Bayat ti Gubat Sangalubongan II, pimmanaw dagiti nagannakko idiay Estonia. Napanda idiay Germany ket idiayak a nayanak. Kalpasanna, nagsaganada nga umakar idiay Canada. Ti immuna a balaymi ket asideg iti Ottawa, Canada. Kaabay dayta ti pagtaraknan iti manok. Nakapobpobrekami, ngem uray kaskasano, kanayon nga adda itlog a pamigatmi.

Maysa nga aldaw, imbasa dagiti Saksi ni Jehova ken ni Nanang ti Apocalipsis 21:3, 4. Natukay unay ti riknana iti naammuanna nga uray la nakasangit. Nagtubo ti bukel ti kinapudno iti puso dagiti nagannakko, ket nagpartak ti panagrang-ayda ken nagpabautisarda.

Saan unay a makasao iti Ingles dagiti nagannakko, ngem impapusoda ti kinapudno. Uray agpatnag idi nga agtrabaho ni Tatang iti paktoria a pagtunawan iti nickel idiay Sudbury, Ontario, dandani sinabado nga itugotnakami ken adingko a Sylvia iti pangasabaan. Linawas met nga inadalmi Ti Pagwanawanan kas sangapamiliaan. Immula da Nanang ken Tatang kaniak ti panagayat iti Dios. Gapu iti dayta, indedikarko ti biagko ken Jehova idi 1956 iti edad a 10. Ti nauneg a panagayatda ken Jehova ti nangpabileg kaniak iti intero a biagko.

Kalpasan a naggraduarak iti hayskul, saanak unayen a nakapagpokus nga agserbi ken Jehova. Panagkunak idi a no agpayunirak, saanak a pulos a makaurnong iti umdas a kuarta tapno matungpal ti arapaapko nga ageroplano ken agpasiar iti intero a lubong. Nakabirokak iti trabaho kas DJ (disc jockey) iti maysa nga estasion ti radio iti lugarmi. Pagay-ayatko dayta a trabaho. Ngem rabii ti trabahok isu a kanayon a malanganak dagiti gimong ken dagiti saan a Saksi ti makadkaduak. Idi agangay, gapu iti diktar ti konsiensiak a sinanay ti Biblia, adda dagiti binalbaliwak iti biagko.

Immakarak iti Oshawa, Ontario. Sadiay a naam-ammok ni Ray Norman, ti adingna a ni Lesli, ken ti dadduma a payunir. Nabara ti panangabrasada kaniak. Nakitak a naragsakda isu nga inusigko manen dagiti kalatko. Pinaregtadak nga agpayunir isu a kasta ti inaramidko idi Septiembre 1966. Nakaragragsakak idi ken kasla nagsayaaten ti biagko. Ngem adda gayam dagiti sorpresa nga agur-uray kaniak a mangbalbaliw iti biagko.

Idi addaak pay laeng iti hayskul, nagaplayak iti Bethel iti Toronto, Canada. Idi agpaypayunirakon, naawisak nga agserbi iti uppat a tawen iti Bethel.  Ngem kursonadak unay ni Lesli. Mabutengak a no akseptarek ti awis, saankon a pulos a makita isuna. Kalpasan dagiti napaut ken napasnek a panagkararagko, inakseptarko met laeng ti awis ti Bethel ngem naladingitak a nagpakada ken Lesli.

Iti Bethel, nagtrabahoak iti laundry ken idi agangay kas maysa a secretary. Kabayatanna, nagbalin ni Lesli nga special pioneer iti Gatineau, Quebec. Masansan idi a pampanunotek no komusta ngatan ni Lesli ken no umiso met la ngata ti inaramidko a desision. Pagammuan ta dimteng ti maysa kadagiti kararagsakan a sorpresa iti biagko. Ti manong ni Lesli a ni Ray ket naawis nga agserbi iti Bethel. Nagbalinkami pay ketdi nga agkakuarto! Gapu iti dayta, nakikomunikarak manen ken Lesli. Nagkasarkami iti maudi nga aldaw ti uppat a tawen a panagserbik iti Bethel—idi Pebrero 27, 1971.

Naibaonkami ken Lesli nga agserbi iti maysa a kongregasion idiay Quebec a French ti lengguahena. Kalpasan ti sumagmamano a tawen, nasorpresaak ta naawisak nga agserbi kas manangaywan iti sirkito iti edad a 28. Panagriknak idi, ubingak unay ken saanko a kaya ti agbalin a kasta. Ngem naparegtaak iti kuna ti Jeremias 1:7, 8. Ni Lesli ket namin-adun a naaksidente iti lugan ken marigatan a maturog. Impagarupmi idi a marigatankami unay iti trabaho iti sirkito. Ngem imbaga ni Lesli, “No adda iyawis kadata ni Jehova, saan kadi a masapul a padasenta dayta?” Inawatmi ti asaynmentmi ket natagiragsakmi ti trabaho a panagdaliasat iti 17 a tawen.

Kas manangaywan iti sirkito, nagadu ti trabahok isu nga awan unay orasko para ken Lesli. Adda sabali pay a masapul a sursuruek. Naminsan, iti agsapa ti Lunes, adda nag-doorbell. Awan ti tao. Ngem adda laeng basket nga adda kargana nga ap-ap, prutas, keso, tinapay, sangabotelia nga arak, baso, ken surat a saan a naikabil no asino ti naggapuanna. Kastoy ti mabasa iti surat, “Agpiknikkayo ken baketmo.” Naariwanas ken nagpintas daydi nga aldaw. Ngem inlawlawagko ken Lesli nga adda dagiti palawag a masapul nga isaganak isu a saankami a makapan. Naawatanna met ngem medio nalidayan. Idi rugiakon ti agsagana, makonkonsiensiaak metten. Nalagipko ti Efeso 5:25, 28 nga iparparegta ni Jehova nga ipaayko dagiti emosional a kasapulan ni baketko. Kalpasan a nagkararagak, imbagak ken Lesli, “Intan,” isu a naragsakan. Napankami iti nagpintas a lugar iti abay ti karayan ken nagaplagkami. Maysa dayta kadagiti kararagsakan nga aldaw a panagkaduami! Naisaganak met latta dagiti palawagko.

Nakaragragsakkami ken adu a sirkito ti nagserbianmi, manipud British Columbia agingga iti Newfoundland. Matungtungpal idin ti arapaapko nga agbiahe iti sabali a lugar. Napampanunotko ti Gilead School ngem diak kayat ti agmisionero iti sabali a pagilian. Panagkunak, espesial a tattao dagiti misionero, ken nariknak a saanak a kualipikado. Mabutengak met ta baka ibaondakami iti maysa a pagilian iti Africa nga adda agwarwaras a sakit ken gubat. Naragsakak idin iti pagserserbianmi.

Idi 1992, makapangasabatayo manen kadagiti pagilian a dati a paset ti Soviet Union. Nakiddaw no kayatmi ti mapan idiay Estonia tapno agserbi kas misionero. Dimi ninamnama ngem inkararagmi ti maipapan iti dayta. Napanunotmi manen, ‘No adda iyawis kadata ni Jehova, saan kadi a masapul a padasenta dayta?’ Isu nga inawatmi, ken napanunotko, ‘Saan met ketdi nga idiay Africa ti papananmi.’

Dagus a rinugianmi ti nagsursuro iti Estonian. Kalpasan ti sumagmamano a bulan a kaaddami iti pagilian, naawiskami nga agserbi iti sirkito. Bisitaenmi ti 46 a kongregasion ken grupo iti Estonia, Latvia, ken Lithuania a pakairamanan ti Kaliningrad, Russia. Masapul ngarud nga agsursurokami iti Latvian, Lithuanian, ken Russian. Nakarigrigat. Ngem naparegta dagiti kakabsat iti panagreggetmi nga agsursuro iti lengguaheda isu a tinulongandakami. Idi 1999, naipasdek ti sanga nga opisina iti Estonia. Karamanak kadagiti naapointaran kas miembro ti komite ti sangay a kaduak da Toomas Edur, Lembit Reile, ken Tommi Kauko.

Adu ti naam-ammomi a kakabsat a naideporta idi idiay Siberia. Uray no naparparigatda iti pagbaludan ken naisinada iti pamiliada, saanda a pulos a nagimula iti sakit ti nakem. Nagtalinaedda a naragsak ken naregta iti ministerio. Nakatulong ti ulidanda tapno makapagibturkami ken naragsakkami latta uray narigat ti kasasaad.

Bayat ti panaglabas dagiti tawen, nagtrabahokami a naimbag ken Lesli. Manmano dagiti aldaw nga aginanakami isu a nangrugi a narikna ni Lesli ti sobra a pannakabannog. Saanmi a dagus a naammuan a ti pannakabannogna ket sintomas gayam ti fibromyalgia. Pampanunotenmi idin ti agawid idiay Canada. Idi naawiskami iti branch school idiay Patterson, New York, U.S.A., panagriknak, saankami a makapageskuela. Ngem kalpasan dagiti napasnek a panagkarkararagmi, inawatmi dayta nga awis. Binendisionan ni Jehova ti desisionmi. Bayat ti panageskuelami, naammuan ti sakit ni Lesli ket naasikaso a naimbag dayta. Isu a nakapagsublikami kadagiti gagangay nga aktibidadmi.

Nagsublikamin idiay Estonia. Maysa a rabii idi 2008, adda immawag kaniak manipud iti sangalubongan a hedkuarter. Dinamagda no kayatmi ti umakar idiay Congo. Naklaatak, nangruna ta kasapulandan ti sungbatko kabigatanna. Idi damo, saanko nga imbagbaga ken Lesli ta ammok a saanto la ketdi a makaturog iti dayta a rabii. Ngem siak met idin ti saan a makaturog gapu iti kakakararagko maipapan kadagiti pagdandanagak no bilang mapankami idiay Africa.

Kabigatanna, idi imbagak dayta ken Lesli, napanunotmi: “Aw-awisennata ni Jehova a mapan idiay Africa. Kasanota nga ammo a saanta a kaya wenno ma-enjoy no saanta a padasen?” Isu a kalpasan ti 16 a tawen a kaaddami idiay Estonia, nageroplanokami a nagpa-Kinshasa, Congo. Nagpintas ken nakataltalna ti Bethel sadiay. Ti maysa kadagiti umuna nga inkabil ni Lesli iti kuartomi ket ti kard nga induldulinna  sipud pay idi pimmanawkami idiay Canada. Naisurat iti dayta dagiti sasao nga, “Agsabongka iti nakaimulaam.” Idi naam-ammomin dagiti kakabsat sa naaddaankami kadagiti iyad-adalan iti Biblia ken maragragsakankami iti kinamisioneromi, nanayonan ti rag-omi iti panagserbimi ken Jehova. Idi agangay, naaddaankami iti pribilehio a mangbisita kadagiti sanga nga opisina iti 13 a pagilian ti Africa. Gapu iti dayta, nakitami ti nagduduma a kultura ken adu dagiti naam-ammomi. Napukaw met laengen dagiti pagdandanagak maipapan iti Africa. Agyamyamankami ken Jehova ta imbaonnakami nga agserbi sadiay.

Idiay Congo, indasarandakami iti nagduduma a makan, kas kadagiti insekto. Panagkunak idi, dimi mairusok a kanen dagita. Ngem idi nakitami nga im-imasen dagiti kakabsat ti mangan, rinamananmi met ket nagustuanmi.

Iti daya ti pagilian, adu ti gerilia a mangraut kadagiti barrio ken mangdangran kadagiti babbai ken ubbing. Napankami sadiay tapno paregtaenmi dagiti kakabsat ken itulodan ida iti ayuda. Marigrigat ti kaaduan a kakabsat. Ngem napabilegkami ta naraniag ti namnamada iti panagungar, ay-ayatenda ni Jehova, ken matalekda iti organisasionna. Nakatulong ti ulidanda tapno lalo a patibkerenmi ti pammatimi iti Dios ken ti determinasionmi nga agserbi kenkuana. Nadadael ti balbalay ken natakaw ti apit ti dadduma a kakabsat. Dayta ti nangipalagip kaniak a nalaka la a mapukaw dagiti material a banag ken ti talaga a kapatgan ket ti relasiontayo ken Jehova. Uray kadagiti karirigatan a situasion, saan a managreklamo dagiti kakabsat. Gapu iti ulidanda, napabilegkami a mangibtur kadagiti problema ken sakitmi.

Adda manen sabali a sorpresa. Nakiddaw nga umakarkami iti sangay iti Hong Kong. Dimi man la pulos napanunot nga agyankami iti Asia! Ngem kalpasan a nariknami ti naayat a tulong ni Jehova iti amin a dadduma pay nga asaynmentmi, inawatmi ti awis. Idi 2013, nakaluakami a nagpakada kadagiti ipatpategmi a gagayyem ken iti nagpintas nga Africa a saanmi nga ammo no ania ti sumaruno a mapasamak.

 Naikawakami iti Hong Kong ta nagadu ti tao a naggapu iti nagduduma a paset ti lubong. Narigat a sursuruen ti lengguahe a Cantonese. Ngem sibabara a pinasangbaydakami dagiti kakabsat, ken talaga a nagustuanmi dagiti makan sadiay. Nagbiit a rimmang-ay ti trabaho, ngem nagbiit met a ngimmina dagiti lote ken pasdek. Isu a nainsiriban a nagdesision ti Bagi a Manarawidwid a mangilako iti kaaduan a sanikua ti sangay. Di nagbayag, idi 2015, nayakarkami ditoy South Korea a pagserserbianmi agingga ita. Masapul a sursuruenmi ti sabali a narigat a lengguahe, ngem uray no saankami pay a nalaing nga agsao iti Korean, maparparegtakami kadagiti kakabsat ta ibagbagada a sumaysayaat ti panagsaomi iti Korean.

Saan a kanayon a nalaka ti makigayyem, ngem nakitami a nalaklakami a maam-ammo dagiti kakabsat no dakami ti umuna a mangawis kadakuada. Nakitami nga ad-adu ti pagpapadaan dagiti kakabsat ngem iti nagdudumaanda. Nakaskasdaaw met ta pinarsuanatayo ni Jehova a manglukat iti pusotayo tapno ayatentayo ti nagadu a gagayyem.—2 Cor. 6:11.

Nakitami a masapul nga awatenmi dagiti tattao a kas iti panangawat ni Jehova kadakuada ken agbirok kadagiti pagilasinan nga ay-ayatennakami ni Jehova ken idaldalanna ti biagmi. Kada maupaykami wenno no pampanunotenmi no adda kadi met laeng mangipatpateg kadakami, basaenmi manen dagiti makaparegta a kard wenno surat manipud kadagiti gagayyem. Talaga a nariknami a sinungbatan ni Jehova dagiti kararagmi, isu a masiguradomi nga ay-ayatennakami ken pabpabilgennakami nga agtultuloy nga agserbi.

Iti panaglabas dagiti tawen, nasursuromi ken Lesli a napateg nga adda orasmi iti maysa ken maysa, kasanoman kaadu ti ar-aramidenmi. Nasursuromi met a katawaan dagiti kamalimi, nangruna no agsursurokami iti baro a lengguahe. Ken kada rabii, mangpanunotkami iti makaparagsak a banag a pagyamananmi ken Jehova.

Aminek nga idi damo, panagriknak ket saanko a kaya ti agmisionero wenno agnaed iti sabali a pagilian. Ngem siraragsak a nasursurok nga amin a banag ket posible iti tulong ni Jehova. Nalagipko ti imbaga idi ni propeta Jeremias: ‘Sabali idi ti pampanunotek, O Jehova.’ (Jer. 20:7) Wen, nakaawatkami iti adu a makaparagsak a sorpresa ken bendision a dimi pulos ninamnama. Natungpal pay ketdi ti arapaapko nga aglugan iti eroplano. Ad-adu a lugar ti napananmi ngem kadagiti inarapaapko a pakadanonak idi ubingak. Adu a sangay ti binisitami iti lima a kontinente. Agyamyamanak met ken Lesli ta situtulok a sinuportarannak iti amin a nagduduma nga annongek.

Kanayon a laglagipenmi nga ar-aramidenmi ti amin gapu ta ay-ayatenmi ni Jehova. Dagiti bendision a tagtagiragsakenmi ita ket pangramanan laeng iti biag nga agnanayon inton ukraden ni Jehova ti imana ken ‘pennekenna ti tarigagay ti tunggal sibibiag a banag.’—Sal. 145:16.