1. Ania ti masapul nga aramidentayo tapno maisalakantayo iti aldaw ni Jehova?

 NO DAKAMATEN ti Biblia ti maipapan iti “aldaw ni Jehova,” tukoyenna ti tiempo nga ukomen ni Jehova dagiti kabusorna ken isalakanna ti ilina. Iti napalabas, adda dagiti nasion a dinusa ni Jehova. (Isa. 13:1, 6; Ezek. 13:5; Sof. 1:8) Iti kaaldawantayo, mangrugi ti “aldaw ni Jehova” inton maraut ti Babilonia a Dakkel ken agngudo iti gubat ti Armagedon. Tapno maisalakantayo iti dayta nga “aldaw,” masapul nga agsaganatayo itan. Insuro ni Jesus a masapul a ditay laeng saganaan ti “dakkel a rigat” no di ket “kanayon a nakasagana[tayo] met” para iti dayta.—Mat. 24:21; Luc. 12:40.

2. Apay a makatulong kadatayo ti 1 Tesalonica?

² Iti umuna a surat ni apostol Pablo kadagiti taga-Tesalonica, nagusar kadagiti ilustrasion a tumulong kadagiti Kristiano tapno kanayonda a nakasagana para iti dakkel nga aldaw ti panangukom ni Jehova. Ammo ni Pablo a saan a dumteng ti aldaw ni Jehova iti daydi a tiempo. (2 Tes. 2:1-3) Ngem pinaregtana latta dagiti kakabsat a saganaanda dayta nga aldaw a kas man la dumteng dayta kabigatanna. Adda met masursurotayo iti balakadna. Kitaentayo ti panangilawlawagna maipapan kadagitoy: (1) no kasano a dumteng ti aldaw ni Jehova, (2) no siasino dagiti saan a maisalakan iti dayta nga aldaw, ken (3) no kasanotayo a makapagsagana tapno maisalakantayo.

3. Kasano a dumteng ti aldaw ni Jehova kas iti mannanakaw iti rabii? (Kitaen met ti ladawan.)

³ “Kas iti mannanakaw iti rabii.” (1 Tes. 5:2) Daytoy ti umuna iti tallo nga ilustrasion a mangiladawan iti iyaay ti aldaw ni Jehova. Masansan nga iti rabii a saan nga ekspektaren dagiti biktima ti iyaay dagiti mannanakaw ken alisto nga ibanagda ti panggepda. Biglanto met nga umay ti aldaw ni Jehova a pakakigtotan ti kaaduan  a tattao. Mabalin a makigtotto met uray dagiti pudno a Kristiano gapu iti kapartak ti paspasamak. Ngem saan a kas kadagiti managdakdakes, saantayto a madadael.

4. Kasano a ti aldaw ni Jehova ket kas iti panagpasikal ti masikog?

⁴ “Kas iti panagpasikal ti masikog.” (1 Tes. 5:3) Saan nga ammo ti masikog ti eksakto nga oras ti panagpasikalna. Ngem ammona a sigurado a mapasamak dayta. No agpasikalen, biglanto dayta, naut-ot, ken saan a malapdan. Kasta met, ditay ammo ti aldaw ken oras a mangrugi ti aldaw ni Jehova. Ngem siguradotayo nga umay dayta, ken ti panangukom ti Dios kadagiti managdakdakes ket bigla ken saanto a malisian.

5. Kasano a ti dakkel a rigat ket kas no aglawagen?

⁵ Kas no aglawagen. Iti maikatlo nga ilustrasion ni Pablo, dinakamatna manen dagiti mannanakaw iti rabii. Ngem ita, agparang nga impada ni Pablo ti aldaw ni Jehova iti kas no aglawagen. (1 Tes. 5:4) Dagiti mannanakaw iti rabii ket nakapokus iti ar-aramidenda, isu a dida mapupuotan ti panaglabas ti oras. Gapu ta aglawagen, mabiglada ken matiliwanda iti ar-aramidenda. Inton dakkel a rigat, maibulgarto met dagidiay kas kadagiti mannanakaw nga adda iti kasipngetan nga agtultuloy nga agar-aramid kadagiti kagura ti Dios. Ngem naidumatayo kadakuada. Makapagsaganatayo no ditay aramiden dagiti kagura ni Jehova ken aramidentayo ti “amin a kita ti kinasayaat ken kinalinteg ken kinapudno.” (Efe. 5:8-12) Simmaruno nga inusar ni Pablo ti dua nga agkakonektar nga ilustrasion a mangiladawan kadagiti saanto a maisalakan.

6. Iti ania a pamay-an a matmaturog ti kaaduan a tattao? (1 Tesalonica 5:6, 7)

⁶ “Dagidiay maturog.” (Basaen ti 1 Tesalonica 5:6, 7.) Impada ni Pablo dagiti saan a maisalakan iti aldaw ni Jehova kadagiti tattao a  matmaturog. Saanda nga ammo ti mapaspasamak iti aglawlawda wenno ti panaglabas ti oras. Dida maawatan dagiti napateg a mapaspasamak isu nga awan ti reaksionda. Kaaduan a tattao ita ket matmaturog iti naespirituan. (Roma 11:8) Saanda a makitkita dagiti ebidensia nga agbibiagtayon iti “maudi nga al-aldaw” ken asidegen ti dakkel a rigat. Gapu kadagiti dadakkel a panagbalbaliw iti lubong, mabalin a mariing ti dadduma a matmaturog iti naespirituan ken medio aginteresda iti mensahe ti Pagarian. Ngem adu ti maturogto met laeng imbes nga agtultuloyda a siririing. Adda met dagiti mamati iti aldaw ti panangukom. Ngem para kadakuada, adayo pay dayta. (2 Ped. 3:3, 4) Nupay kasta, ammotayo a mas kasapulantayo ti agtalinaed a siririing bayat ti panaglabas ti tunggal aldaw.

7. Kasano a dagidiay dadaelento ti Dios ket kas kadagiti nabartek a tattao?

⁷ “Dagidiay agbartek.” Dagiti dadaelento ti Dios ket impada ni apostol Pablo kadagiti mammartek. Dagiti nakainum ket nabuntog ti reaksionda kadagiti mapaspasamak iti aglawlawda isu a dida makapagdesision a naimbag. Kasta met laeng dagiti managdakdakes. Dida ipangpangag dagiti pakdaar ti Dios. Pilpilienda ti biag nga agturong iti pannakadadael. Ngem naibaga kadagiti Kristiano nga agtalinaedda a sipupuot ken agparbengda. (1 Tes. 5:6) Sigun iti maysa nga eskolar ti Biblia, ti panagparbeng ket ti “kinakalmado ken kinasimbeng ti panunot a mangtimbeng ken mangtingiting a naimbag kadagiti bambanag tapno makaaramidtayo kadagiti umiso a pangngeddeng.” Apay a masapul nga agtalinaedtayo a kalmado ken kanayon a nasimbeng ti panunottayo? Tapno saantayo a maimpluensiaan kadagiti isyu ita maipapan iti politika wenno kagimongan. Kumaronto ti pannakapilittayo a dumasig kadagita nga isyu bayat nga umas-asideg ti aldaw ni Jehova. Ngem masapul a ditay agdanag no anianto ti aramidentayo. Matulongannatayo ti espiritu ti Dios nga agbalin a kalmado ken nasimbeng tapno makaaramidtayo kadagiti nainsiriban a desision.—Luc. 12:11, 12.

8. Iti 1 Tesalonica 5:8, kadagiti ania a naipada dagiti kualidad a makatulong tapno agtalinaedtayo a siririing ken sipupuot? (Kitaen met ti ladawan.)

⁸ “Isuottayo ti proteksion ti barukong . . . ken . . . helmet.” Impadanatayo ni Pablo kadagiti soldado nga alerto ken nakarubuaten a makigubat. (Basaen ti 1 Tesalonica 5:8.) Manamnama a nakasagana a makigubat ti maysa a soldado iti aniaman nga oras. Kastatayo met. Kanayon a nakasaganatayo para iti aldaw ni Jehova babaen ti panangisuottayo iti pammati ken ayat a kas proteksion ti barukong ken iti namnama a kas iti helmet. Dakkel ti maitulong kadatayo dagita a kualidad.

9. Kasano a protektarannatayo ti pammatitayo?

⁹ Ti proteksion ti barukong salaknibanna ti puso ti maysa a soldado. Protektaran met ti pammati ken ayat ti simboliko a pusotayo. Tulongandatayo tapno maitultuloytayo ti agserbi iti Dios ken mangsurot ken Jesus. No adda pammatitayo, sigurado a gunggonaannatayo ni Jehova no sapulentayo isuna iti amin a pusotayo. (Heb. 11:6) Gapu iti pammati, napudnotayo latta iti Lidertayo a ni Jesus uray no masapul nga ibturantayo dagiti rigat. Mapatibkertayo ti pammatitayo a mangsango kadagiti problema iti biag no tuladentayo ti ulidan dagiti kakabsat ita a matalek latta uray no maidaddadanes wenno narigat ti panagbiagda. Maliklikantayo met ti agbalin a materialistiko no tuladentayo dagidiay pinasimpleda ti biagda tapno mayun-unada dagiti interes ti Pagarian. b

10. Kasano a ti ayattayo iti Dios ken iti kaarrubatayo matulongannatayo nga agibtur?

¹⁰ Napateg met ti ayat tapno agtalinaedtayo a siririing ken sipupuot. (Mat. 22:37-39) Ay-ayatentayo ti Dios isu nga itultuloytayo ti mangasaba  uray no makapasartayo iti rigat. (2 Tim. 1:7, 8) Gapu ta ay-ayatentayo met uray dagiti ditay kapammatian, itultuloytayo ti mangasaba ken itultuloytayo a trabahuen ti teritoriatayo. Mangasabatayo pay ketdi babaen ti telepono, selpon, ken surat. Ditay maawanan iti namnama nga addanto aldaw nga agbalbaliw dagiti kaarrubatayo ken rugianda metten nga aramiden ti umiso.—Ezek. 18:27, 28.

11. Kasano a makatulong kadatayo ti panangayat kadagiti kakabsat? (1 Tesalonica 5:11)

¹¹ Ti ayattayo iti kaarruba ramanenna dagiti padatayo a Kristiano. Ipakpakitatayo ti kasta nga ayat no ‘agpipinnaregta ken agpipinnabilegtayo.’ (Basaen ti 1 Tesalonica 5:11.) Kas kadagiti soldado nga agtitinnulong iti paggugubatan, agpipinnaregtatayo. Siempre, no nabara ti panaglalaban, baka aksidente a masaktan ti maysa a soldado ti padana a soldado. Ngem dina pulos igagara dayta. Saantayo met a pulos nga igagara a saktan wenno balsen dagiti kakabsat. (1 Tes. 5:13, 15) Maipakitatayo met ti ayattayo no raementayo dagiti kakabsat a lallaki a mangidadaulo iti kongregasion. (1 Tes. 5:12) Idi insurat daytoy ni Pablo, awan pay makatawen ti kongregasion idiay Tesalonica. Posible a bassit pay ti kapadasan dagiti nadutokan a lallaki sadiay ken mabalin a nakaaramidda met kadagiti kamali. Ngem maikarida latta iti panagraem. Bayat nga umas-asideg ti dakkel a rigat, baka masapul nga ad-addanto nga agpannuraytayo iti panangiwanwan dagiti panglakayen iti kongregasiontayo ngem iti ar-aramidentayo ita. Mabalin a saanto a makadanon kadatayo dagiti instruksion manipud iti sangalubongan a hedkuarter ken iti sanga nga opisina. Isu nga ita pay laeng, napateg a sursuruentayon nga ayaten ken raemen dagiti panglakayentayo. Aniaman ti mapasamak, agtalinaedtayo koma a sipupuot. Saan a dagiti pagkapuyanda ti kitkitaentayo, no di ket panunotentayo a ni Jehova babaen ken Kristo ti mangidaldalan kadagitoy a matalek a kakabsat.

12. Kasano a ti namnamatayo protektaranna ti panagpampanunottayo?

¹² No kasano a ti helmet protektaranna ti ulo ti maysa a soldado, ti namnama a maisalakantayto protektaranna ti panagpampanunottayo. No naraniag ti namnamatayo, maawatantayo nga awan  serserbi dagiti ituktukon daytoy a lubong. (Fil. 3:8) Matulongannatayo ti namnamatayo nga agtalinaed a kalmado ken nasimbeng ti panunottayo. Napaneknekan dayta da Wallace ken Laurinda nga agserserbi idiay Africa. Iti uneg ti tallo a lawas, agpadada a natayan iti nagannak. Gapu iti COVID-19 pandemic, dida nakaawid tapno maliwliwa ken mapabilegda dagiti kapamiliada. Insurat ni Wallace: “Gapu iti namnama a panagungar, saan a dagiti naudi nga aldawda iti daytoy a lubong ti pampanunotek no di ket dagiti umunanto nga aldawda idiay baro a lubong. Gapu iti dayta a namnama, lumag-an ti riknak no umapay ni liday wenno no kailiwko ida.”

13. Ania ti aramidentayo tapno maawattayo ti nasantuan nga espiritu?

¹³ “Diyo iddepen ti apuy ti espiritu.” (1 Tes. 5:19) Ti nasantuan nga espiritu ket impada ni Pablo iti apuy iti unegtayo. No adda kadatayo ti espiritu ti Dios, umap-apuy ti regta ken gagartayo a mangaramid iti umiso ken porsegidotayo nga agtrabaho para ken Jehova. (Roma 12:11) Ania ti aramidentayo tapno maawattayo ti nasantuan nga espiritu? Ikararagtayo dayta, adalentayo ti impaisurat ti Dios a Saona, ken agbalintayo a paset ti organisasion nga iturturong ti espirituna. Iti kasta, kanayon a maipakitatayo dagiti aspeto “ti bunga ti espiritu.”—Gal. 5:22, 23.

14. Ania ti masapul a liklikantayo tapno agtultuloy a maawattayo ti espiritu ti Dios? (Kitaen met ti ladawan.)

¹⁴ No adda kadatayon ti nasantuan nga espiritu ti Dios, masapul nga agannadtayo a ‘ditay maiddep ti apuy ti espiritu.’ Ipaay laeng ti Dios ti espirituna kadagidiay kanayon a nadalus ti panagpampanunot ken ar-aramidenda. Isardengna nga ipaay kadatayo ti espirituna no sangkapanunottayo dagiti narugit nga aramid ken no aramidentayo dagita. (1 Tes. 4:7, 8) Tapno agtultuloy a maawattayo ti nasantuan nga espiritu, masapul met a ‘ditay laisen dagiti padto.’ (1 Tes. 5:20) “Dagiti padto” a matuktukoy ditoy ket dagiti mensahe nga ipapaay ti Dios babaen ti espirituna a pakairamanan dagiti padto maipapan iti aldaw ni Jehova ken iti kinaababa ti tiempo a pagbibiagantayo. Ditay liplipatan dayta nga aldaw. Ditay ipapan a saan a dumteng ti Armagedon bayat a sibibiagtayo. Imbes ketdi, mapapartaktayo dayta no sangkapanunottayo. Kasano?  Kanayon nga aramidentayo ti umiso ken kanayon nga adu ti aramidentayo a ‘mangipakita iti debosiontayo iti Dios’ iti kada aldaw.—2 Ped. 3:11, 12.

15. Ania dagiti aramidentayo tapno saantayo a maallilaw kadagiti di umiso nga impormasion ken kadagiti propaganda dagiti demonio? (1 Tesalonica 5:21)

¹⁵ Dandanin ideklara dagiti bumusbusor iti Dios: “Talna ken talged!” (1 Tes. 5:3) Agsaknapto ditoy daga dagiti propaganda a naggapu kadagiti demonio a mangallilaw iti kaaduan a tattao. (Apoc. 16:13, 14) Datayo ngay? Saantayto a maallilaw no ‘siguraduentayo [wenno, “testingentayo”] ti amin a banag.’ (Basaen ti 1 Tesalonica 5:21; kitaen dagiti study note.) Ti Griego a sao a naipatarus kas “siguraduen” ket adda koneksionna iti pamay-an dagiti tattao a mangtesting kadagiti nangina a metal. Masapul ngarud nga arigna testingentayo dagiti mangmangngeg wenno mabasbasatayo tapno masiguradotayo no agpayso met laeng dagita. Dayta idi ti masapul nga aramiden dagiti taga-Tesalonica, ken lallalo pay a masapul nga aramidentayo dayta bayat nga umas-asidegen ti dakkel a rigat. Ditay mamati lattan iti ibagbaga ti dadduma. Usarentayo ti abilidadtayo nga agpanunot a mangikompara kadagiti mabasbasa wenno mangmangngegtayo iti ibagbaga ti Biblia ken ti organisasion ni Jehova. Iti kasta, ditayto maallilaw kadagiti propaganda wenno panangloko dagiti demonio.—Prov. 14:15; 1 Tim. 4:1.

16. Ania ti sigurado a namnamatayo, ken ania ti masapul nga aramidentayo?

¹⁶ Maisalakanto iti dakkel a rigat dagiti agserserbi iti Dios kas maysa a grupo. Ngem kas indibidual, ditay ammo ti mapasamak inton bigat. (Sant. 4:14) Ngem makalasattayo man iti dakkel a rigat wenno mataytayo sakbay dayta, magunggonaantayto iti biag nga agnanayon no agtalinaedtayo a matalek. Ni Kristo ket makaduanto dagiti dinutokan ti espiritu idiay langit. Ti met sabsabali a karnero ket agbiag iti paraiso a daga. Sapay koma ta ipamaysatayo ti panunottayo iti nagsayaat a namnamatayo ken kanayon a nakasaganatayo para iti aldaw ni Jehova!