1. Sigun iti 1 Pedro 5:2, ania a pribilehio ti naited kadagiti panglakayen?

 NAITALEK kadagiti Kristiano a panglakayen ti panangaywan kadagiti karnero nga ipatpateg ni Jehova. Ap-apresiaren dagitoy a napasnek a lallaki ti pribilehioda nga agserbi kadagiti kakabsat. Ar-aramidenda met ti amin a kabaelanda nga agbalin a ‘pastor a talaga a mangipastor.’ (Jer. 23:4; basaen ti 1 Pedro 5:2.) Agyamyamantayo unay kadagiti kasta a lallaki iti kongregasiontayo!

2. Ania dagiti pannubok a mapaspasaran ti dadduma a panglakayen?

² Bayat nga ar-aramiden dagiti panglakayen dagiti responsabilidadda, maipasangoda iti adu a karit. Adu a trabaho ti masapul nga aramidenda tapno maaywananda ti kongregasion. Ni Tony a maysa a panglakayen idiay United States nasursurona a masapul nga agbalin a naem-emma no maipapan iti kaadu ti annongen nga awatenna. Inlawlawagna: “Idi rugrugi ti COVID-19 pandemic, nagadu ti ar-aramidek tapno maorganisar dagiti gimong ken ti ministerio. Ngem uray no nagadu ti ar-aramidek, kasla saan met a maib-ibus dagita. Idi agangay, kurangen ti tiempok para iti panagbasa iti Biblia, personal a panagadal, ken panagkararag.” Sabali met a karit ti nakaipasanguan ni Ilir a panglakayen idiay Kosovo. Bayat nga adda iti lugar a pakapaspasamakan ti gubat, narigatan a mangsurot kadagiti instruksion ti organisasion. Kunana: “Nasubok ti kinaturedko idi kiniddaw ti sanga nga opisina a tumulongak kadagiti kakabsat iti delikado a lugar. Mabutengak idi ken kasla saan a praktikal ti instruksion.” Ni met Tim a maysa a misionero iti Asia ket marigatan a mangaramid kadagiti annongenna iti inaldaw. Kunana: “No dadduma, nabannogak unayen isu a marigatanak a mangasikaso kadagiti kakabsat.” Ania ti makatulong kadagiti panglakayen a maipaspasango kadagiti kasta a karit?

3. Kasano a makatulong kadatayo amin ti panangusig iti ulidan ni Ukom Gideon?

 ³ Adda masursuro dagiti panglakayen iti ulidan ni Ukom Gideon. (Heb. 6:12; 11:32) Prinotektaran ken impastoranna ti ili ti Dios. (Uk. 2:16; 1 Cron. 17:6) Kas ken Gideon, naapointaran dagiti panglakayen a mangaywan iti ili ti Dios kadagitoy a nakarigrigat a tiempo. (Ara. 20:28; 2 Tim. 3:1) Makasursurotayo iti kinaemma, kinapakumbaba, ken kinatulnog ni Gideon. Nasubok ti panagibturna bayat nga itungtungpalna dagiti annongenna. Panglakayentayo man wenno saan, mapaunegtayo ti apresasiontayo kadagiti panglakayentayo. Mabalintayo a suportaran dagitoy a nagagaget a kakabsat a mangay-aywan kadatayo iti kongregasion.—Heb. 13:17.

4. Kasano nga impakita ni Gideon ti kinaemma ken kinapakumbaba?

⁴ Ni Gideon ket naemma ken napakumbaba. b Idi imbaga ti anghel ni Jehova ken Gideon nga isu ti napili a mangisalakan iti Israel manipud kadagiti nabileg a Midianita, insungbat dayta a napakumbaba a lalaki: “Ti pamiliak ti kanunumuan iti Manases, ket siak ti kanunumuan iti balay ni amak.” (Uk. 6:15) Nariknana a saan a kualipikado iti dayta nga annongen. Ngem ammo ni Jehova a kabaelanna nga aramiden dayta. Iti tulong ni Jehova, nagballigi ni Gideon iti annongenna.

5. Kasano a mabalin a masubok ti kinaemma ken kinapakumbaba ti maysa a panglakayen?

⁵ Ar-aramiden dagiti panglakayen ti amin a kabaelanda a mangipakita iti kinaemma ken kinapakumbaba iti amin a banag. (Mik. 6:8; Ara. 20:18, 19) Dida ipampannakkel dagiti abilidad wenno naaramidanda. Dida met panunoten nga awan serserbida gapu laeng ta adda dagiti pagkamkamalianda. Ngem mabalin a masubok ti maysa a panglakayen. Kas pagarigan, baka adu ti awatenna nga asaynment ngem marigatan met a mangaramid amin kadagita. Wenno baka adda mangdillaw iti pamay-anna a mangitungpal iti asaynmentna wenno mapadpadayawan iti pamay-anna a mangitungpal iti sabali nga asaynmentna. Ania ti masursuro dagiti panglakayen ken Gideon a makatulong kadakuada kadagiti kasta a situasion?

6. Ania ti masursuro dagiti panglakayen maipapan iti kinaemma ni Gideon? (Kitaen met ti ladawan.)

⁶ Agpatulong. Ammo ti naemma dagiti limitasionna. Naemma ni Gideon ta situtulok a  nagpatulong iti dadduma. (Uk. 6:27, 35; 7:24) Kasta met ti ar-aramiden dagiti masirib a panglakayen. Ilawlawag ti nadakamaten a ni Tony: “Gapu iti pannakapadakkelko, adda tendensiak nga awatak nga awat kadagiti annongen uray no saankon a kaya. Inkeddengko nga iraman ti topiko a kinaemma iti panagdaydayaw ti pamiliami ken dinamagko ken baketko ti opinionna. Binuyak manen iti jw.org ti video a Mangsanay, Agtalek, ken Mangipaay iti Autoridad kas iti Inaramid ni Jesus.” Rinugianen ni Tony ti agpatulong. Ania ti resultana? Imbaga ni Tony: “Maas-asikason a naimbag dagiti bambanag iti kongregasion ken ad-adun ti tiempok a mangpatibker iti espiritualidadko.”

7. Kasano a matulad dagiti panglakayen ni Gideon no makritikarda? (Santiago 3:13)

⁷ Naalumamay no makritikar. Mabalin pay a masubok dagiti panglakayen no makritikarda. Makatulong manen ti ulidan ni Gideon. Sigurado nga ammona dagiti pagkapuyanna isu a naalumamay idi krinitikar dagiti Efraimita. (Uk. 8:1-3) Saan nga agung-unget ni Gideon idi simmungbat. Impakitana ti kinapakumbaba idi dimngeg kadagiti reklamoda, ken sitataktika a nakisarita isu a napagkalmana ti nabara a situasion. Ni Gideon ket matulad dagiti masirib a panglakayen no dumngegda a naimbag ken naalumamayda no makritikarda. (Basaen ti Santiago 3:13.) Iti kasta, makatulongda iti panagtalinaed ti talna iti kongregasion.

8. Ania koma ti reaksion dagiti naapointaran a lallaki no mapadayawanda? Mangted iti pagarigan.

⁸ Iturong ti dayaw ken Jehova. Idi napadayawan ni Gideon gapu iti panangabakna iti Midian, inturongna ti atension ken Jehova. (Uk. 8:22, 23) Kasano a ni Gideon ket matulad dagiti naapointaran a lallaki? Masapul nga iturongda ti pammadayaw ken Jehova iti amin a maaramidanda. (1 Cor. 4:6, 7) Kas pagarigan, no mapadayawan ti maysa a panglakayen gapu iti abilidadna a mangisuro, mabalin nga iti Sao ti Dios a naggapuan ti isursurona ti pangituronganna iti atension wenno iti naawatna a pannakasanay manipud iti organisasion ni Jehova. Baka masapul a panunoten no dadduma dagiti panglakayen no ti pamay-anda a mangisuro ket pakaidayawan ni Jehova wenno ti bagida. Kitaentayo ti kapadasan ti panglakayen a ni Timothy. Idi nabiit pay a naapointaran, magusgustuanna ti agpalawag iti publiko. Imbagana: “Atiddog dagiti introduksionko ken komplikado dagiti ilustrasionko, isu a masansan a siak ti pakaiturongan ti dayaw imbes a ti Biblia wenno ni Jehova.” Idi agangay, nabigbig ni Timothy a masapul a baliwanna ti pamay-anna a mangisuro tapno saan unay nga agpokus kenkuana dagiti dumdumngeg. (Prov. 27:21) Ania ti resultana? Inlawlawagna: “Ibagbaga dagiti kakabsat a nakatulong kadakuada ti palawagko tapno masolbar ti problemada, maibturanda ti suot, wenno suminged ti relasionda ken Jehova. Naragragsakak itan a makangngeg kadagita a komento ngem kadagiti pammadayaw a naawatko kadagiti napalabas a tawen.”

9. Kasano a nasubok ti kinatulnog ken kinatured ni Gideon? (Kitaen ti ladawan iti akkub.)

⁹ Nadutokan ni Gideon nga agbalin nga ukom. Kalpasanna, nasubok ti kinatulnog ken kinaturedna. Nabilin a rakrakenna ti altar ni Baal a kukua ni tatangna. Napeggad dayta! (Uk. 6:25, 26) Idi agangay, nagurnong kadagiti lallaki a mapan makigubat. Ngem namindua a nabilin a kissayanna ti bilangda. (Uk. 7:2-7) Kamaudiananna, naibaga a mapanna rauten ti kampo dagiti kabusor iti tengnga ti rabii.—Uk. 7:9-11.

10. Kasano a mabalin a masubok ti kinatulnog ti maysa a panglakayen?

¹⁰ Dagiti panglakayen ket masapul a “nakasagana nga agtulnog.” (Sant. 3:17) Ti natulnog a panglakayen dagus a surotenna ti ibagbaga ti Kasuratan ken dagiti instruksion ti organisasion  ti Dios. Mapagulidanan ngarud isuna. Ngem mabalin latta a masubok ti kinatulnogna. Kas pagarigan, baka marigatan a mangsurot kadagiti agsasaruno nga instruksion a maawatna. Adda met dagiti situasion a baka pampanunotenna no talaga met la a praktikal wenno nainsiriban ti maysa nga instruksion. Wenno baka maikkan iti annongen a posible a pakaarestuanna. Kadagiti kasta a situasion, kasano a matulad dagiti panglakayen ti kinatulnog ni Gideon?

11. Ania ti makatulong kadagiti panglakayen nga agbalin a natulnog?

¹¹ Dumngeg a naimbag iti instruksion ken iyaplikar dayta. Imbaga ti Dios ken Gideon no kasano a rakrakenna ti altar a kukua ni tatangna, no sadino ti pangibangonanna iti baro nga altar ni Jehova, ken no ania nga animal ti idatonna. Saan a kinuestionaran ni Gideon dayta nga instruksion—inaramidna ti eksakto a naibilin kenkuana. Makaaw-awat ita dagiti panglakayen kadagiti instruksion manipud iti organisasion ni Jehova. Adda dagiti maaw-awatda a surat, pakaammo, ken dadduma pay nga instruksion tapno agtalinaedtayo a natalged ken nasinged ken Jehova. Ay-ayatentayo dagiti panglakayen gapu ta simamatalek a sursurotenda ti panangiwanwan ti Dios ken ti organisasionna. Mabembenepisiaran ti intero a kongregasion.—Sal. 119:112.

12. Kasano a mayaplikar dagiti panglakayen ti Hebreo 13:17 no adda ibaga ti organisasion ni Jehova a masapul a mabalbaliwan?

¹² Situtulok a suportaran dagiti panagbalbaliw. Lagipentayo a gapu iti kiddaw ni Jehova, kinissayan ni Gideon ti armadana iti nasurok a 99 a porsiento. (Uk. 7:8) Baka napanunotna: ‘Talaga kadi a kasapulan dayta a panagbalbaliw? Agballiginto ngata?’ Ngem nagtulnog latta ni Gideon. Tultuladen ita dagiti panglakayen ni Gideon no ipatungpalda dagiti panagbalbaliw nga inrekomenda ti organisasion. (Basaen ti Hebreo 13:17.) Kas pagarigan, idi 2014, binaliwan ti Bagi a Manarawidwid ti pamay-an ti panangpondo iti panagibangon kadagiti Kingdom Hall ken Assembly Hall. (2 Cor. 8:12-14) Ti loan ket saanen a kasapulan a bayadan dagiti kongregasion. Imbes ketdi, agtitinnulongen dagiti kongregasion iti intero a lubong tapno makaibangon kadagiti pasilidad iti sadinoman, uray kadagiti kongregasion a bassit ti maidondonarda. Idi naammuan ni José ti panagbalbaliw, pinagduaduaanna no agballiginto dayta. Napanunotna: ‘Awanto a pulos ti maibangon a Kingdom Hall, uray maysa. Saan nga agaplikar dayta nga urnos iti lugarmi.’ Ania ti nakatulong ken José tapno suportaranna ti instruksion? Imbagana: “Impalagip kaniak ti Proverbio 3:5, 6 nga agtalekak ken Jehova. Ket nagsayaat dagiti resultana! Ad-adun a Kingdom Hall ti maibangbangon ken nasursuromi payen ti agdonar iti nadumaduma a pamay-an tapno adda panagpapada.”

13. (a) Ania ti nakakombinsiran ni Gideon? (b) Kasano a matulad dagiti panglakayen ni Gideon? (Kitaen met ti ladawan.)

¹³ Situtured nga aramiden ti pagayatan ni Jehova. Nagtulnog ni Gideon ken Jehova uray no mabuteng ken napeggad ti annongenna. (Uk. 9: 17) Kalpasan a naawat ni Gideon ti pammasiguro ni Jehova, naan-anay a kombinsido a tulongan ti Dios a mangprotektar iti ili ti Dios. Ni Gideon ket tultuladen dagiti panglakayen nga adda kadagiti lugar a maiparparit ti trabahotayo. Situtured a mangidadauloda kadagiti gimong ken ministerio uray no mabalin a maaresto, maimbestigaran, maawananda iti trabaho, wenno maranggasanda. c Bayat ti dakkel a rigat, masapul nga agbalinto a natured dagiti panglakayen a mangsurot kadagiti instruksion a maawatda—aniaman dagiti peggad a maipasango kadakuada. Dagiti instruksion ket mabalin nga adda koneksionna iti panangipakaammotayo iti arig uraro a mensahe ken kadagiti masapul nga aramidentayo tapno malasatantayo ti iraraut ti Gog iti Magog.—Ezek. 38:18; Apoc. 16:21.

14. Kasano a nasubok ti panagibtur ni Gideon?

¹⁴ Kas maysa nga ukom, adu ti masapul nga aramiden ni Gideon ken makabannog dagita. Idi nagtataray dagiti Midianita kabayatan ti gubat iti rabii, kinamat ida ni Gideon manipud iti Tanap ti Jezreel agingga iti Karayan Jordan, a mabalin a kakaykaywan ti aglawlawna. (Uk. 7:22) Nagsardeng kadi ni Gideon iti Jordan? Saan! Uray nabannog, kaduana ti 300 a soldadona a bimmallasiw iti karayan ken intultuloyda ti kimmamat. Kamaudiananna, nakamatanda dagiti Midianita ket inabakda ida.—Uk. 8:4-12.

15. Kaano a mabalin a masubok ti panagibtur ti maysa a panglakayen?

¹⁵ No dadduma, baka marikna ti maysa a panglakayen a makabannog unay iti pisikal, mental, wenno emosional ti panangasikasona iti kongregasion ken iti pamiliana. Iti kasta a situasion, kasano a matulad dagiti panglakayen ni Gideon?

16-17. Ania ti nakatulong ken Gideon nga agibtur, ken ania ti masigurado dagiti panglakayen? (Isaias 40:28-31) (Kitaen met ti ladawan.)

¹⁶ Agtalek a pabilgennakayo ni Jehova. Nagtalek ni Gideon a pabilgen isuna ni Jehova, ket kasta ti inaramid ni Jehova. (Uk. 6:14, 34) Naminsan, nagtartaray a kinamat ni Gideon ken dagiti kakaduana ti dua nga ari ti Midian a nakakamelio.  (Uk. 8:12, 21) Ngem iti tulong ti Dios, nagballigi dagiti porsegido nga Israelita. Makapagtalek met dagiti panglakayen ken Jehova, daydiay “saan a mabannog wenno kumapuy.” Ikkanna ida iti bileg iti tiempo a kasapulanda dayta.—Basaen ti Isaias 40:28-31.

¹⁷ Kitaentayo ti kapadasan ni Matthew a miembro ti Hospital Liaison Committee. Ania ti tumultulong kenkuana nga agibtur? Imbagana: “Talaga nga agpaypayso ti Filipos 4:13. Namin-adun a napadasak a gapu iti bannog, nariknak a saankon a kaya, isu a sipapasnek a nagkararagak ken impakpakaasik iti Dios a pasiglaten ken pabilgennak tapno matulongak dagiti kakabsat. Kadagidiay a kanito, nariknak a pinabilegnak ti espiritu ni Jehova ken tinulongannak tapno makapagibturak.” Kas ken Gideon, baka adda dagiti lapped a pakaipaspasanguan dagiti nagaget a panglakayen bayat nga agsaksakripisioda a mangipastor iti arban. Siempre, masapul a naemmada ken bigbigenda a saanda a kanayon a maaramid ti kayatda nga aramiden. Ngem makapagtalekda ken Jehova a denggenna dagiti panagpatulongda ken pabilgenna ida nga agibtur.—Sal. 116:1; Fil. 2:13.

18. Kas pangrepaso, kasano a matulad dagiti panglakayen ni Gideon?

¹⁸ Adda dagiti naintiempuan ken praktikal a masursuro dagiti panglakayen ken Gideon. Rumbeng a naemma ken napakumbaba dagiti panglakayen iti kaadu ti trabaho nga awatenda ken iti reaksionda no makritikar wenno mapadayawanda. Masapul a natulnog ken naturedda, aglalo ta asidegen ti panungpalan daytoy a sistema ti bambanag. Ken nasken nga agtalekda nga aniaman a karit ti maipasango kadakuada, pabilgen ida ti Dios. Wen, ap-apresiarentayo dagita a nagaget a papastor ken “itultuloy[tayo] nga ipateg dagiti kasta a kita ti tattao.”—Fil. 2:29.