Saan nga ibaga ti Biblia. Ngem adda dagiti makapainteres a detalye nga ipakaammona a mabalin a nangapektar iti desisionda.

Idi imbaga ti anghel nga agsikog ken aganak ni Maria, agnanaedda ken Jose idiay Nazaret, ti ili idiay Galilea a nakayanakan ni Jose. (Luc. 1:26-31; 2:4) Idi agangay, kalpasan a nagyanda idiay Egipto, nagsublida idiay Nazaret. Sadiay a dimmakkel ni Jesus ken nagbalin a Nazareno. (Mat. 2:19-23) Isu a no madakamat ti Nazaret, mapanunottayo da Jesus, Jose, ken Maria.

Adda kabagian ni Maria a ti naganna ket Elisabet nga agnanaed idiay Juda. Ni Elisabet ti asawa ti padi a ni Zacarias ken ina ni Juan a Mammautisar. (Luc. 1:5, 9, 13, 36) Binisita ni Maria ni Elisabet ken nakipagyan kadakuada idiay Juda iti tallo a bulan. Kalpasanna, nagawid ni Maria idiay Nazaret. (Luc. 1:39, 40, 56) Medio pamiliar ngarud ni Maria iti teritoria ti Juda.

Idi agangay, nagtulnog ni Jose iti bilin a ‘panagparehistro.’ Nagbiahe ngarud ni Jose manipud Nazaret agingga iti Betlehem a “nakayanakan ni David,” wenno siudad ni David, ken naipadto a pakayanakan ti Mesias. (Luc. 2:3, 4; 1 Sam. 17:15; 20:6; Mik. 5:2) Kalpasan nga inyanak ni Maria ni Jesus sadiay, saan a kayat ni Jose a ti agtagtagibi a ni Maria ket agbiahe iti napaut nga agsubli idiay Nazaret. Nagyanda iti Betlehem, nga agarup 9 a kilometro (agarup 6 a milia) manipud Jerusalem. Gapu iti dayta, mas kombiniente kadakuada nga ipan ti anakda iti templo ken mangted iti daton a kalikaguman ti Linteg.—Lev. 12:2, 6-8; Luc. 2:22-24.

Ti anghel ti Dios impakpakaunana ken Maria a ti iyanakna ket agtugawto iti “trono ni David” ken “agturay kas Ari.” Pinampanunot ngata da Jose ken Maria nga adda napateg a rason a nayanak ni Jesus iti siudad ni David? (Luc. 1:32, 33; 2:11, 17) Mabalin a pinanunotda a nainsiriban nga agtalinaedda sadiay ken urayenda ti sumaganad nga ipaaramid kadakuada ti Dios.

Ditay ammo no kasano kabayagdan idiay Betlehem idi adda dagiti astrologo a pimmasiar kadakuada. Ngem iti daydi a tiempo, aggigianen ti pamilia iti maysa a balay, ken ti anakda ket maysan nga “ubing,” saanen a maladaga. (Mat. 2:11) Agparang nga imbes nga agawidda idiay Nazaret, medio nabayag met bassiten nga aggigiandan iti Betlehem.

Imbilin ni Herodes a mapapatay ti “amin nga ubbing a lallaki nga agtawen iti dua nga agpababa” idiay Betlehem. (Mat. 2:16) Ni Jose ket pinakdaaran ti Dios maipapan iti dayta. Nagkamang ngarud idiay Egipto da Jose ken Maria a kaduada ni Jesus ket nagtalinaedda sadiay agingga a natay ni Herodes. Idi agangay, inyawid ni Jose ti pamiliana idiay Nazaret. Apay a saandan a nagsubli idiay Betlehem? Tapno maliklikanda ti naulpit nga anak ni Herodes a ni Arkelao nga agturturay idin iti Judea ken tapno agtulnogda iti pakdaar ti Dios. Idiay Nazaret, sitatalged a mapadakkel ni Jose ni Jesus kas pudno nga agdaydayaw iti Dios.—Mat. 2:19-22; 13:55; Luc. 2:39, 52.

Agparang a natay ni Jose sakbay a linuktan ni Jesus ti gundaway para iti nailangitan a biag. Mapagungarto ngarud ni Jose ditoy daga. Maam-ammonto isuna ti adu a tattao ken maammuanda ti ad-adu a detalye no apay a nagtalinaedda ken Maria idiay Betlehem kalpasan a nayanak ni Jesus.