MAADAL NGA ARTIKULO 23
KANTA 28 Pannakigayyem ken Jehova
Aw-awisennatayo ni Jehova nga Agbalin a Sangailina
“Addanto kadakuada ti toldak, ket siakto ti Diosda.”—EZEK. 37:27.
TI MASURSUROTAYO
Tapno umuneg ti apresasiontayo iti naisangsangayan nga awis ni Jehova nga agbalin a sangailina iti simboliko a toldana, agraman iti pamay-an ti panangaywanna kas ti mangsangaili kadatayo.
1-2. Ania ti iyaw-awis ni Jehova kadagiti napudno nga agdaydayaw kenkuana?
ADDA kadin ti nagsaludsod kenka iti, ‘Asino ni Jehova para kenka?’ Baka ti insungbatmo ket, ‘Ni Jehova ti Amak, Diosko, ken Gayyemko.’ Ngem adda pay sabali a titulo ken sasao a mangdeskribir ken Jehova. Naibagam kadin ti, ‘Ni Jehova ti mangsangsangaili kaniak’?
2 Inkompara ni Ari David ti pannakigayyem ni Jehova kadagiti napudno nga agdaydayaw kenkuana iti relasion ti mangsangaili ken dagiti sangailina. Insaludsodna: “O Jehova, asino ti sangailiem iti toldam? Asino ti makapagyan iti bantaymo a nasantuan?” (Sal. 15:1) Iti daytoy a bersikulo, naammuantayo a posible nga agbalintayo a sangaili ni Jehova—kayatna a sawen, agbalin a gagayyemna. Talaga a naisangsangayan dayta nga awis ni Jehova!
KAYAT NI JEHOVA NGA AGBALINTAYO A SANGAILINA
3. Asino ti kaunaan a sangaili ni Jehova, ken ania ti nariknada iti maysa ken maysa?
3 Agmaymaysa ni Jehova sakbay a nangparsua. Ngem idi naparsuanan ti inauna nga Anakna, isu ket kas ti manangsangaili a nangawis iti kaunaan a sangailina iti simboliko a toldana. Nakaragragsak ni Jehova iti baro nga akemna kas Manangsangaili. Ibaga ti Biblia a ti ‘nangnangruna a pakaragsakan’ ni Jehova ket ti Anakna. Ti met Anak, ti kaunaan a sangailina, ket ‘kanayon a naragsak iti sanguanan’ ti Amana a ni Jehova.—Prov. 8:30.
4. Siasino pay dagiti nagbalin a sangaili ni Jehova iti toldana?
4 Kalpasanna, pinarsua ni Jehova dagiti anghel, ket inawisna met ida nga agbalin a sangailina. Naawagan dagiti anghel kas “dagiti annak ti Dios” ket naragsakda ta kaduada ni Jehova. (Job 38:7; Dan. 7:10) Iti adu a tawen, dagiti laeng kakadua ti Dios idiay langit a pagnanaedanna ti mabalin a makigayyem kenkuana. Idi agangay, pinarsuana dagiti tattao ditoy daga, ket mabalinda metten ti makigayyem kenkuana. Ti dadduma kadagiti nagbalin a sangailina ket da Enoc, Noe, Abraham, ken Job. Nadeskribirda kas gagayyem ti Dios ta nakipagnada “iti pudno a Dios.”—Gen. 5:24; 6:9; Job 29:4; Isa. 41:8.
5. Ania ti masursurotayo iti padto iti Ezekiel 37:26, 27?
5 Iti ginasut a tawen, intultuloy nga awisen ni Jehova dagiti gagayyemna nga agbalin a sangailina. (Basaen ti Ezekiel 37:26, 27.) Kas pagarigan, naammuantayo iti padto ni Ezekiel a talaga a kayat ti Dios a dagiti napudno nga agdaydayaw kenkuana ket maaddaan iti nasinged a relasion kenkuana. Ikarkarina a mangaramid kadakuada iti “tulag ti kappia.” Ti tuktukoyen dayta a padto ket ti tiempo inton dagiti napili nga agbiag idiay langit ken dagidiay addaan iti namnama nga agbiag nga agnanayon ditoy daga ket agkaykaysa iti simboliko a toldana kas “maymaysa nga arban.” (Juan 10:16) Itan dayta a tiempo!
AY-AYWANANNATAYO NI JEHOVA SADINOMAN TI AYANTAYO
6. Kasano a ti maysa a tao ket agbalin a sangaili iti tolda ni Jehova, ken pakasarakantayo iti toldana?
6 Idi tiempo ti Biblia, ti tolda ti maysa a tao ket paginanaan ken mangsalaknib kenkuana iti nagduduma a paniempo. Manamnama ti sangaili iti dayta a tolda nga isu ket aywanan a naimbag ti mangsangaili kenkuana. Idi nagdedikartayo ken Jehova, nagbalintayo a sangaili iti simboliko a toldana. (Sal. 61:4) Tagtagiragsakentayo ti aglaplapusanan a naespirituan a taraon ken ti pannakigayyem kadagidiay sangaili met ni Jehova. Saan a maymaysa a lugar ti ayan ti simboliko a tolda ni Jehova. Baka napadasamon ti napan iti sabali a nasion tapno umatender iti espesial a kombension, ket naam-ammom sadiay ti dadduma a naragsak a tattao gapu ta addada met iti tolda ti Dios. Ti tolda ti Dios ket adda iti sadinoman nga ayan ti natulnog nga agdaydayaw kenkuana.—Apoc. 21:3.
7. Apay a maibagatayo a dagiti natayen a matalek a tattao ket sangaili latta ni Jehova iti toldana? (Kitaen met ti ladawan.)
7 Dagiti ngay natayen a matalek a tattao? Sangaili latta kadi ida ni Jehova iti toldana? Wen! Apay a maibagatayo ti kasta? Ngamin, sibibiagda latta iti lagip ni Jehova. Inlawlawag ni Jesus: “Iti salaysay maipapan iti siitan a bassit a kayo, dinakamat ni Moises ti maipapan iti panagungar dagiti natay. Inawaganna ni Jehova kas ‘ti Dios ni Abraham ken Dios ni Isaac ken Dios ni Jacob.’ Isu ket Dios, saan a dagiti natay, no di ket dagiti sibibiag, ta sibibiagda amin kenkuana.”—Luc. 20:37, 38.
Uray dagiti natayen a matalek nga adipen ti Dios ket maibilang latta a sangaili iti tolda ti Dios (Kitaen ti parapo 7)
DAGITI BENDISION KEN RESPONSABILIDADTAYO
8. Kasano a magunggonaan dagiti sangaili ni Jehova iti kaaddada iti toldana?
8 Mausar ti literal a tolda kas paginanaan ken proteksion iti nagduduma a paniempo. Kasta met laeng ti tolda ni Jehova. Us-usarenna dayta a mangprotektar kadagiti sangailina tapno saan a madadael ti relasionda kenkuana ken tapno ipaayanna ida iti pudpudno a namnama. (Sal. 31:23; 1 Juan 3:8) Iti baro a lubong, itultuloyto a protektaran ni Jehova dagiti matalek a gagayyemna, saan laeng nga iti naespirituan a pannakadangran no di ket uray pay ken patay.—Apoc. 21:4.
9. Ania ti ekspektaren ni Jehova nga aramiden dagiti sangailina?
9 Talaga a nagsayaat a pribilehio ti agbalin a sangaili ni Jehova iti toldana! Gapu iti dayta, maaddaantayo iti nasinged a pannakigayyem kenkuana nga agpaut iti agnanayon. Ania koma ti masapul nga aramidentayo no kayattayo ti agtultuloy a sangaili ni Jehova? No naimbitaranka iti balay ti maysa a tao, sigurado a kayatmo nga ammuen no ania ti eks-ekspektarenna kenka. Kas pagarigan, mabalin nga eks-ekspektarenna nga ikkatem ti sapatosmo sakbayka a sumrek, ket kayatmo nga aramiden dayta. Kasta met, sigurado a kayattayo nga ammuen dagiti kayat ni Jehova nga aramiden dagiti mayat nga agtultuloy a sangaili iti toldana. Gapu ta ay-ayatentayo ni Jehova, kayattayo nga aramiden ti amin a kabaelantayo ‘tapno naan-anay a maparagsaktayo.’ (Col. 1:10) Agpayso a Gayyemtayo ni Jehova. Ngem isu met ti Dios ken Amatayo. Maikari laeng ngarud a raementayo. (Sal. 25:14) Ditay koma liplipatan ti kinasiasinona, ken kanayon koma a nauneg ti panagraemtayo kenkuana. No nauneg ti panagraemtayo kenkuana, maliklikantayo nga aramiden ti aniaman a kagurana. Sigurado a kayattayo ti ‘agbalin a naemma iti pannakipagnatayo’ iti Diostayo.—Mik. 6:8.
SAAN A NANGIDUMDUMA NI JEHOVA IDIAY LET-ANG
10-11. Kasano ti panangtrato ni Jehova kadagiti Israelita idiay let-ang ti Sinai, ken kasano a paneknekan dayta a saan a mangidumduma isuna?
10 Patas ti panangtrato ni Jehova kadagiti sangailina ta saan a manangidumduma. (Roma 2:11) Makitatayo dayta iti panangtratona kadagiti Israelita idiay let-ang ti Sinai.
11 Kalpasan nga insalakan ni Jehova ti ilina iti pannakaadipenda idi idiay Egipto, nangdutok kadagiti papadi nga agserbi iti tabernakulo. Dinutokanna dagiti Levita a mangasikaso iti dadduma a trabaho iti dayta a nasantuan a toldana. Ngem kayatna kadi a sawen a gapu ta agserserbida iti tabernakulo, wenno aggigianda iti asideg dayta, ket nasaysayaaten ti panangaywan ni Jehova kadakuada ngem iti dadduma? Saan! Saan a manangidumduma ni Jehova.
12. Ania dagiti pakakitaan a saan a nangidumduma ni Jehova iti panangtratona kadagiti Israelita? (Ex. 40:38) (Kitaen met ti ladawan.)
12 Ti tunggal Israelita ket posible nga agbalin a nasinged a gayyem ni Jehova, agserserbi man wenno saan iti tabernakulo, wenno asideg man wenno adayo ti toldana iti tabernakulo. Kas pagarigan, sinigurado ni Jehova a makita ti intero a nasion ti sinan-adigi nga ulep ken sinan-adigi nga apuy iti ngatuen ti tabernakulo. (Basaen ti Exodo 40:38.) No mangrugin nga umakar ti sinan-adigi nga ulep, makita dayta uray dagiti adda iti kaadaywan a tolda manipud iti tabernakulo. Gapu iti dayta, adda gundawayda nga agempake, mangkupin kadagiti toldada, ken makikadua iti nasion a pumanaw. (Num. 9:15-23) Silalawag a mangngeg ti amin ti uni ti dua a pirak a trumpeta a pagilasinan a rugiandan ti pumanaw. (Num. 10:2) Nalawag ngarud a saan a gapu ta aggigian ti maysa nga Israelita iti asideg ti tabernakulo ket nasingsingeden ken Jehova. Imbes ketdi, amin nga Israelita ket agbalin a sangaili ni Jehova ken masiguradoda ti panangiwanwan ken proteksionna. Kasta met laeng ita. Sadinoman ti ayantayo ditoy daga, magunggonaantayo iti nadungngo ken naan-anay a panangaywan ken panangsalaknib ni Jehova.
Ti kaadda idi ti tabernakulo iti tengnga dagiti tolda dagiti Israelita ket pammaneknek a saan a mangidumduma ti Dios (Kitaen ti parapo 12)
SAAN A MANGIDUMDUMA NI JEHOVA ITA
13. Ania ti maysa a pakakitaan a saan a mangidumduma ni Jehova ita?
13 Dadduma nga adipen ti Dios ita ket aggigian iti asideg ti sangalubongan a hedkuarter wenno iti asideg ti maysa kadagiti sanga nga opisina dagiti Saksi ni Jehova. Agserserbi pay ketdi ti dadduma kadakuada kadagitoy a pasilidad. Gapu iti dayta, adda gundawayda a makiraman iti adu nga aktibidad a maar-aramid kadagita a lugar. Personal met a makalkalangenda dagiti mangidadaulo kadatayo. Adda met dagiti agserserbi kas agdaldaliasat a manangaywan wenno agserserbi iti dadduma pay a kita ti espesial nga amin-tiempo a panagserbi. Ngem no saanka a maysa kadakuada, masiguradom a sangailinaka latta ni Jehova ken ay-ayatennaka. Am-ammonaka unay ken ipaayna dagiti kasapulam. (1 Ped. 5:7) Amin nga adipen ti Dios ket makaawat iti naespirituan a taraon, panangiwanwan, ken proteksion a kasapulanda.
14. Ania ti sabali pay a pakakitaan a saan a mangidumduma ni Jehova kadagiti sangailina?
14 Adda pay sabali a pakakitaan a saan a mangidumduma ni Jehova kadagiti sangailina. Siniguradona a ti Biblia ket mabasa dagiti tattao iti intero a lubong. Ti Nasantuan a Kasuratan ket orihinal a naisurat iti tallo a lengguahe: Hebreo, Aramaiko, ken Griego. Ngem dagiti kadi makabasa iti Biblia kadagita a lengguahe ket nadekdekket ti relasionda ken Jehova ngem kadagiti saan? Siempre, saan.—Mat. 11:25.
15. Ania pay ti maysa nga ebidensia a saan a mangidumduma ni Jehova? (Kitaen met ti ladawan.)
15 Ti panagbalintayo a gagayyem ni Jehova ket saan a nakadepende iti nagaw-attayo a sekular nga edukasion wenno iti kinalaingtayo kadagiti lengguahe nga orihinal a nakaisuratan ti Biblia. Saan laeng nga ipapaay ni Jehova ti siribna kadagiti nangato ti adalda. Ipapaayna met dayta kadagiti tattao iti intero a lubong, nangato man ti adalda wenno saan. Ti impaisuratna a Saona, ti Biblia, ket naipatarus iti rinibu a lengguahe. Gapu iti dayta, magunggonaan dagiti tattao iti intero a lubong kadagiti pannursuro ti Biblia ken maammuanda no kasanoda nga agbalin a gagayyem ti Dios.—2 Tim. 3:16, 17.
Apay a ti pannakaipatarus ti Biblia iti rinibu a lengguahe ipakitana a saan a mangidumduma ti Dios? (Kitaen ti parapo 15)
AGTULTULOYKA A SANGAILI NI JEHOVA
16. Sigun iti Aramid 10:34, 35, siasino laeng dagiti awaten ni Jehova a sangailina?
16 Nagsayaat a pribilehio ti agbalin a sangaili ni Jehova iti simboliko a toldana. Awan ti makaartap kenkuana ta isu ti kasingpetan, kadudungnguan, ken kapaparaburan a Manangsangaili. Saan met a mangidumduma. Awatennatayo amin—aniaman ti puli, tribu, edad, kinataotayo, naggapuantayo, nagaw-attayo nga edukasion, wenno lalakitayo man wenno babai. Ngem dagiti laeng agtulnog kadagiti pagalagadanna ti awatenna kas sangailina.—Basaen ti Aramid 10:34, 35.
17. Pakasarakantayo iti dadduma pay nga impormasion maipapan iti panagbalin a sangaili ni Jehova iti toldana?
17 Kas nairekord iti Salmo 15:1, insaludsod ni David: “O Jehova, asino ti sangailiem iti toldam? Asino ti makapagyan iti bantaymo a nasantuan?” Inwanwan met laeng ni Jehova ni David a mangisurat iti sungbat dagita a saludsod. Iti sumaruno nga artikulo, makitatayo ti dadduma pay nga impormasion maipapan kadagiti espesipiko a kidkiddawen ni Jehova tapno maparagsaktayo isuna ken agtalinaedtayo a gagayyemna.
KANTA 32 Ni Jehova ti Dasigam!
