1. Apay nga itultuloy dagiti agserserbi iti Dios ti agdaydayaw kenkuana uray no adda dagiti problema?

 “DELIKADO ken narigat a tiempo”—kasta ti panangiladawan ti Biblia iti kaaldawantayo. (2 Tim. 3:1) Malaksid kadagiti problema a mapaspasaran ti amin iti daytoy a sistema ti bambanag, mabusbusor ken maidaddadanes met dagiti agserserbi ken Jehova. Apay nga itultuloytayo ti agdaydayaw ken Jehova uray no adda dagiti problema? Ti maysa a kangrunaan a rason ket mapampaneknekantayo a ni Jehova “ti sibibiag a Dios.”—Jer. 10:10; 2 Tim. 1:12.

2. Apay a maibagatayo a ni Jehova ti sibibiag a Dios?

² Ni Jehova ket pudpudno a Persona. Makitkitana ti amin a problema a maipaspasango kadatayo ken kanayon a nakasagana a tumulong kadatayo. (2 Cron. 16:9; Sal. 23:4) No laglagipentayo nga ipatpategnatayo ti Dios ken kanayon a nakasagana a tumulong kadatayo, maibturantayo ti aniaman a pakasuotan. Kitaentayo no kasano a napaneknekan dayta ni Ari David.

3. Ania ti kayat a sawen ni David idi imbagana a “sibibiag ni Jehova”?

³ Am-ammo ni David ni Jehova ken agpampannuray Kenkuana. Nagpaarayat ken Jehova idi kayat a patayen dagiti kabusorna, a pakairamanan ni Ari Saul. (Sal. 18:6) Sinungbatan ti Dios ti kararagna ken insalakanna isu nga imbaga ni David: “Sibibiag ni Jehova!” (Sal. 18:46) Ania ti kayatna a sawen? Sigun iti maysa a reperensia, impakita ni David nga agtaltalek ken Jehova “kas ti sibibiag a Dios a kanayon a tumultulong kadagiti adipenna.” Wen, napaneknekan a mismo ni David a sibibiag ti Diosna, isu a naparegta nga agtultuloy nga agserbi  ken mangidaydayaw ken Jehova.—Sal. 18:28, 29, 49.

4. Kasano a magunggonaantayo no kombinsidotayo a ni Jehova ti sibibiag a Dios?

⁴ No kombinsidotayo a ni Jehova ti sibibiag a Dios, makapagserbitayo a sireregta. Maibturantayo dagiti suot ken inspiradotayo a mangitultuloy a mangaramid iti amin a kabaelantayo nga agserbi kenkuana. Determinadotayo met nga agtalinaed a nasinged ken Jehova.

PAPIGSAENNAKA TI SIBIBIAG A DIOS

5. Apay a makapagtalektayo a kabaelantayo a sanguen dagiti pakasuotan? (Filipos 4:13)

⁵ Maibturantayo ti aniaman a suot, dadakkel man wenno babassit, no laglagipentayo a sibibiag ni Jehova ken kanayon a nakasagana a tumulong kadatayo. Ngamin, awan ti aniaman a problema a dina kabaelan a solbaren. Isu ti Mannakabalin-amin ken maipaayannatayo iti bileg nga agibtur. (Basaen ti Filipos 4:13.) Naan-anay ngarud a makapagtalektayo a tulongannatayo a mangsango kadagiti pakasuotan. Bayat a makitkitatayo a tultulongannatayo ni Jehova kadagiti babbabassit a pakasuotan, kombinsidotayo a tulongannatayto met kadagiti daddadakkel a pakasuotan.

6. Ania dagiti kapadasan ni David idi agtutubo pay a nangpabileg iti panagtalekna ken Jehova?

⁶ Kitaentayo ti dua a kapadasan ni David isu a bimmileg ti panagtalekna ken Jehova. Idi agtutubo pay ni David, ipaspastoranna ti arban ni tatangna. Maysa nga aldaw, adda leon nga immay ket intarayna ti maysa a karnero. Idi agangay, kasta met laeng ti inaramid ti maysa nga oso. Kadagita a dua a pasamak, situtured a kinamat ni David ti leon ken ti oso isu a nasalbarna dagiti karnero. Ngem saanna a pinanunot a naaramidna dagita iti bukodna a pigsa. Ammona a ni Jehova ti nangted kenkuana iti bileg a mangaramid iti dayta. (1 Sam. 17:34-37) Saan a pulos a nalipatan ni David dagita a pasamak. Kanayon a pinampanunotna dagita, isu a bimmileg ti panagtalekna nga aniaman ti mapasamak iti masanguanan, itultuloy isuna a pabilgen ti sibibiag a Diosna.

7. Asino ti kanayon a pinampanunot ni David, ken apay a nakatulong dayta kenkuana a mangsango ken Goliat?

⁷ Idi tin-edyer pay laeng ni David, napan iti kampo dagiti soldado nga Israelita. Nakitana a mabutbuteng dagiti soldado gapu iti higante a Filisteo a ni Goliat a ‘mangkarkarit iti armada ti Israel.’ (1 Sam. 17:10, 11) Mabutbuteng dagiti soldado gapu ta agpokpokusda iti kadakkel ni Goliat ken iti panangkaritna kadakuada. (1 Sam. 17:24, 25) Ngem sabali ti pampanunoten ni David. Ammona a ti in-insultuen ni Goliat ket saan a ti armada ti Israel no di ket “ti armada ti sibibiag a Dios.” (1 Sam. 17:26) Ni Jehova ti kangrunaan a pampanunoten ni David. Nagtalek a ti Dios a timmulong kenkuana idi agpaspastor pay laeng ti tumulong met laeng kenkuana iti daydi a situasion. Siguradona a tulongan isuna ti Dios, isu nga idi nagsangodan ken Goliat, isu ti nagballigi!—1 Sam. 17:45-51.

8. Ania ti mangpabileg iti panagtalektayo a tulongannatayo ni Jehova no maipasangotayo kadagiti suot? (Kitaen met ti ladawan.)

⁸ Agballigitayo met a mangsango kadagiti suot no laglagipentayo a nakasagana ti sibibiag a Dios a tumulong kadatayo. (Sal. 118:6) Mapabilegtayo ti panagtalektayo no panunotentayo dagiti naaramidannan iti napalabas. Basaem dagiti salaysay ti Biblia a mangipalagip kenka no kasano nga insalakan ni Jehova dagiti agdaydayaw kenkuana. (Isa. 37:17, 33-37) Basaem met dagiti report iti website-tayo a jw.org a mangipakita a tultulongan ni Jehova dagiti kapammatiantayo iti kaaldawantayo. Lagipem met dagiti tiempo a tinulongannaka ni Jehova. Saan met ketdi a kasapulan a nakaskasdaaw ti kapadasam a kas ken David a tinulongan ni Jehova a manglaban iti leon wenno oso. Apay? Ngamin, nagadun ti naitulong kenka ni Jehova! Inyasidegnaka kenkuana tapno agbalinka a gayyemna. (Juan 6:44) Ket gapu iti tulongna, makapagtultuloyka pay laeng nga agserserbi agingga ita. Kiddawem a tulongannaka a manglagip kadagiti gundaway a sinungbatanna dagiti kararagmo. Tinulongannaka iti umiso a tiempo, wenno pinabilegnaka iti narigat a situasion. No dagita ti kanayon a panunotem, bumileg ti panagtalekmo ken Jehova nga aniaman ti mapasamak, kanayon a tulongannaka.

9. Ania dagiti masapul a laglagipentayo no maipasangotayo kadagiti suot? (Proverbio 27:11)

⁹ No kanayon a sipapanunottayo a ni Jehova ket sibibiag a Persona, umiso ti panangmatmattayo kadagiti pakasuotantayo. Kasano koma? Maawatantayo a dagiti pakasuotantayo ket konektado iti dakdakkel nga isyu nga imbangon ni Satanas kontra ken Jehova. Ibagbaga ti Diablo a no agrigattayo, tallikudantayo kano ni Jehova. (Job 1:10, 11; basaen ti Proverbio 27:11.) Ngem no agtalinaedtayo a matalek ken Jehova, uray no makapasartayo kadagiti pannubok, ipakpakitatayo nga ay-ayatentayo isuna ken pampaneknekantayo nga ulbod ti Diablo. Maipaspasangoka kadi iti ibubusor ti gobierno, narigat a panagbiag, kinaawan interes dagiti kaskasabaam, wenno iti dadduma pay a pakasuotan? No wen, tantandaanam a dayta a situasionmo ket gundaway tapno maparagsakmo ti puso ni Jehova. Laglagipem met a saanna a pulos nga ipalubos a masubokka iti labes ti kabaelam. (1 Cor. 10:13) Pabilgennaka tapno makapagibturka.

GUNGGONAANNAKA TI SIBIBIAG A DIOS

10. Ania ti aramiden ti sibibiag a Dios kadagiti agdaydayaw kenkuana?

¹⁰ Kanayon a gunggonaan ni Jehova dagidiay agdaydayaw kenkuana. (Heb. 11:6) Tultulongannatayo nga agbalin a kalmado ken kontento ita. Ken iti masanguanan, ipaayannatayo iti biag nga agnanayon. Kombinsidotayo a kayat ni Jehova ken adda pannakabalinna a manggunggona kadatayo. Gapu iti dayta, ikagumaantayo nga ipaay ti kasayaatantayo nga agdaydayaw kenkuana kas iti inaramid dagiti matalek nga adipenna. Kasta idi ti inaramid ni Timoteo idi umuna a siglo.—Heb. 6:10-12.

11. Apay nga inkagumaan ni Timoteo ti agtrabaho para iti kongregasion? (1 Timoteo 4:10)

¹¹ Basaen ti 1 Timoteo 4:10. Natibker ti pammati ni Timoteo a gunggonaan isuna ti sibibiag a Dios isu nga inkagumaanna ti agtrabaho ken agbannog para iti dadduma. Ania dagiti inaramidna? Pinaregta ni apostol Pablo ni Timoteo a parang-ayenna ti abilidadna a mangisuro iti ministerio ken agpalawag iti publiko. Masapul met nga agbalin a nasayaat nga ulidan kadagiti kapammatianna, kadagiti man agtutubo wenno nataengan. Naikkan met kadagiti narigat nga annongen kas iti panangipaayna iti nadagsen ngem naayat a balakad kadagiti agkasapulan iti dayta. (1 Tim. 4:11-16; 2 Tim. 4:1-5) Uray no saan a madmadlaw wenno saan a maapresiar ti dadduma ti ar-aramiden ni Timoteo, masiguradona a gunggonaan ni Jehova.—Roma 2:6, 7.

12. Apay nga ikagkagumaan dagiti panglakayen ti agtrabaho para iti kongregasion? (Kitaen met ti ladawan.)

¹² Ita, masigurado met dagiti panglakayen a makitkita ken ipatpateg ni Jehova dagiti nasayaat a maar-aramidanda. Malaksid iti panag-shepherding, panangisuro, ken panangasaba, adu a panglakayen ti agbolboluntario kadagiti panagibangon a proyekto ti organisasion ken trabaho a panangsaranay. Dadduma met ti agserserbi kas miembro ti Patient Visitation Group wenno Hospital Liaison Committee. Ammo dagiti panglakayen a ti kongregasion ket kukua ni Jehova, saan a ti aniaman nga organisasion ti tao. Gapu iti dayta, ikagkagumaanda nga aramiden ti amin a kabaelanda a mangitungpal kadagiti asaynmentda ken naan-anay nga agtaltalekda a gunggonaan ida ti Dios gapu iti ar-aramidenda.—Col. 3:23, 24.

13. Ania ti panagrikna ni Jehova kadagiti ar-aramidentayo para kenkuana?

¹³ Siempre, saan nga amin ket makapagserbi kas panglakayen. Ngem adda amin maipaaytayo para ken Jehova. Apresiaren ti Diostayo no aramidentayo ti amin a kabaelantayo nga agserbi kenkuana. Makitkitana dagiti donasiontayo para iti sangalubongan a trabaho, kasanoman kabassit dayta. Maragragsakan no ikagkagumaantayo a labanan ti kinamanagbabaintayo tapno makapagkomentotayo kadagiti gimong. Maragragsakan pay ketdi no palabsen ken pakawanentayo dagiti pagkamkamalian ti dadduma. Uray no ti panagriknam ket nagbassit ti maar-aramidam, agtalekka nga ipatpateg ni Jehova ti kayam nga aramiden. Ay-ayatennaka gapu iti ar-aramidem, ken gunggonaannakanto.—Luc. 21:1-4.

AGTALINAED A NASINGED ITI SIBIBIAG A DIOS

14. Kasano a makatulong ti kinasingedtayo ken Jehova tapno agtalinaedtayo a matalek kenkuana? (Kitaen met ti ladawan.)

¹⁴ No napaypayso kadatayo ni Jehova, nalaklaka ti agtalinaed a matalek kenkuana. Napaneknekan dayta ni Jose. Determinado a saan nga agaramid iti immoralidad. Napaypayso kenkuana ti Dios ken dina kayat ti agbasol Kenkuana. (Gen. 39:9) Agbalin met ni Jehova a napaypayso kadatayo no iwayaantayo ti agkararag ken adalen ti Saona. No aramidentayo dayta, lallalo a suminged ti pannakigayyemtayo kenkuana. No ibilangtayo ni Jehova kas nadekket a gayyemtayo, kas iti inaramid ni Jose, saantayo nga agaramid iti aniaman a mangpaliday Kenkuana.—Sant. 4:8.

15. Ania ti masursurotayo iti napasamak kadagiti Israelita idiay let-ang? (Hebreo 3:12)

¹⁵ Dagidiay manglipat a ni Jehova ti sibibiag a Dios nalaklakada a mayadayo kenkuana. Kitaentayo  ti napasamak kadagiti Israelita idi addada idiay let-ang. Ammoda a sibibiag ni Jehova, ngem pinagduaduaanda no maipaayna dagiti kasapulanda. Insaludsodda pay ketdi: “Adda kadi ni Jehova kadatayo wenno awan?” (Ex. 17:2, 7) Gapu iti dayta, nagrebeldeda iti Dios. Sigurado a ditay kayat a tuladen ti kinasukirda ken ti dakes nga ulidanda.—Basaen ti Hebreo 3:12.

16. Ania ti mabalin a mangpakapuy iti pammatitayo?

¹⁶ Narigat ti agtalinaed a nasinged ken Jehova iti lubong a pagbibiagantayo ita. Adu ti saan a mamati nga adda Dios. Masansan a kasla nanamnam-ay ti biag dagidiay saan a mangsursurot kadagiti bilin ti Dios. Gapu iti dayta, mabalin a kumapuy ti pammatitayo. Ammotayo met ketdi nga adda Dios. Ngem mabalin a pagduaduaantayo no talaga met laeng a tulongannatayo. Kasta idi ti narikna ti nagsurat iti Salmo 73. Nakitana a nanam-ay ti biag dagiti tattao iti aglawlawna a saan a mangsursurot kadagiti linteg ti Dios. Gapu iti dayta, napanunotna a sayang laeng ti panagserbina iti Dios.—Sal. 73:11-13.

17. Ania ti makatulong kadatayo nga agtalinaed a nasinged ken Jehova?

¹⁷ Ania ti nakatulong iti salmista a mangilinteg iti panagpampanunotna? Inutobna ti mapasamak kadagiti manglipat ken Jehova. (Sal. 73:18, 19, 27) Pinanunotna met dagiti pagimbagan ti panagserbi iti Dios. (Sal. 73:24) Mabalintayo met a panunoten dagiti bendision nga ipapaay kadatayo ni Jehova. Imadyinentayo no ania ngata ti biagtayo no saantayo nga agserserbi ken Jehova. Makatulong dagita tapno agtalinaedtayo a matalek ken maibagatayo met ti imbaga ti salmista: “Ti iyaasidegko iti Dios ket pagimbagak.”—Sal. 73:28.

18. Apay a ditay pagbutngan dagiti mapasamak iti masanguanan?

¹⁸ Kabaelantayo a sanguen ti aniaman a pakarigatan bayat dagitoy maudi nga al-aldaw ta ‘agserserbitayo iti sibibiag ken pudno a Dios.’ (1 Tes. 1:9) Ipatpategnatayo ti Diostayo ken kanayon a tulongannatayo. Saanna idi a binaybay-an dagiti adipenna iti napalabas. Saannatayo met a baybay-an ita. Dandanin ti dakkel a rigat. Ngem saantayto nga agmaymaysa ta kaduatayo ni Jehova. (Isa. 41:10) Sapay koma ta “naturedtayo a mangibaga: ‘Ni Jehova ti tumultulong kaniak; saanakto nga agbuteng.’”—Heb. 13:5, 6.