1-2. Kas ipakita ti Aramid 8:27-31, 35-38, ania ti nakatignayan ti Etiope a eunuko nga agpabautisar?

KAYATMO kadi ti mabautisaran kas adalan ni Kristo? Ayat ken apresasion ti nakatignayan ti adu nga agpabautisar. Usigem ti inaramid ti maysa nga opisial a nagserbi iti reyna ti Etiopia.

² Dagus nga inyaplikar ti Etiope ti nasursurona iti Kasuratan. (Basaen ti Aramid 8:27-31, 35-38.) Ania ti nakatignayanna? Nalawag nga ipatpategnan ti Sao ti Dios, ta basbasaenna idi ti libro nga Isaias bayat a nakalugan iti karuahe. Ket idi nakisarita kenkuana ni Felipe, napatanorna ti apresasion iti inaramid ni Jesus para kenkuana. Ngem apay a napan dayta nga opisial idiay Jerusalem? Gapu ta ay-ayatennan ni Jehova. Kasanotayo nga ammo? Kagapgapuna idiay Jerusalem a nagdaydayaw ken Jehova. Agparang a pinanawan daytoy a lalaki ti nakayanakanna a relihion ket nakikadua iti kakaisuna a nasion a dedikado iti pudno a Dios. Daytoy met laeng nga ayat ken Jehova ti nakatignayanna a mangaramid iti sabali pay a napateg nga addang, ti panagpabautisar ken panagbalin nga adalan ni Kristo.—Mat. 28:19.

3. Ania ti mabalin a makalapped iti panagpabautisar ti maysa a tao? (Kitaen ti kahon nga “ Ania a Klase ti Daga ti Pusom?”)

³ Ti ayatmo ken Jehova ti pakatignayam nga agpabautisar. Ngem mabalin nga ayat met ti manglapped kenka a mangaramid iti dayta. Kasano? Panunotem dagitoy a pagarigan. Mabalin nga ay-ayatem unay dagiti di manamati a kapamiliam wenno gagayyemmo, ket baka madanaganka a guraendaka no agpabautisarka. (Mat. 10:37) Wenno mabalin a pagaayatmo  dagiti bisio wenno aramid nga ammom a kagura ti Dios, ket baka marigatanka a mangisardeng kadagita. (Sal. 97:10) Wenno mabalin a dimmakkelka a mangselselebrar kadagiti kaugalian a konektado iti ulbod a relihion. Mabalin a maragragsakanka no malagipmo ti panangselebrarmo kadagita iti napalabas. Kas resultana, baka marigatanka a mangisardeng kadagiti kaugalian a di makaay-ayo ken Jehova. (1 Cor. 10:20, 21) Masapul ngarud nga agdesisionka, “Ania wenno asino ti ad-adda nga ay-ayatek?”

4. Ania ti kangrunaan a pakatignayam nga agpabautisar?

⁴ Adu a nasayaat a bambanag ti ipatpateg ken pagyamyamanam. Kas pagarigan, sakbay a nakipagadalka kadagiti Saksi ni Jehova, mabalin a naunegen ti panagraemmo iti Biblia. Ken mabalin a nasursuromon nga ayaten ni Jesus. Ita ta am-ammomon dagiti Saksi ni Jehova, mabalin a magusgustuam ti makilangen kadakuada. Ngem saan laeng a ti panagayatmo kadagita a banag ti pakatignayam a mangidedikar iti bagim ken Jehova ken agpabautisar. Ti kangrunaan a pakatignayam nga agpabautisar ket ti mismo nga ayatmo ken Jehova a Dios. No dakdakkel ti panagayatmo ken Jehova ngem iti aniaman a banag, dimo ipalubos a lapdannaka ti aniaman wenno asinoman nga agserbi kenkuana. Mabalin nga ibilangmo ti ayat ken Jehova kas ruangan nga agturong iti bautismo ken kas alad a makatulong kenka nga agtalinaed iti dalan ti panagserbi iti Dios.

5. Ania dagiti saludsod nga usigentayo?

⁵ Imbaga ni Jesus a masapul nga ayatentayo ni Jehova iti amin a puso, kararua, panunot, ken pigsatayo. (Mar. 12:30) Kasano a maaddaanka iti nauneg nga ayat ken panagraem ken Jehova? No utobentayo ti ayat ni Jehova kadatayo, matignaytayo met a mangayat kenkuana. (1 Juan 4:19) Ania pay a rikna ken tignay ti natural a maadda kenka no napatanormon dayta a kapatgan nga ayat? *

6. Sigun iti Roma 1:20, ania ti maysa a pamay-an a maam-ammom ni Jehova?

⁶ Am-ammuem ni Jehova babaen kadagiti parsuana. (Basaen ti Roma 1:20; Apoc. 4:11) Panunotem ti disenio dagiti mula ken animal nga inaramidna a mangipakita iti kinasiribna. Adalem ti nakaskasdaaw a pannakaaramid ti bagim. (Sal. 139:14) Ken panunotem ti enerhia nga inkabil ni Jehova iti inittayo, a maysa laeng iti binilion a bituen. * (Isa. 40:26) No aramidem dayta, umunegto ti panagraemmo ken Jehova. Ngem ti pannakaammom a masirib ken mannakabalin ni Jehova ket paset laeng ti pundasion ti relasionmo kenkuana. Tapno tumibker ti ayatmo ken Jehova, ammuem pay ti ad-adu maipapan kenkuana.

7. Tapno nauneg ti panagayatmo ken Jehova, kombinsidoka koma iti ania?

⁷ Masapul a kombinsidoka nga ay-ayatennaka ni Jehova. Marigatanka kadi a mamati nga am-ammo ken ipatpategnaka ti Namarsua iti langit ken daga? No kasta, laglagipem a “saan nga adayo [ni Jehova] iti tunggal maysa kadatayo.” (Ara. 17:26-28) “Suksukimaten ni Jehova ti amin a puso,” ken ikarkarina kenka ti kas iti imbaga ni David ken Solomon a “no birokem, ipalubosnanto a masarakam.” (1 Cron. 28:9) Kinapudnona,  agad-adalka ita iti Biblia gapu ta kas imbaga ni Jehova, “inyasidegka kaniak.” (Jer. 31:3) No ad-adda a maapresiarmo ti amin nga inaramid ni Jehova para kenka, naun-unegto ti panagayatmo kenkuana.

8. Kasano a masubadam ti ayat ni Jehova?

⁸ Ti maysa a pamay-an a masubadam ti ayat ni Jehova ket ti panagkararagmo kenkuana. Dumakkel ti ayatmo iti Dios bayat nga ibagbagam dagiti pakaseknam ken agyamyamanka iti amin nga ar-aramidenna para kenka. Ken tumibker ti relasionmo ken Jehova bayat a makitkitam a sungsungbatanna dagiti kararagmo. (Sal. 116:1) Iti kasta, kombinsidoka a maawatannaka. Ngem tapno sumingedka ken Jehova, masapul a maawatam ti pampanunotna. Ken masapul nga ammuem ti kayatna nga aramidem. Maammuam laeng dayta no adalem ti Saona, ti Biblia.

9. Kasanom a maipakita a napateg kenka ti Biblia?

⁹ Sursuruem nga ipateg ti Sao ti Dios, ti Biblia. Ti laeng Biblia ti naglaon iti kinapudno maipapan ken Jehova ken iti panggepna para kenka. Ipakpakitam a napateg kenka ti Biblia no basaem dayta iti inaldaw, no agsaganaka sakbay a makipagadalka iti Biblia, ken no iyaplikarmo ti masursurom. (Sal. 119:97, 99; Juan 17:17) Adda kadi eskediulmo nga agbasa iti Biblia iti inaldaw? Sursurotem kadi dayta?

10. Ania ti maysa a rason a nagpaiduma ti Biblia?

¹⁰ Ti maysa a rason a nagpaiduma ti Biblia ket naglaon dayta iti salaysay dagiti nakakita ken Jesus. Dayta laeng ti umiso a rekord a mangilawlawag iti inaramid ni Jesus para kenka. Bayat a maam-ammuam ti imbaga ken inaramid ni Jesus, mabalin a matignayka a makigayyem kenkuana.

11. Kasanom a masursuro nga ayaten ni Jehova?

¹¹ Sursuruem nga ayaten ni Jesus, ket dumakkelto ti ayatmo ken Jehova. Apay? Gapu ta naan-anay a tinulad ni Jesus dagiti kualidad ni Amana. (Juan 14:9) Isu a no ad-adda nga am-ammom ni Jesus, ad-adda met a maawatan ken maapresiarmo ni Jehova. Panunotem ti panangngaasi ni Jesus kadagidiay linalais dagiti tattao—dagiti napanglaw, masakit, ken nakapuy. Panunotem met ti  praktikal a balakadna kenka ken no kasano a simmayaat ti biagmo idi dimngegka kenkuana.—Mat. 5:1-11; 7:24-27.

12. Bayat a maam-ammom ni Jesus, ania ti mabalin a pakatignayam nga aramiden?

¹² Tumibker ti ayatmo ken Jesus bayat nga ut-utobem ti panagsakripisiona tapno mapakawan dagiti basoltayo. (Mat. 20:28) No maawatam a situtulok a natay ni Jesus para kenka, matignayka nga agbabawi ken agkiddaw iti pammakawan ni Jehova. (Ara. 3:19, 20; 1 Juan 1:9) Ken no ad-adda nga ayatem ni Jesus ken ni Jehova, ad-adda met a kayatmo ti makikadua kadagiti tattao a mangay-ayat kadakuada.

13. Ania ti impaay kenka ni Jehova?

¹³ Sursuruem nga ayaten ti pamilia ni Jehova. Baka saan a maawatan ti di manamati a pamiliam ken dagiti dati a gagayyemmo no apay a kayatmo nga idedikar ti bagim ken Jehova. Baka busorendaka pay ketdi. Tulongannaka ni Jehova babaen ti panangipaayna iti naespirituan a pamilia. No agtalinaedka a nasinged iti dayta a naespirituan a pamilia, masarakamto ti ayat ken suporta a kasapulam. (Mar. 10:29, 30; Heb. 10:24, 25) Inton agangay, baka makikadua met laeng kenka dagiti miembro ti pamiliam nga agserbi ken Jehova ken sumurotda kadagiti pagalagadanna.—1 Ped. 2:12.

14. Kas nadakamat iti 1 Juan 5:3, ania ti napaneknekam maipapan kadagiti pagalagadan ni Jehova?

¹⁴ Sursuruem nga ipateg ken iyaplikar dagiti pagalagadan ni Jehova. Sakbay a naam-ammom ni Jehova, baka adda bukodmo a pagalagadan, ngem makitam itan a nasaysayaat dagiti pagalagadan ni Jehova. (Sal. 1:1-3; basaen ti 1 Juan 5:3.) Panunotem ti balakad ti Biblia kadagiti assawa a lallaki, assawa a babbai, nagannak, ken annak. (Efe. 5:22–6:4) Bayat nga iyap-aplikarmo dayta a balakad, nakitam kadi a rimmagsak ti pamiliam? Bayat nga agtultulnogka iti bilin ni Jehova a panangpili iti nasayaat a gagayyem, simmayaat kadi ti kababalinmo? Naragragsakka kadi itan? (Prov. 13:20; 1 Cor. 15:33) Mabalin a wen ti sungbatmo kadagita a saludsod.

15. Ania ti aramidem no kasapulam ti tulong a mangyaplikar kadagiti prinsipio ti Biblia?

¹⁵ No dadduma, baka saanmo nga ammo no kasano nga iyaplikar dagiti prinsipio ti Biblia a masursurom. Dayta ti makagapu nga us-usaren ni Jehova ti organisasionna a mangipaay kenka kadagiti naibatay-Biblia a publikasion tapno mailasinmo ti umiso ken di umiso. (Heb. 5:13, 14) No basaen ken adalem dagita, makitamto a praktikal ken agaplikar dagita iti mismo a biagmo, ket nalabit kayatmonto ti agbalin a paset ti organisasion ni Jehova.

16. Kasano nga inorganisar ni Jehova ti ilina?

¹⁶ Sursuruem nga ayaten ken suportaran ti organisasion ni Jehova. Inorganisar ni Jehova ti ilina iti nadumaduma a kongregasion, a ti Anakna a ni Jesus ti uloda. (Efe. 1:22; 5:23) Dinutokan ni Jesus ti bassit a grupo dagiti napulotan a lallaki a mangidaulo iti pannakaorganisar ti trabaho a kayatna a maaramid ita. Tinukoy ni Jesus daytoy a grupo ti lallaki kas “ti matalek ken masirib nga adipen,” ket ikagkagumaanda nga itungpal ti responsabilidadda a mangpakan ken mangsalaknib kenka iti naespirituan. (Mat. 24:45-47) Ti maysa a pamay-an a tumultulong ti matalek nga adipen a mangaywan kenka ket ti panangsiguradoda a dagiti kualipikado a panglakayen ti madutokan a mangipastor kenka. (Isa. 32:1, 2; Heb. 13:17; 1 Ped. 5:2, 3) Situtulok dagiti panglakayen nga agsakripisio, mangliwliwa, ken tumulong kenka tapno ad-adda a sumingedka  ken Jehova. Ngem ti maysa kadagiti kapatgan a maaramidda ket ti panangtulongda kenka a mangisuro iti sabsabali maipapan ken Jehova.—Efe. 4:11-13.

17. Sigun iti Roma 10:10, 13, 14, apay nga isurotayo ti sabsabali maipapan ken Jehova?

¹⁷ Tulongam ti sabsabali tapno masursuroda nga ayaten ni Jehova. Imbaga ni Jesus kadagiti pasurotna nga isuroda ti sabsabali maipapan ken Jehova. (Mat. 28:19, 20) Posible nga agtulnog ti maysa iti dayta a bilin gapu laeng ta obligasionna. Ngem bayat a dumakdakkel ti ayatmo ken Jehova, mariknamto met ti narikna dagiti apostol a da Pedro ken Juan, a nangibaga: “Saan a mabalin nga isardengmi nga ibaga ti bambanag a nakita ken nangngegmi.” (Ara. 4:20) Agbalintayo a nakaragragsak no adda matulongantayo a mangayat ken Jehova. Panunotem ti kasta unay a ragsak ti ebanghelisador a ni Felipe idi natulonganna ti Etiope a mangammo iti kinapudno a linaon ti Kasuratan sa nabautisaran! No tuladem ni Felipe ken agtulnogka iti bilin ni Jesus a mangasaba, pampaneknekam a kayatmo ti agbalin a Saksi ni Jehova. (Basaen ti Roma 10:10, 13, 14.) Inton dumteng dayta a tiempo, baka maisaludsodmo met ti insaludsod ti Etiope: “Ania ti makalapped kaniak a mabautisaran?”—Ara. 8:36.

18. Ania ti usigentayo iti sumaruno nga artikulo?

¹⁸ Ti kapatgan a desision iti biagmo ket inton agdesisionka nga agpabautisar. Gapu ta serioso dayta, masapul a panunotem a naimbag ti kaipapananna. Ania ti kasapulan nga ammuem maipapan iti bautismo? Ania ti kasapulan nga aramidem sakbay ken kalpasan ti bautismo? Masungbatan dagitoy a saludsod iti sumaruno nga artikulo.