1-2. Siasino dagiti makatulong tapno rumang-ay ti mayad-adalan iti Biblia agingga nga agpabautisar?

“MAGUSTUAK dagiti maad-adalko iti Biblia,” kinuna ni Amy a taga-Fiji. “Ammok a dayta ti kinapudno. Ngem saak la nagbalbaliw ken nagpabautisar idi rinugiak ti makilangen kadagiti kakabsat.” Ipakita ti kapadasan ni Amy daytoy napateg a kinapudno: Agtultuloy a rumang-ay ti mayad-adalan iti Biblia agingga nga agpabautisar no tulongan ti dadduma iti kongregasion.

² Adda maitulong ti tunggal agibumbunannag iti irarang-ay ti kongregasion. (Efe. 4:16) Kinuna ti maysa a payunir nga agnagan Leilani a taga-Vanuatu: “Agtitinnulong kano ti maysa a barrio a mangpadakkel iti maysa nga ubing. Para kaniak, pudno met dayta no iti panagaramid iti adalan; masapul nga agtitinnulong ti kongregasion tapno awaten ti maysa ti kinapudno.” Adda maitulong dagiti kapamilia, gagayyem, ken mannursuro tapno agmataengan ti maysa nga ubing. Matulonganda ti ubing no paregtaenda ken isuroda kenkuana dagiti napapateg a leksion. Umasping iti dayta, makaipaay dagiti agibumbunannag iti balakad, pammaregta, ken nasayaat nga ulidan kadagiti mayad-adalan iti Biblia. Iti kasta, matulonganda ida a rumang-ay agingga nga agpabautisarda.—Prov. 15:22.

3. Ania ti masursurom kadagiti imbaga da Ana, Dorin, ken Leilani?

³ Apay a masapul nga awaten ti agibumbunannag a mangyad-adal iti Biblia ti tulong ti dadduma a kakabsat para iti iyad-adalanna? Kinuna ni Ana nga special pioneer idiay Moldova: “Marigatan ti mangyad-adal a mangipaay iti amin a kasapulan  ti iyad-adalanna a mangrugin a rumang-ay.” Kinuna met ni Dorin, nga special pioneer iti dayta met la a pagilian: “Masansan nga adda maibaga ti dadduma nga agibumbunannag a mangtignay iti puso ti mayad-adalan, a diak pulos napanunot.” Imbaga ni Leilani ti sabali pay a rason: “Ti ayat ken asikaso a maipakita iti mayad-adalan ti makatulong tapno mailasinna a datayo ti ili ni Jehova.”—Juan 13:35.

4. Ania ti usigentayo iti daytoy nga artikulo?

⁴ Ngem mabalin a maisaludsodmo, ‘Ania ti maitulongko iti mayad-adalan iti Biblia tapno rumang-ay uray no saan a siak ti mangikonkondukta iti panagadal?’ Usigentayo dagiti aramidentayo no maawistayo a makikadua a mangyadal iti Biblia ken no ania dagiti aramidentayo no mangrugin a makigimong ti mayad-adalan. Kitaentayo met no kasano a makatulong dagiti panglakayen tapno rumang-ay dagiti mayad-adalan iti Biblia agingga nga agpabautisarda.

5. Ania ti aramidem no naawiska a makikadua a mangyadal iti Biblia?

⁵ Iti panagadal iti Biblia, ti mangyad-adal ti kangrunaan a makinresponsabilidad a mangtulong iti mayad-adalan tapno matarusanna ti Sao ti Dios. No awisennaka ti mangyad-adal a makikadua kenkuana, ibilangmo ti bagim kas partnerna. Ti akemmo ket tumulong kenkuana. (Ecl. 4:9, 10) Ania dagiti espesipiko a maitulongmo tapno nasayaat ti resulta ti panangyadal?

6. No makikaduaka a mangyadal iti Biblia, kasano a mayaplikarmo ti prinsipio iti Proverbio 20:18?

⁶ Agsagana para iti panagadal iti Biblia. Umuna, damagem iti mangyad-adal ti sumagmamano a banag maipapan iti iyad-adalanna. (Basaen ti Proverbio 20:18.) Mabalinmo nga isaludsod: “Ania ti nalikudan ti iyad-adalam? Ania a topiko ti iyadalmo? Ania ti kayatmo a masursurona iti daytoy a panagadal? Adda kadi masapul nga aramidek wenno diak aramiden wenno ibaga bayat ti panagadal? Ania ti mabalin a mangparegta kenkuana a rumang-ay?” Siempre, saan nga ibaga ti mangyad-adal ti aniaman a kompidensial nga impormasion, ngem makatulong ti aniaman a maibagana. Kasta ti ibaga ti misionera nga agnagan Joy kadagidiay makikadua iti panangyadalna iti Biblia. Kinunana: “Makatulong daytoy a panagsarita tapno agbalin nga interesado ti kaduak iti mayad-adalan ket ammonanto ti ibagana bayat ti panagadal.”

7. Apay a masapul nga agsaganaka no makikaduaka a mangyadal?

⁷ No naawiska a makikadua a mangyadal, nasayaat nga isaganam ti mapagadalan. (Esd. 7:10) Kinuna ni Dorin a nadakamaten itay: “Maragsakanak no agsagana ti kaduak a mangyadal. Iti kasta, makaipaay iti nabagas a  komento.” Kasta met, mabalin a madlaw ti mayad-adalan a nakasaganakayo a dua, ket nasayaat nga ulidan dayta kenkuana. Uray dika nakapagsagana a naimbag, ammuem koma uray dagiti kangrunaan laeng a punto iti mayadal.

8. Kasano a masiguradom nga ad-adda a makagunggona ti kararagmo iti maysa a panangyadal iti Biblia?

⁸ Ti panagkararag ket napateg a paset ti panangyadal iti Biblia, isu a panunotem a nasaksakbay ti ibagam no makiddaw a sika ti mangikararag. Iti kasta, ad-adda a magunggonaan ti mayad-adalan iti kararagmo. (Sal. 141:2) Malagip pay laeng ni Hanae a taga-Japan dagiti kararag ti maysa a sister a nakikadua iti mangyad-adal kenkuana iti Biblia. Imbagana: “Nariknak a natibker ti pannakigayyemna ken Jehova ket kayatko a tuladen isuna. Nariknak met a maipatpategak idi inramanna ti naganko kadagiti kararagna.”

9. Sigun iti Santiago 1:19, ania ti maitulongmo iti maysa a panangyadal iti Biblia?

⁹ Suportaram ti mangyad-adal bayat ti panagadal. “Makatulong ti maysa a kadua no dumngeg a naimbag bayat ti panagadal,” imbaga ni Omamuyovbi nga special pioneer idiay Nigeria. “Mabalin a makaipaay ti partner iti nabagas a komento ngem saan koma nga isu ti makaadu nga agsao, ta saan met nga isu ti mangidadaulo iti panagadal.” Kaanoka ngarud nga agkomento ken ania ti ibagam? (Prov. 25:11) Dumngegka a naimbag bayat nga agsasao ti mangyad-adal ken ti iyad-adalanna. (Basaen ti Santiago 1:19.) Iti kasta, nakasaganaka a tumulong no mayanatup. Siempre, masapul nga agpanunotka sakbay nga agsaoka. Kas pagarigan, dimo unay kaaduen ti agsao, saanka a sumampitaw no adda madama nga ilawlawag ti mangyad-adal, wenno saanka a mangibaga iti sabali a topiko. Ngem makatulongka a mangilawlawag iti maysa a punto babaen ti ababa a komento, ilustrasion, wenno saludsod. No dadduma, mabalin nga awan unay ti maibagam maipapan iti topiko a maad-adal. Ngem no komendaram ti mayad-adalan ken ipakitam a maseknanka kenkuana, adu ti maitulongmo tapno rumang-ay.

10. Kasano a makatulong iti maysa a mayad-adalan ti kapadasam?

¹⁰ Iyestoriam ti kapadasam. No maitutop, estoriaem biit iti mayad-adalan no kasano a naammuam ti kinapudno, no kasano a napagballigiam ti maysa a problema, wenno no kasano a nakitam a tinulongannaka ni Jehova. (Sal. 78:4, 7) Baka dayta ti kasapulan a mangngeg ti mayad-adalan iti Biblia. Mabalin a mapabileg ti pammatina wenno maparegta nga itultuloyna ti rumang-ay agingga nga agpabautisar. Mabalin met a dayta ti mangisuro kenkuana no kasano a mapagballigianna ti mapaspasaranna a suot. (1 Ped. 5:9) Ni Gabriel a  taga-Brazil a payunir itan, malagipna ti nakatulong kenkuana idi mayad-adalan pay laeng. Imbagana: “No mangngegko idi ti kapadasan dagiti kakabsat, ammok a makitkita ni Jehova dagiti karit a pakaipaspasanguantayo. No napagballigianda dagita, kayak met.”

11-12. Apay a masapul a sibabara nga abrasaentayo ti mayad-adalan no makigimong?

¹¹ Tapno rumang-ay ti maysa a mayad-adalan iti Biblia agingga nga agpabautisar, masapul a regular a makigimong tapno mabenepisiaran. (Heb. 10:24, 25) Awisen la ketdi isuna ti mangyad-adal kenkuana tapno makigimong. No umatender, maparegtatayo amin isuna a kanayon a makigimong. Kasano?

¹² Sibabara nga abrasaem ti mayad-adalan. (Roma 15:7) No marikna ti mayad-adalan a maawat isuna kadagiti gimong, baka kaykayatnanton ti agtultuloy a makigimong. Tapno saan nga alusiisen ti mayad-adalan, sibabara a kablaawam, ken iyam-ammom iti sabsabali. Kasaritam gapu ta baka di pay simmangpet ti mangyad-adal kenkuana wenno adda sabali nga as-asikasuenna. Denggem a naimbag ti ibaga ti mayad-adalan ken ipakitam a maseknanka kenkuana. Ania ti mabalin nga epekto ti nabara a panangabrasam kenkuana? Kitaentayo ti kapadasan ni Dmitrii, a nabiit pay a nabautisaran ken maysan a ministerial nga adipen. Inyestoriana ti damo a pannakigimongna: “Nakitanak ti maysa a brother nga agur-urayak a madandanagan iti ruar ti Kingdom Hall ket kinuyognak a simrek. Adu ti immay nangkablaaw kaniak. Talaga a nasdaawak. Nagustuak unay dayta nga uray la kayatko nga inaldaw koma nga adda gimong. Diak pay pulos napadpadasan dayta.”

13. Ania ti mabalin nga epekto ti kababalinmo iti maysa a mayad-adalan?

¹³ Ipakitam ti nasayaat nga ulidan. Mabalin a makatulong ti kababalinmo tapno makombinsir ti iyad-adalam a nabirokannan ti kinapudno. (Mat. 5:16) Imbaga ni Vitalii, a payunir itan idiay Moldova: “Nakitak ti kabibiag, panagpampanunot, ken panagtigtignay ti dadduma iti kongregasion. Dayta ti nakakombinsirak a dagiti Saksi ni Jehova ti pudno nga agdaydayaw iti Dios.”

14. Kasano a makatulong ti ulidanmo tapno agtultuloy a rumang-ay ti maysa a mayad-adalan?

¹⁴ Tapno kualipikado nga agpabautisar ti mayad-adalan, masapul nga iyaplikarna dagiti nasursurona. Saan a kaskarina dayta. Ngem no makitana a magunggonaanka iti panangyaplikarmo kadagiti prinsipio ti Biblia, mabalin a matignay a mangtulad kenka. (1 Cor. 11:1) Kitaentayo ti kapadasan ni Hanae a nadakamat itay. Imbagana: “Iyap-aplikar dagiti kakabsat dagiti maad-adalko. Nakitak no kasano nga agbalinak a makaparegta,  manangpakawan, ken naayat. Kanayon a positibo ti ibagbagada maipapan iti sabsabali. Kayatko a tuladen ida.”

15. Kasano a mayaplikartayo ti Proverbio 27:17 iti maysa a mayad-adalan?

¹⁵ Gayyemem ti mayad-adalan. Bayat nga agtultuloy a makigimong ti mayad-adalan, itultuloymo nga ipakita a maseknanka kenkuana. (Fil. 2:4) Ikagumaam nga am-ammuen. Komendaram ti panagrang-ayna, ken komustaem ti panagadalna iti Biblia, ti pamiliana, ken ti trabahona. Ngem agannadka a saan koma a personal unay dagiti saludsodmo. Posible nga agbalinkayo a nasingsinged gapu kadagita a saritaan. No gayyemem ti mayad-adalan, tultulongam a rumang-ay agingga nga agpabautisar. (Basaen ti Proverbio 27:17.) Regular pioneer itan ni Hanae. Inyestoriana ti damo a pannakigimongna: “Idi addan gagayyemko iti kongregasion, segseggaakon dagiti gimong, ket immatenderak uray nabambannogak. Maragragsakanak a makikadua kadagiti baro a gagayyemko. Gapu iti dayta, naisardengko ti makigayyem kadagiti saanko a kapammatian. Kayatko a nasingsingedak ken Jehova ken kadagiti kakabsat, isu a nagpabautisarak.”

16. Ania pay ti aramidem tapno matulongam ti mayad-adalan nga agbalin a naragsak iti kongregasion?

¹⁶ Bayat a rumangrang-ay ti mayad-adalan, ipariknam a paset isuna ti kongregasion. Maaramidmo dayta no managpadaguska. (Heb. 13:2) Malagip ni Denis a taga-Moldova idi mayad-adalan pay laeng iti Biblia: “Namin-adu a naimbitarankami ken baketko a makilangen kadagiti kakabsat. Naparegtakami idi inyestoriada no kasano a tinulongan ida ni Jehova. Dagitoy nga okasion ti nangkombinsir kadakami nga agserbi ken Jehova ken adda nagsayaat a biag nga agur-uray kadatayo.” No kualipikadon ti mayad-adalan iti Biblia nga agbalin nga agibumbunannag, mabalinmo metten nga awisen a makikadua kenka iti ministerio. Imbaga ni Diego, a kabsat a taga-Brazil: “Adu a kakabsat ti mangaw-awis kaniak iti ministerio. Dayta ti kasayaatan a pamay-an tapno maam-ammok ida a naimbag. Gapu iti dayta, adu ti nasursurok, ken nariknak a nasingsingedak kada Jehova ken Jesus.”

17. Kasano a matulongan dagiti panglakayen dagiti mayad-adalan iti Biblia?

¹⁷ Mangiwayakayo iti tiempo para kadagiti mayad-adalan iti Biblia. Dakayo a panglakayen, ti naayat nga interesyo ti makatulong kadagiti mayad-adalan a rumang-ay agingga nga agpabautisarda. Mabalin kadi a regular a makisaritakayo kadagiti mayad-adalan iti Biblia kadagiti gimong? Mariknada nga interesadokayo kadakuada no matandaananyo ti naganda, nangruna no mangrugidan nga agkomento.  Mabalin kadi nga iyurnosyo ti masansan a pannakikadua iti maysa a kabsat no mangyadal iti Biblia? Mabalin a nagdakkel ti maitulong dayta iti mayad-adalan ngem iti ipagarupyo. Inyestoria ni Jackie a payunir a taga-Nigeria: “Adu a mayad-adalan ti masdaaw no maammuanda a ti kaduak a mangyadal kadakuada ket maysa a panglakayen. Imbaga ti maysa a mayad-adalan iti Biblia: ‘Saan a pulos nga aramiden dayta ti pastormi. Babaknang laeng ti sarsarungkaranna ken no laeng bayadanda isuna!’” Makigimgimongen dayta a mayad-adalan.

18. Kasano a maitungpal dagiti panglakayen ti responsabilidad a naitalek kadakuada kas kuna ti Aramid 20:28?

¹⁸ Sanayen ken paregtaenyo dagiti mangyad-adal iti Biblia. Dakayo a panglakayen, adda napateg a responsabilidadyo a tumulong kadagiti agibumbunannag nga agbalin nga epektibo iti ministerioda, a pakairamanan ti panangyadalda iti Biblia. (Basaen ti Aramid 20:28.) No mabain ti maysa a mangikondukta iti panagadal iti Biblia a kaduadakayo, ibagayo a dakayo ti mangikondukta. Imbaga ni Jackie a nadakamat itay: “Kanayon a komustaen kaniak dagiti panglakayen dagiti iyad-adalak iti Biblia. No marigatanak a mangyadal, mangipaayda iti makatulong a balakad.” Dakkel ti maitulong dagiti panglakayen a mangparegta ken mangtignay kadagiti mangyad-adal. (1 Tes. 5:11) Innayon ni Jackie: “Magusgustuak no paregtaendak dagiti panglakayen ken ibagada nga ap-apresiarenda ti panagreggetko. Makapabang-ar kaniak dagita a kas iti sangabaso a nalamiis a danum iti napudot nga aldaw. Pumigsa ti pakinakemko gapu iti komendasionda ken naragragsakak a mangyadal iti Biblia.”—Prov. 25:25.

19. Ania ti makaparagsak kadatayo amin?

¹⁹ Uray awan pay ti iyad-adalantayo iti Biblia, adda latta matulongantayo a rumang-ay iti naespirituan. Uray no saan a datayo ti makaadu nga agsao, matulongantayo ti mangyad-adal no isaganatayo a naimbag dagiti komentotayo. Mabalintayo a gayyemen dagiti mayad-adalan no makigimongda iti Kingdom Hall, ken agbalintayo a nasayaat nga ulidan kadakuada. Maparegta met dagiti panglakayen dagiti mayad-adalan no mangiwayada iti tiempo para kadakuada. Maparegtada met dagiti mangyad-adal no sanayen ken komendaranda ida. Sigurado a nakaragragsaktayo no adda maaramidantayo, uray bassit laeng, tapno matulongan ti maysa a mangayat ken agserbi iti Amatayo, ni Jehova!