1. Ania dagiti kita ti suot a mapaspasaran dagiti adipen ni Jehova?

ADDA kadi narigat a problema a mapaspasaram? Baka adda kabsat a nangpasakit kenka. (Sant. 3:2) Wenno uy-uyawennaka dagiti katrabahuam wenno kaeskuelaam gapu ta agserserbika ken Jehova. (1 Ped. 4:3, 4) Wenno baka paspasardengendaka dagiti kapamiliam a makigimong wenno mangasaba. (Mat. 10:35, 36) No nakarigrigat ti pakasuotam, baka kayatmon ti sumuko. Ngem makapagtalekka nga aniaman ti problemam, ikkannaka ni Jehova iti sirib a mangsango iti dayta ken bileg nga agibtur.

2. Sigun iti Roma 15:4, ania ti maitulong ti panangbasatayo iti Sao ti Dios?

² Impaisurat ni Jehova iti Saona dagiti detalyado a salaysay no kasano nga inibturan dagiti imperpekto a tattao dagiti narigat a suot. Apay? Tapno makasursurotayo. Dayta ti impaisurat ni Jehova ken apostol Pablo. (Basaen ti Roma 15:4.) Mangted iti liwliwa ken namnama ti panangbasatayo kadagita a salaysay. Ngem tapno magunggonaantayo, adda pay ti masapul nga aramidentayo ngem iti basta panangbasa laeng iti Biblia. Masapul a palubosantayo ti Kasuratan a mangmolde iti isiptayo ken mangtukay iti pusotayo. Ania ti aramidentayo no kasapulantayo ti balakad gapu iti problematayo? Mabalintayo nga aramiden dagitoy uppat nga addang: (1) Agkararag, (2) Agimadyin, (3) Agutob, ken (4) Iyaplikar. Pagsasaritaantayo no ania ti karaman kadagita nga addang. * Kalpasanna, usarentayo daytoy a pamay-an ti panagadal tapno makasursurotayo kadagiti pasamak iti biag ni Ari David ken ni apostol Pablo.

3. Sakbay a basaem ti Biblia, ania ti masapul nga aramidem, ken apay?

 ³ (1) Agkararag. Sakbay a basaem ti Biblia, agpatulongka ken Jehova tapno makitam no kasano a matulongannaka ti basaem. Kas pagarigan, no kasapulam ti balakad gapu iti problemam, agpatulongka ken Jehova tapno mabirokam dagiti prinsipio iti Saona a mangiwanwan kenka.—Fil. 4:6, 7; Sant. 1:5.

4. Ania ti makatulong tapno napaypayso kenka ti maysa a salaysay ti Biblia?

⁴ (2) Agimadyin. Inikkannatayo ni Jehova iti nakaskasdaaw nga abilidad nga agimadyin. Tapno napaypayso kenka ti salaysay ti Biblia, padasem nga imadyinen ti eksena ket sika ti kangrunaan a karakter. Padasem a panunoten dagiti banag a nakitana ken riknaem dagiti emosion a nariknana.

5. Ania ti panagutob, ken kasanom nga aramiden?

⁵ (3) Agutob. Ti panagutob ket ti panangpanunot a naimbag iti binasam ken no kasano nga agaplikar dayta kenka. Makatulong dayta tapno mapagkokonektarmo dagiti ideya ken mas maawatam ti maysa a topiko. Ti panagbasa iti Biblia a dika agutob ket kas iti panangkita kadagiti piesa ti jigsaw puzzle iti lamisaan ngem saanmo met nga asembolen dagita. Ti panagutob ket kas iti panamagsisilpo kadagita a piesa tapno makitam ti intero a ladawan. Tapno makapagutobka, mabalinmo nga isaludsod ken sungbatan dagitoy: ‘Ania ti inaramid ti kangrunaan a karakter iti salaysay tapno matulonganna ti bagina? Kasano a tinulongan ni Jehova? Kasanok a mausar dagiti nasursurok tapno maibturak dagiti suot?’

6. Apay a masapul nga iyaplikartayo dagiti masursurotayo?

⁶ (4) Iyaplikar. Imbaga ni Jesus a no ditay iyaplikar dagiti masursurotayo, kaslatayo iti maysa a tao a nangbangon iti balayna iti kadaratan. Nagbannog ngem sayang laeng ti panagreggetna. Apay? Ngamin, idi nagbagyo ken naglayus, narba ti balayna. (Mat. 7:24-27) Iti umasping a pamay-an, no agkararagtayo, agimadyintayo, ken agutobtayo ngem ditay iyaplikar dagiti nasursurotayo, sayang laeng ti panagreggettayo. No adda suot wenno pannakaidadanes a mangsubok iti pammatitayo, saanto a natibker dayta. Ngem no agadaltayo ken iyaplikartayo dagiti masursurotayo, makaaramidtayo iti nasaysayaat a desision, nataltalna ti panunottayo, ken natibtibker ti pammatitayo. (Isa. 48:17, 18) Usarentayo daytoy uppat nga addang a napagsasaritaantayo, ket kitaentayo dagiti masursurotayo iti maysa a pasamak iti biag ni Ari David.

7. Ania a salaysay iti Biblia ti usigentayo?

⁷ Adda kadin gayyemmo wenno kapamiliam a nangdadael iti panagtalekmo kenkuana? No wen, makatulong ti panangrepasom iti salaysay maipapan iti anak ni Ari David a ni Absalom, a nangtraidor ken amana ken nangpadas a mangagaw iti pagarian.—2 Sam. 15:5-14, 31; 18:6-14.

8. Ania ti mabalinmo nga aramiden tapno matulongannaka ni Jehova?

⁸ (1) Agkararag. Bayat a pampanunotem ti salaysay, ibagam ken Jehova ti marikriknam iti saan a nasayaat a pannakatratom. (Sal. 6:6-9) Espesipikoka koma. Sa kiddawem ken Jehova a tulongannaka a mangkita kadagiti prinsipio a mangiwanwan kenka bayat nga ib-ibturam daytoy narigat a kasasaad.

9. Ania ti napasamak iti nagbaetan da David ken Absalom?

⁹ (2) Agimadyin. Panunotem dagiti pasamak iti salaysay ken imadyinem no kasano a naapektaran ni Ari David. Adu a tawen nga inkagumaan ti anakna a ni Absalom a gun-oden  ti pammateg dagiti umili. (2 Sam. 15:7) Idi impagarup ni Absalom a daydin ti umiso a tiempo, nangibaon kadagiti espia iti intero nga Israel a mangisagana kadagiti umili a mangawat kenkuana kas agturay. Nakombinsirna pay ketdi ti maysa a nasinged a gayyem ken mamalbalakad ni David a ni Ahitofel a makiraman iti panagrebelde. Indeklara ni Absalom ti bagina kas ari ken pinadasna a tiliwen ken patayen ni David, a mabalin a nakaro ti sakitna iti daydi a tiempo. (Sal. 41:1-9) Naammuan ni David ti plano isu a pimmanaw idiay Jerusalem. Idi agangay, naglaban ti armada ni Absalom ken dagiti matalek a soldado ni David. Naabak ti rebelde nga armada, ket napapatay ni Absalom nga anak ni David.

10. Ania koma ti posible a reaksion ni Ari David?

¹⁰ Sumaruno, imadyinem ti posible a rikna ni David iti amin a mapaspasamak kenkuana. Impatpategna unay ni Absalom ken nagtalek ken Ahitofel. Ngem trinaidor dagita a dua a nasinged kenkuana. Sinaktanda unay ken pinadasda pay ketdi a patayen. Posible koma a napukaw ni David ti panagtalekna iti dadduma a gagayyemna, ket nagsuspetsa a nakikapponda metten ken Absalom. Mabalin a ti la koman bagina ti pinampanunotna ken agmaymaysan a pimmanaw iti pagilian. Wenno mabalin koma a simmuko lattan gapu iti pannakaupay. Ngem awan kadagita ti inaramid ni David. Imbes ketdi, napagballigianna dagitoy narigat a kasasaad. Ania ti nakatulong kenkuana?

11. Ania ti inaramid ni David iti daytoy narigat a situasion?

¹¹ (3) Agutob. Ania dagiti prinsipio a masursurom iti daytoy a salaysay? Sungbatam ti saludsod nga, “Ania ti inaramid ni David tapno matulonganna ti bagina?” Saan unay a nagdanag ni David ken saan a sidadarasudos a nagaramid kadagiti di nainsiriban a desision. Dina met intantan ti agdesision gapu iti sobra a panagbuteng. Imbes ketdi, nagpatulong ken Jehova. Nagpatulong met kadagiti gagayyemna. Ken dagus a nagtignay a mangipatungpal kadagiti desisionna. Uray no nasaktan unay ni David, dina nagsuspetsaan ti sabsabali ken saan a nagsakit ti nakemna. Intultuloyna ketdi ti nagtalek ken Jehova ken kadagiti gagayyemna.

12. Ania ti inaramid ni Jehova tapno matulonganna ni David?

¹² Kasano a tinulongan ni Jehova ni David? No ag-research-ka, maammuam nga inikkanna ni David iti bileg a kasapulanna tapno maibturanna dayta a suot. (Sal. 3:1-8; superskripsion) Binendisionan ni Jehova dagiti desision ni David. Ken tinulonganna dagiti matalek a gagayyem ni David idi nakilabanda tapno maprotektaranda isuna.

13. Kasanom a matulad ni David no nasaktannaka unay ti maysa a tao? (Mateo 18:15-17)

¹³ (4) Iyaplikar. Isaludsodmo iti bagim, ‘Kasanok a matulad ni David?’ Masapul nga agtignayka a dagus a mangsolbar iti problema. Depende iti kasasaad, mabalinmo nga iyaplikar ti mismo a balakad ni Jesus iti Mateo kapitulo 18 wenno ti prinsipio iti dayta. (Basaen ti Mateo 18:15-17.) Ngem dika koma sidadarasudos nga agdesision gapu iti emosionmo. Ikararagmo ken Jehova nga ikkannaka iti natalna a puso ken iti sirib a kasapulam tapno masolbarmo ti problema. Itultuloymo ti agtalek kadagiti gagayyemmo ken situtulok nga awatem ti tulongda. (Prov. 17:17) Kangrunaanna, surotem ti balakad kenka ni Jehova manipud iti Saona.—Prov. 3:5, 6.

14. Ania dagiti situasion a mapabilegnaka ti 2 Timoteo 1:12-16; 4:6-11, 17-22?

¹⁴ Busbusorendaka kadi dagiti kapamiliam? Wenno agnanaedka kadi iti pagilian a malimlimitaran wenno maiparparit pay ketdi ti trabaho ti ili ni Jehova? No wen, mabalin a  mapabilegka no basaem ti 2 Timoteo 1:12-16 ken 4:6-11, 17-22. * Insurat ni Pablo dagita a teksto idi adda iti pagbaludan.

15. Ania ti mabalinmo a kiddawen ken Jehova?

¹⁵ (1) Agkararag. Sakbay a basaem dagita a salaysay, ibagam ken Jehova ti problemam ken ti marikriknam iti dayta. Espesipikoka koma. Sa kiddawem ken Jehova a tulongannaka a mangtarus kadagiti prinsipio iti salaysay maipapan kadagiti nakasuotan ni Pablo a makatulong tapno masolbarmo ti agdama a problemam.

16. Ania ti napasamak ken Pablo?

¹⁶ (2) Agimadyin. Imadyinem nga addaka iti kasasaad ni Pablo. Nakakawar iti maysa a pagbaludan idiay Roma. Naibalud idin, ngem mapapatayen iti daytoy a gundaway. Pinanawan ti dadduma a kakaduana, ken nabambannogen.—2 Tim. 1:15.

17. Ania koma ti posible a reaksion ni Pablo?

¹⁷ Mabalin a ti la koma napalabas ti pinampanunot ni Pablo, a no sabali a desision ti pinilina, saan koma a naaresto. Mabalin koma a nagsakit ti nakemna iti dadduma a lallaki iti distrito ti Asia a nangpanaw kenkuana, ken mabalin koma a nagsuspetsa iti dadduma pay a gagayyemna. Ngem awan kadagita ti inaramid ni Pablo. Apay a nagtalek latta kadakuada ken nangnamnama ken Jehova?

18. Ania ti reaksion ni Pablo iti napasaranna a suot?

¹⁸ (3) Agutob. Sungbatam ti saludsod a, “Kasano a tinulongan ni Pablo ti bagina?” Uray dandanin mapapatay ni Pablo, nagpokus iti kangrunaan nga isyu—ti panangidaydayaw ken Jehova. Ken intultuloyna a pinanunot no kasano a maparegtana ti dadduma. Nagpannuray ken Jehova babaen ti regular a panagkararag. (2 Tim. 1:3) Imbes a sangkapanunotna dagidiay nangpanaw kenkuana, inyebkasna ti naimpusuan a panagyaman iti naayat a suporta ti gagayyemna a simamatalek a timmulong kenkuana iti praktikal a pamay-an. Intultuloy met ni Pablo nga adalen ti Sao ti Dios. (2 Tim. 3:16, 17; 4:13) Kangrunaan iti amin, naan-anay a nagtalek nga isu ket ay-ayaten ni Jehova ken ni Jesus. Saanda a binaybay-an ni Pablo ken ginunggonaanda iti matalek a panagserbina.

19. Kasano a tinulongan ni Jehova ni Pablo?

¹⁹ Pinakdaaran ni Jehova ni Pablo a maidadanes gapu ta Kristiano. (Ara. 21:11-13) Kasano a tinulongan ni Jehova ni Pablo? Sinungbatanna dagiti kararag ni Pablo, ken idi agangay, inikkanna iti bileg. (2 Tim. 4:17) Naipasigurado ken Pablo a maawatna ti gunggona nga inkagumaanna a gun-oden. Tinignay met ni Jehova dagiti matalek a gagayyem ni Pablo a tumulong kenkuana.

20. Kasanotayo a matulad ti pammati ni Pablo kas naipakita iti Roma 8:38, 39?

²⁰ (4) Iyaplikar. Isaludsodmo iti bagim, ‘Kasanok a matulad ni Pablo?’ Kas ken Pablo, namnamaentayo a maidadanestayo gapu iti pammatitayo. (Mar. 10:29, 30) Tapno agtalinaedtayo a matalek uray masuottayo, masapul nga agpannuraytayo ken Jehova babaen ti kararag ken kanayon nga adalentayo ti Saona. Ken masapul a laglagipentayo a ti maysa kadagiti kapatgan a maaramidantayo ket ti panangidaydayaw ken Jehova. Masiguradotayo a dinatay pulos baybay-an ni Jehova ken awan ti makapasardeng kenkuana a mangayat kadatayo.—Basaen ti Roma 8:38, 39; Heb. 13:5, 6.

21. Ania ti nakatulong kada Aya ken Hector tapno mapagballigianda dagiti problemada?

²¹ Aniaman ti kasasaadtayo, makatulong dagiti  ulidan iti Biblia tapno maibturantayo dagiti narigat a situasion. Kas pagarigan, imbaga ni Aya a payunir a taga-Japan a nakatulong kenkuana ti pakasaritaan ni Jonas tapno mapagballigianna ti buteng a mangasaba iti publiko. Ni Hector, nga agtutubo a taga-Indonesia ken saan a Saksi dagiti nagannakna, ket natignay iti ulidan ni Ruth nga agsursuro ken Jehova ken agserbi kenkuana.

22. Kasano a naan-anay a magunggonaanka kadagiti drama a naibatay iti Biblia wenno iti serye a “Tuladenyo ti Pammatida”?

²² Pakabirokam kadagiti ulidan iti Biblia a mangpabileg kenka? Makatulong dagiti video ken audio drama-tayo ken ti serye a “Tuladenyo ti Pammatida” tapno agbalin a napaypayso dagiti salaysay iti Biblia. * Sakbay a buyaem, denggem, wenno basaem dagitoy a salaysay a na-research a naimbag, kiddawem a tulongannaka ni Jehova a mangbirok kadagiti espesipiko a punto a mabalinmo nga iyaplikar. Imadyinem a sika ti kangrunaan a karakter. Utobem ti inaramid dagitoy a matalek nga adipen ni Jehova ken no kasano a tinulonganna ida kadagiti problemada. Kalpasanna, iyaplikarmo iti situasionmo dagiti naadalmo. Agyamanka ken Jehova iti tulong nga ipapaayna kenka. Kas panangapresiar iti tulongna, mangbirokka kadagiti gundaway a maparegta ken matulongam ti sabsabali.

23. Sigun iti Isaias 41:10, 13, ania ti inkari ni Jehova nga aramidenna para kadatayo?

²³ Narigat ti biag iti daytoy lubong a kontrolado ni Satanas, ket no dadduma, saantay nga ammo ti aramidentayo. (2 Tim. 3:1) Ngem ditay agdanag wenno agbuteng. Ammo ni Jehova ti mapaspasarantayo. No kasapulantay ti tulong, ikarkarina nga iggamannatayo babaen ti napigsa a makannawan nga imana. (Basaen ti Isaias 41:10, 13.) Naan-anay nga agtalektayo a tulongannatayo ni Jehova ken mangipaay ti Biblia iti bileg a kasapulantayo tapno maibturantayo ti aniaman a problema.