1-2. Ania dagiti masansan a makitatayo no adda dagiti agpabautisar, ken ania ti masapul nga usigem?

 NAKAKITAKA kadin iti maysa a grupo dagiti kandidato iti bautismo? Mangngegmo ti nalawag ken napigsa a bosesda bayat a sungsungbatanda ti dua a saludsod sakbay nga agpabautisarda. Makitam a nakaragragsak dagiti kapamilia ken gagayyemda. Inton dagiti kandidato ket rumkuasen iti danum, makitam a nakaragragsakda ken mangngegmo ti panagpapalakpak. Iti average, rinibu kada lawas ti agbalbalin a dedikado ken bautisado a Saksi ni Jehova a Dios.

² Sika ngay? No pampanunotemon ti agpabautisar, naidumdumaka iti daytoy dakes a lubong ta ‘birbirokem ni Jehova.’ (Sal. 14:1, 2) Agtutuboka man wenno nataengan, nairanta kenka daytoy nga artikulo. Ngem kadatayo metten a nabautisaran, kayattayo met a pabilgen ti determinasiontayo nga agserbi ken Jehova iti agnanayon. Usigentayo ngarud ti tallo iti adu a rason nga agserserbitayo ken Jehova.

3. Apay nga ay-ayaten dagiti agserserbi ken Jehova ti kinapudno ken kinalinteg? (Salmo 119:128, 163)

³ Imbilin ni Jehova iti ilina: “Ayatenyo ti kinapudno.” (Zac. 8:19) Imparegta ni Jesus kadagiti pasurotna a surotenda ti kinalinteg. (Mat. 5:6) Kaipapanan dayta a ti maysa ket masapul a nasged ti tarigagayna nga agaramid iti nalinteg, nasayaat, ken nadalus iti imatang ti Dios. Ay-ayatem kadi ti kinapudno ken kinalinteg? Masiguradomi a wen. Kaguram dagiti kinaulbod ken amin a kinakillo ken kinadakes. (Basaen ti Salmo 119:128, 163.) No agul-ulbod ti maysa, tultuladenna ni Satanas, ti agturturay iti daytoy a lubong. (Juan 8:44; 12:31) Maysa kadagiti kalat ni Satanas ket padaksen ti nasantuan a nagan ni Jehova a Dios. Sipud pay idi nagrebelde ni Satanas idiay Eden, mangiwarwarasen kadagiti kinaulbod maipapan iti Diostayo. Pagparparangenna  a naagum ni Jehova ken saan a napudno nga Agturay a mangipapaidam iti nasayaat kadagiti tattao. (Gen. 3:1, 4, 5) Dagiti kinaulbod ni Satanas maipapan ken Jehova ti agtultuloy a mangsabsabidong iti isip ken puso dagiti tattao. No saan a pilien dagiti tattao nga ‘ayaten ti kinapudno,’ maimpluensiaan ida ni Satanas nga agaramid iti amin a kita ti kinakillo ken kinadakes.​—Roma 1:25-31.

4. Kasano a pampaneknekan ni Jehova nga isu “ti Dios ti kinapudno”? (Kitaen met ti ladawan.)

⁴ Ni Jehova “ti Dios ti kinapudno,” ken sipaparabur nga isursurona ti kinapudno kadagidiay mangay-ayat kenkuana. (Sal. 31:5) Iti panangaramidna iti dayta, aonen ken wayawayaanna ida kadagiti kinaulbod ni Satanas. Isursuro met ni Jehova kadagiti adipenna nga agbalinda a napudno ken nalinteg isu nga addaanda iti respeto iti bagida ken natalna ti panunotda. (Prov. 13:5, 6) Inaramidna kadin kenka dayta bayat nga agad-adalka iti Biblia? Nasursurom a dagiti dalan ni Jehova ti kasayaatan para iti amin a tattao ken para kenka a mismo. (Sal. 77:13) Isu a kayatmo nga aramiden ti ibaga ti Dios a nalinteg. (Mat. 6:33) Kayatmo nga idepensa ti kinapudno ken kayatmo ti tumulong a mangpaneknek a saan a husto ti pammadakes maipapan iti Diostayo a ni Jehova. Kasano a maaramidmo dayta?

5. Kasano a masuportaram ti kinapudno ken ti kinalinteg?

⁵ Mabalinmo a pilien ti pamay-an ti panagbiag nga arigna ibagbagam: “Diak pulos patien dagiti kinaulbod ni Satanas, ken supsuportarak ti kinapudno. Kayatko a ni Jehova ti mangituray kaniak, ken kayatko nga aramiden ti ibagbagana nga umiso.” Kasano a maaramidmo dayta? Agkararagka ken Jehova ken idedikarmo ti bagim kenkuana. Kalpasanna, ipakaammom iti publiko dayta a dedikasionmo babaen ti panagpabautisarmo. Ti panangayatmo iti kinapudno ken iti kinalinteg ti nabileg a pakatignayam nga agdesision nga agpabautisar.

6. Ania dagiti rason nga ibaga kenka ti Salmo 45:4 isu nga ay-ayatem ni Jesu-Kristo?

⁶ Apay nga ay-ayatem ni Jesu-Kristo? Kitaentayo ti dadduma a makakombinsir a rason iti Salmo 45:4. (Basaen.) Ay-ayaten ni Jesus ti kinapudno, kinapakumbaba, ken kinalinteg. No ay-ayatem ti kinapudno ken ti kinalinteg, ay-ayatem met ngarud ni Jesu-Kristo. Panunotem no kasano a situtured nga indepensa ni  Jesus ti kinapudno ken ti kinalinteg. (Juan 18:37) Ngem kasano nga insuro ni Jesus ti kinapakumbaba?

7. Ania ti magusgustuam maipapan iti kinapakumbaba ni Jesus?

⁷ Insuro ni Jesus ti kinapakumbaba babaen ti ulidanna. Kas pagarigan, inturongna ken Amana ti amin a dayaw, saan a pulos nga iti bagina. (Mar. 10:17, 18; Juan 5:19) Ania ti mariknam iti kasta a kinapakumbabana? Saannaka kadi a matignay a mangayat iti Anak ti Dios ken mangsurot iti ulidanna? Sigurado a wen. Apay a napakumbaba ni Jesus? Gapu ta ay-ayatenna ken tultuladenna ti napakumbaba nga Amana. (Sal. 18:35; Heb. 1:3) Saan kadi nga umasideg ti riknam ken Jesus, a perpekto a nangtulad kadagiti kualidad ni Jehova?

8. Apay nga ay-ayatentayo ni Jesus kas Aritayo?

⁸ Ay-ayatentayo ni Jesus kas Aritayo ta isu ti kasayaatan nga Agturay. Ni Jehova a mismo ti nangsanay iti Anakna ken nangdutok kenkuana nga agturay. (Isa. 50:4, 5) Panunotem met ti managsakripisio nga ayat nga impakita ni Jesus. (Juan 13:1) Kas Arim, maikari unay ni Jesus iti ayatmo. Inlawlawagna a dagidiay talaga a mangay-ayat kenkuana​—dagidiay aw-awaganna iti gagayyemna​—maipakitada nga ay-ayatenda isuna no agtulnogda kadagiti bilinna. (Juan 14:15; 15:14, 15) Anian a pribilehio ti agbalin a gayyem ti Anak ni Jehova!

9. Ania ti pagpadaan ti bautismo dagiti Kristiano ken ti bautismo ni Kristo?

⁹ Ti maysa nga imbilin ni Jesus ket agpabautisar dagiti pasurotna. (Mat. 28:19, 20) Inyulidanna dayta. Adda nagdumaan ti bautismo ni Jesus ken ti bautismo dagiti pasurotna. (Kitaen ti kahon a “ Ti Bautismo ni Jesus ken ti Bautismo Dagiti Pasurotna​—Dagiti Nagdumaanda.”) Ngem adda met nagpadaanda. Idi nagpabautisar ni Jesus, indatagna ti bagina tapno aramidenna ti pagayatan ni Amana. (Heb. 10:7) Agpabautisar met dagiti pasurot ni Kristo tapno ipakitada iti publiko nga indedikardan ti bagida ken Jehova a Dios. Naisentron ti biagda iti panangaramid iti pagayatanna, saan a ti pagayatanda. Isu a tultuladenda ti ulidan ti Apoda.

10. Apay a ti koma ayatmo ken Jesus ti mangtignay kenka nga agpabautisar?

¹⁰ Mamatika a ni Jesus ti bugbugtong nga Anak ni Jehova ken ti Ari a dinutokan ti Dios a mangituray kadatayo. Naammuam a napakumbaba ni Jesus ken tultuladenna ni Amana iti perpekto a pamay-an. Naadalmo a pinakanna dagiti mabisin, liniwliwana dagiti maup-upay, ken pinaimbagna pay ketdi dagiti masakit. (Mat. 14:14-21) Makitkitam no kasano nga idadauluanna ita ti kongregasionna. (Mat. 23:10) Ken ammom met nga ad-adunto pay nga amang dagiti aramidenna iti masanguanan kas Ari ti Pagarian ti Dios. Kasano a maipakitam nga ay-ayatem ni Jesus? Tuladem ti ulidanna. (Juan 14:21) Mairugim nga aramiden dayta no idedikarmo ti bagim ken Jehova ken agpabautisarka.

11. Ania ti kapatgan a rason nga agpabautisarka, ken apay?

¹¹ Ania ti kapatgan a rason nga agpabautisarka? Daytoy ti imbaga ni Jesus a kangrunaan kadagiti bilin ti Dios: “Masapul nga ayatem ni Jehova a Diosmo iti amin a pusom ken amin a kararuam ken amin a panunotmo ken amin a pigsam.” (Mar. 12:30) Kasta kadi ti panagayatmo iti Dios?

12. Apay nga ay-ayatem ni Jehova? (Kitaen met ti ladawan.)

¹² Nagadu ti rason nga ay-ayatentayo ni Jehova. Kas pagarigan, naawatam nga isu “ti ubbog ti biag” ken ti Manangipaay iti “tunggal nasayaat ken perpekto a sagut.” (Sal. 36:9; Sant.  1:17) Amin a naimbag a banag a tagtagiragsakem ket naggapu iti naparabur ken naayat a Diostayo.

13. Apay a ti subbot ket nagsayaat a sagut?

¹³ Ti subbot ket nagsayaat a sagut ni Jehova kadatayo. Apay a maibagatayo dayta? Panunotentayo ti nasinged a relasion ni Jehova ken ti Anakna. Imbaga ni Jesus: “Ay-ayatennak ti Ama” ken “ay-ayatek ti Ama.” (Juan 10:17; 14:31) Bayat ti panagkaduada iti binilion a tawen, simminged a simminged la ketdi ti relasionda. (Prov. 8:22, 23, 30) Isu a panunotentayo ti saem a narikna ti Dios idi impalubosna nga agsagaba ken matay ti Anakna. Situtulok nga intedna ti dungdungnguenna nga Anak kas daton tapno adda gundawaymo ken ti dadduma pay nga agbiag nga agnanayon. Apay nga inaramidna dayta? Ay-ayaten unay ni Jehova ti amin a tattao​—a pakairamanam. (Juan 3:16; Gal. 2:20) Dayta ti kangrunaan a rason nga ay-ayatentayo ti Dios.

14. Ania ti kasayaatan pay laeng a kalat iti biag a mabalinmo a ragpaten?

¹⁴ Umun-uneg ti ayatmo ken Jehova bayat nga umad-adu ti masursurom maipapan kenkuana. Sigurado a kayatmo ti agbalin a nasingsinged kenkuana ita ken iti agnanayon. Maaramidmo dayta. Siaayat nga iparparegtana kenka a paragsakem ti pusona. (Prov. 23:15, 16) Maaramidmo dayta saan la nga iti sao no di ket  uray iti aramid. Ti wagas ti panagbiagmo ti pakakitaanto a talaga nga ay-ayatem ni Jehova. (1 Juan 5:3) Dayta ti kasayaatan pay laeng a kalat iti biag a mabalinmo a ragpaten.

15. Kasanom a maipakita nga ay-ayatem ni Jehova?

¹⁵ Kasanom a maipakita nga ay-ayatem ni Jehova? Umuna, umasidegka iti kakaisuna a pudno a Dios babaen ti espesial a kararag tapno idedikarmo ti biagmo kenkuana. (Sal. 40:8) Kalpasanna, ipakaammom iti publiko dayta a personal a panagdedikarmo babaen ti panagpabautisarmo. Kas napagsasaritaantayon kadagiti immuna a parapo, ti panagpabautisarmo ket naragsak ken napateg a kanito iti biagmo. Rugiamon ti baro a wagas ti panagbiag. Agbiagkan para ken Jehova, saan a para iti bagim. (Roma 14:8; 1 Ped. 4:1, 2) Kasla nagdakkel a desision dayta, ket talaga a kasta. Ngem luktanna ti gundaway tapno matagiragsakmo ti kasayaatan a biag. Kasano?

16. Sigun iti Salmo 41:12, ania a gunggona ti ipaay ni Jehova kadagidiay mangusar iti biagda nga agserbi kenkuana?

¹⁶ Ni Jehova ti kapaparaburan iti amin. Aniaman ti itedmo kenkuana, kanayon nga ad-adu nga amang ti isubadna. (Mar. 10:29, 30) No usarem ti biagmo nga agserbi ken Jehova, ipaayannaka iti makaparagsak, makagunggona, ken makapnek unay a biag, uray iti daytoy arigna agngangabiten a lubong. Ken pangrugian laeng dayta. Awan patinggana ti biag a mangrugi iti panagpabautisarmo, ta mabalinmo ti agserbi iti ay-ayatem nga Amam iti agnanayon. Agtultuloy nga umun-uneg ti ayat kenka ti Amam ken ti ayatmo kenkuana, ken kinaagpaysuanna, agbiagka pay ketdi iti agnanayon a kas kenkuana ta isu ket sibibiag iti agnanayon.​—Basaen ti Salmo 41:12.

17. Ania ti maitedmo ken Jehova nga awan pay kenkuana?

¹⁷ No idedikarmo ti biagmo iti Dios ken agpabautisarka, adda pribilehiom a mangted iti banag a talaga nga ipatpateg ti Amam. Impaayna kenka ti amin a nasayaat a banag, amin a nakallalagip a paset ti biagmo, a talaga a natagiragsakmo. Kas pangsubadmo, maitedmo iti Makinkukua iti langit ken daga ti banag nga awan pay kenkuana​—ti situtulok ken naipamaysa  a panagserbim. (Job 1:8; 41:11; Prov. 27:11) Adda pay kadi sabali a nasaysayaat a pangusaram iti biagmo? Awan duadua a ti ayatmo ken Jehova ti kasayaatan a rason nga agpabautisarka.

18. Ania dagiti isaludsodmo iti bagim?

¹⁸ Ania ngarud ti sungbatmo iti daytoy a saludsod, Agpabautisarka kadi? Sika laeng ti makasungbat iti dayta. Ngem makatulong kenka no isaludsodmo iti bagim, ‘Ania pay ti ur-urayek?’ (Ara. 8:36) Laglagipem ti tallo a rason a napagsasaritaantayon. Umuna, ay-ayatem ti kinapudno ken kinalinteg. Isaludsodmo iti bagim, ‘Kayatko kadi a makita ti tiempo a ti amin ket agsasaonton iti kinapudno ken agar-aramid iti kinalinteg?’ Maikadua, ay-ayatem ni Jesu-Kristo. Isaludsodmo iti bagim, ‘Kayatko kadi a ti Anak ti Dios ti Arik, ken kayatko a suroten ti ulidanna?’ Maikatlo ken kangrunaan iti amin, ay-ayatem ni Jehova. Isaludsodmo iti bagim, ‘Kayatko kadi a paragsaken ti puso ni Jehova babaen ti panagserbik kenkuana kas Diosko?’ No wen ti sungbatmo kadagita a saludsod, apay ngarud a saanka pay a nagpabautisar? Ania pay ti ur-urayem?​—Ara. 16:33.

19. Apay a saanka koma nga agpangadua nga agpabautisar? Iyilustrar. (Juan 4:34)

¹⁹ No agpangpangaduaka nga agpabautisar, panunotem ti ilustrasion nga inusar ni Jesus. (Basaen ti Juan 4:34.) Siputam ta ti panangaramid iti pagayatan ni Amana ket impadana iti taraon. Apay? Pagsayaatantayo ti pannangan. Ammo ni Jesus nga amin nga ipapaaramid ni Jehova ket pagsayaatantayo. Saan a kayat ni Jehova nga aramidentayo ti aniaman a pagdaksantayo. Kayat kadi ni Jehova nga agpabautisarka? Wen. (Ara. 2:38) Masiguradom ngarud a pagsayaatam no agtulnogka iti bilin nga agpabautisarka. No kasano a saanka nga agpangadua a mangan iti kaiimasan a makan, apay koma nga agpangaduaka nga agpabautisar?

20. Ania ti usigentayo iti sumaruno nga artikulo?

²⁰ Ania pay ti ur-urayem? Ti sungbat ti adu iti dayta a saludsod ket, “Diak pay nakasagana.” Kinapudnona, ti desision nga agdedikar ken Jehova ken agpabautisar ti kapatgan a desision nga aramidem. Isu a tapno makualipikarka, kasapulan ti tiempo, panangpanunot a naimbag, ken napasnek a panagregget. Ngem no talaga a nasged ti tarigagaymo nga agpabautisar, ania dagiti masapul nga aramidem ita tapno maisaganam ti bagim? Masungbatan dayta iti sumaruno nga artikulo.