1. Ania ti pagbilbiliban ti adu nga interesado nga umat-atender kadagiti gimongtayo? (Kitaen met ti ladawan.)

 IMADYINENYO ti agassawa a damoda ti makigimong iti Kingdom Hall dagiti Saksi ni Jehova. Bilibda unay iti nabara a panangawat dagiti kakabsat ken ti ayat nga ipakpakitada iti maysa ken maysa. Idi agaw-awiddan, imbaga ti asawa a babai ken lakayna, ‘Naiduma dagiti Saksi ni Jehova! Nagragsakda a kakadua.’

2. Apay a naitibkol ti dadduma?

² Talaga a naidumduma ti ayat nga adda iti kongregasion Kristiano. Siempre, imperpekto dagiti Saksi ni Jehova. (1 Juan 1:8) Isu a bayat nga ad-adda a maam-ammotayo dagiti kakabsat, ad-adda met a makitatayo ti dadduma a pagkurkuranganda. (Roma 3:23) Makapaladingit ta adda dagiti nangipalubos a maitibkolda iti kinaimperpekto ti dadduma.

3. Ania ti pakabigbigan dagiti pudno a pasurot ni Jesus? (Juan 13:34, 35)

³ Kitaentayo manen ti pannakatema a teksto daytoy nga artikulo. (Basaen ti Juan 13:34, 35.) Ania ti pakabigbigan dagiti pudno a pasurot ni Kristo? Ayat, saan a kinaperpekto. Siputanyo met ta saan nga imbaga ni Jesus: ‘Maammuanyonto a dakayo dagiti adalak.’ Imbes ketdi, kinunana: “Maammuanto ti amin a dakayo dagiti adalak.” Impakita ngarud ni Jesus a saan la a dagiti pasurotna no di ket uray pay dagiti adda iti ruar ti kongregasion Kristiano ti makabigbig kadagiti pudno a pasurotna gapu iti managsakripisio nga ayatda iti maysa ken maysa.

4. Ania ti mabalin a kayat a maammuan ti dadduma maipapan kadagiti pudno a Kristiano?

 ⁴ Mabalin a pampanunoten ti dadduma a saan a Saksi ni Jehova: ‘Kasano a ti ayat ti pakabigbigan dagiti pudno a pasurot ni Jesus? Kasano nga impakita ni Jesus ti ayat kadagiti apostolna? Ken kasano a posible a matuladtayo ita ti ulidan ni Jesus?’ Nagsayaat no panunoten dagiti Saksi ti sungbat dagita a saludsod. Mabalin a makatulong dayta tapno ad-adda pay a maipakitatayo ti ayat aglalo no maap-apektarantayo iti kinaimperpekto ti maysa ken maysa.​—Efe. 5:2.

5. Ilawlawag ti kaipapanan ti sasao ni Jesus iti Juan 15:12, 13.

⁵ Pinagminar ni Jesus nga adda espesial a klase ti ayat a pakabigbigan dagiti pasurotna. (Basaen ti Juan 15:12, 13.) Siputam ta imbilin ni Jesus kadakuada: “Agiinnayatkayo kas iti panagayatko kadakayo.” Ania ti kaipapanan dayta? Inlawlawag ni Jesus a dayta ket ti managsakripisio nga ayat​—ti ayat a mangtignay pay ketdi iti maysa a Kristiano a matay para iti kapammatianna no kasapulan. b

6. Kasano nga impaganetget ti Sao ti Dios ti kinapateg ti ayat?

⁶ Iti Sao ti Dios, kasta unay ti pannakaipaganetget ti ayat. Dagitoy a bersikulo ti Biblia ti karaman kadagiti paborito ti adu a tattao: “Ti Dios ket ayat.” (1 Juan 4:8) “Masapul nga ayatem ti kaarrubam a kas iti bagim.” (Mat. 22:39) “Ti ayat abbonganna ti adu a basol.” (1 Ped. 4:8) “Ti ayat saan a pulos agpatingga.” (1 Cor. 13:8) Nalawag nga ipakita dagitoy a bersikulo ken ti dadduma pay a nagpateg nga iparangarang daytoy nagpintas a kualidad.

7. Apay a di pulos mapagkaykaysa ni Satanas dagiti tattao babaen ti pudno nga ayat?

 ⁷ Isalsaludsod ti adu a tattao: ‘Kasanok a mailasin ti pudno a relihion? Ibagbaga ti amin a relihion nga isursuroda ti kinapudno, ngem agduduma met ti isursuroda maipapan iti Dios.’ Adu a tattao ti naallilaw ni Satanas ta nangpataud iti nagadu nga ulbod a relihion. Ngem saan a pulos a makapataud isuna iti sangalubongan a panagkakabsat dagiti Kristiano nga agiinnayat. Ni Jehova laeng ti makaaramid iti dayta. Ngamin, ni Jehova ti pagtataudan ti pudno nga ayat. Adda laeng dayta iti grupo dagiti agdaydayaw a pangipapaayanna iti espiritu ken pamendisionna. (1 Juan 4:7) Masdaawtayo kadi ngarud iti imbaga ni Jesus a ti managsakripisio nga ayat ti pakabigbigan dagiti pudno a pasurotna?

8-9. Idi nakita ti adu ti panagiinnayat dagiti Saksi ni Jehova, ania ti epekto dayta kadakuada?

⁸ Kas iti impakpakauna ni Jesus, adu ti makailasin kadagiti pudno a pasurotna gapu iti pudno nga ayat nga ipakpakitada iti maysa ken maysa. Kas pagarigan, malagip ti brother a ni Ian ti umuna a pannakikombensionna iti maysa nga istadium iti asideg ti balayda. Adda ni Ian iti dayta met laeng nga istadium sumagmamano a bulan ti napalabas tapno agbuya iti ay-ayam. Imbagana: “Dakkel ti nakaidumaan daytoy a kombension. Nasayaat ti kababalin ken panagkawkawes dagiti Saksi ken nasingpet dagiti annakda.” Imbagana pay: “Kangrunaanna, makitak a kontento ken natalna dagitoy a tattao​—banag a tartarigagayak unay. Awan ti malagipko iti aniaman a palawag iti dayta nga aldaw, ngem nagtalinaed iti panunotko ti nasayaat a kababalin dagiti Saksi.” c Siempre, ti kasta a kababalin ket resulta ti pudno nga ayattayo iti maysa ken maysa. Gapu ta ay-ayatentayo dagiti kakabsattayo, nasingpet ken nadayaw ti panangtratotayo kadakuada.

⁹ Kasta met laeng ti umuna nga impresion ti brother a ni John idi damona ti makigimong. Imbagana: “Naallukoyak iti nasayaat a panaglalangen . . . ti tunggal maysa sadiay. Panagriknak, kaslada santo. Ti pudpudno nga ayatda ti nangkombinsir kaniak a nasarakakon ti pudno a relihion.” d Paneknekan dagita ken ti adu pay a kapadasan a dagiti agdaydayaw ken Jehova isuda dagiti pudno a Kristiano.

10. Kaano a nangnangruna a maipakitatayo ti Nakristianuan nga ayat? (Kitaen met ti footnote.)

¹⁰ Kas nadakamat iti rugrugi, awan ti perpekto kadagiti kapammatiantayo. No maminsan, makaibaga wenno makaaramidda iti pakasuronantayo. e (Sant. 3:2) Kadagiti kasta a gundaway a nangnangruna a maipakitatayo ti Nakristianuan nga ayat babaen ti reaksiontayo. No maipapan iti dayta a banag, ania ti masursurotayo iti inyulidan ni Jesus?​—Juan 13:15.

11. Ania dagiti saan a nasayaat nga ugali da Santiago ken Juan? (Kitaen met ti ladawan.)

¹¹ Saan a ninamnama ni Jesus ti kinaperpekto kadagiti pasurotna. Imbes ketdi, siaayat a tinulonganna ida a mangbalbaliw kadagiti saan a nasayaat nga ugalida tapno maalada ti pabor ni Jehova. Iti maysa a gundaway, ti dua nga apostolna a da Santiago ken Juan imbagada ken ni nanangda a kiddawenna ken Jesus  nga ikkanna ida iti prominente a posision iti Pagarian. (Mat. 20:20, 21) Impakita ngarud idi da Santiago ken Juan ti kinapannakkel ken kinaambisioso.​—Prov. 16:18.

12. Da Santiago ken Juan laeng kadi ti nangipakita kadagiti saan a nasayaat nga ugali? Ilawlawag.

¹² Saan laeng a da Santiago ken Juan ti nangipakita kadagiti saan a nasayaat nga ugali iti dayta a gundaway. Kitaenyo ti reaksion ti dadduma nga apostol: “Idi nangngeg dayta ti 10 pay nga apostol, nasuronda [wenno, nakapungtotda] kadagiti agkabsat.” (Mat. 20:24) Maimadyintayo la ketdi ti panagsisinnungbat da Santiago, Juan, ken ti dadduma nga apostol kadagiti makapasakit a sasao. Baka kastoy ti imbaga ti dadduma: ‘Asinokayo iti panagkunayo tapno agkiddawkayo iti nangato a posision iti Pagarian? Apay, dakayo laeng kadi ti agbambannog a makipagtrabaho ken Jesus? Uray dakami, maikarikami met kadagiti espesial a pribilehio!’ Aniaman ti mabalin nga imbagada, impalubos dagiti apostol a temporario a maawan kadakuada ti nainkabsatan a panagayatda.

13. Ania ti reaksion ni Jesus kadagiti pagkurangan dagiti apostolna? (Mateo 20:25-28)

¹³ Ania ti reaksion ni Jesus iti dayta a situasion? Saan a nakapungtot. Dina imbaga nga agbiroken kadagiti nasaysayaat nga apostol, dagidiay napakpakumbaba ken kanayon a naayat ti panangtratoda iti maysa ken maysa. Imbes ketdi, naanus a nakisarita ni Jesus  kadakuada ta ammona a kayatda nga aramiden ti husto. (Basaen ti Mateo 20:25-28.) Nagtultuloy a naayat ti panangtratona kadakuada uray no saan a daytoy ti umuna ken maudi a gundaway a nagdidiskusionan dagiti apostol no asino kadakuada ti katan-okan.​—Mar. 9:34; Luc. 22:24.

14. Ania a kultura ti dimmakkelan dagiti apostol ni Jesus?

¹⁴ Awan duadua nga inkabilangan ni Jesus ti kultura a dimmakkelan dagiti apostol. (Juan 2:24, 25) Isursuro idi dagiti lider ti relihion a nakapatpateg ti kinaprominente ken posision. (Mat. 23:6; idilig ti video a The Front Seats in the Synagogue iti study note ti Mateo 23:6.) Kasta met, managinlilinteg dagiti Judio a lider ti relihion. f (Luc. 18:9-12) Naawatan ni Jesus nga adda epektona ti kasta a kultura iti panangkita dagiti apostol iti bagida ken iti dadduma. (Prov. 19:11) Realistiko ti namnamaenna kadagiti adalanna. Idi met rimmuar ti pagkapuyanda, saan a nakapungtot. Ammona a nasayaat ti panagpuspusoda, isu nga inan-anusanna ida a tinulongan tapno maparutda ti kinapannakkel ken kinaambisioso ket ayat ti isukatda kadagita.

15. Ania ti masursurotayo iti pasamak a nakairamanan da Santiago ken Juan?

¹⁵ Adu ti masursurotayo iti pasamak a nakairamanan da Santiago ken Juan. Kamali ti inaramidda idi kiniddawda ti nangato a posision iti Pagarian. Ngem kamali met ti inaramid ti dadduma nga apostol ta impalubosda a mapukaw ti panagkaykaysada iti dayta a situasion. Nupay kasta, nasingpet ken naayat ti panangtrato ni Jesus iti amin a 12 nga apostol. Ti leksion? Napateg ngarud a saan laeng a dagiti kamali ken pagkurangan ti dadduma ti panunotentayo no di ket uray pay ti reaksiontayo kadagita. Ania ti makatulong kadatayo? No masurontayo iti kapammatiantayo, isaludsodtayo iti bagitayo: ‘Apay a masuronak unay iti inaramidna? Ipakita kadi daytoy nga adda ti saan a nasayaat nga ugalik a masapul a balbaliwak? Baka adda met problemana? Uray no adda kalintegak a masuron, mabalinko ngata nga ipakita ti managsakripisio nga ayat ket palabsek lattan ti inaramidna?’ No ad-adda a naayat ti panangtratotayo iti dadduma, ad-adda met a mapaneknekantayo a datayo ket pudno a pasurot ni Jesus.

16. Ania pay ti masursurotayo iti ulidan ni Jesus?

¹⁶ Isuro pay ti ulidan ni Jesus nga ikagumaantayo a tarusan dagiti kapammatiantayo. (Prov. 20:5) Agpayso a saantayo a kaya a basaen ti puso a kas ken Jesus. Ngem kayatayo a bennaten ti aanusantayo kadagiti pagkapuyan dagiti kakabsat. (Efe. 4:1, 2; 1 Ped. 3:8) Nalaklakatayo nga aramiden dayta no mas maam-ammotayo ida. Kitaentayo ti maysa a pagarigan.

17. Kasano a nakatulong iti maysa a manangaywan iti sirkito idi inam-ammona a naimbag ti maysa a kapammatianna?

¹⁷ Malagip ti maysa nga agdaldaliasat a manangaywan iti East Africa ti maysa a brother a panagriknana idi ket narigat a pakilangenan ti personalidadna. Ania ti reaksion ti manangaywan iti sirkito? Imbagana: “Imbes a liklikak, inkagumaak nga inam-ammo a naimbag ti kabsat.” Idi inaramid dayta ti manangaywan iti sirkito, naammuanna ti  dadduma maipapan iti pannakapadakkel ti kabsat a nangimpluensia iti personalidadna. Intuloy ti manangaywan iti sirkito: “Apaman a naawatak no kasano ti rigatna a nanglaban iti kasta a nalikudan ken no kasano kadakkelen ti nagrang-ayanna, naapresiarko ti kabsat. Nagbalinkami a nasinged nga aggayyem.” Wen, no ikagumaantayo a tarusan dagiti kakabsattayo, masansan a nalaklakatayo ida nga ayaten.

18. Ania dagiti mabalin nga isaludsodtayo iti bagitayo no nasaktannatayo ti maysa a kapammatiantayo? (Proverbio 26:20)

¹⁸ Mabalin a mariknatayo no dadduma a masapul a kasaritatayo ti kapammatiantayo a nangpasakit kadatayo. Ngem nasayaat no isaludsodtayo nga umuna dagitoy iti bagitayo: ‘Ammok kadi a talaga ti amin a napasamak?’ (Prov. 18:13) ‘Saan ngata nga awan met ti intensionna a saktanna ti riknak?’ (Ecl. 7:20) ‘Naaramidko kadi metten dayta?’ (Ecl. 7:21, 22) ‘No kasaritak ti kabsat, kumaro la kadi ti problema imbes a masolbar?’ (Basaen ti Proverbio 26:20.) No panunotentayo nga umuna dagita a saludsod, mabalin a makitatayo a ti ayattayo iti kabsat ti mangtignay kadatayo a mangpalabas lattan iti inaramidna.

19. Ania ti determinasionmo?

¹⁹ Kas grupo, pampaneknekan dagiti Saksi ni Jehova nga isuda dagiti pudno nga adalan ni Jesus. Kas indibidual, mapaneknekantayo a pudnotayo a pasurot ni Jesus no ipakitatayo ti managsakripisio nga ayat kadagiti kakabsattayo uray imperpektoda. Bayat nga ar-aramidentayo dayta, matulongantayo ti dadduma a mangilasin iti pudno a relihion ket makikaduada kadatayo nga agdaydayaw ken Jehova, ti Dios ti ayat. Determinadotayo koma nga itultuloy nga ipakita ti ayat a pakabigbigan dagiti pudno a Kristiano.