1-2. No saanka pay a nakasagana nga agpabautisar, apay a saanka koma a maupay? (Kitaen ti ladawan iti akkub.)

 NO KAYATMO ti agpabautisar, nagsayaat dayta a kalatmo. Nakasaganaka kadin nga agpabautisar? No panagkunam ket nakasaganakan ken immanamongen dagiti panglakayen, saanka nga agpangadua a mangaramid iti dayta inton sumaruno a gundaway. Agur-uray kenka ti naragsak a biag bayat nga agserserbika ken Jehova.

² Ngem adda kadin nangibaga kenka nga adda pay dagiti masapul a parang-ayem sakbay nga agpabautisarka? Wenno sika a mismo ti nakarikna iti dayta? No wen, saanka a maupay. Kayam ti rumang-ay ken maragpatmonto met laeng dayta a napateg a kalat, ubingka man wenno nataengan.

3. Ania ti insaludsod ti Etiope nga opisial ti palasio ken Felipe, ken ania ti tumaud a saludsod? (Aramid 8:36, 38)

³ Basaen ti Aramid 8:36, 38. Insaludsod ti Etiope nga opisial ti palasio ken Felipe nga ebanghelisador: “Ania ti makalapped kaniak a mabautisaran?” Kayat ti Etiope ti agpabautisar, ngem talaga kadi a nakasaganan a mangaramid iti dayta a napateg nga addang?

4. Kasano nga impakita ti Etiope a determinado nga agtultuloy nga agsursuro?

⁴ Ti Etiope ket “napan idiay Jerusalem tapno agdaydayaw.” (Ara. 8:27) Maysa la ketdi isuna a Judio a proselita a nakomberte iti Judaismo. Sigurado a naammuanna ti maipapan ken Jehova manipud kadagiti nasantuan a sursurat iti Hebreo a Kasuratan. Ngem kayatna unay a maammuan ti ad-adu pay. Kinapudnona, idi nagkitada ken Felipe iti dalan, ania ti nakita ni Felipe nga ar-aramidenna? Basbasaenna ti lukot nga insurat ni propeta Isaias. (Ara. 8:28) Natangken a naespirituan a taraon dayta. Saan a kontento ti opisial ti palasio kadagiti simple laeng  a kinapudno; kayatna nga itultuloy ti agsursuro.

5. Ania ti inaramid ti Etiope kadagiti naammuanna?

⁵ Ti lalaki ket nangato nga opisial ni Reyna Candace ti Etiopia; isu ti “paraaywan iti amin a gamengna.” (Ara. 8:27) Adu la ketdi ti ar-aramidenna ken responsabilidadna. Ngem nangiwaya iti tiempo tapno agdaydayaw ken Jehova. Saan a kontento iti panangammona iti kinapudno; inyaplikarna dagiti naammuanna. Nagbiahe ngarud manipud Etiopia agingga iti templo idiay Jerusalem tapno agdaydayaw ken Jehova. Napaut ken nagastos la ketdi dayta a biahe. Ngem para kenkuana, saan a sayang dayta ta kayatna ti agdaydayaw ken Jehova.

6-7. Kasano a nagtultuloy nga immuneg ti panagayat dayta nga Etiope ken Jehova?

⁶ Adda dagiti napateg a baro a kinapudno a naammuan ti Etiope manipud ken Felipe a pakairamanan ti kinasiasino ti Mesias. (Ara. 8:34, 35) Sigurado a naragsakan daytoy nga opisial ti palasio idi naammuanna ti inaramid ni Jesus para kenkuana. Ania ti reaksionna? Mabalin a nagtalinaed latta koman a mararaem a Judio a proselita. Ngem immuneg ti ayatna ken Jehova ken iti Anakna a ni Jesus. Natignay a mangaramid iti napateg a desision nga agpabautisar kas pasurot ni Jesu-Kristo. Nakita ni Felipe a nakasagana ti Etiope, isu a binautisaranna.

⁷ No surotem ti ulidan ti Etiope, makapagsaganaka para iti bautismo. Sigurado nga addanto met kompiansam a mangibaga, “Ania ti makalapped kaniak a mabautisaran?” Pagsasaritaantayo no kasanom a matulad dagiti addang nga inaramid ti Etiope: Intultuloyna ti nagsursuro, inyaplikarna dagiti naammuanna, ken intultuloyna a pinauneg ti ayatna iti Dios.

8. Ania ti ibaga ti Juan 17:3 a masapul nga aramidem?

⁸ Basaen ti Juan 17:3. Dagita kadi nga imbaga ni Jesus ti nakatulong tapno agdesisionka nga agpayadal iti Biblia? Pudno dayta iti adu kadatayo. Ngem saan kadi nga ibagbaga met dagita a sasao nga itultuloytayo ti agsursuro? Wen. Ditayto pulos sumardeng a “mangam-ammo [iti] maymaysa a pudno a Dios.” (Ecl. 3:11) Agnanayon nga itultuloytayo ti agsursuro. No ad-adu ti masursurotayo, nasingsingedtayo ken Jehova.​—Sal. 73:28.

9. Ania ti masapul nga aramidentayo kalpasan a naammuantayo dagiti kangrunaan a pannursuro ti Biblia?

⁹ Natural laeng a no kayatmo nga ammuen ti maipapan ken Jehova, mangrugi dayta kadagiti kangrunaan a pannursuro ti Biblia. Iti surat ni apostol Pablo kadagiti Hebreo, tinukoyna dagiti kangrunaan a pannursuro ti Biblia kas dagiti “pagdamdamuan a bambanag.” Saanna a tagtagibassiten “ti pagdamdamuan  a doktrina”; ikomkomparana dayta iti gatas a taraon ti maladaga. (Heb. 5:12; 6:1) Ngem imparegtana met iti amin a Kristiano a saan la a dagiti kangrunaan a pannursuro ti Biblia ti ammuenda no di ket uray pay dagiti naun-uneg a kinapudno iti Sao ti Dios. Nayugalim kadin a kanayon nga ammuen dagiti naun-uneg a pannursuro ti Biblia? Kayatmo kadi ti agtultuloy a rumang-ay ken agtultuloy nga ammuen ti maipapan ken Jehova ken kadagiti panggepna?

10. Apay a marigatan ti dadduma nga agadal?

¹⁰ Ngem para iti adu, narigat ti agadal. Sika ngay? Nasursurom kadi idiay eskuelaan no kasano ti agbasa ken agadal a naimbag? Maay-ayatanka kadi idi nga agadal ta adu ti masursurom? Wenno ipapanmo kadi a saanka a nalaing nga agsursuro babaen kadagiti libro? No wen, saanka nga agmaymaysa. Ngem matulongannaka ni Jehova. Perpekto isuna ken isu ti kasayaatan a Mannursuro.

11. Kasano a pampaneknekan ni Jehova nga isu ‘ti Naindaklan nga Instruktor’?

¹¹ Aw-awagan ni Jehova ti bagina kas “ti Naindaklan nga Instruktoryo.” (Isa. 30:20, 21) Isu ket naanus, naimbag, ken mannakaawat a Mannursuro. Kitkitaenna ti nasayaat kadagiti estudiantena. (Sal. 130:3) Dina pulos ekspektaren ti ad-adu ngem iti kayatayo. Laglagipem, diniseniona ti utekmo. Nagsayaat dayta a sagutna. (Sal. 139:14) Natural laeng a kayattayo ti agsursuro. Kayat ti Namarsua kadatayo nga agsursurotayo iti agnanayon​—ken naragsaktayo a mangaramid iti dayta. Isu a nainsiriban a “tarigagayan[tayo]” itan nga ammuen dagiti kinapudno iti Biblia. (1 Ped. 2:2) Mangaramidka kadagiti kalat a kayam a ragpaten, ken kanayon a surotem ti eskediulmo nga agbasa ken agadal iti Biblia. (Jos. 1:8) Iti bendision ni Jehova, kanayonton a magusgustuam ti agbasa ken agsursuro iti ad-adu maipapan kenkuana.

12. Apay a masapul nga agpokustayo ken Jesus iti personal a panagadaltayo?

¹² Regular nga utobem ti biag ken ministerio ni Jesus. Ti panangsurottayo a naimbag kadagiti addang ni Jesus ket nagpateg iti panagserbitayo ken Jehova, nangruna kadagitoy narigat a tiempo. (1 Ped. 2:21) Nalawag nga imbaga ni Jesus dagiti problema a pakaipasanguan dagiti pasurotna. (Luc. 14:27, 28) Ngem agtalek nga agballigi dagiti pudno a pasurotna a kas kenkuana. (Juan 16:33) Adalem dagiti detalye ti biag ni Jesus, ken mangaramidka kadagiti kalat tapno inaldaw a matuladmo isuna.

13. Ania ti masapul nga itultuloymo a kiddawen ken Jehova, ken apay?

¹³ Saan a pulos nga umanay ti pannakaammo laeng. Kasapulam met ketdi dayta tapno maawatam ti ad-adu maipapan ken Jehova ken mapatanormo dagiti kualidad a kas iti ayatmo ken pammatim kenkuana. (1 Cor. 8:1-3) Ngem bayat nga itultuloymo ti agsursuro, itultuloymo a kiddawen ken Jehova a patibkerenna ti pammatim. (Luc. 17:5) Sipaparabur a sungbatanna dagiti kasta a kararag. Ti pudno a pammati a naibatay iti umiso a pannakaammo maipapan iti Diostayo ti makatulong kenka a rumang-ay.​—Sant. 2:26.

14. Kasano nga intampok ni apostol Pedro ti kinapateg ti panangyaplikar kadagiti naammuantayo? (Kitaen met ti ladawan.)

¹⁴ Intampok ni apostol Pedro no kasano kapateg kadagiti pasurot ni Kristo ti agtultuloy a panangyaplikar kadagiti naammuanda. Dinakamatna ti salaysay ti Biblia maipapan ken Noe. Imbaga ni Jehova ken Noe a babaen ti layus, dadaelenna dagiti dakes a tattao iti daydi a tiempo. Saan nga umanay ti basta panangammo nga adda layus tapno maisalakan ni Noe ken ti pamiliana. Siputam ta ti tiempo a dinakamat  ni Pedro ket sakbay ti Layus “bayat a maibangbangon ti daong.” (1 Ped. 3:20) Wen, inyaplikar ni Noe ken ti pamiliana ti naammuanda manipud iti Dios babaen ti panangaramidda iti daong, maysa a nagdakkel a barko. (Heb. 11:7) Kalpasanna, ti inaramid ni Noe ket impada ni Pedro iti bautismo. Insuratna: “Ti bautismo, a katupag daytoy, ti mangisalakan met kadakayo ita.” (1 Ped. 3:21) No kasta, ti ar-aramidem ita a panagsagana para iti bautismo ket mabalintayo nga ipada iti inaramid idi ni Noe ken ti pamiliana a panangibangon iti daong iti adu a tawen. Ania dagiti masapul nga aramidem tapno makapagsaganaka para iti bautismo?

15. Kasanotayo nga ipakita ti pudno a panagbabawi?

¹⁵ Ti maysa kadagiti umuna a masapul nga aramidentayo ket ti naimpusuan a panagbabawi kadagiti basoltayo. (Ara. 2:37, 38) Ti pudno a panagbabawi ket agresulta iti pudno a panagbalbaliw. Insardengmo kadin ti aniaman nga aramid a kagura ni Jehova kas iti immoral a panagbiag, panagsigarilio, wenno panagsao iti naalas wenno makapasakit? (1 Cor. 6:9, 10; 2 Cor. 7:1; Efe. 4:29) No saan pay, itultuloymo nga ikagumaan ti agbalbaliw. Makisaritaka iti mangyad-adal kenka iti Biblia, wenno agpatulong ken agpabalakadka kadagiti panglakayen iti kongregasion. No ubing wenno agtutuboka pay laeng nga adda iti poder dagiti nagannakmo, kanayon nga agpatulongka kadakuada tapno maisardengmo ti aniaman a dakes nga aramid a mabalin a makalapped iti panagpabautisarmo.

16. Ania ti karaman iti nasayaat a naespirituan a rutina?

¹⁶ Napateg met ti panangsurot iti nasayaat a naespirituan a rutina. Karaman iti dayta ti panagatender kadagiti Nakristianuan a gimong ken pannakipaset kadagita. (Heb. 10:24, 25) Ket no kualipikadokan a mangasaba, pagbalinem met daytan a paset ti rutinam. No kanayon a makipasetka iti dayta a trabaho a mangsalbar iti biag, ad-addanto a magustuam dayta. (2 Tim. 4:5) No ubing wenno agtutuboka pay laeng nga adda iti poder dagiti nagannakmo, isaludsodmo iti bagim: ‘Masapul pay la kadi nga ipalagip kaniak dagiti nagannakko a makigimongak wenno mangasabaak? Wenno saanen a kasapulan?’ No aramidem dagita a sibubulos ti riknam, ipakpakitam ti pammatim, ayat, ken panagyamanmo ken Jehova a  Dios. Dagita ti “mangipakita iti debosion[mo] iti Dios,” dagiti sagutmo ken Jehova. (2 Ped. 3:11; Heb. 13:15) Amin a sagut a naimpusuan a maited ken saan a mapilpilit ket makaparagsak iti Diostayo. (Idilig ti 2 Corinto 9:7.) Ar-aramidentayo dagita ta pagragsakantayo nga ited ti kasayaatantayo ken Jehova.

17-18. Ania a napateg a kualidad ti makatulong kenka a rumang-ay agingga nga agpabautisarka, ken apay? (Proverbio 3:3-6)

¹⁷ Bayat nga itultuloymo ti rumang-ay agingga nga agpabautisarka, maipasangokanto kadagiti karit. Baka addanto manguyaw kenka gapu iti baro a pammatim; baka busoren wenno idadanesdaka pay ketdi. (2 Tim. 3:12) Bayat nga agporporsegika a mangisardeng iti maysa a dakes nga aramid, mabalin a no dadduma, maaramidmo manen dayta. Wenno baka saanka a makaan-anus ken maup-upayka ta kasla marigatanka a mangragpat iti kalatmo. Ania ti makatulong kenka nga agibtur? Ti nagpateg a kualidad​—ti ayatmo ken Jehova.

¹⁸ Ti ayatmo ken Jehova ket maysa a nagpintas a kualidad, ti kasayaatan nga adda kenka. (Basaen ti Proverbio 3:3-6.) Ti nauneg a panagayatmo iti Dios ti makatulong tapno mapagballigiam dagiti problema iti biag. Masansan a dakamaten ti Biblia ti napudno nga ayat ni Jehova para kadagiti adipenna. Ti napudno nga ayat ni Jehova kaipapananna a dina pulos baybay-an dagiti adipenna wenno dina pulos isardeng nga ayaten ida. (Sal. 100:5) Naaramidka a kaladladawan ti Dios. (Gen. 1:26) Kasanom a maipakita ti kasta a klase ti ayat?

19. Kasanom a maipakita nga agyamyamanka unay gapu iti amin nga inaramid ni Jehova para kenka? (Galacia 2:20)

¹⁹ Umuna, agbalinka a managyaman. (1 Tes. 5:18) Iti kada aldaw, isaludsodmo iti bagim, ‘Kasano nga ipakpakita ni Jehova nga ay-ayatennak?’ Kalpasanna, siguraduem nga iyebkasmo ken Jehova ti panagyamanmo kadagiti kararagmo. Espesipiko a dakamatem dagiti bambanag nga inaramidna para kenka. Panunotem nga ar-aramidenna dagita para kenka a mismo ta ay-ayatennaka. Kasta ti nabigbig ni apostol Pablo maipapan ken Jehova. (Basaen ti Galacia 2:20.) Isaludsodmo iti bagim, ‘Kayatko kadi nga ipakita ken Jehova nga ay-ayatek met isuna?’ Ti ayatmo kenkuana ti tumulong tapno agtultuloy a malabanam dagiti sulisog ken mapagballigiam dagiti problema. Dayta ti mangtignay kenka nga agtultuloy a  mangidaydayaw iti Amam a ni Jehova, tapno maipakitam nga inaldaw nga ay-ayatem isuna.

20. Ania ti masapul nga aramidem tapno maidedikarmo ti biagmo ken Jehova, ken kasano kapateg dayta a desision?

²⁰ Inton agangay, gapu iti ayatmo ken Jehova, matignayka a mangidedikar iti biagmo iti Dios babaen ti espesial a kararag. Laglagipem a no nagdedikarkan ken Jehova, maaddaanka iti daytoy a nagsayaat a namnama: Kukuanakan iti agnanayon. No idedikarmo ti biagmo ken Jehova, ikarkarim nga agserbika kenkuana, nasayaat man wenno narigat ti kasasaad. Saanen a pulos a kasapulan nga ulitem dayta. Agpayso a no agdedikartayo, mangar-aramidtayo iti napateg nga addang wenno desision. Ngem panunotem daytoy: Adunto ti aramidem a desision iti biagmo. Dadduma ket nagsayaat. Ngem ti kasayaatan a desision a maaramidmo ket ti panangidedikarmo iti biagmo ken Jehova. (Sal. 50:14) Ikagumaanto ni Satanas a pabaawen ti ayatmo iti Amam, bareng no isukom ti integridadmo. Dimo pulos ipalubos a mangabak ni Satanas! (Job 27:5) Ti nauneg nga ayatmo ken Jehova ti makatulong tapno matungpalmo ti dedikasionmo ken lallalo a sumingedka iti nailangitan nga Amam.

21. Apay a maibagatayo a ti bautismo ket pangrugian, saan a pagpatinggaan?

²¹ Kalpasan a nagdedikarka ken Jehova, makisaritaka kadagiti panglakayen iti kongregasionyo maipapan iti sumaruno a napateg nga addang. Ngem kanayon a laglagipem a ti bautismo ket saan a pagpatinggaan, no di ket pangrugian. Pangrugian dayta ti awan patinggana a panagserbim ken Jehova. Isu a paunegem itan ti ayatmo iti Amam. Mangaramidka kadagiti kalat tapno inaldaw nga umuneg nga umuneg dayta nga ayatmo. No aramidem dayta, desididokanto la ketdi nga agpabautisar. Nakaragragsakto dayta nga aldaw. Ngem pangrugian laeng dayta. Sapay koma ta umuneg nga umuneg ti ayatmo ken Jehova ken iti Anakna iti agnanayon!