1-2. Kasano a sumayaat ti biagmo kalpasan ti bautismom?

 NARAGSAKTAYO no agpabautisartayo ken agbalintayo a paset ti pamilia ni Jehova. Maysa a pribilehio ti maaddaan iti nadekket a relasion ken Jehova. Umanamongtayo iti sasao ti salmista a ni David a nangibaga: “Naragsak daydiay piliem [Jehova] ken paasitgem nga agnaed iti paraanganmo.”—Sal. 65:4.

² Saan nga asino lattan ti awisen ni Jehova a mapan iti paraanganna. Kas nailawlawag iti napalabas nga artikulo, kayatna ti umasideg kadagidiay mayat a maaddaan iti nadekket a relasion kenkuana. (Sant. 4:8) No agdedikarka ken Jehova ken agpabautisarka, agbalin a nadekdekket ti relasionmo ken Jehova iti espesial a pamay-an. Masiguradom a kalpasan ti bautismom, ‘ibukbokna kenka ti bendision agingga nga adda aminen a kasapulam.’—Mal. 3:10; Jer. 17:​7, 8.

3. Ania ti serioso a responsabilidad dagiti dedikado ken bautisado a Kristiano? (Eclesiastes 5:​4, 5)

³ Siempre, ti bautismo ket pangrugian laeng. Kalpasan nga inaramidmo dayta nga addang, masapul nga aramidem ti amin a kabaelam tapno matungpalmo ti inkarim idi nagdedikarka, uray no maipasangoka kadagiti pakasuotan wenno pannubok iti pammatim. (Basaen ti Eclesiastes 5:​4, 5.) Kas adalan ni Jesus, masapul a surotem a naimbag ti ulidanna ken dagiti bilinna.  (Mat. 28:​19, 20; 1 Ped. 2:21) Tulongannaka daytoy nga artikulo tapno maaramidmo dayta.

‘ITULTULOYMO A SUROTEN’ NI JESUS URAY ADDA SUOT KEN SULISOG

4. Kasano a ti tunggal adalan ni Jesus bagkatenna ti “kayona a pagtutuokan”? (Lucas 9:23)

⁴ Kalpasan ti bautismom, namnamaem nga addanto nga adda ti problema a pakaipasanguam. Kinapudnona, imbaga ni Jesus a ti tunggal maysa kadagiti adalanna masapul a bagkatenna ti “kayona a pagtutuokan.” Kinaagpaysuanna, “inaldaw” nga aramidenda dayta. (Basaen ti Lucas 9:23.) Ibagbaga kadi ni Jesus a kanayon nga agsagaba dagiti pasurotna? Saan met. Ibagbagana laeng a malaksid kadagiti bendision a maawatda, maipasangoda met kadagiti pannubok. Dadduma kadagitoy a pannubok ket mabalin a nakarigrigat.—2 Tim. 3:12.

5. Ania dagiti bendision nga inkari ni Jesus kadagidiay agsaksakripisio?

⁵ Baka binusordakan dagiti kapamiliam wenno baka insakripisiom ti maaddaan iti ad-adu a kuarta wenno dadduma pay a bambanag tapno mayun-unam ti Pagarian ti Dios iti biagmo. (Mat. 6:33) No kasta, masiguradom nga ammo ni Jehova ti amin nga inaramidmo para kenkuana. (Heb. 6:10) Mabalin a napaneknekam nga agpayso daytoy nga imbaga ni Jesus: “Asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken iti naimbag a damag, ket mamin-100 iti daytoy a tiempo ti awatenna a balay, kakabsat a lallaki, kakabsat a babbai, inna, annak, ken taltalon, agraman pannakaidadanes, ken iti masanguanan a sistema ti bambanag, biag nga agnanayon.” (Mar. 10:​29, 30) Talaga nga ad-adu a bendision ti maawatmo ngem iti aniaman nga insakripisiom.—Sal. 37:4.

6. Apay a masapul nga itultuloymo a labanan “ti tarigagay ti lasag” kalpasan ti bautismom?

⁶ Masapul latta a labanam “ti tarigagay ti lasag” kalpasan ti bautismom. (1 Juan 2:16) Apay? Ngamin, imperpektoka latta. No dadduma, baka mariknam ti kas iti narikna ni apostol Pablo. Insuratna: “Talaga a maragsakanak iti linteg ti Dios maitunos iti kinataok, ngem makitak iti bagik ti sabali pay a linteg a bumusbusor iti linteg ti panunotko ken pagbalbalinennak nga adipen ti linteg ti basol nga adda iti bagik.” (Roma 7:​22, 23) Gapu iti tendensiam nga agbasol, mabalin a maupayka. Ngem no panunotem ti inkarim idi nagdedikarka ken Jehova, mapabileg ti determinasionmo a manglaban iti sulisog. Ti agpayso, makatulong ti inkarim idi nagdedikarka tapno nalaklakam a sanguen dagiti sulisog. Kasano?

7. Kasano a makatulong ti dedikasionmo ken Jehova tapno agtalinaedka a matalek kenkuana?

⁷ Idi nagdedikarka ken Jehova, tinallikudamon ti bagim. Kaipapanan dayta a nagsaankan kadagiti personal a tarigagay ken kalat a kagura ni Jehova. (Mat. 16:24) Isu a no maipasangoka iti pakasuotan, saanmonton a masapul a pagduaduaan no ania ti aramidem. Desididokan no ania ti aramidem—ti agtalinaed a matalek ken Jehova. Agtalinaedka a determinado a mangparagsak ken Jehova. No aramidem dayta, tultuladem ni Job. Uray no naipasango iti nakarigrigat a pannubok, sikokompiansa nga imbagana: “Agtalinaedak nga awan pagkuranganna!”—Job 27:5.

8. Kasano a makatulong kenka a manglaban iti sulisog no panunotem ti kararagmo idi nagdedikarka?

⁸ No panunotem ti kararagmo idi nagdedikarka ken Jehova, mapabilegka a manglaban iti aniaman a sulisog. Kas pagarigan, agalembong wenno ag-flirt-ka kadi iti maysa a  naasawaanen a tao? Sigurado a saan! Nagsaankan iti dayta. No dimo ipalubos nga agtubo iti pusom dagiti saan nga umiso a rikna, awanto ti parutem kalpasanna. “Panawam[to]” la ketdi ti “dana ti managdakdakes.”—Prov. 4:​14, 15.

9. Kasano a ti panangpanunotmo iti kararagmo idi nagdedikarka matulongannaka met nga agtultuloy a mangyun-una kadagiti naespirituan nga aktibidad iti biagmo?

⁹ Kasano ngay no adda nai-offer kenka a trabaho a manglapped iti regular a pannakigimongmo? Ammomon ti aramidem. Nabayag sakbay pay a nai-offer kenka dayta a trabaho, nagsaankan iti kasta a trabaho. Isu a saankan a masulisog a mangawat iti kasta a trabaho samonto ikarigatan nga iyun-una ni Jehova iti biagmo. Makatulong kadatayo ti ulidan ni Jesus. Determinado a mangparagsak iti Amana. Kas ken Jesus, determinadoka koma a dagus a mangliklik iti aniaman a kagura ti Dios a nagdedikaram.—Mat. 4:10; Juan 8:29.

10. Kasano a matulongannaka ni Jehova nga ‘agtultuloy a mangsurot’ ken Jesus kalpasan ti bautismom?

¹⁰ Kinaagpaysuanna, no adda suot ken sulisog, gundawaymo dayta a mangipakita a determinadoka nga ‘agtultuloy a mangsurot’ ken Jesus. Bayat nga ar-aramidem dayta, masiguradom a tulongannaka ni Jehova. Kuna ti Biblia: “Matalek ti Dios, ket dina ipalubos a masulisogkayo iti diyo kabaelan, no di ket mangisagana iti dalan a pagruaran tapno maibturanyo dayta a sulisog.”—1 Cor. 10:13.

NO KASANOM A MAITULTULOY A SUROTEN NI JESUS

11. Ania ti maysa kadagiti kasayaatan a pamay-an tapno maitultuloymo a suroten ni Jesus? (Kitaen met ti ladawan.)

¹¹ Naregta ni Jesus, ken kanayon a nagkararag tapno agtalinaed a nadekket ken Jehova. (Luc. 6:12) Kinapudnona, ti maysa kadagiti kasayaatan a pamay-an tapno maitultuloymo  a suroten ni Jesus kalpasan ti bautismom, ket ti agtultuloy a panangaramidmo kadagiti banag a mas mangpasinged kenka ken Jehova. Kuna ti Biblia: “Aniaman ti nagrang-ayantayon, itultuloytayo ti naurnos a panangsurot iti dayta iti isu met la a pamay-an.” (Fil. 3:16) Adda dagiti tiempo a makangngegka iti kapkapadasan dagiti kakabsattayo a nagdesision a mangpalawa iti panagserbida ken Jehova. Baka nageskuelada iti School for Kingdom Evangelizers wenno timmulongda kadagiti lugar a dakdakkel ti panagkasapulanna. Nagsayaat met no pagbalinem dagita a kalatmo, no ipalubos ti kasasaadmo. Dagiti adipen ni Jehova ket magagaran a mangpalawa iti ministerioda. (Ara. 16:9) Ngem kasano ngay no saanmo pay a kaya nga aramiden dayta ita? Dimo koma ikomkompara ti bagim kadagiti makabael a mangaramid iti dayta. Ti napateg ket itultuloymo ti agibtur. (Mat. 10:22) Saanmo a tagtagibassiten ti pateg ti panagserbim ken Jehova sigun iti abilidad ken kasasaadmo. Maysa dayta a napateg a pamay-an tapno maitultuloymo a suroten ni Jesus kalpasan ti bautismom.—Sal. 26:1.

12-13. Ania ti mabalinmo nga aramiden no bumabaawen ti regtam? (1 Corinto 9:​16, 17) (Kitaen met ti kahon nga “ Agtalinaedka iti Lumba.”)

¹² Ania ti aramidem no panagriknam ket saanen a naimpusuan dagiti kararagmo, wenno saanmon a maen-enjoy ti ministeriom? Kasanon no saanmon a maen-enjoy ti agbasa iti Biblia a kas iti dati? No kasta ti marikriknam kalpasan ti bautismom, dimo ipapan nga awanen kenka ti espiritu ni Jehova. Gapu ta imperpektotayo, agbaliwbaliw ti riknatayo no dadduma. No bumabaawen ti regtam, panunotem ti ulidan ni apostol Pablo. Agpayso nga inkagumaanna a tuladen ni Jesus, ngem adda dagiti gundaway a nariknana a saan a porsegido a mangaramid iti dayta. (Basaen ti  1 Corinto 9:​16, 17.) Imbagana: “Uray no mapilitanak, adda latta kaniak ti annongen a naitalek kaniak.” Kayatna a sawen, determinado latta ni Pablo a mangitungpal iti ministeriona uray no adda dagiti saan a nasayaat a marikriknana iti dayta a gundaway.

¹³ Kasta met, dimo ipalubos a dagiti imperpekto a rikrikna ti mangapektar kadagiti desisionmo. Determinadoka koma a mangaramid iti umiso uray no saanmo a kayat nga aramiden dayta. No itultuloymo nga aramiden dayta, sumayaatto met laeng ti riknam iti panaglabas ti panawen. Kabayatanna, itultuloymo ti nasayaat a naespirituan a rutinam tapno maitultuloymo a suroten ni Jesus kalpasan ti bautismom. No makita dagiti kakabsat ti panagibturmo bayat nga agserserbika ken Jehova, maparegtada met.—1 Tes. 5:11.

“ITULTULOYYO A SUBOKEN . . . ITULTULOYYO A PANEKNEKAN”

14. Ania ti masapul a regular nga usigem, ken apay? (2 Corinto 13:5)

¹⁴ No bautisadokan, makatulong kenka no regular nga usigem ti bagim. (Basaen ti 2 Corinto 13:5.) Sagpaminsan nga usigem ti bagim ken ti rutinam. Inaldaw kadi nga agkarkararagka? Regularka kadi nga agbasbasa ken agad-adal iti Biblia, makigimgimong, ken mangaskasaba? Mangpanunotka kadagiti pamay-an tapno mas ag-enjoy ken magunggonaanka kadagitoy nga aspeto ti panagdaydayawmo. Kas pagarigan, isaludsodmo iti bagim: ‘Mailawlawagko kadi dagiti kangrunaan a pannursuro iti Biblia? Adda kadi pay dagiti pamay-an tapno mas ma-enjoy-ko ti ministeriok? Kasano kaespesipiko dagiti kararagko? Ipakitada kadi a naan-anay nga agtaltalekak ken Jehova? Regular kadi a makigimgimongak? Kasanok pay a mapasayaat ti panagpokus ken panagkomentok kadagiti gimong?’

15-16. Ania ti masursurom iti kapadasan ti maysa a brother maipapan iti pananglaban iti sulisog?

¹⁵ Napateg met nga ammom dagiti pagkapuyam. Inyestoria ti maysa a brother a ni Robert ti kapadasanna a konektado iti dayta a banag: “Idi ag-20 ti tawenko, adda part-time a trabahok. Maysa nga aldaw kalpasan ti trabahok, inawisnak ti katrabahuak a mapan iti balayna. Imbagana a dakdakami laeng kano ken kayatna ti makiseks kaniak. Idi damo, agpampambarak laeng. Ngem idi kuan, imbagak a diak kayat ken inlawlawagko no apay.” Linabanan ni Robert ti sulisog, ket nagsayaat dayta nga inaramidna. Ngem idi sinublianna ti napasamak, naamirisna nga adda koma pay nasaysayaat nga inaramidna iti dayta a situasion. Inaminna: “Saanko a natulad ti kinatibker ken ti  dagus a panagkedked ni Jose idi ginargari ti asawa ni Potifar. (Gen. 39:​7-9) Kinaagpaysuanna, nagrigat gayam ti agsaan. Dayta a pasamak ti timmulong kaniak tapno makitak a masapul a patibkerek pay ti relasionko ken Jehova.”

¹⁶ Makatulong met kenka no usigem ti bagim kas iti inaramid ni Robert. Uray nalabanam ti sulisog, isaludsodmo iti bagim, ‘Kasano kabayag sakbayak a nagsaan?’ No maamirismo nga adda pay dagiti masapul a balbaliwam, saanka a maupay. Agyamanka ketdi ta nakitam ti pagkapuyam. Ikararagmo dayta ken mangaramidka kadagiti pamay-an tapno tumibker ti determinasionmo a mangsurot kadagiti pagalagadan ni Jehova iti moral.—Sal. 139:​23, 24.

17. Kasano a nairaman ti nagan ni Jehova iti kapadasan ni Robert?

¹⁷ Adda pay maadaltayo iti kapadasan ni Robert. Intuloyna: “Idi nagsaanakon iti awis ti katrabahuak, imbagana, ‘Nakapasaka!’ Dinamagko no ania ti kayatna a sawen. Inlawlawagna nga adda kano gayyemna a dati a Saksi a nangibaga nga amin nga agtutubo a Saksi ket doble kara ti panagbiagda ken sililimed nga agaramidda iti dakes no adda gundaway. Isu nga imbagana iti dayta a gayyemna a subokennak. Imbag laengen ta diak timmulok iti kayatna. Ket naidaydayawko ti nagan ni Jehova.”

18. Ania ti determinasionmo kalpasan ti bautismom? (Kitaen met ti kahon a “ Serye a Magustuamto.”)

¹⁸ No agdedikarka ken Jehova ken agpabautisarka, ipakpakitam a kayatmo a santipikaren ti naganna aniaman ti mapasamak. Ket masiguradom nga ammo ni Jehova dagiti suot a pakaipaspasanguam ken dagiti sulisog a lablabanam. Bendisionanna dagiti panagreggetmo nga agtalinaed a matalek. Agtalekka a babaen ti nasantuan nga espirituna, mapabilegnaka a mangaramid iti dayta. (Luc. 11:​11-13) Iti tulong ni Jehova, maitultuloymo a suroten ni Jesus kalpasan ti bautismom.