1. Ania ti dadduma a bendision a matagtagiragsaktayo gapu ta pasettayo ti organisasion ni Jehova?

 TALAGA a bendision ti agbalin a paset ti organisasion ni Jehova bayat daytoy nagrigat a maudi nga al-aldaw. Dumakdakes a dumakdakes daytoy a lubong ngem ipapaayannatayo ni Jehova kadagiti kakabsat a tumulong kadatayo. (Sal. 133:1) Tultulongannatayo tapno agbalin a naragsak ti pamiliatayo. (Efe. 5:33–6:1) Ken ipapaayannatayo iti pannakatarus ken sirib tapno natalged ti riknatayo ken natalna ti isiptayo.

2. Ania ti masapul nga aramidentayo, ken apay?

² Ngem masapul nga ikagumaantayo ti agserbi ken Jehova a simamatalek. Apay? Gapu ta mabalin a masaktantayo gapu iti kinaimperpekto dagiti kakabsattayo. Baka masurontayo pay ketdi iti bagitayo no makaaramidtayo iti kamali, lalo no maulit-ulit a maaramidtayo dagita. Masapul nga itultuloytayo latta ti agserbi ken Jehova uray (1) no nasaktannatayo ti maysa a kapammatiantayo, (2) no nadismayanatayo ti asawatayo, ken (3) no masurontayo iti bagitayo. Iti daytoy nga artikulo, pagsasaritaantayo dagitoy a tallo a situasion. Iti kada situasion, usigentayo met dagiti masursurotayo iti maysa a matalek a karakter iti Biblia.

ITULTULOYMO TI AGSERBI KEN JEHOVA NO NASAKTANNAKA TI MAYSA A KAPAMMATIAN

3. Ania a karit ti pakaipaspasanguan dagiti agserserbi ken Jehova?

³ Ti karit. Baka adda ugali ti dadduma a kapammatiantayo a pakasuronantayo. Mabalin nga upayendatayo ti dadduma wenno saan a nasayaat ti panangtratoda kadatayo. Agkamali met dagiti  mangidadaulo kadatayo. Dagitoy a problema ti mabalin a rason ti dadduma nga agduadua a daytoy ti organisasion ti Dios. Imbes nga itultuloyda ti agserbi iti Dios iti “abagan-abaga” a kadua dagiti kakabsat, mabalin a sumardengdan a makikadua kadagiti nakasair iti riknada wenno saanda pay ketdin a makigimong. (Sof. 3:9) Nainsiriban kadi dayta? Usigentayo dagiti masursurotayo iti maysa a karakter iti Biblia a nakapadas iti kasta a problema.

4. Ania a karit ti nakaipasanguan ni apostol Pablo?

⁴ Ti ulidan iti Biblia. Ammo ni apostol Pablo nga imperpekto dagiti kapammatianna. Kas pagarigan, isu ket hinusgaran ti dadduma a kakabsat idi mangrugin a makitimpuyog iti kongregasion. (Ara. 9:26) Idi agangay, adda met dagiti mangperperdi iti reputasionna. (2 Cor. 10:10) Nakita met ni Pablo a nagkamali ti maysa a panglakayen a mabalin a nakaitibkolan ti dadduma. (Gal. 2:​11, 12) Ken naupay met unay ni Pablo gapu iti inaramid ti maysa a nadekket a gayyemna a ni Marcos. (Ara. 15:​37, 38) Mabalin koma nga impalubos ni Pablo a dagita a situasion ti nanglapped kenkuana a makikadua kadagiti nakasair iti riknana. Ngem intultuloyna latta nga impateg dagiti kakabsat ken nagtalinaed nga aktibo iti panagserbi ken Jehova. Ania ti nakatulong ken Pablo nga agtultuloy nga agserbi ken Jehova a simamatalek?

5. Ania ti nakatulong ken Pablo tapno saan a mauma kadagiti kakabsat? (Colosas 3:​13, 14) (Kitaen met ti ladawan.)

⁵ Ay-ayaten ni Pablo dagiti kakabsat. Gapu iti ayatna kadakuada, nagpokus isuna kadagiti nasayaat a kualidadda, imbes a kadagiti pagkapuyanda. Gapu met laeng iti ayat, natulongan ni Pablo a mangaramid iti insuratna a mismo a nairekord iti Colosas 3:​13, 14. (Basaen.) Kitaentayo no kasano a pinakawan ni Pablo ni Marcos. Uray binaybay-an ni Marcos ni Pablo bayat ti umuna a panagdaliasatna kas misionero, saan a nagimula iti sakit ti nakem ni Pablo. Idi agangay, idi sinuratan ni Pablo ti kongregasion ti Colosas tapno iyebkasna ti ayatna, inapresiarna ni Marcos kas ipatpategna a katrabahuan ken mangmangted iti “kasta unay a liwliwa.” (Col. 4:​10, 11) Bayat ti pannakaibalud ni Pablo idiay Roma, espesipiko a kiniddawna a mapan ni Marcos tapno tumulong kenkuana. (2 Tim. 4:11) Nalawag a pinakawan ni Pablo dagiti kakabsat. Ania ti masursurotayo ken Pablo?

6-7. Kasanotayo a maitultuloy nga ipakita ti ayat kadagiti kakabsat uray no imperpektoda? (1 Juan 4:7)

⁶ Ti masursurotayo. Kayat ni Jehova a pagreggetantayo nga ipakita ti ayat kadagiti kakabsat. (Basaen ti 1 Juan 4:7.) No saan a nasayaat ti panangtrato kadatayo ti maysa a kabsat, saantayo koma nga ipagarup nga inggagarana a saktannatayo. Panunotentayo nga  ikagkagumaanna met nga aramiden ti umiso iti imatang ni Jehova. (Prov. 12:18) Ay-ayaten ti Dios dagiti matalek nga adipenna uray agkamalida. Uray no makaaramidtayo kadagiti kamali, kayatna latta nga agbalintayo a gayyemna ken saan nga agipempen iti sakit ti nakem. (Sal. 103:9) Nagpateg ngarud a tuladentayo ti manangpakawan nga Amatayo!—Efe. 4:32–5:1.

⁷ Laglagipentayo met a bayat nga umas-asideg ti panungpalan, masapul nga agtalinaedtayo a nasinged kadagiti kakabsat. Ekspektarentayo a kumaro pay ti pannakaidadanes. Mabalin a maibaludtayto pay ketdi gapu iti pammatitayo. No mapasamak dayta, ad-adda a kasapulantayto dagiti kakabsat. (Prov. 17:17) Kitaentayo ti napasamak ken Josep, a a maysa a panglakayen idiay Spain. Isu ket naibalud a kadua ti dadduma pay a kakabsat gapu iti neutral a takderda. Imbagana: “Iti pagbaludan, gapu ta agkakaduakami amin idiay, saanmi a maliklikan ti masuron iti maysa ken maysa no dadduma. Masapul nga agpipinnasensia ken sibubulos nga agpipinnakawankami. Dayta ti nakatulong tapno agkaykaysakami ken masalaknibanmi ti maysa ken maysa. Napalawlawankami kadagiti balud a saan nga agserserbi ken Jehova. Iti maysa a gundaway, nablo ti takiagko ken nabendaan, isu a saanak a makapagtrabaho a sisiak. Ngem adda kabsat a nangilaba kadagiti badok ken nangasikaso kaniak iti dadduma pay a praktikal a pamay-an. Nariknak ti pudno nga ayat iti tiempo a kasapulak unay dayta.” Nagsayaat ngarud nga ita pay laeng, solbarentayon dagiti ditay pagkikinnaawatan kadagiti kapammatiantayo!

ITULTULOYMO TI AGSERBI KEN JEHOVA NO NADISMAYANAKA TI ASAWAM

8. Ania a karit ti pakaipaspasanguan dagiti agassawa?

⁸ Ti karit. Maipasango iti rigat ti amin nga agassawa. Sipaprangka nga ibaga ti Biblia a dagidiay mangasawa ket ‘agrigatto iti lasag.’ (1 Cor. 7:28) Apay? Gapu ta dagiti agassawa ket agpada nga imperpekto ken agduma ti personalidadda, agraman dagiti kayatda ken dida kayat. Mabalin nga agduma ti dimmakkelanda a kultura wenno pamilia. Baka iti panaglabas ti tiempo, rummuarto dagiti ugali a mabalin a dida nakita idi agin-innaremda pay laeng. Mabalin a mangpataud dagita kadagiti problema. Imbes nga aminenda nga adda nagkurangan ti tunggal maysa kadakuada ken agtinnulongda tapno masolbar ti problema, baka agpinnabasolda pay ketdi. Mabalin a mapanunotda payen ti agsina wenno agdiborsio. Ngem dayta kadi ti solusion? b Kitaentayo ti maysa a karakter iti Biblia a nagtultuloy latta a nagserbi ken Jehova iti laksid ti nakarigrigat a situasionna iti denna ni lakayna.

9. Ania a karit ti nakaipasanguan ni Abigail?

⁹ Ti ulidan iti Biblia. Nakiasawa ni Abigail ken Nabal, nga ibaga ti Biblia a nauyong ken dakes ti ugalina. (1 Sam. 25:3) Nagrigat la ketdi para ken Abigail ti agbiag a kadua ti kasta a lalaki. Adda kadi idi gundaway a mabalin koma a makapanaw ni Abigail iti situasionna? Adda. Idi a ni David ket saan pay nga ari ti Israel, kayatna a papatayen ni Nabal gapu iti panangin-insultona kenkuana ken kadagiti tattaona. (1 Sam. 25:​9-13) Mabalin koma a pimmanaw lattan ni Abigail tapno maibanag ni David ti planona. Ngem bimmallaet ken kinombinsirna ni David a saanna a papatayen ni Nabal. (1 Sam. 25:​23-27) Apay nga inaramidna dayta?

10. Apay a nakapagan-anus ni Abigail uray no narigat ti situasionna?

¹⁰ Ay-ayaten ni Abigail ni Jehova. Raraemenna  met dagiti pagalagadan ti Dios iti panagasawa. Sigurado nga ammona ti imbaga ti Dios kada Adan ken Eva idi impasdekna ti umuna a panagasawa. (Gen. 2:24) Ammo ni Abigail a para ken Jehova, sagrado ti panagasawa. Kayatna a paragsaken ti Dios, isu nga inaramidna ti amin a kabaelanna tapno masalbar ti sangakabbalayanna agraman ni lakayna. Dagus a nagtignay a manglapped ken David a mangpapatay ken Nabal. Situtulok met a dimmawat iti pammakawan iti kamali a saanna met nga inaramid. Nalawag nga ay-ayaten ni Jehova daytoy natured ken saan a managimbubukodan a babai. Ania ti masursuro agpadpada dagiti assawa a babbai ken lallaki iti ulidan ni Abigail?

11. (a) Ania ti ekspektaren ni Jehova kadagiti agassawa? (Efeso 5:33) (b) Ania ti nasursurom iti inaramid ni Carmen tapno masalbar ti relasionda nga agassawa? (Kitaen met ti ladawan.)

¹¹ Ti masursurotayo. Imbilin ni Jehova kadagiti agassawa a respetuenda ti urnos ti panagasawa uray no narigat a pakibagayan ti asawada. Maragsakan la ketdi ti Dios no makitana nga agtintinnulong dagiti agassawa a mangsolbar kadagiti problemada ken no raraemen ken ay-ayatenda ti maysa ken maysa. (Basaen ti Efeso 5:33.) Usigentayo ti ulidan ni Carmen. Agarup innem a tawen kalpasan ti kasarda ken lakayna, nakipagadal ni Carmen iti Biblia kadagiti Saksi ni Jehova agingga a nabautisaran. “Saan a nagustuan ni lakayko ti desisionko,” kuna ni Carmen. “Nagimonanna ni Jehova. Inin-insulto ken binutbutengnak a panawannak kano.” Nupay kasta, intultuloy latta ni Carmen a salbaren ti relasionda nga agassawa. Iti uneg ti 50 a tawen, inaramidna ti amin a kabaelanna nga ipakita ti ayat ken respeto ken lakayna. “Bayat ti panaglabas ti tawtawen, nasursurok a tarusan ni lakayko ken makisarita kenkuana iti nasayaat a pamay-an. Gapu ta ammok a sagrado para ken Jehova ti panagasawa, inaramidko ti amin a kabaelak a mangprotektar iti dayta. Diak pulos pinanunot a sinaan ni lakayko ta ay-ayatek ni Jehova.” c Uray no adda dagiti tumaud a problema iti relasionyo nga agassawa, makapagtalekka a suportaran ken tulongannaka ni Jehova tapno maitultuloymo latta ti agserbi kenkuana.

ITULTULOYMO LATTA TI AGSERBI KEN JEHOVA URAY NO MASURONKA ITI BAGIM

12. Ania a karit ti mabalin a pakaipasanguantayo no makaaramidtayo iti serioso a basol?

¹² Ti karit. Mabalin a masurontayo unay iti bagitayo no makaaramidtayo iti nadagsen a basol. Ibagbaga ti Biblia a gapu kadagiti basoltayo, mabalin a mariknatayo a kasla “nasugatan ken nadunor” ti pusotayo. (Sal. 51:17) Adu a tawen nga inkagumaan ti maysa a brother a ni Robert ti makualipikar kas ministerial nga adipen. Ngem idi kuan, nakaaramid iti serioso a  basol isu a napanunotna a trinaidorna ni Jehova. “Kasta unay ti pannakadudog ti konsiensiak,” kunana. “Sa idi kuan, marurodak unay iti bagik. Inyanug-og ken inkararagko dayta ken Jehova. Impagarupko a saannak a denggen ti Dios gapu iti inaramidko ta napaayko isuna.” No makaaramidtayo iti serioso a basol, mabalin a masugatan ken madunor ti pusotayo ket mapanunottayo a binaybay-annatayon ni Jehova ken awanen ti panggapuantayo nga agserbi kenkuana. (Sal. 38:4) No kasta ti marikriknam, usigem ti matalek a karakter iti Biblia a nagtultuloy latta nga agserbi ken Jehova uray no nakaaramid iti serioso a basol.

13. Ania a nadagsen a basol ti naaramid ni apostol Pedro, ken ania dagiti kamali a naaramidna sakbay dayta?

¹³ Ti ulidan iti Biblia. Iti rabii sakbay a mapapatay ni Jesus, nakaaramid ni apostol Pedro iti agsasaruno a kamali a nagresulta iti pannakaaramidna iti kadadagsenan a basol iti biagna. Umuna, sobra ti panagtalek ni Pedro iti bagina. Impangasna nga agtalinaed a matalek uray no ni Jesus ket panawan ti dadduma nga apostol. (Mar. 14:​27-29) Simmaruno, idi addada idiay hardin ti Getsemani, maulit-ulit a nakaturog ni Pedro isu a saan a nakapagtultuloy nga agbantay. (Mar. 14:​32, 37-41) Kalpasanna, idi arestuendan ni Jesus, binaybay-an isuna ni Pedro. (Mar. 14:50) Kamaudiananna, namitlo nga inlibak ni Pedro nga am-ammona ni Jesus, nga uray la insapatana dayta a panagulbodna. (Mar. 14:​66-71) Ania ti reaksion ni Pedro idi naamirisna no kasano kadagsen ti basolna? Permi ti sangitna posible a gapu iti kasta unay a pannakakonsiensiana. (Mar. 14:72) Imadyinem ti saem a narikna ni Pedro idi a sumagmamano nga oras laengen kalpasanna, mapapatayen ti gayyemna a ni Jesus. Narikna la ketdi ni Pedro nga awan serserbina!

14. Ania ti nakatulong ken Pedro tapno maitultuloyna ti agserbi ken Jehova? (Kitaen ti ladawan.)

¹⁴ Naitultuloy ni Pedro ti agserbi ken Jehova gapu iti sumagmamano a rason. Imbes nga insinsinana ti bagina, nakikadua ketdi iti dadduma nga adalan, ket awan duadua a liniwliwada isuna. (Luc. 24:33) Kasta met, idi napagungar ni Jesus, nagparang ken Pedro, a mabalin a tapno paregtaenna isuna. (Luc. 24:34; 1 Cor. 15:5) Kalpasanna, imbes a tubngaren ni Jesus ni Pedro gapu kadagiti kamalina, inikkanna ketdi ti gayyemna iti dakdakkel a responsabilidad. (Juan 21:​15-17) Ammo ni Pedro a nadagsen ti basolna. Ngem saan a simmuko nga agaramid iti umiso. Apay? Gapu ta kombinsido nga ay-ayaten latta isuna ti Apona a ni Jesus. Intultuloy met a sinuportaran isuna dagiti naespirituan a kakabsatna. Ania ti masursurotayo iti ulidan ni Pedro?

15. Ania ti kayat ni Jehova a pakakombinsirantayo? (Salmo 86:5; Roma 8:​38, 39) (Kitaen met ti ladawan.)

 ¹⁵ Ti masursurotayo. Kayat ni Jehova a kombinsidotayo nga ay-ayatennatayo ken sisasagana a mangpakawan kadatayo. (Basaen ti Salmo 86:5; Roma 8:​38, 39.) No agbasoltayo, makonsiensiatayo. Normal laeng dayta ken masapul a kasta. Ngem ditay koma panunoten a saannatayon nga ay-ayaten ni Jehova wenno saannatayon a mapakawan. Imbes ketdi, madagdagus nga agpatulongtayo. Kuna ni Robert a nadakamat itay: “Nagbasolak ta nagtalekak iti bagik a kayak a labanan ti sulisog.” Naamirisna a masapul a makisarita kadagiti panglakayen. Imbagana: “Idi nakisaritaak kadagiti panglakayen, dagus a nariknak nga ay-ayatennak ni Jehova. Nariknak met nga ay-ayatendak dagiti panglakayen. Tinulongandak a mamati a saannak a binaybay-an ni Jehova.” Makombinsirtayo met nga ay-ayatennatayo unay ni Jehova ken pakawanennatayo no pagbabawyantayo dagiti basoltayo, agpatulongtayo, ken no ikagumaantayo a saanen nga uliten dagiti kamalitayo. (1 Juan 1:​8, 9) Dayta a determinasiontayo ti mangigawid kadatayo a saan nga agsardeng nga agserbi ken Jehova uray no agkamalitayo.

16. Apay a determinadoka nga agtultuloy nga agserbi ken Jehova?

¹⁶ Ap-apresiaren unay ni Jehova ti panangikagumaantayo nga agserbi kenkuana iti daytoy narigat a maudi nga al-aldaw. Iti tulong ni Jehova, kabaelantayo ti agtultuloy nga agserbi kenkuana uray adda dagiti pakaupayantayo. Masursurotayo nga ayaten dagiti kakabsat ken pakawanen ida uray masaktandatayo. Maitultuloytayo met nga ipakita nga ay-ayatentayo unay ti Diostayo ken raraementayo dagiti pagalagadanna no aramidentayo ti amin a kabaelantayo a mangsolbar kadagiti problema a mabalin a tumaud iti panagasawa. Ket no agbasoltayo, agpatulongtayo ken Jehova, awatentayo ti ayat ken pammakawanna, ken agtultuloytayo nga agserbi kenkuana. Masiguradotayo nga agapittayto iti adu a bendision no ‘ditay sumuko nga agaramid iti nasayaat.’—Gal. 6:9.