1. Ania ti mabalin a marikna ti dadduma a matalek nga agserserbi ken Jehova?

 MASIGURADOTAYO a maragragsakan ni Jehova iti ilina! Kuna ti Biblia: “Maragsakan ni Jehova kadagiti tattaona.” (Sal. 149:4) Ngem no dadduma, adda dagiti maup-upay unay ket baka mapanunotda, ‘Maragragsakan met la kadi ni Jehova kaniak?’ Kasta ti napanunot ti adu a matalek nga agdaydayaw ken Jehova idi panawen ti Biblia.—1 Sam. 1:​6-10; Job 29:​2, 4; Sal. 51:11.

2. Siasino dagiti pakaragsakan ni Jehova?

² Nalawag nga ipakita ti Biblia a mabalin a maragsakan wenno anamongan ni Jehova dagiti imperpekto a tattao. Kasano? Masapul nga ipakitatayo ti pammatitayo ken Jesu-Kristo ken agpabautisartayo. (Juan 3:16) Iti kasta, ipakpakitatayo iti publiko a nagbabawyantayon dagiti basoltayo ken inkaritayon iti Dios nga aramidentayo ti pagayatanna. (Ara. 2:38; 3:19) Maragsakan ni Jehova no aramidentayo dagita tapno agbalintayo a nasinged a gayyemna. No itultuloytayo nga aramiden ti kabaelantayo a tungpalen ti inkaritayo idi nagdedikartayo, maragsakan ni Jehova kadatayo ken ibilangnatayo a nasinged a gagayyemna.—Sal. 25:14.

3. Ania ti tallo a saludsod nga usigentayo?

³ Ngem apay a no dadduma, adda dagidiay makarikna a saan a maragsakan ti Dios kadakuada? Kasano nga ipakpakita ni Jehova a maragsakan kadatayo? Ken kasano a masigurado ti maysa a Kristiano a maragsakan ti Dios kenkuana?

 NO APAY A MABALIN A MARIKNA TI DADDUMA A SAAN A MARAGSAKAN NI JEHOVA KADAKUADA

4-5. Uray mariknatayo nga awan serserbitayo, ania ti masiguradotayo?

⁴ Sipud kinaubingtayo, mabalin nga adun kadatayo ti manglablaban iti rikna nga awan serserbitayo. (Sal. 88:15) Imbaga ti brother a ni Adrián: “Kanayon a mariknak nga awan serserbik. Malagipko nga ikarkararagko idi ubingak nga agyanto koma idiay Paraiso ti pamiliak, uray no diak masigurado no kaduadakto sadiay.” Imbaga met ni Tony, a dimmakkel iti pamilia a saan a Saksi: “Uray naminsan, saan a pulos nga imbaga dagiti nagannakko nga ay-ayatendak wenno ipagpannakkeldak. Isu a panagriknak, uray ania ti aramidek, saanko a maparagsak ida.”

⁵ No adda dagiti tiempo a mariknatayo nga awan serserbitayo, laglagipentayo a ni Jehova a mismo ti nangyasideg kadatayo kenkuana. (Juan 6:44) Makitkitana dagiti nasayaat a kualidadtayo a mabalin a ditay makitkita, ken ammona ti linaon ti pusotayo. (1 Sam. 16:7; 2 Cron. 6:30) Isu a makapagtalektayo no ibagbagana a napategtayo kenkuana.—1 Juan 3:​19, 20.

6. Ania ti narikna ni apostol Pablo kadagiti naaramidna idi a basol?

⁶ Sakbay a naammuantayo ti kinapudno, nakaaramid ti dadduma kadatayo iti basol ket makonkonsiensiatayo pay laeng agingga ita. (1 Ped. 4:3) Uray dagiti matalek a Kristiano ket mabalin nga addaan pay laeng kadagiti pagkapuyan a lablabananda. Sika ngay? Mariknam kadi a no dadduma, kasla saannaka a mapakawan ni Jehova? No wen, saanka nga agmaymaysa ta narikna met dayta dagiti matalek nga adipen ni Jehova. Kas pagarigan, narikna idi ni Pablo nga isu ket kakaasi no malagipna dagiti nagkamalianna. (Roma 7:24) Siempre, pinagbabawyanen ni Pablo dagiti basolna ken nagpabautisar. Ngem minatmatanna latta ti bagina kas “ti kanunumuan kadagiti apostol” ken ti “kangrunaan” a managbasol.—1 Cor. 15:9; 1 Tim. 1:15.

7. Ania ti masapul a laglagipentayo maipapan kadagiti naaramidtayo a basol?

⁷ Ikarkari ti nailangitan nga Amatayo a pakawanennatayo no agbabbabawitayo. (Sal. 86:5) Isu a no talaga a pinagbabawyantayon dagiti basoltayo, makapagtalektayo a pudno ti imbaga ni Jehova—pinakawannatayon.—Col. 2:13.

8-9. Kasanotayo a maparmek ti rikna a ditay pulos maparagsak ni Jehova?

⁸ Kayattayo nga aramiden ti amin a kabaelantayo nga agserbi ken Jehova. Ngem marikna ti dadduma a saan a pulos umanay ti aniaman a maar-aramidanda tapno maparagsakda isuna. Kuna ti sister a ni Amanda: “Masansan a pampanunotek a tapno maitedko ti kasayaatak ken Jehova, masapul nga adu ti aramidek para kenkuana. Isu a masansan nga ad-adu ti aramidek ngem iti kabaelak. No diak maaramid dayta, madismayaak iti bagik ket ipapanko a dismayado metten ni Jehova kaniak.”

⁹ Kasanotayo a maparmek ti rikna a ditay pulos maparagsak ni Jehova? Laglagipentayo a ni Jehova ket saan nga istrikto. Isu ket nainkalintegan. Dina pulos kiddawen ti nalablabes ngem iti kabaelantayo nga aramiden. Apresiarenna ti aniaman nga aramidentayo para kenkuana no la ket ta aramidentayo ti kasayaatantayo. Kasta met, panunotem dagiti ulidan a nadakamat iti Biblia maipapan kadagidiay nagserbi ken Jehova iti amin a puso. Ni Pablo ti maysa kadakuada. Adu a tawen a sireregta a nagserbi. Rinibu a kilometro ti dinaliasatna ken nangipasdek iti adu a kongregasion. Ngem idi nagbalbaliw ti situasionna, ket saanen a makapangasaba a kas iti dati, maragsakan pay latta kadi ti Dios kenkuana? Wen. Binendisionan ni  Jehova ta intultuloyna nga inaramid ti kabaelanna. (Ara. 28:​30, 31) Kastatayo met. No dadduma, adda dagiti tiempo a ditay maaramiden ti dati nga ar-aramidentayo para ken Jehova. Ngem ti napateg kenkuana ket no apay nga ar-aramidentayo dayta. Pagsasaritaantayo ita ti dadduma a pamay-an no kasano nga ipakpakita ni Jehova a maragsakan kadatayo.

KASANO NGA IBAGBAGA NI JEHOVA A MARAGSAKAN KADATAYO?

10. Kasano a “mangngegtayo” ti ibagbaga ni Jehova a maragsakan kadatayo? (Juan 16:27)

¹⁰ Babaen ti Biblia. Magusgustuan ni Jehova nga ipakita kadagiti adipenna nga ay-ayatenna ida ken maragragsakan kadakuada. Iti Biblia, namindua nga imbaga ni Jehova ken Jesus nga isu ti dungdungnguenna nga Anak ken pakaragsakanna. (Mat. 3:17; 17:5) Kayatmo kadi met a mangngeg nga ibagbaga dayta kenka ni Jehova? Saan a direkta a makisarita kadatayo ni Jehova manipud langit. Ngem makisarsarita kadatayo babaen ti Saona, ti Biblia. No basaentayo ti nadungngo a pannakisarita ni Jesus kadagiti adalanna kas mabasa kadagiti Ebanghelio, kas man la mangmangngegtayo nga ibagbaga met ni Jehova dagita kadatayo. (Basaen ti Juan 16:27.) Perpekto a tinulad ni Jesus ti personalidad ni Amana. Isu a no mabasatayo ti imbaga ni Jesus a maragsakan kadagiti imperpekto ngem matalek a pasurotna, maimadyintayo nga ibagbaga met dagita ni Jehova kadatayo.—Juan 15:​9, 15.

11. No makapasartayo iti rigat, apay a dina kayat a sawen a saanen a maragsakan ni Jehova kadatayo? (Santiago 1:12)

¹¹ Babaen kadagiti aramidna. Magagaran ni Jehova a tumulong kadatayo. Kas pagarigan, ipapaayna dagiti material a kasapulantayo. No dadduma, mabalin nga ipalubos ni Jehova nga agpasartayo iti rigat, kas iti napasamak iti nalinteg a ni Job. (Job 1:​8-11) No makapasartayo kadagiti suot, dina kayat a sawen a saanen a maragsakan ti Dios kadatayo. Imbes ketdi, gundawaytayo dayta a mangpaneknek iti kauneg ti ayattayo iti Dios ken iti panagtalektayo kenkuana. (Basaen ti Santiago 1:12.) Mariknatayo ti nadungngo a panangaywan ken suportana bayat a tultulongannatayo nga agibtur.

12. Ania ti masursurotayo iti kapadasan ni Dmitrii?

¹² Kitaentayo ti napasamak ken Dmitrii, maysa a brother a taga-Asia. Naawanan iti trabaho. Ket uray no adu a bulan nga agbirbirok, awan  ti masarakanna. Isu nga inyad-aduna ti orasna iti ministerio, kas panangipakitana iti panagtalekna ken Jehova. Limmabas ti adu pay a bulan, ngem awan latta ti nasarakanna a trabaho. Idi kuan, nagsakit nga uray la naidalit. Nariknana a saanen a nasayaat nga asawa ken ama, ken napanunotna a saanen a maragsakan kenkuana ni Jehova. Maysa a rabii, adda papel nga inted kenkuana ti balasitangna. Nai-print iti dayta ti sasao iti Isaias 30:15: “Napigsakayo no agtalinaedkayo a kalmado ken no agtalekkayo.” Imbaga ti balasitangna, “Daddy, no nalidayka, laglagipem daytoy a teksto.” Naamiris ni Dmitrii nga iti tulong ni Jehova, adda pay laeng met umdas a taraon ti pamiliana, adda kawesda, ken adda balayda. Imbagana: “Ti laeng masapul nga aramidek ket agtalinaedak a kalmado ken itultuloyko ti agtalek iti Diosko.” No kasta met laeng ti situasionmo, makapagtalekka nga aywanannaka ni Jehova ken tulongannaka nga agibtur.

13. Siasino dagiti mabalin nga usaren ni Jehova tapno maipakitana a maragragsakan kadatayo, ken kasano?

¹³ Babaen kadagiti kapammatian. Us-usaren ni Jehova dagiti kakabsat tapno ipakitana a maragragsakan kadatayo. Kas pagarigan, mabalin a tignayenna ida a paregtaendatayo iti umiso a tiempo. Kasta ti kapadasan ti maysa a sister a taga-Asia bayat iti adu a problemana. Naawanan iti trabaho ken nagsakit iti nakaro. Nakaaramid pay iti serioso a basol ti asawana isu a naikkat a panglakayen. Kuna ti sister: “Diak idi maawatan no apay a mapaspasamak daytoy. Baka adda naaramidko a kamali isu a saanen a maragsakan kaniak ni Jehova.” Impakaasi ti sister ken Jehova nga ipakitana koma a maragragsakan latta isuna kenkuana. Kasano a sinungbatan ni Jehova? Insuratna, “Kinasaritadak dagiti panglakayen ken impaawatda kaniak nga ay-ayatennak latta ni Jehova.” Idi agangay, nagpatulong manen ken Jehova.  Imbagana: “Iti dayta met la nga aldaw, nakaawatak iti surat manipud iti maysa a grupo dagiti kakabsat iti kongregasion. Bayat a basbasaek ti makaliwliwa a suratda, nariknak a dengdenggennak ni Jehova.” Wen, masansan nga ipakita ni Jehova a maragragsakan kadatayo babaen kadagiti pammaregta ti sabsabali.—Sal. 10:17.

14. Ania ti sabali pay a pamay-an nga ipakpakita ni Jehova a maragsakan kadatayo?

¹⁴ Ipakpakita met ni Jehova a maragragsakan kadatayo no usarenna dagiti kapammatiantayo a mangbalakad kadatayo no kasapulantayo dayta. Kas pagarigan, idi umuna a siglo, inusar ni Jehova ni apostol Pablo a mangaramid iti 14 a surat para kadagiti kapammatianna. Adda dagiti prangka ngem naayat a balakad kadagita a surat. Apay nga impaisurat ni Jehova ken Pablo dagita a balakad? Naimbag nga Ama ni Jehova ken disiplinaenna dagiti annakna “a pagragsakanna.” (Prov. 3:​11, 12) Isu a no makaawattayo iti naibatay-Biblia a balakad, ibilangtayo koma dayta nga ebidensia a maragragsakan ti Dios kadatayo, saan ket a gapu ta kaguranatayo. (Heb. 12:6) Ania ti dadduma pay a pakakitaan a maragragsakan kadatayo ni Jehova?

DADDUMA PAY A PAKAKITAAN A MARAGRAGSAKAN KADATAYO NI JEHOVA

15. Siasino ti pangipapaayan ni Jehova iti nasantuan nga espirituna, ken apay a makapabileg dayta?

¹⁵ Ipapaay ni Jehova ti nasantuan nga espirituna kadagidiay pakaragsakanna. (Mat. 12:18) Mabalintayo nga isaludsod iti bagitayo, ‘Maipakpakitak kadi ti dadduma nga aspeto ti bunga ti espiritu ti Dios iti biagko?’ Nadlawmo kadi a naan-anuska itan iti dadduma ngem idi sakbay a naam-ammom ni Jehova? Kinapudnona, no kanayon nga ipakpakitam ti bunga ti nasantuan nga espiritu ti Dios, mas kombinsidoka a maragragsakan ni Jehova kenka!—Kitaen ti kahon a “ Ti Bunga ti Espiritu ket . . . ”

16. Siasino ti us-usaren ni Jehova a mangikasaba iti naimbag a damag, ken ania ti panagriknam iti dayta? (1 Tesalonica 2:4)

¹⁶ Intalek ni Jehova ti naimbag a damag kadagidiay pakaragsakanna. (Basaen ti 1 Tesalonica 2:4.) Nakombinsir iti dayta ti maysa a sister a ni Jocelyn bayat nga ikaskasabana ti naimbag a damag. Maysa nga aldaw, nariing ni Jocelyn a nakalidliday. “Awan gaganaygayak ken nariknak nga awan serserbik,” imbagana. “Ngem gapu ta payunirak ken eskediulko ti mapan mangasaba, nagkararagak ken napanak  nangasaba.” Iti dayta nga aldaw, naam-ammo ni Jocelyn ti nasingpet a babai a ni Mary. Nagpayadal kenkuana iti Biblia. Kalpasan ti sumagmamano a bulan, imbaga ni Mary a nabayagen nga agkarkararag ken agpatpatulong iti Dios idi nagtuktok ni Jocelyn iti ridaw ti balayna. Ania ti nasursuro ni Jocelyn iti dayta a kapadasanna? Imbagana, “Nariknak a kas man la ibagbaga ni Jehova kaniak, ‘Maragragsakanak kenka.’” Siempre, saan nga amin ket dumngeg iti mensahe nga ikaskasabatayo. Ngem masiguradotayo a maragsakan ni Jehova kadatayo no aramidentayo ti amin a kabaelantayo a mangikasaba iti naimbag a damag.

17. Ania ti masursurom iti imbaga ni Vicky maipapan iti subbot? (Salmo 5:12)

¹⁷ Kayat ni Jehova a dagiti pakaragsakanna ket magunggonaan iti pateg ti subbot. (1 Tim. 2:​5, 6) Ngem kasanon no panagriknatayo ket saan a maragsakan ni Jehova kadatayo uray no patientayo ti subbot ken bautisadotayon? Laglagipentayo a saantayo a kanayon a mapagtalkan ti riknatayo. Ngem makapagtalektayo ken Jehova. Ibilangna a nalinteg dagidiay mamati iti subbot ken ikarkarina a bendisionanna ida. (Basaen ti Salmo 5:12; Roma 3:26) Nakatulong ken Vicky ti panangut-utobna iti subbot. Maysa nga aldaw, kalpasan a pinampanunotna ti subbot, naamirisna: “Nabayagen nga an-anusannak ni Jehova. . . . Kaskasdi, kasla ibagbagak kenkuana: ‘Saan a makadanon kaniak ti panagayatmo. Saan nga umdas ti daton ti Anakmo a mangabbong kadagiti basolko.’” Ngem mariknana itan nga ay-ayaten ni Jehova gapu iti panangut-utobna iti sagut a subbot. Mariknatayo met nga ay-ayatennatayo ni Jehova ken maragragsakan kadatayo no utobentayo ti subbot.

18. Ania ti masiguradotayo no itultuloytayo nga ayaten ti nailangitan nga Amatayo?

¹⁸ Uray no aramidentayo ti amin a kabaelantayo a mangyaplikar kadagiti nasursurotayo iti daytoy nga artikulo, baka adda dagiti tiempo a maupaytayo latta ket pagduaduaantayo no maragsakan met laeng ni Jehova kadatayo. No mapasamak dayta, laglagipentayo a maragragsakan kadagidiay “agtultuloy nga agayat Kenkuana.” (Sant. 1:12) Isu nga itultuloymo ti umasideg ken Jehova ken siputam ti amin a pakakitaan a maragragsakan kenka. Dimo pulos liplipatan a ni Jehova ket “saan nga adayo iti tunggal maysa kadatayo.”—Ara. 17:27.