1-2. Ania ti masapul nga aramiden ti maysa sakbay nga agpabautisar?

 ITI napalabas a lima a tawen, nasurok a maysa a milion a tattao ti nagpabautisar kas Saksi ni Jehova. Adu kadakuada ti kas iti adalan idi umuna a siglo a ni Timoteo a nasursuruan iti kinapudno ‘manipud idi maladaga.’ (2 Tim. 3:​14, 15) Ti dadduma kadakuada ket adulton idi naammuanda ti maipapan ken Jehova. Lallakay ken babbaket pay ketdin ti dadduma, a kas iti maysa a babai a nakipagadal iti Biblia kadagiti Saksi ni Jehova a nabautisaran idi agtawen iti 97!

² No maysaka a mayad-adalan iti Biblia wenno no Saksi dagiti nagannakmo, pampanunotem met kadin ti agpabautisar? Nagsayaat dayta a kalatmo! Ngem sakbay nga agpabautisarka, masapul nga idedikarmo ti biagmo ken Jehova. Mailawlawag iti daytoy nga artikulo no ania ti ramanen ti panagdedikar. Matulongannaka met tapno maammuam no apay a masapul a saanka nga agbuteng a mangidedikar iti biagmo iti Dios ken agpabautisar no nakasaganakan a mangaramid iti dayta.

ANIA TI DEDIKASION?

3. Mangted kadagiti pagarigan iti Biblia kadagiti tattao a dedikado idi ken Jehova.

³ Iti Biblia, ti maysa a dedikado ken Jehova ket napili para iti maysa a sagrado a panggep. Dedikado idi ken Jehova ti nasion ti Israel. Ngem dadduma nga Israelita ket dedikado ken Jehova iti espesial a pamay-an. Kas pagarigan, adda nakasuot ken Aaron a “nasantuan a tanda ti dedikasion”—ti nasileng a metal a balitok iti sango ti turbantena. Dayta a metal a balitok ipakitana a napili isuna nga agserbi ken Jehova iti espesial a pamay-an —kas nangato a padi ti Israel. (Lev. 8:9) Dagiti Nazareo ket dedikado met idi ken Jehova iti espesial a pamay-an. Ti sao a “Nazareo” ket naggapu iti Hebreo a sao a nazirʹ a kaipapananna “Daydiay Naisina,” wenno “Daydiay Naidedikar.” Masapul idi nga agtulnog dagiti Nazareo kadagiti espesial a bilin kadakuada ti Mosaiko a Linteg.—Num. 6:​2-8.

4. (a) Iti ania a pamay-an a dagiti dedikado ken Jehova ket naisina para iti sagrado a panggep? (b) Ania ti kaipapanan ti ‘panangtallikud iti bagi’? (Kitaen met ti ladawan.)

⁴ No idedikarmo ti biagmo ken Jehova, piliem ti agbalin nga adalan ni Jesu-Kristo ken pagbalinem a kapatgan iti biagmo ti panagaramid iti pagayatan ti Dios. Ania ti karaman iti Nakristianuan a dedikasion? Imbaga ni Jesus: “Asinoman a mayat a sumurot kaniak, tallikudanna koma ti bagina.” (Mat. 16:24) Ti Griego a sao a naipatarus kas “tallikudanna koma ti bagina” ket mabalin met a maipatarus kas “agsaan iti bagina.” Kas dedikado nga adipen ni Jehova, masapul nga agsaanka iti aniaman a maikontra iti pagayatanna. (2 Cor. 5:​14, 15) Karaman iti dayta ti panagsaan kadagiti “aramid ti lasag,” kas iti seksual nga immoralidad. (Gal. 5:​19-21; 1 Cor. 6:18) Dagita kadi a bilin parigatenna ti biagmo? Saan, no ay-ayatem ni Jehova ken no kombinsidoka a pagsayaatam dagiti lintegna. (Sal. 119:97; Isa. 48:​17, 18) Imbaga ti maysa a brother a ni Nicholas, “Mabalinmo nga ibilang dagiti pagalagadan ni Jehova kas kadagiti rehas ti pagbaludan a manglapped kenka a mangaramid kadagiti kayatmo nga aramiden wenno kas iti rehas ti kulongan ti leon a mangprotektar kenka iti peggad.”

5. (a) Kasanom nga idedikar ti biagmo ken Jehova? (b) Ania ti nagdumaan ti dedikasion ken bautismo? (Kitaen met ti ladawan.)

⁵ Kasanom nga idedikar ti biagmo ken Jehova? Ikarim kenkuana iti kararag nga isuna laeng ti pagdaydayawam ken iyun-unam iti biagmo. Ikarkarim ken Jehova nga itultuloymo nga  ayaten isuna “iti amin a pusom ken amin a kararuam ken amin a panunotmo ken amin a pigsam.” (Mar. 12:30) No agdedikarka, aramidem dayta a siksika ket dakayo laeng ken Jehova ti makaammo iti dayta. Iti sabali a bangir, ti bautismo ket maaramid iti publiko ken ipakita dayta iti dadduma a nagdedikarkan. Ti dedikasionmo ket maysa a sagrado a kari. Masapul nga aramidem ti inkarim, ket ekspektaren ni Jehova nga aramidem dayta.—Ecl. 5:​4, 5.

APAY NGA AGDEDIKARKA KEN JEHOVA?

6. Ania ti mangtignay iti maysa nga agdedikar ken Jehova?

⁶ Ti kangrunaan a rason nga agdedikarka ken Jehova ket gapu ta ay-ayatem isuna. Ti ayatmo ket saan a naibatay iti emosion laeng. Imbes ketdi, nairamut dayta iti “umiso a pannakaammo” ken “naespirituan a pannakaawat”—dagiti nasursurom maipapan ken Jehova a nangpauneg iti ayatmo kenkuana. (Col. 1:9) Gapu iti panagadalmo iti Kasuratan, nakombinsirka nga (1) agpaypayso ni Jehova, (2) inwanwanna ti pannakaisurat ti Saona, ti Biblia, ken (3) us-usarenna ti organisasionna a mangitungpal iti pagayatanna.

7. Ania ti masapul nga aramidentayo sakbay nga agdedikartayo iti Dios?

⁷ Dagiti agdedikar ken Jehova masapul nga ammoda dagiti kangrunaan a sursuro a masarakan iti Sao ti Dios ken agbibiagda maitunos kadagiti pagalagadanna. Ar-aramidenda ti amin a kabaelanda a mangiranud iti dadduma kadagiti nasursuroda. (Mat. 28:​19, 20) Ay-ayatenda unay ni Jehova, ken isuna laeng ti kayatda a pangipaayan iti naipamaysa a debosion. Saan kadi a kastaka met? No ay-ayatem ni Jehova iti amin a pusom, saanka nga agdedikar ken agpabautisar tapno laeng maparagsakmo  ti mangyad-adal kenka iti Biblia wenno dagiti nagannakmo; wenno gapu laeng ta kasta ti ar-aramiden ti amin a gagayyemmo.

8. Kasano a makatulong ti kinamanagyaman tapno agdesisionka nga agdedikar ken Jehova? (Salmo 116:​12-14)

⁸ No panunotem ti amin nga inaramid ni Jehova para kenka, matignayka nga agyaman ken mangidedikar iti biagmo kenkuana. (Basaen ti Salmo 116:​12-14.) Umiso laeng ti ibagbaga ti Biblia a ni Jehova ti Manangted iti “tunggal nasayaat ken perpekto a sagut.” (Sant. 1:17) Ti kadakkelan kadagidiay a sagut ket ti panangisakripisiona iti Anakna a ni Jesus. Panunotem laengen, gapu iti subbot, posible a maaddaanka iti nadekket a relasion ken Jehova! Ken inikkannaka iti namnama nga agbiag nga agnanayon. (1 Juan 4:​9, 10, 19) Ti panangidedikarmo iti biagmo ken Jehova ti maysa kadagiti kasayaatan a pamay-an a maipakitam nga agyamyamanka iti kadakkelan nga ebkas ti ayat nga impakitana kenka, kasta met kadagiti dadduma pay a bendision nga impaay ni Jehova kenka. (Deut. 16:17; 2 Cor. 5:15) Dayta a panagyaman ket naitampok iti leksion 46, punto 4, ti libro nga Agbiagka a Naragsak iti Agnanayon! agraman ti tallo-minuto a video a Panangipaay iti Sagut iti Dios.

NAKASAGANAKA KADIN NGA AGDEDIKAR KEN AGPABAUTISAR?

9. Apay a saan koma a mapilit ti maysa nga agdedikar?

⁹ Baka panagriknam ket saanka pay a nakasagana nga agdedikar ken agpabautisar. Mabalin nga adda pay dagiti masapul a balbaliwam iti biagmo tapno masurotmo dagiti pagalagadan ni Jehova, wenno baka kasapulam ti ad-adu pay a panawen tapno mapabilegmo ti pammatim. (Col. 2:​6, 7) Saan nga agpapada ti panagrang-ay ti amin a mayad-adalan iti Biblia. Saan met nga amin nga agtutubo ket nakasaganan nga agdedikar ken agpabautisar iti agpapada nga edad. Padasem nga usigen dagiti masapul a pasayaatem iti bagim sigun iti kabaelam ken saanmo nga ikompara ti bagim iti dadduma.—Gal. 6:​4, 5.

10. Ania ti mabalinmo nga aramiden no panagriknam ket saanka pay a nakasagana nga agdedikar ken agpabautisar? (Kitaen met ti kahon a “ Para Kadagiti Napadakkel iti Kinapudno.”)

¹⁰ Uray no mariknam a saanka pay laeng a nakasagana nga agdedikar ken Jehova, itultuloymo latta a pagbalinen dayta a kalatmo. Ikararagmo a bendisionan ni Jehova ti panagreggetmo a mangaramid kadagiti kasapulan a panagbalbaliw. (Fil. 2:13; 3:16) Masiguradom a denggen ken sungbatanna ti kararagmo.—1 Juan 5:14.

NO APAY NGA AGPANGADUA TI DADDUMA

11. Kasanonatayo a tulongan ni Jehova nga agtalinaed a matalek kenkuana?

¹¹ Adda dagidiay nakasaganan nga agdedikar ken agpabautisar ngem agpangaduada latta. Baka mapanunotda, ‘Kasanon ngay no makaaramidakto iti serioso a basol ket mailaksidak?’ No dayta ti pagbutbutngam, masiguradom nga ipaay ni Jehova ti amin a kasapulam ket iti kasta, ‘makapagbiagka a makaay-ayo kenkuana tapno naan-anay a maparagsakmo.’ (Col. 1:10) Ikkannaka met iti bileg tapno maaramidmo ti umiso. Adun ti natulonganna a mangaramid iti umiso. (1 Cor. 10:13) Dayta ti maysa a rason a manmano laeng ti mailaksid iti kongregasion Kristiano. Tultulongan ni Jehova ti ilina nga agtalinaed a matalek.

12. Kasanotayo a maliklikan ti makaaramid iti serioso a basol?

¹² Amin nga imperpekto a tao ket masulisog nga agaramid iti di umiso. (Sant. 1:14) Ngem adda kenka no agpasulisogka, desisionmo dayta. Kinaagpaysuanna, sika ti makinkontrol no ania ti kayatmo nga aramiden iti biagmo.  Ibagbaga ti dadduma a tattao a saantayo a makontrol ti marikna ken aramidentayo, ngem saan nga agpayso dayta. Kayam a kontrolen dagiti saan nga umiso a tarigagay. Adda dagiti makatulong tapno maliklikam ti agbasol. Kas pagarigan, inaldaw nga agkararagka ken Jehova, itultuloymo ti nasayaat a rutinam iti personal a panagadalmo iti Sao ti Dios, makigimongka, ken ibagam iti dadduma dagiti patpatiem. No regular nga aramidem dagitoy, maaddaanka iti bileg tapno maitungpalmo ti karim idi nagdedikarka. Ken dimo liplipatan a tulongannaka ni Jehova a mangaramid kadagita.—Gal. 5:16.

13. Ania ti nasayaat nga inyulidan kadatayo ni Jose?

¹³ Nalaklaka para kenka a tungpalen ti dedikasionmo ken Jehova no nasaksakbay nga agdesisionkan iti aramidem inton maipasangoka iti sulisog. Ibaga ti Biblia nga adda dagiti tattao a nangaramid iti dayta uray no imperpektoda met a kas kadatayo. Kas pagarigan, maulit-ulit a pinadas ti asawa ni Potifar a gargarien ni Jose. Ngem awan duadua nga ammon ni Jose ti aramidenna iti dayta a situasion. Ibaga kadatayo ti Biblia a “nagkedked” ni Jose, ken imbagana: “Apay koma nga aramidek daytoy nakaro a kinadakes ket agbasolak iti Dios?” (Gen. 39:​8-10) Nalawag nga ammon ni Jose ti aramidenna sakbay pay a gargarien ti asawa ni Potifar. Dayta ti rason a nalaklakan para kenkuana nga aramiden ti umiso idi naipasango iti sulisog.

14. Kasanotayo a masursuro ti agsaan kadagiti dakes nga aramid?

¹⁴ Kasanom a matulad ti determinasion ni Jose a mangaramid iti umiso no maipasangoka iti sulisog? Mabalinmon ti agdesision ita iti aramidem inton maipasangoka iti sulisog. Sursuruem ti dagus nga agsaan kadagiti banag a kagura ni Jehova, ken uray man laeng panunoten dagita. (Sal. 97:10; 119:165) Iti kasta, saankanto a tumulok no maipasangoka iti sulisog. Ammomton ti aramidem ta desididokan a mangaramid iti umiso.

15. Kasano a maipakita ti maysa nga isu ket “napasnek a mangsapsapul” ken Jehova? (Hebreo 11:6)

¹⁵ Baka kombinsidoka metten a nabirokamon ti kinapudno ken kayatmon ti agserbi ken Jehova iti amin a pusom. Ngem mabalin nga agpangaduaka latta nga agdedikar ken agpabautisar. No kasta, tuladem ti inaramid ni Ari David. Ipakaasim ken Jehova: “O Dios, sukimatennak ket ammuem ti pusok. Usigennak ken ammuem ti madandanagan a pampanunotko. Kitaem no adda aniaman a dakes kaniak, ket iturongnak iti dalan ti kinaagnanayon.” (Sal.  139:​23, 24) Bendisionan ni Jehova dagidiay “napasnek a mangsapsapul kenkuana.” Ti panagreggetmo a mangaramid iti kalatmo nga agdedikar ken agpabautisar ipakitana a kasta ti ar-aramidem.—Basaen ti Hebreo 11:6.

ITULTULOYMO TI UMASIDEG KEN JEHOVA

16-17. Kasano nga iyas-asideg ni Jehova kenkuana dagiti napadakkel iti kinapudno? (Juan 6:44)

¹⁶ Imbaga ni Jesus a ni Jehova ti nangyasideg kadagiti adalanna. (Basaen ti Juan 6:44.) Kitaem no kasano kasayaat dayta ken ti kaipapananna para kenka. Makitkita ni Jehova ti kinaimbag iti tunggal tao nga iyas-asidegna kenkuana. Matmatmatanna dayta nga indibidual kas ti “espesial a sanikuana,” wenno “ti ipatpategna a sanikua.” (Deut. 7:6; ftn.) Kasta ti pangibilanganna kenka.

¹⁷ Maysaka kadi nga agtutubo a napadakkel iti kinapudno? Baka mariknam nga agserserbika laeng ken Jehova gapu ta Saksi dagiti nagannakmo, saan a gapu ta iyas-asidegnaka ni Jehova kenkuana. Nupay kasta, saannaka nga ibilbilang ni Jehova a paset laeng ti maysa a grupo. Iyas-asidegna ti tunggal indibidual—a pakairamanan ti tunggal maysa kadagiti napadakkel iti kinapudno. Kanayonanna, ibagbaga ti Biblia: “Umasidegkayo iti Dios, ket umasidegto kadakayo.” (Sant. 4:8; 1 Cron. 28:9) Isu a no ikagumaam nga iyasideg ti bagim ken Jehova, sigurado nga umasideg met kenka.—Idilig ti 2 Tesalonica 2:13.

18. Ania ti pagsasaritaantayo iti sumaruno nga artikulo? (Salmo 40:8)

¹⁸ No idedikarmo ti biagmo ken Jehova ken agpabautisarka, tultuladem ni Jesus. Situtulok nga inaramidna ti aniaman a kiniddaw ti Amana. (Basaen ti Salmo 40:8; Heb. 10:7) Iti sumaruno nga artikulo, pagsasaritaantayo ti makatulong kenka nga agtultuloy nga agserbi ken Jehova a simamatalek kalpasan ti bautismom.