Mapakawan laeng dagiti basoltayo gapu iti subbot nga imbayad ni Jesus babaen ti darana. (Efe. 1:7) Ngem kuna ti Biblia maipapan iti Dios: “Gapu iti panagteppelna, pakpakawanenna dagiti basol a naaramid iti napalabas,” kayatna a sawen, sakbay nga impaay ni Jesus ti subbot. (Roma 3:​25, ftn.) Kasano a makuna latta a perpekto ti kinahustisia ni Jehova uray kasta ti inaramidna?

Para ken Jehova, ti subbot ket kasla nabayadanen idi inkarina ti ‘kaputotan’ a mangisalakan kadagiti tattao a mamati kenkuana. (Gen. 3:15; 22:18) Naan-anay nga agtalek ti Dios nga iti inkeddengna a tiempo, situtulok nga ipaay ti bugbugtong nga Anakna ti subbot. (Gal. 4:4; Heb. 10:​7-10) Bayat ti kaadda ni Jesus ditoy daga kas pannakabagi ti Dios, inikkan isuna ni Jehova iti autoridad a mangpakawan kadagiti basol uray sakbay pay a maitedna ti subbot. Inusarna ti pateg ti ipaayna a sakripisio tapno mapakawan ti basol dagiti tattao a mamati kenkuana.—Mat. 9:​2-6.