1. Ania ti imbaga ni Jesus maipapan kadagiti naespirituan a gameng?

SAAN nga amin a gameng ket makita. Kinapudnona, dagiti kapatgan a gameng ket saan a makita. Iti Sermon ni Jesus iti Bantay, dinakamatna dagiti naespirituan a gameng a napatpateg nga amang ngem iti material a bambanag, sa innayonna: “No sadino ti ayan ti kinabaknangmo [wenno, gamengmo], addanto met sadiay ti pusom.” (Mat. 6:19-21) No nakapatpateg kadatayo ti maysa a banag, tignayennatayo ti pusotayo a manggun-od iti dayta. Agurnongtayo iti “kinabaknang idiay langit” babaen ti panangikagumaantayo a maaddaan iti naimbag a nagan, wenno takder, iti Dios. Inlawlawag ni Jesus a saan a pulos madadael wenno matakaw dagita a kinabaknang.

2. (a) Sigun iti 2 Corinto 4:17, 18, ania ti iparparegta ni Pablo a pagpokusantayo? (b) Ania ti usigentayo iti daytoy nga artikulo?

² Parparegtaennatayo ni apostol Pablo nga ‘ipamaysatayo dagiti matatayo iti bambanag a di makita.’ (Basaen ti 2 Corinto 4:17, 18.) Dagitoy a di makita a bambanag ket dagiti gameng a pakairamanan dagiti bendision a tagiragsakentayto iti baro a lubong ti Dios. Iti daytoy nga artikulo, adalentayo ti uppat a gameng a di makita a tagtagiragsakentayo itan—ti pannakigayyemtayo iti Dios, ti sagut a kararag, ti tulong ti nasantuan nga espiritu ti Dios, ken ti maaw-awattayo a nailangitan a suporta iti ministeriotayo. Usigentayo met no kasanotayo a maipakita nga ap-apresiarentayo dagita.

3. Ania ti kapatgan a gameng a di makita, ken kasano a posible dayta?

³ Ti kapatgan a gameng a di makita ket ti pannakigayyem ken Jehova a Dios. (Sal. 25:14) Posible kadi a makapagtalinaed a  nasantuan ti Dios uray no makigayyem iti managbasol a tattao? Wen, gapu ta ti daton a pangsubbot ni Jesus ket “mangikkat iti basol” ti sangatauan. (Juan 1:29) Nasaksakbay nga ammo ni Jehova nga agballigi ti panggepna a mangipaay iti Manangisalakan iti sangatauan. Dayta ti makagapu a mabalin a makigayyem ti Dios kadagiti tattao a nagbiag sakbay a natay ni Kristo.—Roma 3:25.

4. Mangdakamat iti dadduma a nagbalin a gayyem ti Dios sakbay ti panawen Kristiano.

⁴ Usigentayo ti dadduma a nagbalin a gayyem ti Dios sakbay ti panawen Kristiano. Nangipakita ni Abraham iti nakabilbileg a pammati. Nasurok a 1,000 a tawen kalpasan ti ipapatay ni Abraham, inawagan ni Jehova iti “gayyemko.” (Isa. 41:8) Isu nga uray ni patay dina kabaelan nga isina ken Jehova dagiti nasinged a gagayyemna. Sibibiag latta ni Abraham iti memoria ni Jehova. (Luc. 20:37, 38) Ni Job ti maysa pay a pagarigan. Iti maysa a taripnong dagiti anghel idiay langit, kombinsido unay ni Jehova iti imbagana maipapan ken Job. Para ken Jehova, ni Job ket “nalinteg ken awan pagkuranganna, agbuteng iti Dios ken saan nga agar-aramid iti dakes.” (Job 1:6-8) Ania met ti narikna ni Jehova maipapan ken Daniel, a matalek a nagserbi iti Dios iti agarup 80 a tawen iti maysa a nasion dagiti pagano? Namitlo nga impasigurado dagiti anghel iti dayta a lakay nga isu ket ‘ipatpateg unay’ ti Dios. (Dan. 9:23; 10:11, 19) Siguradotayo a kailiw ni Jehova ti aldaw inton pagungarenna dagiti natayen a patpatgenna a gagayyem.—Job 14:15.

5. Ania ti kasapulan tapno agbalintayo a nasinged a gayyem ni Jehova?

⁵ Mano nga imperpekto a tattao ita ti nasinged a gagayyem ni Jehova? Minilion. Nakaad-adu a lallaki, babbai, ken ubbing iti intero a daga ti mangpampaneknek babaen ti kababalinda a talaga a gagayyem ida ti Dios. “Nasinged a gayyem [ni Jehova] ti nalinteg.” (Prov. 3:32) Posible daytoy a pannakigayyem gapu iti pammatida iti daton a pangsubbot ni Jesus. Gapu iti dayta, siaayat nga ipalubos ni Jehova nga idedikartayo ti bagitayo kenkuana sa agpabautisartayo. No aramidentayo dagitoy a napateg nga addang, makikadkaduatayo iti minilion a dedikado ken bautisado a Kristiano a ‘nasinged a gagayyem’ ti katan-okan a Persona iti uniberso!

6. Kasanotayo a maipakita nga ap-apresiarentayo ti pannakigayyemtayo iti Dios?

⁶ Kasanotayo a maipakita a napateg kadatayo ti pannakigayyemtayo iti Dios? Kas kada Abraham ken Job, a nagtalinaed a matalek iti Dios iti nasurok a sangagasut a tawen, masapul nga agtalinaedtayo a matalek—kasanoman kabayagen nga agserserbitayo ken Jehova iti daytoy daan a sistema. Kas ken Daniel, masapul a napatpateg kadatayo ti pannakigayyemtayo iti Dios ngem iti biagtayo. (Dan. 6:7, 10, 16, 22) Iti tulong ni Jehova, maibturantayo ti aniaman a suot ket makapagtalinaedtayo a nasinged kenkuana.—Fil. 4:13.

7. (a) Sigun iti Proverbio 15:8, ania ti marikna ni Jehova maipapan kadagiti kararagtayo? (b) Kasano a sungbatan ni Jehova dagiti kararagtayo?

⁷ Ti kararag ti sabali pay a gameng a di makita. Maragragsakan ti nasinged nga aggayyem a mangibaga iti pampanunoten ken rikriknada. Kasta met kadi ti pannakigayyemtayo ken Jehova? Wen! Makisarsarita ni Jehova kadatayo babaen ti Saona, ken maammuantayo iti dayta ti pampanunoten ken rikriknana. Makisarsaritatayo kenkuana babaen ti kararag, ken mayebkastayo kenkuana ti pampanunoten ken rikriknatayo. Maragsakan ni Jehova a dumngeg kadagiti kararagtayo. (Basaen ti Proverbio 15:8.) Kas naayat a Gayyem,  saan laeng a denggen ni Jehova dagiti kararagtayo no di ket sungbatanna pay dagita. No dadduma, alisto ti sungbatna. Adda met dagiti tiempo a mabalin a masapul nga itultuloytayo nga ikararag ti maysa a banag. Ngem masiguradotayo a masungbatan dagiti kararagtayo iti umiso a tiempo ken iti kasayaatan a pamay-an. Siempre, ti sungbat ti Dios ket mabalin a naiduma iti ekspektarentayo. Kas pagarigan, imbes nga ikkatenna ti pannubok, mabalin nga ikkannatayo iti sirib ken pigsa a ‘mangibtur iti dayta.’—1 Cor. 10:13.

8. Kasanotayo a maipakita nga ap-apresiarentayo ti sagut a kararag?

⁸ Kasanotayo a maipakita nga ap-apresiarentayo ti nagpateg a sagut a kararag? Ti maysa a pamay-an ket no sipapakumbaba a sursurotentayo ti balakad ti Dios nga “itultuloy[tayo] ti agkararag.” (1 Tes. 5:17) Saannatayo a piliten ni Jehova nga agkararag. Imbes ketdi, kayatna a boluntariotayo nga agkararag. Isu a maipakitatayo ti apresasiontayo no masansan nga agkararagtayo iti inaldaw. Siempre, iramantayo met koma iti kararagtayo ti panagyaman ken panangidaydayaw ken Jehova.—Sal. 145:2, 3.

9. Ania ti marikrikna ti maysa a kabsat maipapan iti kararag, ken ania ti mariknam iti dayta?

⁹ Bayat a bumaybayag ti panagserbitayo ken Jehova ken makitkitatayo a sungsungbatanna dagiti kararagtayo, ad-adda a maapresiartayo ti kararag. Alaentayo a pagarigan ni Chris, maysa a kabsat a lalaki a 47 a tawenen iti amin-tiempo a panagserbi. “Maragragsakanak nga agriing iti nasapa tapno agkararagak ken Jehova,” kinunana. “Makapabang-ar ti makisarita ken Jehova bayat a sumingsingising ti init ken sumilsilap dagiti nayaplag a linnaaw! Dayta ti pakatignayak nga agyaman kenkuana iti amin a sagutna, a pakairamanan ti pribilehio nga agkararag. Sa kalpasan ti panagkararagko iti rabii, nagimas ti maturog a nadalus ti konsiensiak.”

10. Apay a masapul nga ipategtayo ti nasantuan nga espiritu ti Dios?

¹⁰ Ti aktibo a puersa ti Dios ti sabali pay a di  makita a sagut a masapul nga ipategtayo. Imparegta ni Jesus nga itultuloytayo nga ikararag ti nasantuan nga espiritu. (Luc. 11:9, 13) Babaen ti espiritu ni Jehova, ikkannatayo iti bileg—uray ti “bileg a nalablabes ngem iti gagangay.” (2 Cor. 4:7; Ara. 1:8) Iti tulong ti espiritu ti Dios, maibturantayo ti aniaman a suot a mabalin a sangsanguentayo.

11. Kasano a matulongannatayo ti nasantuan nga espiritu?

¹¹ Matulongannatayo ti nasantuan nga espiritu a mangtungpal kadagiti annongentayo iti panagserbitayo iti Dios. Mapasayaat ti espiritu ti Dios dagiti talento ken abilidadtayo. Iti kasta, maitungpaltayo dagiti responsabilidadtayo kas Kristiano. Kinaagpaysuanna, dagiti nasayaat a resulta ti panagreggettayo ket saan a gapu iti bukodtayo a pigsa no di ket iti tulong ti espiritu ti Dios.

12. Sigun iti Salmo 139:23, 24, ania ti mabalin nga ikararagtayo a pangtulongan ti nasantuan nga espiritu kadatayo?

¹² Ti sabali pay a pamay-an a maipakitatayo a napateg kadatayo ti nasantuan nga espiritu ti Dios ket ikararagtayo a tulongannatayo a mangammo iti aniaman a di umiso a pampanunot wenno tarigagay iti pusotayo. (Basaen ti Salmo 139:23, 24.) No kasta ti ikararagtayo, usaren ni Jehova ti espirituna a tumulong kadatayo a mangduktal kadagiti di umiso a pampanunot wenno tarigagaytayo. Ket no adda naduktalantayo, masapul nga ikararagtayo nga ikkannatayo ti espiritu ti Dios iti bileg a manglaban iti dayta. Iti kasta, maipakitatayo a determinadotayo a mangliklik iti aniaman a rason nga isardeng ni Jehova ti tumulong kadatayo babaen ti nasantuan nga espirituna.—Efe. 4:30.

13. Kasano nga umuneg ti apresasiontayo iti nasantuan nga espiritu?

¹³ Umuneg ti apresasiontayo iti nasantuan nga espiritu no kitaentayo dagiti maar-aramidan dayta iti kaaldawantayo. Sakbay a nagpalangit ni Jesus, imbagana kadagiti adalanna: “Umawatkayto iti pannakabalin inton umay kadakayo ti nasantuan nga espiritu, ket dakayonto dagiti saksik . . . agingga iti kaadaywan a paset ti daga.” (Ara. 1:8) Kasta ti eksakto a  mapaspasamak ita. Babaen ti tulong ti nasantuan nga espiritu, agdaydayawen ken Jehova ti nasurok nga 8.6 a milion a tattao iti intero a daga. Tagtagiragsakentayo met ti naespirituan a paraiso gapu ta tultulongannatayo ti espiritu ti Dios a mangipakita kadagiti nagsasayaat a kualidad a kas iti ayat, rag-o, talna, kinaanus, kinaimbag, kinasayaat, pammati, kinaalumamay, ken panagteppel. Dagitoy a kualidad ti mangbukel iti “bunga ti espiritu.” (Gal. 5:22, 23) Talaga a nagpateg a sagut ti nasantuan nga espiritu!

14. Siasino dagiti di makita a mangsupsuporta kadatayo no makipaspasettayo iti ministerio?

¹⁴ Maysa pay a di makita a gameng ket ti panagbalintayo a “katrabahuan” ni Jehova, ni Jesus, ken dagiti anghel. (2 Cor. 6:1) Pudno dayta no makipaspasettayo iti trabaho a panagaramid iti adalan. Imbaga ni Pablo maipapan iti bagina ken kadagiti makipaspaset iti dayta a trabaho: “Katrabahuannakami ti Dios.” (1 Cor. 3:9) No makiramramantayo iti ministerio, katrabahuannatayo met ni Jesus. Kalpasan nga imbilin ni Jesus kadagiti pasurotna a ‘pagbalinenda nga adalanna dagiti tattao iti amin a nasion,’ imbagana: “Addaak kadakayo.” (Mat. 28:19, 20) Dagiti ngay anghel? Agyamyamantayo ta iwanwanwannatayo dagiti anghel bayat nga ipakpakaammotayo ti “agnanayon a naimbag a damag . . . kadagiti agnanaed iti daga”!—Apoc. 14:6.

15. Mangisalaysay iti maysa a pagarigan iti Biblia a mangipakita iti napateg a paset ni Jehova iti ministeriotayo.

¹⁵ Gapu iti dayta a nailangitan a suporta, ania ti maar-aramidantayo? Bayat nga agimulmulatayo kadagiti bin-i ti Pagarian, dadduma a bin-i ti matnag kadagiti puso a sidadaan nga umawat ket agtubo dagita. (Mat. 13:18, 23) Asino ti mamagtubo ken mangpabunga kadagita a bin-i ti kinapudno? Inlawlawag ni Jesus nga awan ti tao nga agbalin a pasurotna malaksid no “iyasideg ti Ama.” (Juan 6:44) Mangisalaysay ti Biblia iti pagarigan. Lagipentayo idi kinasabaan ni Pablo ti maysa a grupo dagiti babbai iti ruar ti siudad ti Filipos. Kuna ti Biblia maipapan iti maysa kadakuada, nga agnagan Lidia: “Linuktan ni Jehova ti pusona tapno awatenna ti ibagbaga ni Pablo.” (Ara. 16:13-15) Kas ken Lidia, minilion a dadduma pay ti inyasideg ni Jehova.

16. Asino ti rumbeng a mapadayawan iti aniaman a nasayaat a resulta ti ministeriotayo?

¹⁶ Asino ti rumbeng a mapadayawan iti aniaman a nasayaat a resulta ti ministeriotayo? Sinungbatan dayta ni Pablo idi insuratna iti kongregasion iti Corinto: “Siak ti nagmula, ni Apolos ti nagsibug, ngem ti Dios ti nangpadpadakkel iti dayta, tapno saan a maidaydayaw ti nagmula wenno ti nagsibug, no di ket ti Dios a nangpadakkel iti dayta.” (1 Cor. 3:6, 7) Kas ken Pablo, masapul a ni Jehova ti kanayon a padayawantayo iti aniaman a nasayaat a resulta ti ministeriotayo.

17. Kasanotayo a maipakita ti apresasiontayo iti pribilehio a ‘makipagtrabaho’ iti Dios, ken Kristo, ken kadagiti anghel?

¹⁷ Kasanotayo a maipakita ti apresasiontayo iti pribilehio a ‘makipagtrabaho’ iti Dios, ken Kristo, ken kadagiti anghel? No aramidentayo ti amin a kabaelantayo a mangikasaba iti naimbag a damag. Adu ti pamay-an a maaramidtayo dayta, kas iti panangasaba iti “publiko ken iti binalaybalay.” (Ara. 20:20) Adu met ti maragragsakan a mangasaba iti di pormal. Nainggayyeman a kumablaawda ken padasenda nga irugi ti saritaan. Ket no kayat dayta a tao ti makisarita, sitataktika nga iturongda ti saritaan iti mensahe ti Pagarian.

18-19. (a) Kasanotayo a masibugan dagiti bin-i ti kinapudno? (b) Mangted iti pagarigan a mangipakita a tinulongan ni Jehova ti maysa a mayad-adalan iti Biblia.

¹⁸ Kas ‘katrabahuan ti Dios,’ saantayo laeng  nga agimulmula kadagiti bin-i ti kinapudno no di ket sibsibugantayo pay dagita. No interesado ti maysa, ikagumaantayo a sarungkaran wenno iyurnostayo nga adda mangsarungkar tapno marugian a mayadalan iti Biblia. Maragsakantayo a makakita no kasano a tultulongan ni Jehova ti mayad-adalan iti Biblia a mangbalbaliw iti biagna.

¹⁹ Usigentayo ti kapadasan ni Raphalalani a maysa nga albolario idiay South Africa. Nagustuanna dagiti maad-adalna iti Biblia. Ngem narigatan a mangakseptar iti ibagbaga ti Biblia maipapan iti pannakisarita kadagiti natayen nga inapo. (Deut. 18:10-12) In-inut nga impalubosna a sukogen ni Jehova ti panagpampanunotna. Idi agangay, insardengnan ti kinaalbolariona uray no dayta laeng ti pangal-alaanna iti pagbiagna. Imbaga ni Raphalalani, nga agtawen itan iti 60: “Agyamanak unay kadagiti Saksi ni Jehova iti adu a maitultulongda kaniak, a kas iti panagbirok iti trabaho. Kangrunaanna, agyamanak ken Jehova ta tinulongannak a mangbalbaliw iti biagko, ket ita makiramramanakon iti ministerio kas bautisado a Saksi.”

20. Ania ti determinasionmo?

²⁰ Iti daytoy nga artikulo, inusigtayo ti uppat a di makita a gameng. Ti kangrunaan iti amin ket ti pribilehio a ni Jehova ti kasingedan a Gayyemtayo. Gapu iti dayta, magunggonaantayo iti dadduma pay a di makita a gameng—ti panagkararag kenkuana, ti tulong ti nasantuan nga espirituna, ken ti nailangitan a suporta iti ministeriotayo. Determinadotayo koma a mangpauneg iti apresasiontayo kadagitoy a di makita a gameng. Itultuloytayo met koma ti agyaman ken Jehova gapu ta isu ti kasayaatan a Gayyem.