1-2. Ania ti komento ti maysa a mannurat, ken ania ti pagsasaritaantayo iti daytoy nga artikulo?

MINILION a tattao ita ti mangibagbaga a mamatida ken Jesus, ngem saanda nga awaten dagiti insurona. (2 Tim. 4:3, 4) Kinapudnona, imbaga ti maysa a mannurat: “No adda sabali a Jesus ita a mangibaga iti bambanag nga imbaga idi ti orihinal a Jesus . . . , laksidentayo kadi isuna ita a kas iti pananglaksidda kenkuana dua ribu a tawenen ti napalabas? . . . Kaaduanna a ti sungbat ket: Wen.”

² Idi umuna a siglo, adu a tattao ti nakangngeg iti panangisuro ni Jesus ken nakitada nga agar-aramid kadagiti milagro. Ngem saanda a namati kenkuana. Apay? Iti napalabas nga artikulo, inusigtayo ti uppat a rason no apay a naitibkol dagiti tattao iti imbaga ken inaramid ni Jesus. Usigentayo ti uppat pay a rason. Bayat nga ar-aramidentayo dayta, maawatantayo no apay a dagiti tattao ita laksidenda dagiti pasurot ni Jesus ken no kasano a maliklikantayo ti maitibkol.

3. Ania ti inaramid ni Jesus a nakaitibkolan ti dadduma?

³ Idi adda ni Jesus ditoy daga, nakilangen iti amin a kita ti tattao. Nakipangan kadagiti nabaknang ken kadagiti addaan autoridad, ngem masansan a nakikadua met kadagiti napanglaw ken mairurrurumen. Kasta met, naasian kadagiti ibilang ti kaaduan kas “managbasol.” Naitibkol ti dadduma a managinlilinteg a tattao kadagita nga inaramid ni Jesus. Dinamagda kadagiti adalanna: “Apay a makipangpangan ken makiin-inumkayo  kadagiti managbasol ken agsingsingir iti buis?” Insungbat ni Jesus: “Dagiti masakit ti agkasapulan iti doktor, saan a dagiti nasalun-at. Immayak tapno ayabak dagiti managbasol tapno agbabawida, saan a dagiti nalinteg.”—Luc. 5:29-32.

4. Sigun ken propeta Isaias, ania koma ti ekspektaren dagiti Judio maipapan iti Mesias?

⁴ Ania ti kuna ti Kasuratan? Nabayag pay sakbay nga immay ti Mesias, imbaga ni propeta Isaias a saanto nga awaten ti lubong. Kuna ti padto: “Um-umsien ken likliklikan ti tattao . . . Kas man la saantayo a nakita ti rupana. Maum-umsi, ken imbilangtayo nga awan pategna.” (Isa. 53:3) Ti Mesias ket liklikanto “ti tattao,” isu nga ekspektaren koma dagiti Judio idi umuna a siglo a ni Jesus ket laksiden dagiti tattao.

5. Ania ti panagkita ti adu ita kadagiti pasurot ni Jesus?

⁵ Kasta met la kadi ti problema ita? Wen. Awaten a dagus ti adu a lider ti relihion kas miembroda dagiti prominente, nabaknang, ken maibilang a masirib iti daytoy a lubong. Kasta ti aramiden dagiti lider ti relihion uray no ti moralidad ken estilo ti panagbiag dagiti baro a miembroda ket masansan a saan a maitunos kadagiti pagalagadan ti Dios. Dagita met la a lider ti relihion ti manglalais kadagiti adipen ni Jehova a naregta ken nadalus ti moralidadda gapu ta nababa ti panagkita kadakuada daytoy a lubong. Kas kinuna ni Pablo, pinili ti Dios dagidiay “matagtagibassit.” (1 Cor. 1:26-29) Nupay kasta, napateg ken Jehova ti amin a matalek nga adipenna.

6. Kasanotayo a matulad ni Jesus, kas kuna ti Mateo 11:25, 26?

⁶ Ania ti aramidentayo tapno ditay maitibkol? (Basaen ti Mateo 11:25, 26.) Dimo tuladen ti panagkita ti lubong kadagiti adipen ti Dios. Laglagipem a dagiti laeng napakumbaba ti us-usaren ni Jehova a mangaramid iti pagayatanna. (Sal. 138:6) Panunotem met no kasano kaadun ti naaramidanna babaen ti panangusarna kadagiti saan nga ibilbilang ti lubong a masirib wenno nalaing.

7. Apay nga imbaga ni Jesus a managinsisingpet dagiti Fariseo, ken ania ti reaksionda?

⁷ Situtured a kinondenar ni Jesus ti ar-aramid dagiti managinsisingpet a lider ti relihion idi kaaldawanna. Kas pagarigan, imbutaktakna ti kinamanaginsisingpet dagiti Fariseo, a napatpateg kadakuada ti panangbuggo iti ima ngem iti panangaywanda kadagiti nagannakda. (Mat. 15:1-11) Mabalin a nasdaaw dagiti adalan ni Jesus iti imbagana, isu nga insaludsodda: “Ammom kadi a nakapungtot dagiti Fariseo iti imbagam?” Insungbat ni Jesus: “Tunggal mula a saan nga immula ni Amak idiay langit maparutto. Bay-anyo ida. Bulsekda a mangidaldalan. No idalan ti bulsek ti padana a bulsek, matnagdanto iti abut.” (Mat. 15:12-14) Saan nga impalubos ni Jesus a ti negatibo a reaksion dagiti lider ti relihion ti mangpasardeng kenkuana a mangibaga iti kinapudno.

8. Kasano nga impakita ni Jesus a saan nga awaten ti Dios ti amin a narelihiosuan a sursuro?

⁸ Imbutaktak met ni Jesus dagiti ulbod a doktrina. Saanna nga imbaga nga awaten ti Dios ti amin a narelihiosuan a sursuro. Imbes ketdi, imbagana nga adunto ti magna iti nalawa a dalan nga agturong iti pannakadadael, ngem manmano laeng ti magna iti nailet a dalan nga agturong iti biag. (Mat. 7:13, 14) Pinaglawagna a pagparangento ti dadduma nga agserserbida iti Dios, ngem kinaagpaysuanna, saanda nga agserserbi kenkuana. Impakdaarna: “Agannadkayo kadagiti  ulbod a propeta nga agpampammarang a kas karnero, ngem ti agpayso, narawetda a lobo. Mailasinyonto ida babaen iti bungada.”—Mat. 7:15-20.

9. Ania ti dadduma nga ulbod a sursuro nga imbutaktak ni Jesus?

⁹ Ania ti kuna ti Kasuratan? Impadto ti Biblia a kasta unay ti panangipateg ti Mesias iti balay ni Jehova. (Sal. 69:9; Juan 2:14-17) Gapu iti dayta, imbutaktak ni Jesus dagiti ulbod a sursuro ken aramid. Kas pagarigan, patien dagiti Fariseo a saan a matay ti kararua, ngem insuro ni Jesus a matmaturog laeng dagiti natay. (Juan 11:11) Saan a patien dagiti Saduceo ti panagungar, ngem pinagungar ni Jesus ti gayyemna a ni Lazaro. (Juan 11:43, 44; Ara. 23:8) Mamati dagiti Fariseo iti gasat ken amin a banag ket inkeddeng kanon ti Dios, ngem insuro ni Jesus a mabalin nga ikeddeng dagiti tattao ti agserbi iti Dios wenno saan.—Mat. 11:28.

10. Apay nga adu ti maitibkol kadagiti isursurotayo?

¹⁰ Kasta met la kadi ti problema ita? Wen. Adu ti maitibkol gapu ta dagiti naibatay-Biblia a sursurotayo ti nangibutaktak kadagiti ulbod a sursuro dagiti relihion. Isursuro dagiti lider ti relihion a dusdusaen ti Dios dagiti managdakdakes idiay impierno. Us-usarenda dayta nga ulbod a sursuro tapno makontrolda dagiti pasurotda. Kas ad-adipen ni Jehova, nga agdaydayaw iti naayat a Dios, ibutbutaktaktayo dayta nga ulbod a sursuro. Isursuro met dagiti lider ti relihion a ti kararua ket immortal wenno di matay. Ibutbutaktaktayo a nagtaud kadagiti pagano dayta a doktrina; ket no pudno man dayta a doktrina, awan no kuan ti serserbi ti panagungar. Ken saan a kas iti panamati iti predestinasion (pannakaikeddeng ti gasat) nga isursuro ti adu a relihion, isursurotayo nga adda wayawaya ti tao nga agpili ken makapagdesision no kayatna ti agserbi iti Dios. Ania ti reaksion dagiti lider ti relihion? Masansan a makapungtotda!

11. Sigun iti imbaga ni Jesus iti Juan 8:45-47, ania ti kayat ti Dios nga aramiden dagiti adipenna?

¹¹ Ania ti aramidentayo tapno ditay maitibkol? No ipatpategtayo ti kinapudno, masapul  nga akseptarentayo ti sasao ti Dios. (Basaen ti Juan 8:45-47.) Saan a kas ken Satanas a Diablo, agtalinaedtayo iti kinapudno. Ditay pulos ikompromiso dagiti patpatientayo. (Juan 8:44) Kayat ti Dios a dagiti adipenna ‘guraenda ti dakes’ ken ‘ayatenda ti naimbag,’ kas iti inaramid ni Jesus.—Roma 12:9; Heb. 1:9.

12. Apay nga adu a Judio ti naitibkol iti pamay-an ti ipapatay ni Jesus?

¹² Ania pay ti sabali a nakaitibkolan dagiti Judio idi kaaldawan ni Jesus? Imbaga ni Pablo: “Ikaskasabatayo a nabitay ni Kristo iti kayo, a pakaitibkolan kadagiti Judio.” (1 Cor. 1:23) Apay nga adu a Judio ti saan a nangawat ken Jesus gapu iti pamay-an ti ipapatayna? Para kadakuada, gapu ta nabitay ni Jesus iti kayo, kriminal ken managbasol isuna—saan a Mesias.—Deut. 21:22, 23.

13. Ania ti saan a patien dagidiay naitibkol gapu ken Jesus?

¹³ Dagiti Judio a naitibkol gapu ken Jesus saanda a binigbig nga isu ket inosente, nga ulbod ti akusasion kenkuana, ken di nainkalintegan ti pannakatratona. Dagidiay nangbista ken Jesus dida inkabkabilangan ti hustisia. Dinardaras ti korte suprema dagiti Judio ti nagmimiting, ken saanda a sinurot dagiti linteg iti panangbista. (Luc. 22:54; Juan 18:24) Saan a patas dagiti hues idi dinengngegda ti kaso ni Jesus, ta nangbirokda kadagiti “ulbod a pammaneknek kontra ken Jesus tapno mapapatayda.” Idi saan a nagballigi dayta, inkagumaan ti nangato a padi a pagsawen ni Jesus iti mausarda kontra kenkuana. Naan-anay a maikontra daytoy iti linteg. (Mat. 26:59; Mar. 14:55-64) Uray idi napagungaren ni Jesus, adda pay nagdakes nga inaramid dagidiay a nakillo a hues. Binayadanda iti “adu a pedaso a pirak” dagiti Romano a soldado a nangbantay iti tanem ni Jesus tapno agiwarasda iti ulbod nga estoria no apay nga awan ti nagyan ti tanem.—Mat. 28:11-15.

14. Ania ti impadto ti Kasuratan maipapan iti ipapatay ti Mesias?

¹⁴ Ania ti kuna ti Kasuratan? Uray no saan nga inekspektar ti adu a Judio idi kaaldawan  ni Jesus a masapul a matay ti Mesias, kitaentayo ti naipadto iti Kasuratan: “Intedna ti biagna agingga iti ipapatay ken naibilang kadagiti managbasol; imbaklayna ti basol ti adu a tattao, ken bimmallaet para kadagiti managbasol.” (Isa. 53:12) Isu nga awan ti rason dagiti Judio a maitibkol idi napapatay ni Jesus kas managbasol.

15. Ania dagiti akusasion kadagiti Saksi ni Jehova a nakaitibkolan ti dadduma?

¹⁵ Kasta met la kadi ti problema ita? Wen! Napabasol ni Jesus ken saan a patas ti pannakasentensiana, ket kasta met laeng a di nainkalintegan a pannakatrato ti mapaspasaran dagiti Saksi ni Jehova. Kas pagarigan, idi 1930’s ken 1940’s iti United States, ti wayawayatayo nga agdaydayaw iti Dios ket maulit-ulit a nakuestion kadagiti korte. Nalawag a saan a patas ti dadduma a hues iti panangtratoda kadatayo. Iti Quebec, Canada, nagtinnulong ti Simbaan ken Estado kontra iti trabahotayo. Naibalud ti adu nga agibumbunannag gapu laeng ta imbagada iti sabsabali ti maipapan iti Pagarian ti Dios. Iti Germany idi tiempo dagiti Nazi, adu a matalek nga agtutubo a kakabsattayo ti pinapatay dayta a naulpit a rehimen. Ket iti napalabas a tawtawen, nasentensiaan ken naibalud ti adu a kakabsattayo idiay Russia gapu iti panangilawlawagda iti Biblia, a naibilang kas “extremist activity.” Uray ti Baro a Lubong a Patarus ti Nasantuan a Kasuratan iti lengguahe a Russian ket naiparit ken naibilang nga “extremist” a publikasion gapu iti panangusarna iti nagan a Jehova.

16. Kas ipakita ti 1 Juan 4:1, apay a masapul a ditay patien dagiti ulbod nga estoria maipapan iti ili ni Jehova?

¹⁶ Ania ti aramidentayo tapno ditay maitibkol? Ammuentayo ti kompleto nga impormasion. Iti Sermon ni Jesus iti Bantay, pinakdaaranna dagiti agdengdengngeg kenkuana nga addanto dagiti ‘mangpadpadakes’ kadakuada. (Mat. 5:11) Ti nagtaudan dagitoy a kinaulbod ket ni Satanas. Im-impluensiaanna dagiti bumusbusor tapno agiwarasda iti pammadakes maipapan kadagidiay mangipatpateg iti kinapudno. (Apoc. 12:9, 10) Masapul a ditay patien dagiti kinaulbod nga ibagbaga dagiti bumusbusor kadatayo. Ditay koma ipalubos a dagita a kinaulbod ti makagapu nga agbutengtayo wenno kumapuy ti pammatitayo.—Basaen ti 1 Juan 4:1.

17. Kasano a naitibkol ti dadduma gapu kadagiti pasamak sakbay ti ipapatay ni Jesus?

¹⁷ Sakbay ti ipapatay ni Jesus, trinaidor ti maysa kadagiti 12 nga apostolna. Namitlo nga inlibak ti sabali pay nga apostol, ken pinanawan ti amin a dadduma pay nga apostolna iti rabii sakbay ti ipapatayna. (Mat. 26:14-16, 47, 56, 75) Saan a nasdaaw ni Jesus. Impakpakaunana pay ketdi a mapasamak dayta. (Juan 6:64; 13:21, 26, 38; 16:32) Naitibkol ti dadduma idi nakitada dayta ket inrasonda, ‘No kasta ti inaramid dagiti apostol ni Jesus, diak kayat ti makikadua iti dayta a grupo!’

18. Ania dagiti padto a natungpal sakbay ti ipapatay ni Jesus?

¹⁸ Ania ti kuna ti Kasuratan? Ginasut a tawen sakbayna, impalgak ni Jehova iti Saona a matraidor ti Mesias iti 30 a pedaso a pirak. (Zac. 11:12, 13) Ti mangtraidor ken Jesus ket maysa a nasinged a gayyemna. (Sal. 41:9) Insurat met ni propeta Zacarias: “Patayem ti pastor ken bay-am a mawarawara ti arban.” (Zac. 13:7) Imbes a maitibkol dagiti nasingpet a tattao gapu kadagita a pasamak, napabilegda idi nakitada a natungpal ken Jesus dagita a padto.

19. Ania ti ammo dagiti nasingpet a tattao?

 ¹⁹ Kasta met la kadi ti problema ita? Wen. Iti tiempotayo, sumagmamano a popular a Saksi ti nangpanaw iti kinapudno, nagbalin nga apostata, ken nangpadas a mangitallikud iti dadduma. Nagiwarasda kadagiti negatibo a report, makaallilaw nga estoria, ken agdadata a kinaulbod maipapan kadagiti Saksi ni Jehova babaen ti news media ken iti Internet. Ngem saan a naitibkol dagiti nasingpet a tattao. Ammoda ngamin nga impadto ti Biblia a mapasamak dagita.—Mat. 24:24; 2 Ped. 2:18-22.

20. Ania ti aramidentayo tapno didatay maitibkol dagidiay nangpanaw iti kinapudno? (2 Timoteo 4:4, 5)

²⁰ Ania ti aramidentayo tapno ditay maitibkol? Masapul a pagtalinaedentayo a natibker ti pammatitayo babaen ti regular a panagadal, agtultuloy a panagkararag, ken panagbalin nga okupado iti trabaho nga inted ni Jehova kadatayo. (Basaen ti 2 Timoteo 4:4, 5.) No adda pammatitayo, saantayo nga agdanag no makangngegtayo kadagiti negatibo a report. (Isa. 28:16) Makatulong ti ayattayo ken Jehova, iti Saona, ken kadagiti kakabsattayo tapno saandatayo a maitibkol dagidiay nangpanaw iti kinapudno.

21. Nupay laklaksiden ti kaaduan a tattao ita ti mensahetayo, ania ti masiguradotayo?

²¹ Idi umuna a siglo, adu ti naitibkol, ket linaksidda ni Jesus. Ngem adu met ti nangawat kenkuana. Karaman kadakuada ti maysa a miembro ti Sanhedrin dagiti Judio ken uray ti ‘adu a papadi.’ (Ara. 6:7; Mat. 27:57-60; Mar. 15:43) Minilion met ita ti saan a naitibkol. Apay? Gapu ta ammoda ken ipatpategda dagiti kinapudno a masarakan iti Kasuratan. Kuna ti Sao ti Dios: “Aglaplapusanan ti talna dagiti mangipatpateg iti lintegmo, awan ti makaitibkol kadakuada.”—Sal. 119:165.