1-2. Ania dagiti problema a pakaipaspasanguan ti adu a Saksi?

PINAREGTA ni apostol Pablo ni Timoteo—ken ti amin a Kristiano—a naan-anay nga itungpalda ti ministerioda. (2 Tim. 4:5) Ikagkagumaantayo amin a suroten ti balakad ni Pablo. Ngem adda dagiti problema. Kasapulan ti adu a kakabsattayo ti tured tapno makapangasabada. (2 Tim. 4:2) Kas pagarigan, panunotentayo dagiti kakabsat kadagiti pagilian nga adda restriksion wenno maiparparit ti trabahotayo. Mangaskasabada uray no posible a maibaludda!

² Nagduduma a problema ti pakaipaspasanguan dagiti adipen ni Jehova a mabalin a pakaupayanda. Kas pagarigan, adu kadakuada ti agtrabaho iti adu nga oras tapno maipaayda dagiti kangrunaan a kasapulan ti pamiliada. Kayatda met koma nga ad-adu ti maaramidanda iti ministerio, ngem nabambannogdan iti ngudo ti lawas. Limitado met ti maaramidan ti dadduma gapu iti nabayagen a sakitda wenno gapu ta nataengandan; mabalin a saanda pay ketdin a makapanaw iti balayda. Adda met dagiti kanayon a makarikna nga awan ti serserbida. Kinuna ni Mary * a maysa a kabsat a taga-Middle East: “Masapul nga ikagumaak a labanan ti negatibo a rikriknak a mangupay unay kaniak. Makonkonsiensiaak gapu ta dita ti pakaus-usaran ti adu a tiempo ken pigsak imbes nga iti ministeriok.”

3. Ania ti usigentayo iti daytoy nga artikulo?

³ Aniaman ti situasiontayo, mapabilegnatayo ni Jehova a mangsango kadagiti problema tapno maitultuloytayo ti agserbi kenkuana iti amin a kabaelantayo. Sakbay nga usigentayo no kasano a matulongannatayo ni Jehova, ammuentayo no kasano a pinabilegna da Pablo ken Timoteo tapno maitungpalda ti ministerioda iti laksid dagiti problema.

4. Ania dagiti problema a nakaipasanguan ni Pablo?

⁴ Adu a problema ti nakaipasanguan ni Pablo. Kasapulanna unay ti bileg idi nakabkabil, naub-ubor, ken naibalud. (2 Cor. 11:23-25) Inamin ni Pablo a lablabananna no dadduma dagiti negatibo nga emosion. (Roma 7:18, 19, 24) Inibturanna met ti problema iti salun-at a kasla maysa a “siit ti lasag,” a kayatna unay idi nga ikkaten ti Dios.—2 Cor. 12:7, 8.

5. Ania dagiti naitungpal ni Pablo iti laksid dagiti problema a nakaipasanguanna?

⁵ Pinabileg ni Jehova ni Pablo tapno maitungpalna ti ministeriona iti laksid ti amin a problema a nakaipasanguanna. Usigentayo ti naaramidan ni Pablo. Kas pagarigan, idi nakabalud iti maysa a balay idiay Roma, sireregta nga indepensana ti naimbag a damag iti sanguanan dagiti lider dagiti Judio ken nalabit dagiti opisial ti gobierno. (Ara. 28:17; Fil. 4:21,22) Kinasabaanna met ti adu a miembro ti Guardia a Pretorio ken ti amin a bimmisita kenkuana. (Ara. 28:30, 31; Fil. 1:13) Iti dayta a tiempo, inwanwan ti Dios ti panangaramid ni Pablo kadagiti surat a pakagunggonaan dagiti pudno a Kristiano agingga ita. Kasta met, napabileg ti kongregasion idiay Roma iti ulidan ni Pablo, isu a dagiti kakabsat sadiay ket ‘timmured a nangipakaammo iti sao ti Dios.’ (Fil. 1:14) Adda dagiti tiempo a limitado ti maaramidan ni Pablo, ngem nagporsegi isu a ‘naisaknap ti naimbag a damag.’—Fil. 1:12.

6. Sigun iti 2 Corinto 12:9, 10, ania ti nakatulong ken Pablo a mangitungpal iti ministeriona?

⁶ Binigbig ni Pablo a ti amin a naaramidanna iti panagserbi ken Jehova ket gapu iti bileg ti Dios, saan a gapu iti bukodna a bileg. Imbagana a ti pannakabalin ti Dios ket ‘naan-anay kenkuana no nakapuy.’ (Basaen ti 2 Corinto 12:9, 10.) Bimmileg ni Pablo gapu iti nasantuan nga espiritu ni Jehova, isu a naan-anay a naitungpalna ti ministeriona—nupay naidadanes, naibalud, ken naipasango iti dadduma pay a problema.

7. Ania dagiti problema a masapul nga ibturan ni Timoteo tapno maitungpalna ti ministeriona?

⁷ Ti ub-ubing a kadua ni Pablo a ni Timoteo ket masapul met nga agpannuray iti pannakabalin ti Dios tapno maitungpalna ti ministeriona. Kinaduana ni Pablo kadagiti adayo a panagbiahena kas misionero. Imbaon met isuna ni Pablo kadagiti kongregasion tapno bisitaen ken paregtaenna ida. (1 Cor. 4:17)  Baka impagarup idi ni Timoteo a saan a kualipikado. Nalabit dayta ti rason nga imbaga kenkuana ni Pablo: “Dimo ipalubos nga adda asinoman a manglais iti kinaagtutubom.” (1 Tim. 4:12) Iti dayta a tiempo, addaan met ni Timoteo iti bukodna a siit ti lasag—ti “masansan a panagsakit[na].” (1 Tim. 5:23) Ngem ammo ni Timoteo a pabilgen isuna ti nasantuan nga espiritu ni Jehova tapno maikasabana ti naimbag a damag ken makapagserbi kadagiti kakabsat.—2 Tim. 1:7.

8. Kasano a pabpabilgen ni Jehova dagiti adipenna ita?

⁸ Ipapaayan ita ni Jehova dagiti adipenna iti “bileg a nalablabes ngem iti gagangay” tapno maitultuloyda ti matalek a panagserbida kenkuana. (2 Cor. 4:7) Usigentayo ti uppat a probision nga ipapaay ni Jehova tapno pabilgen ken tulongannatayo nga agtalinaed a matalek kenkuana: kararag, Biblia, pannakilangen kadagiti kapammatian, ken ministeriotayo.

9. Kasano a matulongannatayo ti kararag?

⁹ Kararag. Kas kuna ti Efeso 6:18, iparparegta ni Pablo nga agkararagtayo iti Dios iti “amin a tiempo.” Sungbatan ti Dios dagita a kararag ket pabilgennatayo. Narikna a mismo dayta ni Jonnie a taga-Bolivia idi napasaranna ti agsasaruno a suot. Naggigiddan a nagsakit iti grabe ni baketna ken dagiti nagannakna. Permi ti rigat ni Jonnie a nangaywan kadakuada a tallo. Natay ni nanangna, ket nabayag a naimbagan ni baketna ken ni tatangna. Imbaga ni Jonnie maipapan iti dayta a napasaranna: “No mais-stress-ak unay idi, ti kanayon a makatulong kaniak ket dagiti espesipiko a kararagko.” Impaay ni Jehova ken Jonnie ti bileg a kasapulanna tapno makapagibtur. Naammuan ni Ronald, a maysa a panglakayen idiay Bolivia, nga adda kanser ni nanangna. Natay makabulan kalpasanna. Ania ti nakatulong kenkuana tapno maibturanna dayta? Imbagana: “No agkararagak ken Jehova, ibagbagak ti amin a linaon ti pusok ken marikriknak. Ammok nga ad-adda a maawatannak ngem iti asinoman a tao, ken ad-adda pay ketdi a maawatannak ngem iti bagik.” No dadduma, mabalin a nakaro unay ti marikriknatayo gapu iti nadagsen a problema wenno ditay ammo ti ikararagtayo. Ngem aw-awisennatayo ni Jehova nga agkararag kenkuana uray no marigatantayo a mangilawlawag iti pampanunoten ken marikriknatayo.—Roma 8:26, 27.

10. Kas ipakita ti Hebreo 4:12, apay a nakapatpateg ti panagbasa iti Biblia ken ti panangutob iti nabasatayo?

¹⁰ Biblia. Nagpannuray ni Pablo iti Kasuratan tapno mapabileg ken maliwliwa, ket kasta met ti masapul nga aramidentayo. (Roma 15:4) Bayat a basbasaen ken ut-utobentayo ti Sao ti Dios, mabalin nga usaren ni Jehova ti espirituna tapno ad-adda a maawatantayo no kasano nga iyaplikartayo ti Kasuratan iti biagtayo. (Basaen ti Hebreo 4:12.) Imbaga ni Ronald a nadakamat itay: “Maragsakanak ta nayugalik ti rinabii nga agbasa iti Biblia. Masansan nga utobek dagiti kualidad ni Jehova ken ti naayat a pannakilangenna kadagiti adipenna. Gapu iti dayta, mapabpabilegak.”

11. Kasano a pinabileg ti Biblia ti maysa a kabsat a maladladingitan unay?

¹¹ Makatulong ti panangutob iti Sao ti Dios tapno umiso ti panangmatmattayo kadagiti problematayo. Usigentayo no kasano a nakatulong ti Biblia iti maysa a maladladingitan a biuda. Insingasing kenkuana ti maysa a panglakayen nga adu ti masursurona no basaenna ti libro a Job. Ngem ti damo a reaksionna ket nasuron ken Job gapu kadagiti di umiso a  panagpampanunotna. Imbaga dayta a kabsat iti un-unegna: “Job! Dimo sangkapanunot dagiti problemam!” Ngem naamirisna nga agpadada gayam ken Job. Dayta ti nakatulong tapno mabalbaliwanna ti panangmatmatna ken maibturanna ti saem ti ipapatay ni lakayna.

12. Kasanonatayo a pabilgen ni Jehova babaen kadagiti kapammatiantayo?

¹² Pannakilangen kadagiti kapammatian. Pabpabilgennatayo met ni Jehova babaen kadagiti padatayo a Kristiano. Insurat ni Pablo a mailiw a ‘makipinnaregta’ kadagiti naespirituan a kakabsatna. (Roma 1:11, 12) Ti kasta a panaglalangen ket magusgustuan ni Mary, a nadakamat itay. Imbagana: “Us-usaren ni Jehova dagiti kakabsat a di makaammo nga adda dagiti problemak. Parparegtaendak wenno patulodandak iti kard iti tiempo a kasapulak unay dayta. Makatulong met ti pannakisaritak iti dadduma a sister a kapadak ti mapaspasaranda. Isu a makasursuroak kadagiti kapadasanda. Ken kanayon nga iparikna kaniak dagiti panglakayen a maysaak a napateg a paset ti kongregasion.”

13. Kasanotayo a mapabileg ti maysa ken maysa kadagiti gimong ti kongregasion?

¹³ Dagiti gimong ti kongregasion ti maysa kadagiti kasayaatan a gundaway tapno makapagpipinnaregtatayo. No makigimongka, pabilgem koma ti sabsabali babaen ti napasnek nga ebkas ti panangipateg ken panangapresiarmo. Kas pagarigan, sakbay a mangrugi ti gimong, imbaga ti panglakayen a ni Peter iti maysa a kabsat a saan a Saksi ni lakayna: “Makaparegta ti pannakakitami kenka kadagiti gimong. Kanayon a kaduam ti innem nga annakmo ken kanayon a nakasaganada nga agkomento.” Makasangit a nagyaman dayta a kabsat ket kinunana: “Diyo la ammo no kasano a naparegtaak iti dayta nga imbagayo.”

14. Kasano a makatulong kadatayo ti ministerio?

¹⁴ Ministerio. No ipakaammotayo iti sabsabali dagiti kinapudno iti Biblia, mabang-aran ken mapabilegtayo, dumngegda man wenno saan. (Prov. 11:25) Napadasan ti kabsat a ni Stacy a talaga a makapabileg ti ministerio. Idi nailaksid ti maysa a kapamiliana, nalidayan unay ket insalsaludsodna iti bagina, ‘Ania ngata koma ti masapul nga inaramidko tapno natulongak?’ Dayta ti sangkapanunot ni Stacy. Ania ti nakatulong tapno sumayaat ti riknana? Ti ministerio! Iti panangasabana, nagpokus kadagiti tattao iti teritoria nga agkasapulan iti tulong. Kinunana: “Iti daydi a tiempo, inikkannak ni Jehova iti iyadalak iti Biblia nga alisto ti panagrang-ayna. Naparegtaak unay gapu iti dayta. Ti kangrunaan a nakatulong kaniak ket ti pannakiramanko iti ministerio.”

15. Ania ti nasursurom iti imbaga ni Mary?

¹⁵ Gapu iti kasasaad ti dadduma, baka mariknada a bassit ti maar-aramidanda iti ministerio. No kasta met ti marikriknam, laglagipem a maragsakan ni Jehova no ar-aramidem ti amin a kabaelam. Usigentayo manen ti ulidan ni Mary. Idi immakar iti sabali ti lengguahena a kongregasion, panagriknana ket bassit laengen ti maar-aramidanna. Imbagana: “Medio nabayag met a ti laeng maaramidak ket agkomento iti simple wenno agbasa iti teksto ti Biblia wenno mangted iti tract.” Isu a nariknana a bassit laeng ti maar-aramidanna no ikompara kadagiti nalaing iti dayta a lengguahe. Ngem binalbaliwanna ti panangmatmatna. Naamirisna a mabalin latta nga usaren isuna ni Jehova uray saan unay a nalaing iti dayta a lengguahe. Kinunana: “Simple laeng dagiti makaispal-biag a kinapudno iti Biblia, ngem kabaelan a balbaliwan dagita a kinapudno ti panagbiag dagiti tattao.”

16. Ania ti mangpabileg kadagidiay saan a makaruar iti balayda?

 ¹⁶ Makitkita ken ap-apresiaren ni Jehova ti tarigagaytayo a makipaset iti ministerio uray no saantayo a makaruar iti balaytayo. Matulongannatayo tapno makasabaantayo dagidiay umay mangay-aywan kadatayo wenno dagiti doktor ken nars. Mabalin a maupaytayo no ikomparatayo ti maar-aramidantayo ita kadagiti maar-aramidantayo idi. Ngem no panunotentayo no kasano a tultulongannatayo ita ni Jehova, bumilegtayo ket siraragsak a maibturantayo ti aniaman a suot.

17. Sigun iti Eclesiastes 11:6, apay a masapul nga itultuloytayo ti mangasaba uray saantayo a dagus a makita dagiti resultana?

¹⁷ Ditay ammo no ania kadagiti bin-i ti kinapudno nga imulatayo ti agramut ken agtubo. (Basaen ti Eclesiastes 11:6.) Kas pagarigan, ti kabsat a ni Barbara a nasuroken nga 80 ti tawenna ket regular a mangasaba iti telepono ken surat. Iti maysa kadagiti suratna, inragpinna ti Pagwanawanan a Marso 1, 2014, nga addaan iti artikulo a “No Ania ti Naaramidanen ti Dios Kenka.” Dina ammo a naipatulodna gayam dayta a surat iti agassawa a saanen a Saksi ni Jehova. Namin-adu a binasada dayta a magasin. Narikna ti mister a kas man la kasarsarita isuna ni Jehova. Nakigimong manen dagitoy nga agassawa. Ket idi agangay, nagbalinda manen nga aktibo a Saksi—kalpasan ti nasurok a 27 a tawen. Talaga a naparegta ken napabileg ni Barbara idi nakitana dagiti kasta a nagsayaat a resulta ti maysa a suratna!

18. Ania ti aramidentayo tapno mapabilegnatayo ti Dios?

¹⁸ Ipapaayannatayo ni Jehova iti umdas a gundaway nga umawat iti aglaplapusanan a pannakabalinna. No us-usarentayo dagiti probisionna—kas iti kararag, Biblia, pannakilangen kadagiti kapammatian, ken ministerio—ipakpakitatayo nga agtaltalektayo a kabaelan ken kayat ni Jehova ti tumulong kadatayo. Kanayontay koma nga agpannuray iti nailangitan nga Amatayo, a siraragsak nga “ipakitana ti pigsana kadagidiay naan-anay ti pusoda kenkuana.”—2 Cron. 16:9.