1-2. Ania ti maysa a rason nga interesadotayo iti libro nga Apocalipsis?

 NAPADASAM kadin a kinita wenno binuya ti photo album ti maysa a tao? Bayat a buybuyaem dagiti piktiur, adu dagiti makitkitam a saanmo nga am-ammo. Ngem maysa a piktiur ti nangala iti atensionmo. Apay? Addaka ngamin iti dayta a piktiur. Bayat a mingmingmingam ti piktiur, pampanunotem no kaano ken sadino ti nakaalaan dayta. Padpadasem met nga irupaan ti amin nga adda iti dayta a ladawan. Espesial unay kenka dayta a ladawan.

² Ti libro nga Apocalipsis ket kas iti dayta a retrato. Apay? Gapu iti dua a rason. Umuna, daytoy a libro ti Biblia ket naisurat para kadatayo. Iti laengen kaunaan a bersikulona, mabasatayo: “Daytoy ket apocalipsis ni Jesu-Kristo, nga inted kenkuana ti Dios, tapno ipakitana kadagiti adipenna . . . dagiti masapul a mapasamak iti mabiit.” (Apoc. 1:1) No kasta, dagiti naisurat iti daytoy a libro ket saan a para iti amin a tattao no di ket para kadatayo a dedikado nga adipen ti Dios. Kas ili ti Dios, ditay koma masdaaw no maammuantayo a makiramramantayo iti pannakatungpal dagiti padto iti daytoy makapainteres a libro. Iti sabali a pannao, makitkitatayo ti bagitayo “iti dayta a ladawan.”

3-4. Sigun iti libro nga Apocalipsis, kaano a matungpal dagiti linaonna a padto, ken ania ti masapul nga epektona iti tunggal maysa kadatayo?

³ Ti maikadua a rason ramanenna ti tiempo no kaano a matungpal dagita a padto. Impakaammo ti lakayen a ni apostol Juan dayta a tiempo idi imbagana: “Impannak ti nasantuan nga espiritu iti aldaw ti Apo.” (Apoc. 1:10) Idi insurat ni Juan dagita a sasao idi agarup 96 C.E., adayo pay ti “aldaw ti Apo.”  (Mat. 25:14, 19; Luc. 19:12) Ngem sigun iti padto ti Biblia, nangrugi dayta nga aldaw idi 1914, idi naitrono ni Jesus kas Ari idiay langit. Sipud dayta a tawen nga agpatpatuloy, dagiti padto ti Apocalipsis nga adda pakainaiganna iti ili ti Dios ket matungtungpalen. Wen, agbibiagtayon iti “aldaw ti Apo”!

⁴ Gapu ta agbibiagtayon iti daytoy makapagagar a tiempo, datayo ti kangrunaan a mangipangag iti naayat a pammagbaga a mabasa iti Apocalipsis 1:3: “Naragsak daydiay mangbasa a sipipigsa ken dagidiay dumngeg iti sasao daytoy a padto ken mangtungpal kadagiti naisurat iti dayta, ta asidegen ti naikeddeng a tiempo.” Masapul ngarud nga ‘agbasatayo a sipipigsa,’ tapno ‘dumngegtayo iti sasao daytoy a padto,’ ken ‘tungpalentayo’ dagita. Ania ti dadduma kadagita a sasao ti masapul a tungpalentayo?

5. Kasano nga ipaganetget ti libro nga Apocalipsis a napateg a siguraduentayo nga akseptaren ni Jehova ti panagdaydayawtayo?

⁵ Iti pay laeng umuna a kapitulo ti Apocalipsis, maammuantayon nga ammo ni Jesus ti amin a mapaspasamak kadagiti kongregasion. (Apoc. 1:12-16, 20; 2:1) Paneknekan dayta dagiti mensahe ni Jesus iti pito a kongregasion iti Asia Menor. Kadagita a mensahe, nangted ni Jesus iti espesipiko nga instruksion a makatulong kadagiti Kristiano idi umuna a siglo tapno masiguradoda nga akseptaren ni Jehova ti panagdaydayawda. Ti imbagana kadagita a mensahe ket agaplikar met iti amin nga adipen ti Dios ita. Ania ti masursurotayo? Ti Lidertayo, ni Kristo Jesus, pagaammona unay ti naespirituan a kasasaadtayo. Idaldalan ken protprotektarannatayo ni Jesus; ken makitkitana ti amin. Ammona ti masapul nga aramidentayo tapno agtultuloy nga anamongannatayo ni Jehova. Ania nga instruksionna ti masapul a tungpalentayo ita?

6. (a) Sigun iti Apocalipsis 2:3, 4, ania ti imbaga ni Jesus a problema ti kongregasion idiay Efeso? (b) Ania ti masursurotayo iti daytoy?

⁶ Basaen ti Apocalipsis 2:3, 4. Rumbeng a ditay pukpukawen ti damo nga ayattayo ken Jehova. Sigun iti mensahe ni Jesus kadagiti miembro ti kongregasion idiay Efeso, agib-ibtur ken agserserbida latta ken Jehova iti laksid ti nadumaduma a pakarigatan. Ngem napukawda ti damo nga ayatda. Masapul a parayrayenda manen dayta nga ayatda​—ta no saan, saan a maakseptar ti panagdaydayawda. Kasta met la ita, masapul a saantayo laeng a basta agibtur. Rumbeng nga agibturtayo gapu kadagiti umiso a rason. Interesado ti Diostayo saan laeng a no ania ti ar-aramidentayo no di ket no apay nga ar-aramidentayo dayta. Napateg kenkuana dagiti motibotayo ta kayatna a ti panagdaydayawtayo ket naibatay iti nauneg a panagayat ken apresasiontayo kenkuana.​—Prov. 16:2; Mar. 12:29, 30.

7. (a) Kas mabasa iti Apocalipsis 3:1-3, ania ti nakita ni Jesus a problema ti kongregasion idiay Sardis? (b) Ania ti masapul nga aramidentayo?

⁷ Basaen ti Apocalipsis 3:1-3. Masapul nga agtalinaedtayo a siririing ken alerto. Sabali ti problema dagiti miembro ti kongregasion idiay Sardis. Nakaregregtada idi ngem bimmaaw ti regtada nga agserbi iti Dios. Isu nga imbaga ni Jesus nga ‘agriingda.’ Ania a pakdaar ti masursurotayo? Siempre, saan a lipaten ni Jehova dagiti ar-aramidentayo. (Heb. 6:10) Ngem ditay koma pagarupen a gapu ta nagserbitayon ken Jehova iti napalabas, saanen a kasapulan nga agserbitayo kenkuana ita. Uray no ad-adu ti limitasiontayo ita ngem idi, masapul nga agtalinaedtayo nga okupado  “iti trabaho ti Apo,” ken siririing ken alerto agingga iti panungpalan.​—1 Cor. 15:58; Mat. 24:13; Mar. 13:33.

8. Kas mabasa iti Apocalipsis 3:15-17, ania ti masursurotayo iti imbaga ni Jesus kadagiti kakabsat idiay Laodicea?

⁸ Basaen ti Apocalipsis 3:15-17. Masapul nga agbalintayo a naregta ken naimpusuan iti panagdaydayawtayo. Impakita ti mensahe ni Jesus kadagiti taga-Laodicea ti sabali pay a problema. ‘Apaganem-em’ ti panagdaydayawda. Gapu iti kinaaleng-alengda, imbaga ni Jesus a “nakapimpiman” ken “nakakaasi” ti kasasaadda. Masapul nga agbalinda a nakaregregta para ken Jehova ken iti panagdaydayawda kenkuana. (Apoc. 3:19) Ania ti masursurotayo? No bumaaw ti kinaregtatayo, masapul a parayrayentayo ti apresasiontayo kadagiti naespirituan a kinabaknangtayo. (Apoc. 3:18) Pulos a ditay ipalubos a ti panagporsegitayo a maaddaan iti nanam-ay a biag ti makagapu a saanen a numero uno iti biagtayo dagiti naespirituan nga aktibidad.

9. Kas ipakita ti mensahe ni Jesus kadagiti Kristiano idiay Pergamo ken Tiatira, ania a peggad ti masapul a liklikantayo?

⁹ Masapul a laksidentayo ti pannursuro dagiti apostata. Binabalaw ni Jesus ti dadduma idiay Pergamo ta nagbalinda a promotor iti panagsisina ken sekta. (Apoc. 2:14-16) Kinomendaranna dagiti kakabsat idiay Tiatira a nangliklik kadagiti “nauneg a bambanag ni Satanas,” ken imparegtana nga ‘agtalinaedda’ iti kinapudno. (Apoc. 2:24-26) Masapul nga agbabawi dagiti nakapuy a Kristiano a namati kadagiti ulbod a pannursuro. Datayo ngay ita? Masapul a laksidentayo ti aniaman a pannursuro a maikontra iti pampanunot ni Jehova. Dagiti apostata ket ‘kasla relihioso ngem saanda nga agbibiag a kasta.’ (2 Tim. 3:5) Nalaklakatay nga ilasin ken laksiden dagiti ulbod a pannursuro no nagagettayo nga agadal iti Sao ti Dios.​—2 Tim. 3:14-17; Jud. 3, 4.

10. Ania pay dagiti masursurotayo iti imbaga ni Jesus kadagiti kongregasion idiay Pergamo ken Tiatira?

¹⁰ Masapul a ditay makiraman, ditay panuynoyan, wenno ditay konsintiren ti aniaman a kita ti immoralidad. Adda pay ti sabali a problema iti Pergamo ken Tiatira. Kinondenar ni Jesus ti dadduma kadagita a kongregasion ta saanda a linaksid ti immoralidad. (Apoc. 2:14, 20) Ania ti masursurotayo? Ditay ekspektaren a panuynoyan ni Jehova ti aniaman nga immoral nga ar-aramidentayo, uray no nabayagen  nga agserserbitayo kenkuana ken uray no adu ti pribilehiotayo ita. (1 Sam. 15:22; 1 Ped. 2:16) Namnamaenna a surotentayo dagiti nangato a moral a pagalagadanna uray no bumabbaba dagiti pagalagadan ti lubong.​—Efe. 6:11-13.

11. Ania dagiti naadaltayon? (Kitaen met ti kahon a “ Dagiti Leksion Para Kadatayo Ita.”)

¹¹ Ania dagiti naadaltayon? Nakitatayo a masapul a siguraduentayo nga akseptaren ni Jehova ti panagdaydayawtayo. No adda ar-aramidentayo a dayta ti rason a saan a maakseptar ti panagdaydayawtayo, masapul nga agtignaytayo a dagus tapno mailinteg dayta. (Apoc. 2:5, 16; 3:3, 16) Ngem adda pay dinakamat ni Jesus iti mensahena kadagiti kongregasion. Ania dayta?

12. Ania ti imbaga ni Jesus kadagiti kakabsat idiay Smirna ken Filadelfia a masapul a paginteresantayo ita? (Apocalipsis 2:10)

¹² Usigentayo ti mensahe ni Jesus kadagiti kongregasion idiay Smirna ken Filadelfia. Imbagana kadagiti Kristiano sadiay a dida mabuteng a maidadanes, ta bendisionan ida ni Jehova no agmatalekda. (Basaen ti Apocalipsis 2:10; 3:10) Ania ti masursurotayo ita? Ekspektarentayo a maidadanestayo ken situtuloktayo a mangibtur iti dayta. (Mat. 24:9, 13; 2 Cor. 12:10) Apay a napateg daytoy a pammalagip?

13-14. Kasano a maap-apektaran ti ili ti Dios kadagiti pasamak a nadeskribir iti Apocalipsis kapitulo 12?

¹³ Ipakaammo kadatayo ti libro nga Apocalipsis a maidadanes ti ili ti Dios iti kaaldawantayo​—iti “aldaw ti Apo.” Sigun iti Apocalipsis kapitulo 12, adda napasamak a gubat idiay langit kalpasan unay a naipasdek ti Pagarian ti Dios. Ni Miguel​—ti naipadayag a ni Jesu-Kristo​—ken ti armadana ket nakilaban ken Satanas ken kadagiti demonio. (Apoc. 12:7, 8) Kas resultana, naabak dagita a kabusor ti Dios ken naitapuakda ditoy daga isu nga adu ti sagsagabaen dagiti tattao agraman ti daga. (Apoc. 12:9, 12) Ngem ania ti epekto dayta iti ili ti Dios?

¹⁴ Ibaga met ti Apocalipsis ti reaksion ni Satanas. Saanen a makapan idiay langit, isu nga ipappapasna ti pungtotna kadagiti natda kadagiti dinutokan ti espiritu a pannakabagi ti Pagarian ti Dios ditoy daga ken “nadutokan a mangsaksi ken Jesus.” (Apoc. 12:17; 2 Cor. 5:20; Efe. 6:19, 20) Kasano a matungtungpal daytoy a padto?

15. Siasino ti irepresentar ti ‘dua a saksi’ a nadakamat iti Apocalipsis kapitulo 11, ken ania ti napasamak kadakuada?

¹⁵ Sinugsogan ni Satanas dagiti kabusor ti Dios a mangraut kadagiti kakabsat a dinutokan ti espiritu a mangidadaulo iti trabaho a panangikasaba iti Pagarian. Dagiti prominente  kadakuada ti isimbolo ti ‘dua a saksi’ a napapatay. * (Apoc. 11:3, 7-11) Idi 1918, walo a brother nga addaan responsabilidad ti naakusaran gapu kadagiti ulbod a pammabasol, ken nasentensiaan iti napaut a pannakaibalud. Iti panangmatmat ti tao, kasla ‘napapatay’ ti trabaho dagitoy a dinutokan ti espiritu.

16. Ania ti di ninamnama a napasamak idi 1919, ngem ania ti itultuloy ni Satanas nga aramiden sipud idi?

¹⁶ Ti padto iti Apocalipsis kapitulo 11 ibagana met a ti ‘dua a saksi’ ket mapagungar kalpasan ti ababa a tiempo. Natungpal dayta idi adda di ninamnama a napasamak awan pay makatawen manipud naibaludda. Idi Marso 1919, dagidiay a kakabsat a dinutokan ti espiritu ket nawayawayaan iti pagbaludan ken naabsueltoda idi agangay. Dagus nga indauluanda manen ti trabaho ti Pagarian. Ngem intultuloy latta ni Satanas dagiti panangrautna iti ili ti Dios. Sipud idin, ti “karayan” ti panangidadanes ket impugson ni Satanas iti amin nga adipen ti Dios. (Apoc. 12:15) Talaga a ti tunggal maysa kadatayo ket ‘masapul nga agibtur ken maaddaan iti pammati.’​—Apoc. 13:10.

17. Ania a di ninamnama a tulong ti inawat ti ili ti Dios uray no isuda ti puntiria ni Satanas?

¹⁷ Ipakita ti Apocalipsis kapitulo 12 nga adda di ninamnama a tulong a maawat ti ili ti Dios. “Ti daga” kas man la inigupna “ti karayan” ti panangidadanes. (Apoc. 12:16) Dayta ti eksakto a mapaspasamak. Adda dagiti tiempo a dagiti napigpigsa nga elemento ti lubong ni Satanas, kas iti dadduma a sistema ti hustisia, ket pabor iti ili ti Dios. Namin-adun a nangabak dagiti adipen ni Jehova kadagiti kaso iti korte isu nga adda wayawaya a matagtagiragsakda. Pangus-usaranda iti wayawayada? Nainsiriban a gunggundawayanda ti amin nga oportunidad tapno aramidenda ti trabaho nga inted kadakuada ni Jehova. (1 Cor. 16:9) Ania ti ramanen daytoy a trabaho?

18. Ania ti kangrunaan a trabahotayo bayat dagitoy maudi nga al-aldaw?

¹⁸ Impadto ni Jesus a sakbay nga umay ti panungpalan, ipakaammo dagiti pasurotna ti “naimbag a damag maipapan iti Pagarian” ti Dios iti intero a daga. (Mat. 24:14) Bayat a mangaskasabada, tultulongan ida ti maysa nga anghel, wenno grupo dagiti anghel, a nadeskribir a mangipakpakaammo iti “agnanayon  a naimbag a damag . . . kadagiti agnanaed iti daga, iti tunggal nasion ken tribu ken lengguahe ken ili.”​—Apoc. 14:6.

19. Ania pay a mensahe ti masapul nga ikasaba dagiti mangay-ayat ken Jehova?

¹⁹ Saan laeng a ti naimbag a damag maipapan iti Pagarian ti masapul nga ipakaammo ti ili ti Dios. Masapul met a suportaranda ti trabaho dagiti anghel a nadeskribir iti Apocalipsis kapitulo 8 agingga iti 10. Ipakpakaammo dagitoy nga anghel ti agsasaruno a nakakaasi a pagbanagan dagidiay mangilaksid iti Pagarian ti Dios. Dayta ti rason nga ipakpakaammo met dagiti Saksi ni Jehova ti mensahe ti panangukom a kas iti “uraro ken apuy,” a mangilawlawag kadagiti panangukom ti Dios iti nadumaduma nga elemento ti nakadakdakes a lubong ni Satanas. (Apoc. 8:7, 13) Masapul a maammuan dagiti tattao nga asidegen ti panungpalan tapno makapagbalbaliwda a dagus ken maisalakanda iti aldaw ti pungtot ni Jehova. (Sof. 2:2, 3) Ngem saan a kayat dayta ti adu a tattao. Kasapulantay ngarud ti tured a mangipakaammo iti dayta. Bayat ti dakkel a rigat, ti maudi a mensahe ti panangukom ket nadagdagsento pay.​—Apoc. 16:21.

20. Ania ti usigentayo iti sumaruno a dua nga artikulo?

²⁰ Talaga a masapul a tungpalentayo ti “sasao daytoy a padto” ta karamantayo iti pannakatungpal dagiti mabasatayo iti libro nga Apocalipsis. (Apoc. 1:3) Ngem kasanotayo a simamatalek a maibturan ti pannakaidadanes ken agtultuloy a situtured a mangipakaammo kadagita a mensahe? Dua a banag ti mangpabileg kadatayo: Umuna, ipakaammo ti libro nga Apocalipsis ti mapasamak kadagiti kabusor ti Dios; maikadua, ipakaammona dagiti bendision a maawattayto no agtalinaedtayo a matalek. Usigentayo dagitoy iti sumaruno a dua nga artikulo.