MAADAL NGA ARTIKULO 21
Apocalipsis—Ti Kaipapananna Para iti Masakbayam
“Amen! Umayka, Apo Jesus.”—APOC. 22:20.
KANTA 142 Taginayonentayo ti Namnamatayo
ITI DAYTOY A PANAGADAL *
1. Ania a napateg a desision ti masapul nga aramiden ti amin a tattao?
ADDA napateg a desision a masapul nga aramiden dagiti tattao ita. Ni Jehova a Dios kadi ti suportaranda kas ti addaan kalintegan nga Agturay iti uniberso, wenno suportaranda ti nakadakdakes a kabusorna, ni Satanas a Diablo? Dua laeng ti pagpilian. Nakadepende iti desisionda no agbiagda nga agnanayon wenno saan. (Mat. 25:31-33, 46) Bayat ti “dakkel a rigat,” mamarkaandanto para iti pannakaisalakan wenno pannakadadael.—Apoc. 7:14; 14:9-11; Ezek. 9:4, 6.
2. (a) Ania ti iparparegta ti Hebreo 10:35-39 nga aramidentayo? (b) Kasano a matulongannatayo ti libro nga Apocalipsis?
2 Basaen ti Hebreo 10:35-39. No pinilim a suportaran ti panangituray ni Jehova, nainsiriban ti inaramidmo a desision. Ita, magagarankan a tumulong iti sabsabali a mangaramid iti umiso a desision. Tapno maaramidmo dayta, mabalinmo nga usaren dagiti impormasion iti libro nga Apocalipsis. Ipakaammo daytoy naisangsangayan a libro ti mapasamak kadagiti bumusor ken Jehova. Itampokna met dagiti bendision a magun-odan dagiti simamatalek a mangsuporta iti turayna. Masapul ngarud nga adalentayo dagitoy a nagpapateg a kinapudno. No aramidentayo dayta, mas determinadotayo nga agtultuloy nga agserbi ken Jehova. Kasta met, mabalintayo nga usaren dagiti nasursurotayo a tumulong iti sabsabali nga agdesision nga agserbi ken Jehova ken agtultuloy nga agserbi kenkuana.
3. Ania ti usigentayo iti daytoy nga artikulo?
3 Iti daytoy nga artikulo, usigentayo dagitoy a saludsod: Ania ti mapasamak kadagiti mangsupsuporta iti panagturay ti Dios? Iti sabali a bangir, ania ti mapasamak kadagidiay mangsupsuporta iti nalabaga a narungsot nga animal, a nailadawan iti libro nga Apocalipsis?
TI MAPASAMAK KADAGITI MATALEK
4. Ania a grupo ti nakita ni apostol Juan a kadua ni Jesus idiay langit?
4 Iti maysa a sirmata, nakita ni apostol Juan ti dua a grupo a mangsupsuporta iti panagturay ni Jehova ken aw-awatenda ti bendision a biag nga agnanayon. Ti bilang ti umuna a grupo ket 144,000. (Apoc. 7:4) Ditoy daga ti nakaalaanda ket makikaduada ken Jesus idiay langit tapno mangbukelda iti maysa a gobierno, wenno Pagarian. Kaduada isuna a mangituray ditoy daga. (Apoc. 5:9, 10; 14:3, 4) Iti sirmata, nakita ida ni Juan a nakatakder a kadua ni Jesus iti nailangitan a Bantay Sion.—Apoc. 14:1.
5. Ania ti asidegen a mapasamak kadagiti nabatbati a paset ti 144,000?
5 Manipud idi tiempo dagiti apostol agingga ita, rinibun ti napili nga agbalin a paset ti 144,000. (Luc. 12:32; Roma 8:17) Ngem naibaga ken Juan nga adda bassit a bilang dagiti natda a sibibiag bayat ti maudi nga al-aldaw. Awaten “dagiti nabatbati” ti maudi a “selio” ti anamong ni Jehova sakbay a mangrugi ti dakkel a rigat. (Apoc. 7:2, 3; 12:17) Kalpasanna, addanto tiempo bayat ti dakkel a rigat a dagitoy a natda ket maipan idiay langit tapno makikaduada iti dadduma pay a kameng ti 144,000 a natay a simamatalek. Sadiay a makipagturaydanto a kadua ni Jesus iti Pagarian ti Dios.—Mat. 24:31; Apoc. 5:9, 10.
6-7. (a) Ania a grupo ti simmaruno a nakita ni Juan, ken ania ti maammuantayo maipapan kadakuada? (b) Apay nga interesado ti natda ken ti “dakkel a bunggoy” iti Apocalipsis kapitulo 7?
6 Kalpasan a nakita ni Juan ti grupo a para langit, nakitana ti “dakkel a bunggoy.” Saan a kas iti 144,000, daytoy a grupo ket saan a mabilang. (Apoc. 7:9, 10) Ania ti maammuantayo maipapan kadakuada? Naibaga ken Juan: “Isuda dagidiay nakalasat iti dakkel a rigat, ken linabaanda dagiti badoda ken pinapudawda iti dara ti Kordero.” (Apoc. 7:14) Apaman a makalasat ti “dakkel a bunggoy” iti dakkel a rigat, agnaedda ditoy daga ken tagiragsakenda dagiti nakaskasdaaw a bendision.—Sal. 37:9-11, 27-29; Prov. 2:21, 22; Apoc. 7:16, 17.
7 Datayo man dagiti napili a mapan idiay langit wenno agtalinaed ditoy daga, makitkitatayo kadi ti bagitayo iti ladawan a nadeskribir iti Apocalipsis kapitulo 7? Masapul koma a kasta. Makapagagar unay dayta a tiempo para iti dua a grupo nga agserserbi iti Dios! Perminto ti ragsaktayo ta pinilitayo a suportaran ti turay ni Jehova. Ania pay ti ibaga kadatayo ti libro nga Apocalipsis maipapan iti dakkel a rigat?—Mat. 24:21.
TI MAPASAMAK KADAGITI BUMUSBUSOR ITI DIOS
8. Kasano a mangrugi ti dakkel a rigat, ken anianto ti reaksion ti kaaduan a tattao?
8 Kas nadakamat iti napalabas nga artikulo, dagiti napolitikaan nga elemento daytoy a lubong asidegen a bueltaenda ti Babilonia a Dakkel, ti sangalubongan nga imperio ti ulbod a relihion. (Apoc. 17:16, 17) Dayta a pasamak ti pangrugian ti dakkel a rigat. Gapu iti dayta, umadunto kadi ti agdesision nga agdayawdan ken Jehova? Saan. Imbes ketdi, ipakita ti Apocalipsis kapitulo 6 nga iti dayta a nagpateg a tiempo, dagiti tattao a saan nga agserserbi ken Jehova ket agkamangto kadagiti napolitikaan ken nakomersialan a sistema daytoy a lubong, a nayarig iti bambantay. Gapu ta saanto a suportaran dagita a tattao ti Pagarian ti Dios, ibilangto ida ni Jehova a kabusorna.—Luc. 11:23; Apoc. 6:15-17.
9. Kasanonto a makita dagiti tattao a naiduma ti ili ni Jehova bayat ti dakkel a rigat, ket anianto ti resultana?
9 Talaga a makitanto a naiduma dagiti matalek nga adipen ni Jehova bayat dayta a nakarigrigat a tiempo. Agtultuloy nga isudanto la ngamin ti kakaisuna a grupo dagiti tattao ditoy daga nga agserserbi ken Jehova a Dios ken agkedked a mangsuporta iti “narungsot nga animal.” (Apoc. 13:14-17) Gapu ta agtaltalinaedda a matalek, kumaronto ti pungtot dagiti bumusbusor ken Jehova. Kas resultana, ti aliansa dagiti nasion rautennanto ti ili ti Dios iti intero a daga. Sigun iti padto, daytoy a minamaag nga iraraut ket nadeskribir kas ti iraraut ni Gog iti Magog.—Ezek. 38:14-16.
10. Kas nadeskribir iti Apocalipsis 19:19-21, anianto ti reaksion ni Jehova iti daytoy a pannakaraut ti ilina?
10 Anianto ti reaksion ni Jehova iti daytoy nakadakdakes nga iraraut? Ibagana kadatayo: “Sumgedto ti nakaro a pungtotko.” (Ezek. 38:18, 21-23) Deskribiren ti Apocalipsis kapitulo 19 ti sumaruno a mapasamak. Ibaon ni Jehova ti Anakna a mangprotektar iti ilina ken abakenna dagiti kabusorda. Iti daytoy a panagibales, makikaduanto ken Jesus “dagiti armada idiay langit”—dagiti matalek nga anghel ken ti 144,000. (Apoc. 17:14; 19:11-15) Ania ti resulta daytoy a gubat? Ti pannakatalipupos ti amin a tao ken organisasion a bumusbusor ken Jehova!—Basaen ti Apocalipsis 19:19-21.
KALPASAN TI GUBAT, KASAR
11. Ania ti naisangsangayan a pasamak kas tampok ti libro nga Apocalipsis?
11 Imadyinentayo ti rikna dagiti matalek a tattao ditoy daga a makalasat inton dinadaelen ti Dios ti amin a kabusorna! Nakaragragsakto la ketdi dayta a tiempo! Nupay addanto napigsa a panagpupukkaw idiay langit gapu iti rag-o inton nadadaelen ti Babilonia a Dakkel, addanto pay sabali a mangyeg iti dakdakkel a rag-o. (Apoc. 19:1-3) Kinapudnona, dayta ti tampok ti libro nga Apocalipsis—“ti kasar ti Kordero.”—Apoc. 19:6-9.
12. Kas ipakita ti Apocalipsis 21:1, 2, kaanonto ti kasar ti Kordero?
12 Kaano a maangay dayta a kasar? Addanton idiay langit ti amin a 144,000 sakbay unay a mangrugi ti gubat ti Armagedon. Ngem saanto a dayta ti tiempo ti kasar ti Kordero. (Basaen ti Apocalipsis 21:1, 2.) Maangayto ti kasar ti Kordero kalpasan ti gubat ti Armagedon, ket iti dayta a tiempo, nadadaelen ti amin a kabusor ti Dios.—Sal. 45:3, 4, 13-17.
13. Anianto ti mapasamak iti kasar ti Kordero?
13 Anianto ti mapasamak iti kasar ti Kordero? Ti kasar pagtiponenna ti maysa a lalaki ken maysa a babai. Daytoy ngarud simboliko a kasar pagtiponenna ti Ari a ni Jesu-Kristo ken ti “nobiana,” ti 144,000. Dayta a nagpateg a pasamak ti inagurasion ti baro a gobierno a mangituray iti daga iti 1,000 a tawen.—Apoc. 20:6.
TI NADAYAG A SIUDAD KEN TI MASAKBAYAM
14-15. Ania ti nangyarigan ti Apocalipsis kapitulo 21 iti 144,000? (Kitaen ti ladawan iti akkub.)
14 Sumaruno, inyarig ti Apocalipsis kapitulo 21 ti 144,000 iti nakapimpintas a siudad a maawagan iti “Baro a Jerusalem.” (Apoc. 21:2, 9) Daytoy a siudad ket addaan iti 12 a pundasion a bato a nakaisuratan “ti 12 a nagan ti 12 nga apostol ti Kordero.” Apay nga interesado ni Juan iti dayta? Ngamin, nakitana ti naganna a naisurat iti maysa kadagita a bato. Anian a naisangsangayan a pribilehio!—Apoc. 21:10-14; Efe. 2:20.
15 Awan kapada daytoy simboliko a siudad. Ti kadakkelan a kalsadana ket puro a balitok ken 12 ti perlas a ruanganna. Dagiti pader ken pundasionna ket naaramid iti nangingina a batbato ken perpekto ti panagpapada ti rukodda. (Apoc. 21:15-21) Ngem kasla adda kurang! Kastoy ti simmaruno nga imbaga ni Juan: “Awan ti nakitak a templo iti unegna, ta ti templona ket ni Jehova a Dios a Mannakabalin-amin, ken kasta met ti Kordero. Saanen a kasapulan ti init wenno bulan a manglawag iti siudad, ta ti dayag ti Dios ti nanglawag iti dayta, ket ti Kordero ti silawna.” (Apoc. 21:22, 23) Dagidiay mangbukel iti Baro a Jerusalem direkta a makaasidegdanto ken Jehova. (Heb. 7:27; Apoc. 22:3, 4) No kasta, ni Jehova ken ni Jesus ti templo iti dayta a siudad.
16. Anianto ti matagiragsak ti sangatauan bayat ti Sangaribu a Tawen a Panagturay ti Pagarian ti Dios?
16 Makapagagar la ketdi para kadagiti dinutokan ti espiritu ti panangpanunot iti daytoy a siudad. Ngem masapul nga interesado met iti dayta dagidiay addaan iti naindagaan a namnama. Bayat ti Sangaribu a Tawen a Panagturay ti Pagarian ti Dios, di mabilang a bendision ti iyegto ti Baro a Jerusalem. Makitkita ni Juan dagita a bendision nga agay-ayus kas “maysa a karayan ti danum ti biag.” Ken iti agsumbangir nga igid ti karayan, adda “dagiti kayo ti biag” a dagiti bulongda ket “pangagas kadagiti nasion.” (Apoc. 22:1, 2) Ti amin a tattao a sibibiag iti dayta a tiempo ket maaddaanto iti gundaway a magunggonaan kadagita a probision. In-inut nga agbalinto a perpekto ti amin a natulnog a tattao. Awanton ti sakit, ut-ot, ken lulua gapu iti ladingit.—Apoc. 21:3-5.
17. Kas ipakita ti Apocalipsis 20:11-13, siasino dagiti magunggonaan bayat ti Sangaribu a Tawen a Turay?
17 Siasinonto dagiti magunggonaan kadagitoy nagsasayaat a probision? Umuna iti amin, ti dakkel a bunggoy a makalasat inton Armagedon, agraman dagiti posible a mayanakto iti baro a lubong. Ikarkari met ti Apocalipsis kapitulo 20 nga agungarto dagiti natay. (Basaen ti Apocalipsis 20:11-13.) Agbiagto manen ditoy daga dagiti matalek a “nalinteg,” a natay iti napalabas, agraman dagiti “nakillo” a saan a naikkan iti umdas a gundaway nga agsursuro maipapan ken Jehova. (Ara. 24:15; Juan 5:28, 29) Kayat kadi a sawen dayta nga amin a natay ket mapagungarto ditoy daga bayat ti Sangaribu a Tawen a Turay? Saan. Saanto a mapagungar dagidiay nangigagara a nangilaksid iti oportunidad nga agserbi ken Jehova sakbay ti ipapatayda. Naikkandan iti tsansa ngem pinaneknekanda a saanda a maikari nga agbiag iti Paraiso a daga.—Mat. 25:46; 2 Tes. 1:9; Apoc. 17:8; 20:15.
TI MAUDI A PANNUBOK
18. Anianto ti situasion ditoy daga iti ngudo ti 1,000 a tawen?
18 Iti ngudo ti 1,000 a tawen, perpektonton ti amin a sibibiag a tattao ditoy daga. Didanton mapadasan dagiti epekto ti basol a natawidda ken Adan. (Roma 5:12) Naan-anay a mapukawton ti lunod nga inyeg ti basol ni Adan. Gapu iti dayta, ‘agbiagto’ dagidiay adda ditoy daga kas perpekto a tattao iti ngudo ti 1,000 a tawen.—Apoc. 20:5.
19. Apay a kasapulan ti maudi a pannubok?
19 Ammotayo a napagballigian ni Jesus dagiti panangikagumaan ni Satanas a mangikompromiso iti integridadna. Nagtalinaed a matalek idi nasubok. Ngem agtalinaedto ngata a matalek ti amin a perpekto a tattao no maikkan ni Satanas iti gundaway a mangsubok kadakuada? Mapaneknekan ti tunggal maysa ti kinamatalekna ken Jehova inton maparuar ni Satanas iti nakaun-uneg nga abut iti ngudo ti 1,000 a tawen. (Apoc. 20:7) Dagidiay mapaneknekan a matalek bayat daytoy maudi a pannubok ti umawatto iti biag nga agnanayon ket matagiragsakda met laengen ti pudno a wayawaya. (Roma 8:21) Dagidiay agrebelde ket permanententon a madadael, a kadua ti Diablo ken dagiti demoniona.—Apoc. 20:8-10.
20. Ania ti mariknam kadagiti makapagagar a padto iti libro nga Apocalipsis?
20 Ania ti mariknam kalpasan a napagsasaritaantayo ti ababa a pakabuklan ti libro nga Apocalipsis? Eksaytedka kadin a makakita a karamanka kadagitoy nagsasayaat a padto? Naparegtaka kadi a mangawis iti dadduma a makikadua kadatayo iti nadalus a panagdaydayaw iti Diostayo? (Apoc. 22:17) Natukay la ketdi ti isip ken pusotayo kadagitoy makapainteres a pasamak iti masanguanan. Sigurado a magagarantayo met a mangibaga iti sasao ni apostol Juan: “Amen! Umayka, Apo Jesus.”—Apoc. 22:20.
KANTA 27 Maipalgaken Dagiti Annak ti Dios
[Footnote]
^ Daytoy ti maudi nga artikulo iti serye maipapan iti libro nga Apocalipsis. Iti daytoy nga artikulo, maammuantayo a dagidiay agtalinaed a matalek ken Jehova ket maaddaan iti naragsak a masakbayan. Ngem nakababainto ti pagtungpalan dagidiay bumusbusor iti panangituray ti Dios.