1-2. No adda panagbalbaliw iti biagtayo, kasano a mas agaplikaren kadatayo ti dadduma a prinsipio ti Biblia?

 ITI aldaw ti kasar ti naguapo a nobio ken napintas a nobia, dumngegda a naimbag iti naibatay-Biblia a palawag maipapan iti panagasawa. Saanen a baro kadakuada dagiti mailawlawag a prinsipio ti Biblia. Ngem manipud iti dayta nga aldaw, mas agaplikaren kadakuada dagita a prinsipio. Apay? Ngamin, iyaplikardan dagita kas agassawa.

² Kasta met laeng no agbalin a nagannak ti maysa a Kristiano nga agassawa. Adun a tawen a mabalin a nangnangngegda dagiti palawag maipapan iti panangpadakkel iti annak. Ngem mas agaplikar itan kadakuada dagita a prinsipio. Maaddaandanto ngaminen iti anak a padakkelenda. Nagdakkel dayta a responsabilidad! Isu a no adda panagbalbaliw iti biagtayo, mas agaplikar kadatayon ti dadduma a nangnangngegtayon a prinsipio ti Biblia. Dayta ti maysa a rason a ti Biblia ket basbasaen dagiti agdaydayaw ken Jehova iti “intero” a panagbiagda, kas iti naibilin idi kadagiti ari ti Israel, ken ut-utobenda dayta.​—Deut. 17:19.

3. Ania ti pagsasaritaantayo iti daytoy nga artikulo?

³ Dakayo a Kristiano a nagannak, maysa kadagiti kadakkelan a pribilehioyo ti panangisuro kadagiti annakyo maipapan ken Jehova. Ngem saanyo la a basta ibaga kadakuada dagiti impormasion maipapan iti Diostayo. Sigurado a kayatyo met  a tulongan dagiti annakyo a mangpauneg iti ayatda kenkuana. Ania ti mabalinyo nga aramiden tapno maimulayo ti panagayat ken Jehova iti puso dagiti annakyo? Iti daytoy nga artikulo, pagsasaritaantayo ti uppat a prinsipio ti Biblia a makatulong kadakayo a nagannak. (2 Tim. 3:16) Kitaentayo met no kasano a nagsayaatan ti dadduma a Kristiano a nagannak ti panangyaplikarda kadagiti pammagbaga ti Biblia.

4. Ania ti maysa a prinsipio a makatulong kadagiti nagannak a mangimula iti panagayat ken Jehova iti puso dagiti annakda? (Santiago 1:5)

⁴ Prinsipio 1: Agpaidalankayo ken Jehova. Kiddawenyo ken Jehova nga ikkannakayo iti sirib a kasapulanyo tapno matulonganyo dagiti annakyo a mangayat kenkuana. (Basaen ti Santiago 1:5.) Isu laeng ti makaipaay kadagiti kasayaatan a balakad. Adu ti rason no apay. Usigentayo ti dua. Umuna, ni Jehova ti kabayaganen a nagannak. (Sal. 36:9) Ken maikadua, kanayon a makagunggona dagiti nainsiriban a balakadna.​—Isa. 48:17.

5. (a) Ania dagiti ipapaay ti organisasion ni Jehova a makatulong kadagiti nagannak? (b) Kas mabuya iti video, ania ti nasursuroyo kada Brother ken Sister Amorim iti panangpadakkelda kadagiti annakda?

⁵ Us-usaren ni Jehova ti Saona ken ti organisasionna a mangipaay iti nagadu a naibatay iti Biblia a naespirituan a taraon. Dagita ti makatulong kadakayo tapno mapadakkelyo dagiti annakyo a mangayat ken Jehova. (Mat. 24:45) Kas pagarigan, adu ti makitayo a praktikal a balakad iti artikulo nga addaan serye a “Tulong Para iti Pamilia.” Iti adu a tawen, mabasa idi dayta iti magasin nga Agriingkayo! ngem available itan iti website-tayo. Adu met a nai-video nga interbiu ken pannakaidrama iti jw.org ti makatulong kadagiti nagannak a mangyaplikar kadagiti balakad ni Jehova bayat a padpadakkelenda dagiti annakda. *​—Prov. 2:4-6.

6. Ania ti kinuna ti maysa nga ama maipapan iti panagpaidalanda nga agassawa iti organisasion ni Jehova?

⁶ Adu a nagannak ti agyamyaman iti tulong nga ipapaay ni Jehova babaen ti organisasionna. Inamin ti maysa nga ama a ni  Joe: “Saan a kaskarina ti mangpadakkel iti tallo nga annak iti kinapudno. Kanayon nga ikarkararagmi ken baketko a tulongannakami ni Jehova. Ket masansan nga adda artikulo wenno video nga apagisu a mairuar a tumulong kadakami iti situasionmi. Ti panagpaidalan ken Jehova ti kanayon a tumultulong kadakami.” Nakita ni Joe ken ni baketna a dagita a probision ti tumultulong kadagiti annakda a suminged ken Jehova.

7. Apay a napateg a sipapanunot dagiti nagannak iti ulidan nga ipakpakitada? (Roma 2:21)

⁷ Prinsipio 2: Agbalinkayo a nasayaat nga ulidan. Sipsiputan dagiti annak dagiti nagannakda ket masansan a tultuladenda ida. Siempre, awan ti perpekto a nagannak. (Roma 3:23) Nupay kasta, ikagumaan latta dagiti masirib a nagannak nga ipakita ti nasayaat nga ulidan kadagiti annakda. (Basaen ti Roma 2:21.) Imbaga ti maysa nga ama maipapan kadagiti annakna: “Kasda la espongha a mangagsep iti amin.” Innayonna: “Ibagada no ditay ar-aramiden ti isursurotayo kadakuada.” No ngarud kayattayo nga ayaten dagiti annaktayo ni Jehova, masapul a nalawag a makitada a talaga nga ay-ayatentayo isuna.

8-9. Ania ti nasursurom iti imbaga da Andrew ken Emma?

⁸ Adu ti pamay-an a maisuro dagiti nagannak kadagiti annakda ti panagayat ken Jehova. Kuna ti 17 ti tawenna a brother a ni Andrew: “Kanayon nga isursuro dagiti nagannakko a nakapatpateg ti panagkararag. Rinabii a kaduaennak idi ni Tatang nga agkararag uray no nagkararagakon. Sangkaibaga dagiti nagannakmi kadakami nga agkabsat: ‘Mabalinyo ti agkararag ken Jehova uray mamin-adu.’ Gapu iti dayta, nakapatpateg kaniak ti panagkararag. Isu nga ita, diak agalangan nga agkararag ken Jehova ta ibilangko kas nadungngo nga Amak.” Nagannak, laglagipenyo a no ay-ayatenyo unay ni Jehova, matulonganyo dagiti annakyo a mangayat met kenkuana.

⁹ Usigentayo met ti kapadasan ni Emma. Pinanawan ida ni tatangna a nagadu ti utangna isu a kapilitan a ni nanangna ti mangbayad kadagita. Imbaga ni Emma: “Adu dagiti tiempo a bassit ti makukuarta ni Nanang. Ngem kanayon nga ibagbagana no kasano nga ay-aywanan ni Jehova dagiti adipenna. Talaga a nakitak a patienna dayta ta ar-aramidenna ti isursurona.” Ti leksion? Dagiti nagannak ket masapul nga agbalin a nasayaat nga ulidan uray kadagiti narigat a situasion.​—Gal. 6:9.

10. Ania idi dagiti gundaway a makasarita ti adu nga Israelita a nagannak dagiti annakda? (Deuteronomio 6:6, 7)

¹⁰ Prinsipio 3: Kanayon a kasaritayo dagiti annakyo. Imbilin ni Jehova kadagiti nagkauna nga Israelita a kanayon nga isuroda kadagiti annakda ti maipapan kenkuana. (Basaen ti Deuteronomio 6:6, 7.) Iti agmalem, adu ti gundaway dagita a nagannak a makisarita kadagiti annakda ken mangimula iti panagayat ken Jehova iti pusoda. Kas pagarigan, mabalin nga adu nga oras a tulongan ti barito nga Israelita ni tatangna nga agmula wenno agapit. Mabalin met nga iti agmalem, tulongan ti kabsatna a babai ni nanangda iti panagdait, panagabel, ken panagtagibalay. Bayat nga agkadua nga agtrabtrabaho dagiti nagannak ken annak, mabalin a mapagsaritaanda ti adu nga importante a banag. Kas pagarigan, pagsaritaanda ti kinasayaat ni Jehova ken no kasano a tultulonganna ti pamiliada.

11. Ania ti maysa a gundaway dagiti Kristiano a nagannak tapno makasaritada dagiti annakda?

¹¹ Ngem naiduma itan ti panagbiag. Iti adu a  pagilian, saan a makapagkadua iti agmalem dagiti nagannak ken annak. Dagiti nagannak ket mabalin nga adda iti pagtrabahuan, ken baka adda met dagiti annak iti eskuelaan. Masapul ngarud nga ipamuspusan dagiti nagannak ti mangpanunot kadagiti gundaway a makasaritada dagiti annakda. (Efe. 5:15, 16; Fil. 1:10) Ti panagdaydayaw ti pamilia ti maysa kadagita a gundaway. Kuna ti agtutubo a brother a ni Alexander: “Kanayon a mangaramid ni tatangko kadagiti urnos para iti panagdaydayaw ti pamiliami, ket dina ipalubos nga adda ti makalapped iti dayta a panagkakaduami. Kalpasan ti panagadalmi, agiinnestoriakami.”

12. Ania ti masapul a laglagipen ti ulo ti pamilia bayat ti panagdaydayaw ti pamilia?

¹² No maysaka nga ulo ti pamilia, ania ti mabalinmo nga aramiden tapno makaparagsak kadagiti annakyo ti panagdaydayaw ti pamiliayo? Mabalin nga iyadalmo kadagiti annakyo ti nagpintas a baro a publikasion nga Agbiagka a Naragsak iti Agnanayon! Naragsak la ketdi ti panagsasaritayo bayat nga ad-adalenyo dayta. Kayatmo nga ibaga dagiti annakmo ti rikrikna ken pakadanaganda. Dimo ngarud sermonan wenno pagungtan ida bayat ti panagdaydayaw ti pamiliayo. Ikagumaam met ti agtalinaed a kalmado no adda ibaga dagiti annakmo a maikontra kadagiti prinsipio ti Biblia. Agyamanka ketdi ta ibagbagada ti agpaypayso a marikriknada ken paregtaem ida a kanayon nga aramidenda dayta. Matulongam laeng dagiti annakmo no talaga nga ammom ti marikriknada.

13. Ania pay dagiti gundaway dagiti nagannak tapno matulonganda dagiti annakda a suminged ken Jehova?

¹³ Nagannak, mangpanunotkayo kadagiti gundaway iti agmalem tapno matulonganyo dagiti annakyo a suminged ken Jehova. Saanen a kasapulan nga urayenyo pay ti panagadalyo iti Biblia tapno isuroyo ida maipapan iti naayat a Diostayo. Imbaga ti maysa nga ina a ni Lisa: “Isursuromi kadagiti annakmi ti maipapan ken Jehova babaen kadagiti parsuana. Kas pagarigan, no adda makapakatawa nga aramiden ti asomi a mangparagsak kadagiti annakmi, isuromi a maysa dayta a pakakitaan a ti Namarsua kadatayo ket naragsak a Dios, ken kayatna a naragsaktayo met.”

14. Apay a napateg a tulongan dagiti nagannak dagiti annakda a nainsiriban a pilienda ti pakigayyemanda? (Proverbio 13:20)

 ¹⁴ Prinsipio 4: Tulonganyo dagiti annakyo a maaddaan kadagiti nasayaat a gagayyem. Nalawag nga ibaga ti Sao ti Dios a mabalin a nasayaat wenno dakes ti impluensia kadatayo dagiti gagayyemtayo. (Basaen ti Proverbio 13:20.) Nagannak, ammoyo kadi no siasino ti gagayyem dagiti annakyo? Naam-ammo ken nakalangenyo kadi idan? Kasanoyo a matulongan dagiti annakyo a makigayyem kadagidiay mangay-ayat ken Jehova? (1 Cor. 15:33) Matulonganyo ida a mangaramid kadagiti nainsiriban a desision no awisenyo ti dadduma a nabileg ti espiritualidadda a makikadua kadakayo kadagiti aktibidad ti pamiliayo.​—Sal. 119:63.

15. Ania ti mabalin nga aramiden dagiti nagannak tapno matulonganda dagiti annakda a maaddaan iti nasayaat a gagayyem?

¹⁵ Kitaentayo ti kapadasan ti maysa nga ama a ni Tony. Imbagana ti inaramidda ken baketna tapno matulonganda dagiti annakda a maaddaan iti nasayaat a gagayyem: “Iti adu a tawen, nagawiskami ken baketko kadagiti kakabsat a nagduduma ti edad ken nalikudanda. Makikaduada kadakami iti pannangan ken iti panagdaydayaw ti pamiliami. Nagsayaat a pamay-an daytoy tapno maam-ammomi dagidiay mangay-ayat ken siraragsak nga agserserbi ken Jehova. Naaddaankami iti pribilehio a sangailien iti balaymi dagiti manangaywan iti sirkito, misionero, ken dadduma pay. Adu ti nasursuro dagiti annakmi iti kinaregta, kapkapadasan, ken kinamanagsakripisioda ken nakatulong dagita tapno sumingedda ken Jehova.” Nagannak, determinadokayo koma a mangtulong kadagiti annakyo a maaddaan kadagiti nasayaat a kakadua.

16. Kasanon no ibaga ti anakyo a dina kayat ti agserbi ken Jehova?

¹⁶ Kasanon no inaramidyon ti amin a kabaelanyo ngem ibaga ti maysa nga anakyo a dina kayat ti agserbi ken Jehova? Dimo panunoten a napaayka kas nagannak. Inikkannatayo amin ni Jehova​—agraman ti anakmo​—iti wayawaya nga agpili no agserbitayo kenkuana wenno saan. No pilien ti anakmo a panawan  ni Jehova, dika maawanan iti namnama nga addanto aldaw nga agsublinto met laeng. Laglagipem ti ilustrasion maipapan iti napukaw nga anak. (Luc. 15:11-19, 22-24) Dayta nga agtutubo a lalaki ket simmiasi iti dalan ti kinalinteg. Ngem nagsubli met laeng idi agangay. Mabalin nga ibaga ti dadduma, “Estoria la dayta. Mapaspasamak met aya iti agpaypayso a biag?” Wen, a! Kinapudnona, napadasan dayta ti agtutubo a lalaki a ni Elie.

17. Kasanoka a naparegta iti kapadasan ni Elie?

¹⁷ Kinuna ni Elie maipapan kadagiti nagannakna: “Inaramidda ti amin a kabaelanda a mangisuro kaniak iti panagayat ken Jehova ken iti Saona, ti Biblia. Ngem nagbalinak a nasukir idi tin-edyerak pay.” Doble kara ti panagbiag ni Elie ket dina inkankano ti amin a panangikagumaan dagiti nagannakna a tumulong kenkuana iti naespirituan. Pimmanaw iti poder dagiti nagannakna ket impapatina ti nagaramid iti dakes. Ngem adda dagiti tiempo a naisarsaritana iti maysa a gayyemna ti maipapan iti Biblia. Imbaga ni Elie: “Tunggal ilawlawagko kenkuana ti maipapan ken Jehova, ad-adda met a mapampanunotko ni Jehova. In-inut a nagtubo dagiti bukel ti kinapudno manipud iti Biblia a nabayagen a naitukit iti pusok babaen kadagiti nagannakko.” Idi agangay, nagsubli met laeng ni Elie iti kinapudno. * Panunotem no kasano karagsak dagiti nagannakna ta inkagumaanda nga isuro sipud kinaubingna nga ayatenna ni Jehova!​—2 Tim. 3:14, 15.

18. Ania ti makunam maipapan kadagiti nagannak nga agporporsegi a mangisuro kadagiti annakda a mangayat ken Jehova?

¹⁸ Nagannak, nagsayaat ti pribilehio a naawatyo​—ti mangpadakkel iti baro a henerasion dagiti agdaydayaw ken Jehova. (Sal. 78:4-6) Nagdakkel a responsabilidad dayta, ket naimpusuan unay a komendarandakayo ta agporporsegikayo a tumulong kadagiti annakyo! No itultuloyyo nga aramiden ti amin a kabaelanyo a tumulong kadagiti annakyo a mangayat ken Jehova ken padakkelenyo ida iti disiplina ken pammagbagana, sigurado a maparagsakyo ti naayat a nailangitan nga Amatayo.​—Efe. 6:4.