1. Apay a kasapulantay amin ti nadiosan a sirib? (Proverbio 4:7)

 NO MANGARAMIDKA iti nagpateg a desision, sigurado nga agkararagka tapno agkiddaw iti sirib​—ta ammom a kasapulam dayta. (Sant. 1:5) Insurat ni Ari Solomon: “Ti sirib ti kapatgan.” (Basaen ti Proverbio 4:7.) Siempre, saan la nga uray ania a sirib ti tuktukoyen ni Solomon. Tuktukoyenna ti sirib nga agtaud ken Jehova a Dios. (Prov. 2:6) Ngem makatulong kadi ti nadiosan a sirib tapno mapagballigiantayo dagiti problema a mapaspasarantayo ita? Wen, kas makitatayo iti daytoy nga artikulo.

2. Ania ti maysa a pamay-an nga agbalintayo a talaga a masirib?

² Ti maysa a pamay-an nga agbalintayo a talaga a masirib ket no adalen ken iyaplikartayo dagiti pannursuro ti dua a lallaki a pagaammo ken mararaem gapu iti siribda. Umuna, pagsasaritaantayo ni Solomon. Ibaga ti Biblia nga “inikkan ti Dios ni Solomon iti naisangsangayan a sirib ken pannakatarus.” (1 Ar. 4:29) Maikadua, pagsasaritaantayo ni Jesus, nga awan kapada ti siribna. (Mat. 12:42) Naipadto maipapan ken Jesus: “Agtalinaedto kenkuana ti espiritu ni Jehova, ti espiritu ti kinasirib ken pannakaawat.”​—Isa. 11:2.

3. Ania ti adalentayo iti daytoy nga artikulo?

³ Inusar da Solomon ken Jesus ti inted ti Dios a sirib tapno makaipaayda iti praktikal a balakad maipapan kadagiti banag a paginteresantayo amin. Iti daytoy nga artikulo, adalentayo ti tallo kadagita: Ti kinapateg ti balanse a panangmatmat iti kuarta, iti sekular a trabaho, ken iti bagitayo.

4. Ania ti nagdumaan ti kasasaad ti biag da Solomon ken Jesus?

⁴ Nakabakbaknang ni Solomon ken nakanamnam-ay ti biagna.  (1 Ar. 10:7, 14, 15) Ngem ni Jesus, bassit laeng ti material nga ik-ikutanna ken awan ti bukodna a balay. (Mat. 8:20) Ngem agpada a balanse ti panangmatmatda kadagiti material a bambanag ta agpada ti Gubuayan ti siribda​—ni Jehova a Dios.

5. Ania ti balanse a panangmatmat ni Solomon iti kuarta?

⁵ Imbaga ni Solomon a ti kuarta ket “proteksion.” (Ecl. 7:12) No adda kuartatayo, magatangtayo dagiti kasapulantayo ken mabalin nga uray ti sumagmamano a kayattayo. Ngem uray nakabakbaknang ni Solomon, naamirisna nga adda dagiti napatpateg ngem iti kuarta. Kas pagarigan, insuratna: “Pilien ti naimbag a nagan [wenno, “ti naimbag a reputasion,” ftn.] imbes a ti adu a kinabaknang.” (Prov. 22:1) Nakita met ni Solomon a dagidiay managayat iti kuarta ket manmano a mapnek iti adda kadakuada. (Ecl. 5:10, 12) Impakdaarna pay a ditay panunoten a ti kuarta ti kapatgan, ta alisto laeng a mapukaw dayta.​—Prov. 23:4, 5.

6. Ania ti balanse a panangmatmat ni Jesus kadagiti material a bambanag? (Mateo 6:31-33)

⁶ Balanse ti panangmatmat ni Jesus kadagiti material a bambanag. Tinagiragsakna ti mangan ken uminum. (Luc. 19:2, 6, 7) Iti maysa nga okasion, nangaramid iti arak a kasayaatan ti kalidadna​—ti umuna kadagiti milagrona. (Juan 2:10, 11) Nakabado met iti nangina idi aldaw ti ipapatayna. (Juan 19:23, 24) Ngem saan nga inyun-una ni Jesus dagiti material a bambanag iti biagna. Imbagana kadagiti pasurotna: “Awan ti adipen a makapagserbi iti dua nga amo . . . Diyo mapaggiddan a pagserbian ti Dios ken ti Kinabaknang.” (Mat. 6:24) Insuro ni Jesus a no iyun-unatayo ti Pagarian, siguraduen ni Jehova nga ipaayna dagiti kasapulantayo.​—Basaen ti Mateo 6:31-33.

7. Kasano a nagsayaatan ti maysa a brother ti balanse a panangmatmatna iti kuarta?

⁷ Nagsayaatan ti adu a kakabsat ti panangyaplikarda iti nadiosan a sirib no maipapan iti kuarta. Kitaentayo ti kapadasan ti maysa a baro a ni Daniel. Imbagana: “Idi tin-edyerak,  pinagbalinko a kapatgan iti biagko dagiti naespirituan nga aktibidad.” Pinasimple ni Daniel ti biagna, isu a nausarna ti tiempo ken dagiti abilidadna iti adu a proyekto ti organisasiontayo. Innayonna: “Talaga a diak pulos pagbabawyan ti desisionko. Agpayso met ketdi a naaddaanak koma iti adu a kuarta no dayta ti impangpangrunak iti biagko. Ngem saan a masukatan ti kuarta ti maaddaan iti nasasayaat a gagayyem. No inyun-unak ti kuarta, saanak koma a kas iti karagsakko ita gapu ta inyun-unak ti Pagarian. Saan a magatang ti kuarta dagiti bendision ni Jehova kaniak.” Nalawag a pagsayaatantayo no agpokustayo kadagiti naespirituan a bambanag, saan nga iti kuarta.

8. Kasanotayo nga ammo a balanse ti panangmatmat ni Solomon iti trabaho? (Eclesiastes 5:18, 19)

⁸ Inawagan ni Solomon a “sagut ti Dios” ti panangtagiragsak iti napinget a panagtrabaho. (Basaen ti Eclesiastes 5:18, 19.) Insuratna: “Makagunggona ti tunggal kita ti napinget a panagtrabaho.” (Prov. 14:23) Ammo ni Solomon ti ibagbagana ta nagaget nga agtrabaho! Nagibangon kadagiti balay, nagmula kadagiti kaubasan, ken nagaramid kadagiti hardin ken pagurnongan iti danum. Nagaramid pay kadagiti siudad. (1 Ar. 9:19; Ecl. 2:4-6) Sipipinget a nagtrabaho ket sigurado a dayta ti nangparagsak kenkuana. Ngem ammo ni Solomon a saan laeng a dagita ti mangparagsak kenkuana. Adu met ti inaramidna para ken Jehova. Kas pagarigan, indauluanna ti pannakaibangon ti nadayag a templo a pagdaydayawan ken Jehova. Pito a tawen a proyekto dayta! (1 Ar. 6:38; 9:1) Kalpasan nga inaramid ni Solomon ti amin a klase ti aktibidad, sekular man ken naespirituan, nabigbigna a ti kapatgan ket ti panagserbi ken Jehova. Insuratna: “Ti konklusion maipapan iti amin a naibaga ket: Agbutengka iti pudno a Dios ken tungpalem dagiti bilinna.”​—Ecl. 12:13.

9. Kasano a sinigurado ni Jesus a saan a kapatgan kenkuana ti sekular a trabahona?

⁹ Ni Jesus ket napinget a trabahador. Idi agtutubo pay, nagtrabaho kas karpintero. (Mar. 6:3) Sigurado nga inapresiar dagiti nagannakna ti tulongna bayat nga inkarkarigatanda nga ipaay dagiti kasapulan ti dakkel a pamiliada. Perpekto ni Jesus, ket kas karpintero, perpekto la ketdi dagiti aramidna! Isu a sigurado a nagustuan ti adu dagiti produktona. Magusgustuan la ketdi idi ni Jesus ti trabahona. Ngem uray nakagaggaget ni Jesus, siniguradona nga adda orasna para kadagiti naespirituan nga aktibidad. (Juan 7:15) Ket idi mangaskasaban iti amin a tiempo, imbalakadna kadagiti dumdumngeg kenkuana: “Agtrabahokayo, saan a para iti madadael a taraon, no di ket para iti agpaut a taraon a mangted iti biag nga agnanayon.” (Juan 6:27) Imbaga met ni Jesus iti Sermonna iti Bantay: “Agurnongkayo iti kinabaknang idiay langit.”​—Mat. 6:20.

10. Ania ti mabalin a problema a pakaipasanguan ti dadduma iti sekular a trabahoda?

¹⁰ Tulongannatayo ti nadiosan a sirib a maaddaan iti balanse a panangmatmat iti sekular a trabahotayo. Kas Kristiano, maisursuro kadatayo nga ‘aggaggagettayo ken agaramidtayo iti nasayaat.’ (Efe. 4:28) Masansan a maobserbaran dagiti amo a mapagtalkan ken nagagettayo, isu a mabalin nga ibagada nga ap-apresiarenda ti panagtrabahotayo. Gapu iti dayta, baka agtrabahotayo iti ad-adu nga oras ta kayattayo a kanayon a nasayaat ti impresion dagiti amotayo kadagiti Saksi ni Jehova.  Ngem inton agangay, baka maliwayantayon dagiti responsabilidadtayo iti pamilia ken naespirituan nga aktibidad. Masapul a mangaramidtayo iti panagbalbaliw tapno agbalintayo a balanse.

11. Ania ti nasursuro ti maysa a brother maipapan iti balanse a panangmatmat iti trabaho?

¹¹ Nasursuro a mismo ti agtutubo a brother a ni William ti kinapateg ti panagbalin a balanse iti sekular a trabaho. Imbaga ni William maipapan iti maysa a panglakayen a dati nga amona: “Nagsayaat nga ulidan [daytoy a kabsat] no maipapan iti balanse a panangmatmat iti trabaho. Nakapingpinget nga agtrabaho, ken nasayaat ti relasionna kadagiti klientena gapu iti kalidad ti trabahona. Ngem iti ngudo ti aldaw, no malpasen ti trabaho, lipatenna pay laeng dayta ket ipamaysana ti atensionna iti pamiliana ken iti panagdaydayawna. Ket ammoyo? Isu ti maysa kadagiti kararagsakan a tao nga am-ammok!” *

12. Kasano nga impakita ni Solomon a balanse ti panangmatmatna iti bagina, ngem kasano a napukawna dayta?

¹² Idi matalek pay laeng ni Solomon nga agdaydayaw ken Jehova, balanse ti panangmatmatna iti bagina. Idi agtutubo, sieemma nga inaminna dagiti limitasionna ken nagpaiwanwan ken Jehova. (1 Ar. 3:7-9) Idi rugrugi ti panagturay ni Solomon, ammona met ti peggad ti panagbalin a napannakkel. Insuratna: “Ti kinapannakkel agturong iti pannakadadael, ken ti kinatangsit agtungpal iti pannakatnag.” (Prov. 16:18) Makapaladingit ta idi agangay, saan nga inyaplikar ni Solomon ti mismo a balakadna. Adda tiempo bayat nga agturturay, sipapannakkel a dina sinurot dagiti bilin ti Dios. Kas pagarigan, sigun iti maysa kadagiti linteg, ti Hebreo nga ari ket masapul a ‘saan a mangasawa iti adu, tapno saan nga agsukir ti pusona.’ (Deut. 17:17) Saan nga inkankano ni Solomon dayta a linteg, ket naaddaan iti 700 nga assawa ken 300 a sabali pay nga assawa, nga adu  kadakuada ket pagano! (1 Ar. 11:1-3) Impagarup siguro ni Solomon a “kontroladona ti amin a banag.” Aniaman ti rason, sinagabana idi agangay dagiti dakes a resulta ti panagsukirna ken Jehova.​—1 Ar. 11:9-13.

13. Ania ti masursurotayo no utobentayo ti kinapakumbaba ni Jesus?

¹³ Balanse ti panangmatmat ni Jesus iti bagina ken kanayon a napakumbaba. Sakbay a nagbalin a tao ni Jesus, nagadu ti nakaskasdaaw nga inaramidna bayat nga agserserbi ken Jehova. Babaen ken Jesus, “naparsua ti amin a dadduma pay a bambanag idiay langit ken ditoy daga.” (Col. 1:16) Idi nabautisaran ni Jesus, nalawag a nalagipna dagiti inaramidna bayat a kaduana ni Amana. (Mat. 3:16; Juan 17:5) Ngem saan a nagpannakkel ni Jesus gapu iti dayta. Dina pulos imbilang a nangatngato ti bagina ngem iti asinoman. Imbagana kadagiti adalanna a ti rason nga immay ditoy daga ket “saan a tapno pagserbian, no di ket tapno agserbi ken itedna ti biagna kas pangsubbot iti adu.” (Mat. 20:28) Sieemma met nga imbaga ni Jesus nga awan ti banag nga aramidenna iti bukodna a nakem. (Juan 5:19) Talaga a nakapakpakumbaba! Nagsayaat ni Jesus nga ulidan para kadatayo.

14. Ania ti masursurotayo ken Jesus maipapan iti umiso a panangmatmat iti bagitayo?

¹⁴ Insuro ni Jesus kadagiti pasurotna a masapul nga umiso ti panangmatmatda iti bagida. Iti maysa a gundaway, impasigurado ni Jesus kadakuada: “Ammona uray ti bilang ti buok ti uloyo.” (Mat. 10:30) Makaliwliwa unay kadatayo dagita a sasao, nangruna no negatibo ti panangmatmattayo iti bagitayo. Kaipapanan dayta a talaga nga interesado kadatayo ti nailangitan nga Amatayo​—ken napategtayo kenkuana. No ipalpalubos ni Jehova nga agdaydayawtayo kenkuana ken ibilangnatayo a maikari nga agbiag nga agnanayon iti baro a lubongna, ditay koma pulos kuestionaran dayta.

15. (a) Ania a balanse a panangmatmat iti bagitayo ti imbaga Ti Pagwanawanan a masapul a patanorentayo? (b) Kas ipakita dagiti ladawan iti panid 24, no nakapokustayo unay iti bagitayo, ania dagiti bendision a pakaikapisantayo?

¹⁵ Nasurok a 15 a tawenen ti napalabas, imbaga  Ti Pagwanawanan a masapul a balanse ti panangmatmattayo iti bagitayo: “Siempre, saantay a kayat a panunoten a natan-oktayo nga uray la nga agpasindayagtayo; ngem iti sabali a bangir, saantay met kayat a panunoten nga awan serserbitayo. Imbes ketdi, rumbeng a ti panggeptayo ket maaddaan iti rasonable a panangmatmat iti bagitayo, nga usigentayo dagiti paglaingantayo ken kasta met dagiti limitasiontayo. Kastoy ti panangibaga ti maysa a Kristiano a babai: ‘Saan a siak ti makuna a dakes; ngem saan met a siak ti kasayaatan. Agpadpada nga addaanak kadagiti matarigagayan ken di matarigagayan a saguday, a kas iti asinoman.’” * Talaga a pagsayaatantayo no balanse ti panangmatmattayo iti bagitayo.

16. Apay a mangipapaay ni Jehova iti nainsiriban a panangiwanwan?

¹⁶ Mangipapaay ni Jehova iti nainsiriban a panangiwanwan babaen ti Saona. Ay-ayatennatayo, ken kayatna nga agbalintayo a naragsak. (Isa. 48:17, 18) Ti kasayaatan a desision​—ti desision a mangyeg iti pudpudno a ragsak​—ket ti panangyun-una kadagiti bambanag a mangparagsak ken Jehova. No kasta ti aramidentayo, maliklikantayo ti adu a problema a mapaspasaran dagidiay nakapokus unay iti kuarta, sekular a trabaho, wenno iti bagida. Determinado koma ti tunggal maysa kadatayo nga agbalin a masirib ken paragsaken ti puso ni Jehova!​—Prov. 23:15.