1, 2. Bayat a rumangrang-aytayo iti naespirituan, ania ti masursurotayo nga aramiden? Iyilustrar.

ADDA regalo a naawat ti maysa nga ubing. Imbaga dagiti nagannakna nga ibagana ti “Thank you.” Nagtulnog ti ubing ta dayta ti naibaga kenkuana. Bayat a dumakdakkel, ad-adda a maapresiarna ti panagpampanunot dagiti nagannakna ken ti kinaimbag ti sabsabali. Ita, isu a mismon ti naimpusuan nga agyaman. Apay? Gapu ta ti panagyaman ket paseten ti panagpampanunotna.

² Kasta met, idi damo a naammuantayo ti kinapudno, nasursurotayo ti kinapateg ti panagtulnog kadagiti kangrunaan a kidkiddawen ni Jehova. Ngem bayat a rumangrang-aytayo iti naespirituan, umad-adu ti masursurotayo maipapan iti panagpampanunot ni Jehova​—dagiti kayatna, dagiti saanna a kayat, ken ti panangmatmatna iti nagduduma a banag. No sursuruentayo ti agrason iti kasta a pamay-an ken no bay-antayo a ti kasta a panagpampanunot ti mangimpluensia iti ar-aramid ken personal a desisiontayo, ipakpakitatayo a tultuladentayo ti panagpampanunot ni Jehova.

3. Apay a mabalin a karit ti panangtulad iti panagpampanunot ni Jehova?

³ Nupay makaparagsak ti panangtulad iti panagpampanunot  ni Jehova, mabalin a karit met dayta. No dadduma, mabalin a lapdannatayo ti imperpekto a panagrasrasontayo. Kas pagarigan, mabalin a marigatantayo a mangtarus iti panangmatmat ni Jehova iti moral a kinadalus, materialismo, panangasaba, di umiso a panangusar iti dara, wenno dadduma pay. Ania ti aramidentayo? Kasano nga in-inut a matuladtayo ti panagpampanunot ti Dios? Ken kasano a ti panangaramidtayo iti dayta apektaranna ti agdama ken masanguanan nga ar-aramidtayo?

4. Ania ti karaman iti panangsurot iti pammaregta ni Pablo a: ‘Pabaruenyo ti panunotyo’?

⁴ Basaen ti Roma 12:2. Inladawan ditoy ni apostol Pablo ti karaman iti panangtulad iti panagpampanunot ni Jehova. Tinulongannatayo ti immuna nga artikulo a mangtarus a tapno ‘ditay agpaisukogen iti daytoy a sistema ti bambanag,’ masapul a saantayo nga iserrek iti isiptayo dagiti panangmatmat ken kababalin ti lubong. Ngem imbaga met ni Pablo a kasapulan a ‘pabaruentayo ti panunottayo.’ Karaman iti daytoy ti panangadal iti Sao ti Dios tapno maawatantayo ti panagpampanunotna, mautobtayo dayta, ken maitunostayo ti pampanunottayo iti panagpampanunot ti Dios.

5. Ilawlawag ti nagdumaan ti basta panagbasa ken ti panagadal.

⁵ Ti panagadal ket saan a basta panagbasa ken pananglinia iti sungbat dagiti saludsod. No agadaltayo, usigentayo ti ibaga ti material maipapan ken Jehova, kadagiti dalanna, ken panagpampanunotna. Ikagumaantayo a tarusan no apay nga imbilin ti Dios ti maysa a banag ken kondenarenna ti sabali. Panunotentayo met dagiti masapul a balbaliwantayo iti biag ken panagpampanunottayo. Nupay mabalin a ditay maikabilangan amin dagitoy iti tunggal panagadal, magunggonaantayo no mangiwayatayo iti tiempo a mangutob a naimbag iti binasatayo​—nalabit kagudua ti tunggal panagadaltayo.​—Sal. 119:97; 1 Tim. 4:15.

6. Ania ti mapasamak no utobentayo ti pampanunot ni Jehova?

⁶ No regular nga utobentayo ti Sao ti Dios, adda nakaskasdaaw a mapasamak. ‘Pampaneknekantayo iti bagitayo,’ wen, komkombinsirentayo ti bagitayo, a perpekto ti panangmatmat ni Jehova iti bambanag. Mangrugi a matmatantayo ti bambanag sigun iti panangmatmatna, ken umanamongtayo iti dayta. ‘Mapabaro’ ti panunottayo, ket maaddaantayo iti baro a pamay-an ti panagpampanunot. Iti kasta, in-inut a matuladtayo ti panagpampanunot ni Jehova.

7, 8. (a) Ania ti panangmatmat ni Jehova iti material a bambanag? (Kitaen dagiti ladawan iti rugi ti artikulo.) (b) No tuladentayo ti panangmatmatna, ania ti kanayon a prioridadtayo?

⁷ Ditay koma ibaga a ti panagpanunot ket basta panangusar laeng iti isip. Agkadkadua ti panagpanunot ken dagiti aramidentayo. (Mar. 7:21-23; Sant. 2:17) Mas maawatantayo daytoy no adalentayo ti sumagmamano a pagarigan. Kas pagarigan, ipakita dagiti Ebanghelio dagiti nalawag a pammaneknek no ania ti panangmatmat ni Jehova iti material a bambanag. Pinili ti Dios no asino a nagannak ti mangpadakkel iti Anakna​—maysa a pagassawaan a nanumo iti material. (Lev. 12:8; Luc. 2:24) Idi nayanak ni Jesus, “impaidda [ni Maria] iti maysa a kulluong, agsipud ta awan lugarda iti siled a pagdagusan.” (Luc. 2:7) No kayat koma ni Jehova, kabaelanna nga ipaay ti mas komportable a lugar a pakayanakan ti Anakna. Ngem ti napateg Kenkuana ket ti naespirituan a kasasaad a pakaaywanan ken pakapadakkelan ni Jesus.

 ⁸ Iti daytoy a salaysay ti Biblia maipapan iti pannakayanak ni Jesus, maawatantayo ti panangmatmat ni Jehova iti material a bambanag. Kayat ti dadduma a nagannak a maaddaan dagiti annakda iti kasayaatan a material a bambanag, uray no apektado ti espiritualidad dagiti annakda. Ngem nalawag a ti naespirituan a bambanag ti kapatgan ken Jehova. Tultuladem kadi ti panangmatmat ni Jehova? Ania ti ipakita ti tigtignaymo?​—Basaen ti Hebreo 13:5.

9, 10. Kasano a mabalin a maipakitatayo a kas ken Jehova ti panangmatmattayo iti panangitibkol iti sabsabali?

⁹ Ti sabali pay a pagarigan ket ti panangmatmat ti Dios iti panangitibkol iti sabsabali. Imbaga ni Jesus: “Siasinoman a mangitibkol iti maysa kadagitoy babassit a mamati, nasaysayaat kenkuana no maigalut iti tengngedna ti maysa a gilingan a bato a kas iti puspusiposen ti asno ket isu pudno a maitapuak iti baybay.” (Mar. 9:42) Talaga a serioso dayta! Gapu ta naan-anay a natulad ni Jesus ti personalidad ni Amana, masiguradotayo a kasta met ti rikna ni Jehova iti asinoman a di mangikabilangan iti pannakaitibkol ti maysa a pasurot ni Jesus.​—Juan 14:9.

¹⁰ Kasta met kadi ti panangmatmattayo? Tultuladentayo kadi ti panangmatmat ni Jehova ken ni Jesus? Ania ti ipakita ti ar-aramidentayo? Ipapantayon a magusgustuantayo ti maysa nga estilo ti panagbadbado wenno panaglanglanga a mabalin a pakasuronan ti dadduma iti kongregasion wenno pakatignayanda nga agpanunot iti immoral a bambanag. Napatpateg kadi ti naayat a pannakaseknantayo kadagiti kakabsat ngem iti dayta a kaykayattayo nga estilo?​—1 Tim. 2:9, 10.

11, 12. Kasano a maliklikantayo ti agaramid iti dakes babaen ti panagteppeltayo ken ti panangtuladtayo iti panangmatmat ni Jehova iti panagaramid iti dakes?

¹¹ Maikatlo a pagarigan: Kagura ni Jehova ti kinakillo. (Isa. 61:8) Nupay ammona ti tendensiatayo nga agaramid iti dakes gapu iti natawidtayo a kinaimperpekto, iparegtana a guraentayo met ti kinakillo. (Basaen ti Salmo 97:10.) Ti panangpanunot no apay a kagura ni Jehova ti kinadakes tulongannatayo a mangtulad iti panangmatmatna, ket pumigsatayo a manglaban iti panagaramid iti dakes.

¹² Ti panangtulad iti panangmatmat ni Jehova iti kinakillo tulongannatayo met a mangilasin a dakes ti dadduma nga ar-aramid, uray no saan nga espesipiko a dinakamat dagita ti Sao ti Dios. Kas pagarigan, ti lap dancing ket maysa a kita ti naderrep nga aramid nga agbalbalinen a popular iti lubong. Mabalin nga irasonan dayta ti dadduma, nga ibagada a saan met nga aktual a panagseks dayta. * Ngem ipakita kadi ti kasta a panagrasrason ti panagpampanunot ti Dios, a kagurana ti amin a kita ti kinadakes? Adaywantayo koma ti panagaramid iti dakes babaen ti panagteppeltayo ken panangguratayo iti kagura ni Jehova.​—Roma 12:9.

13. Kasano a makatulong ti nasakbay a panangusig iti panangmatmat ni Jehova kadagiti desisiontayo iti masanguanan?

¹³ No agad-adaltayo, nasayaat nga usigentayo ti kinapateg ti panangmatmat ni Jehova kadagiti situasion a mabalin a pakaipasanguantayo. Iti kasta, nakasaganatayon no maipasangotayo iti situasion a kasapulan ti dagus a panagdesision. (Prov. 22:3) Pagsasaritaantayo ti dadduma a pagarigan iti Biblia.

14. Ania ti masursurotayo iti panagkedked ni Jose iti pananggargari ti asawa ni Potifar?

 ¹⁴ Impakita ni Jose a nasakbay nga inusigna ti panangmatmat ni Jehova maipapan iti kinamatalek iti asawa idi dagus a nagkedked iti pananggargari ti asawa ni Potifar. (Basaen ti Genesis 39:8, 9.) Kasta met, ti sungbatna iti asawa ni Potifar a: “Kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?” ipakitana a tinuladna ti panangmatmat ti Dios. Datayo ngay? Ipapantayon nga agalembong (ag-flirt) kadatayo ti maysa a katrabahuantayo. Wenno kasanon no adda nangi-send iti selponmo iti makaparasuk a mensahe wenno makagargari a piktiur? * Adayo a nalaklaka ti agdesision no inkeddengtayon a tuladen ti panangmatmat ni Jehova iti kasta a bambanag ken nagdesisiontayon a nasakbay no ania ti aramidentayo.

15. Kas iti tallo a Hebreo, kasanotayo a malabanan ti panangpilit a mangikompromiso iti kinamatalektayo ken Jehova?

¹⁵ Adalentayo ita ti ulidan ti tallo a Hebreo a pagaammo a da Sidrac, Mesac, ken Abednego. Ti determinasionda a di agdayaw iti ladawan a balitok nga inaramid ni Ari Nabucodonosor ken ti natured a sungbatda iti ari ipakitana a nasakbay a pinampanunotda ti ramanen ti panagtalinaed a matalek ken Jehova. (Ex. 20:4, 5; Dan. 3:4-6, 12, 16-18) Ipapantayon nga imbaga ti boss-mo nga agdonarka para iti asidegen a selebrasion a konektado iti ulbod a relihion. Ania ti aramidem? Imbes nga urayem pay a maipasangoka kadagitoy a situasion, apay a dimo panunoten itan ti panangmatmat ni Jehova iti kasta a bambanag? Ket inton maipasangoka iti aniaman kadagita a situasion, nalaklakamton nga aramiden ken ibaga ti umiso, kas iti inaramid ti tallo a Hebreo.

16. Kasano a ti nalawag a pannakatarus iti panangmatmat ni Jehova tulongannatayo nga agsagana para iti medikal nga emerhensia?

¹⁶ Ti nasakbay a panangpanunot iti pateg ti panagtalinaed a matalek ket makatulong met no adda medikal nga emerhensia. Nupay determinadotayo a saan nga agpayalison iti puro a dara wenno iti uppat a kangrunaan a pasetna, adda dagiti pamay-an ti panangagas mainaig iti dara a kasapulantayo ti mangaramid  iti personal a desision a naibatay iti panagpampanunot ni Jehova a makita kadagiti prinsipio ti Biblia. (Ara. 15:28, 29) Ti kasayaatan a panangpanunot iti dayta ket saan nga iti ospital, inton agpapaut-ottayon wenno mapilitantayon a dagus nga agdesision. Itan ti tiempo nga ag-research-ka, suratam ti legal a medikal a dokumento a naglaon kadagiti kayatmo a maaramid kenka, ken makisaritaka iti doktormo. *

17-19. Apay a napateg a sursuruentayo itan ti panagpampanunot ni Jehova iti bambanag? Mangted iti maysa a situasion a kasapulan a nakasaganatayo.

¹⁷ Kitaentayo ti maudi a pagarigan: Ti alisto a sungbat ni Jesus iti di umiso a balakad ni Pedro a: “Kaasiam ta bagim, Apo.” Nalawag a nasakbay a pinampanunot ni Jesus ti pagayatan ti Dios kenkuana ken kadagiti paset ti Kasuratan nga agaplikar iti biag ken ipapatayna ditoy daga. Daytoy ti nangpabileg iti desisionna nga agtalinaed a matalek ken managsakripisio, a saan a sumuksuko.​—Basaen ti Mateo 16:21-23.

¹⁸ Ita, pagayatan ti Dios nga agbalintayo a gayyemna ken naan-anay a makiramantayo iti trabahona agingga a posible. (Mat. 6:33; 28:19, 20; Sant. 4:8) Kas iti napasamak ken Jesus, mabalin a padasen dagiti maseknan a tattao nga iyadayodatayo iti kasta a panggep. Kas pagarigan, kasanon no imbaga ti boss-mo nga i-promote-naka iti posision a dakdakkel ti sueldom ngem malapdan met dagiti naespirituan nga aktibidadmo? Wenno no maysaka nga estudiante, ipapantayon a naikkanka iti gundaway nga ageskuela iti adayo para iti kanayonan nga edukasion. Iti dayta a gundaway, kasapulam kadi ti agkararag ken ag-research, makisarita iti pamiliam ken nalabit kadagiti panglakayen, sa agdesisionka? Apay a saanmo nga ammuen itan ti pampanunot ni Jehova kadagita a banag ken ikagumaam a tuladen ti pampanunotna? Ket inton maipasangoka iti kasta a situasion, mabalin a saankanton a masulisog. Nalawag kenkan dagiti naespirituan a kalatmo, nakapagdesisionkan, ket ti laengen panangitungpal iti dayta ti kurang.

¹⁹ Mabalin a makapanunotka iti dadduma pay a situasion a bigla a pakaipasanguam. Siempre, saantay a masaganaan ti amin a posible a mapasamak. Ngem no utobentayo ti pampanunot ni Jehova iti personal a panagadaltayo, ad-adda a malagiptayo ti naadaltayo ken mayaplikartayo iti situasion a pakaipaspasanguantayo. Kanayontayo koma ngarud a sipapanunot iti pampanunot ni Jehova iti bambanag, tuladentayo dayta, sa usigentayo no kasano a ti panangmatmat ti Dios apektaranna ti ar-aramidentayo ita ken iti masanguanan.

20, 21. (a) Apay a maragsakantayto iti adda limitasionna a wayawayatayo iti baro a lubong? (b) Kasanotayo a maaddaan iti kasta a rag-o ita?

²⁰ Talaga a padpadaanantayon ti baro a lubong. Namnamaen ti kaaduan kadatayo ti agbiag nga agnanayon iti paraiso a daga. Inton agturayen ti Pagarian, mawayawayaantayon kadagiti ladingit a gagangay iti daytoy a sistema. Siempre, uray iti baro a lubong, addanto latta wayawayatayo nga agpili. Agpilinto ti tunggal indibidual sigun iti kayat ken tarigagayna.

²¹ Siempre, adda limitasion dayta a wayawaya. No maipapan iti naimbag ken dakes, agpaiwanwanto dagiti naemma iti linlinteg ken pampanunot ni Jehova. Makaparagsakto daytoy ken mangted iti dakdakkel a rag-o ken kasta unay a talna. (Sal. 37:11) Ngem mariknatayo itan dayta a rag-o bayat a tultuladentayo ti panagpampanunot ni Jehova.