NAMINSAN, imbaga ni Jesus: “Ad-adu ti kinaragsak iti panangted ngem iti panangawat.” (Ara. 20:35) Agaplikar daytoy a napateg a prinsipio iti relasiontayo ken Jehova. Apay? Inikkannatayo ni Jehova iti adu a sagut a mangparagsak kadatayo, ngem makariknatayo iti dakdakkel a kinaragsak no mangtedtayo iti sagut kenkuana. Ania a sagut ti mabalintayo nga ited ken Jehova? Kuna ti Proverbio 3:9: “Padayawam ni Jehova iti napapateg a bambanagmo.” Karaman iti ‘napapateg a bambanagtayo’ ti tiempo, talento, pigsa, ken materialtayo. No usarentayo dagita para iti pudno a panagdayaw, ik-ikkantayo ni Jehova iti sagut, ket dayta ti mangparagsak kadatayo.

No iti panangted iti material, ania ti makatulong tapno ditay maliwayan ti mangted iti sagut ken Jehova? Imbaga ni apostol Pablo kadagiti taga-Corinto a ‘mangilasinda’ iti kontribusionda. (1 Cor. 16:2) Ania ti aramidem no kayatmo nga ammuen ti dadduma pay a pamay-an ti panagdonar a posible iti lugaryo? Pangngaasim ta kitaem ti kahon iti baba.

Saan nga amin a nasion ket makapagdonar iti online. Ngem ti dadduma pay a pamay-an ti panagdonar ket maammuan iti web page a donasion. Iti dadduma a nasion, adda document iti dayta a web page a mangsungbat kadagiti masansan a saludsod maipapan iti panagdonar.