ITI napalabas a tawtawen, adu a kakabsat kadagiti napanglaw a pagilian ti immakar kadagiti pagilian iti Laud. Ngem idi agangay, nagsublida iti nakayanakanda a pagilian. Gapu iti ayatda ken Jehova ken iti padada a tao, immakarda kadagiti lugar nga agkasapulan iti ad-adu nga agibumbunannag iti Pagarian. (Mat. 22:37-39) Ania dagiti insakripisioda, ken ania dagiti bendision a naawatda? Tapno maammuantayo, agpokustayo iti pagilian ti Cameroon iti makinlaud nga Africa.

Idi 1998, pimmanaw idiay Cameroon ti kabsat nga agnagan iti Onésime. Nagyan iti sabali a pagilian iti 14 a tawen. Maysa nga aldaw, iti maysa a gimong, adda nangngegna nga ilustrasion maipapan iti trabaho a panangasaba. Kinuna ti ispiker, “Adda aggayyem nga agkalkalap iti nagduma a lugar. Bassit ti makalkalapan ti maysa idinto ta ad-adu ti makalapan ti gayyemna. Saan ngata nga umakar ti bassit ti makalkalapanna iti lugar nga ad-adu ti maalana nga ikan?”

Dayta nga ilustrasion ti namagpanunot ken Onésime nga agsubli iti nabunga a naespirituan a pagkalapan idiay Cameroon tapno matulonganna dagiti agibumbunannag sadiay. Ngem madanagan. Mairuamnanto ngata manen ti agbiag iti nakayanakanna a pagilian kalpasan ti adu a tawen a panagnaedna iti sabali a pagilian? Tapno maammuanna dayta, bimmisita idiay Cameroon iti innem a bulan. Sa idi 2012, permanenten a nagyan sadiay.

Inyestoria ni Onésime: “Naikawaak iti napudot a paniempo ken iti kasasaad ti panagbiag. Iti Kingdom Hall, inruamko ti bagik nga agtugaw manen iti natangken a bangko. Ngem no dumngegak a naimbag iti programa,” siiisem nga imbagana, “ad-adda a malipatak dagiti de kutson a tugaw.”

Idi 2013, inkasar ni Onésime ni Géraldine, a nagsubli idiay Cameroon kalpasan ti 9 a tawen a panagyanna idiay France. Ania dagiti bendision a naawat dagitoy nga agassawa gapu ta impamaysada iti biagda dagiti naespirituan nga aktibidad? Kuna ni Onésime: “Nageskuelakami nga agassawa iti School for Kingdom Evangelizers ket agserserbikamin iti Bethel. Iti maysa laeng a tawen, 20 a mayad-adalan iti Biblia iti kongregasionmi ti nabautisaran. Mariknak nga addaak itan iti umiso a lugar a ‘pagkalapan.’” (Mar. 1:17, 18) Innayon ni Géraldine: “Ad-adu a bendision ti inawatko ngem iti ninamnamak.”

Immakar ni Judith idiay United States ngem kayatna a palawaen ti ministeriona. Inyestoriana, “Kada malpasen ti ibibisitak iti pamiliak idiay Cameroon, agsangitak ta masapul a panawak ti sumagmamano a narugiak nga iyadalan iti Biblia.” Ngem agpangadua ni Judith nga agsubli  idiay Cameroon. Dakkel ngamin ti sueldona iti trabahona ket dayta ti us-usarenna a pagpaagas ni tatangna idiay Cameroon. Ngem immakar latta ni Judith gapu iti panagtalekna ken Jehova. Inaminna a mailiw iti dadduma a pagnam-ayan a napasaranna idi adda iti sabali a pagilian. Inkararagna ken Jehova a maka-adjust ken natulongan met iti pammaregta ti manangaywan iti sirkito ken ti asawana.

Kas pananglagip ni Judith iti napalabas, kinunana, “Iti uneg ti tallo a tawen, nakariknaak iti rag-o ta nakasarakak iti uppat a naespirituan nga annak.” Nangrugi nga agserbi ni Judith kas special pioneer. Ita, agserserbin a kadua ti lakayna a ni Sam-Castel iti trabaho iti sirkito. Ngem komustan ti tatang ni Judith? Nakabirok ni Judith ken ti pamiliana iti maysa nga ospital iti sabali a pagilian a mayat a mangopera ken tatangna nga awan ti bayadanda. Makaparagsak ta nagballigi ti operasion.

Immakar idiay Canada ti kabsat nga agnagan Victor. Idi nabasana ti maysa nga artikulo iti Pagwanawanan maipapan iti nangatngato nga edukasion, napanunotna ti panageskuelana. Saannan nga intuloy ti panageskuelana iti unibersidad ket nangala laengen iti vocational course. “Gapu iti dayta, al-alisto a nakastrekak iti trabaho,” imbagana, “ken naaramidko ti nabayagen a kayatko nga aramiden—ti panagpayunir.” Idi agangay, inkasar ni Victor ni Caroline, sada nagbakasion idiay Cameroon. Idi bimmisitada iti Bethel sadiay, adda dagiti kakabsat a nangparegta kadakuada a mangpanunot no mabalinda ti agserbi idiay Cameroon. Kinuna ni Victor, “Awan ti rasonmi nga agsaan, ket gapu ta pinasimplemi ti biagmi, mabalinmi nga awaten ti imbitasion.” Nupay adda bassit problema ni Caroline iti salun-atna, nagdesisionda nga umakar.

Nagserbi da Victor ken Caroline kas regular pioneer idiay Cameroon tapno matulonganda ti adu nga interesado iti Biblia. Iti sumagmamano a tiempo, immanay nga inusarda ti urnongda. Kalpasanna, nagtrabahoda idiay Canada iti sumagmamano a bulan tapno adda gastuenda nga agsubli idiay Cameroon ket maitultuloyda ti agpayunir. Ania dagiti bendision a naawatda? Nakapageskuelada iti School for Kingdom Evangelizers, nagserbida kas special pioneer, ken construction servant-da itan. Imbaga ni Victor, “Gapu ta pinanawanmi ti komportable a biagmi, nariknami a supsuportarannakami ni Jehova.”

Idi 2002, nabasa ti kabsat a ni Alain nga estudiante iti maysa nga unibersidad idiay Germany ti tract nga Agtutubo—Kasanoyo nga Usaren ti Biagyo? Gapu iti nabasana, natignay a mangaramid kadagiti baro a kalat. Idi 2006, nageskuela iti Ministerial Training School ken naibaon idiay Cameroon, ti nakayanakanna a pagilian.

Nakabirok ni Alain iti part-time a trabaho idiay Cameroon. Idi agangay, nakabirok iti dakdakkel ti sueldona a trabaho, ngem madanagan a baka basbassitton ti tiempona iti ministerio. Isu nga idi naawis nga agserbi kas special pioneer, inawatna a dagus dayta. Imbaga ti boss-na nga ingatona ti sueldona ngem saan a binaliwan ni Alain ti desisionna. Idi agangay, inkasar ni Alain ni Stéphanie, nga adu a tawen a nagyan idi idiay France. Ania dagiti pakarigatan a nakaipasanguan ni Stéphanie idi immakar idiay Cameroon?

Kinuna ni Stéphanie: “Naaddaanak kadagiti saan met a grabe a sakit ken allergy. Ngem regular nga agpapaagasak isu a mabangbang-aranak.” Nagunggonaan daytoy nga agassawa gapu iti panagibturda. Inyestoria ni Alain: “Idi  napankami nangasaba iti nasulinek a purok a maawagan iti Katé, adda sumagmamano a nasarakanmi a mayat nga agpayadal iti Biblia. Idi agangay, nayadalanmi ida babaen ti telepono. Dua kadakuada ti nabautisaran ket adda nabuangay sadiay a maysa a grupo dagiti agibumbunannag.” Innayon ni Stéphanie: “Nakaragragsak ti tumulong kadagiti tattao agingga nga idedikarda ti biagda ken Jehova. Gapu iti panagserbimi ditoy, kanayonmi a marikna dayta.” Ita, agserserbin da Alain ken Stéphanie iti trabaho iti sirkito.

Nabautisaran ni Gisèle bayat nga agad-adal iti kinadoktor idiay Italy. Bilib iti simple a biag ti agassawa a payunir a nangyadal kenkuana iti Biblia isu a kayatna nga ad-adu ti maaramidanna iti ministerio. Nag-regular pioneer ngarud ni Gisèle bayat nga ilepleppasna ti panageskuelana.

Kayat ni Gisèle nga ad-adu ti maaramidanna nga agserbi ken Jehova idiay Cameroon, ngem adda dagiti pakadanaganna. Kinunana, “Masapul nga ibbatak ti kinaresidentek iti Italy ken panawak metten dagiti gagayyem ken kapamiliak nga aggigian idiay Italy.” Nupay kasta, nagsubli ni Gisèle idiay Cameroon idi Mayo 2016. Idi agangay, nakiasawa ken Léonce, ket inrekomenda ti sanga nga opisina idiay Cameroon nga agserbida idiay Ayos, maysa nga ili nga agkasapulan iti adu a manangaskasaba iti Pagarian.

Kasano ti biag idiay Ayos? Kinuna ni Gisèle: “Masansan nga adu a lawas nga awan ti korientemi, ket saanmi a mai-charge dagiti selponmi. Kaaduanna a saanmi a maus-usar dagita. Nasursurok ti agluto nga agsungrod iti kayo, ken nagusarkami iti karetilia ken flashlight a mapan agsakdo iti rabii inton bassiten ti mapan agsakdo iti ubbog.” Kasano a nakapagibtur ti agassawa? Imbaga ni Gisèle: “Nakatulong kadakami ti espiritu ni Jehova, ti panagsinnuportami nga agassawa, ken ti pammaregta ken ti sagpaminsan a pinansial a suporta dagiti pamilia ken gagayyemmi.”

Naragsak kadi ni Gisèle a nagsubli iti nakayanakanna a pagilian? “Wen!” imbagana. “Idi damo, adda dagiti pakarigatan ken pakaupayan, ngem idi napagballigianmi dagitan, nariknami ken lakayko nga inaramidmi a mismo ti masapul nga aramidenmi. Agtaltalekkami ken Jehova isu a sumingsingedkami kenkuana.” Nageskuela da Léonce ken Gisèle iti School for Kingdom Evangelizers, ket agserserbida itan kas temporary special pioneer.

Kas kadagiti mangngalap a situtured a mangsango iti nadumaduma a kasasaad tapno adu ti makalapanda, dagidiay agsubli iti nakayanakanda a pagilian situtulokda nga agsakripisio a tumulong kadagidiay mangipangag iti mensahe ti Pagarian. Sigurado a saan a malipatan ni Jehova dagitoy a naggagaget nga agibumbunannag gapu iti ayat nga ipakpakitada para iti naganna. (Neh. 5:19; Heb. 6:10) No agnanaedka iti sabali a pagilian ket agkasapulan ti pagilian a nakayanakam iti ad-adu nga agibumbunannag iti Pagarian, kabaelam kadi ti agsubli? No aramidem dayta, nabaknang a bendision ti agur-uray kenka.—Prov. 10:22.