1-2. (a) Apay a masapul nga agtalek ken Jehova dagiti kakaskasar? (Salmo 37:3, 4) (b) Ania ti usigentayo iti daytoy nga artikulo?

DANDANIKA kadin agkasar wenno kakaskasarmo? No wen, sigurado a kayatmo a matagiragsak ti biag a kadua ti dungdungnguem unay. Siempre, adda dagiti rigat iti panagasawa, ken adda dagiti napateg a desision a masapul nga aramiden. Ti panangsangoyo kadagita a pakarigatan ken desision apektarannanto ti kinaragsakyo kas agassawa kadagiti masungad a tawtawen. No agpannuraykayo ken Jehova, nainsiribanto dagiti desisionyo, tumibkerto ti relasionyo nga agassawa, ken naragragsakkayto. No saanyo a suroten ti balakad ti Dios, sigurado nga agproblemakayto iti panagasawayo ket saankayonto a naragsak.​—Basaen ti Salmo 37:3, 4.

² Nupay daytoy nga artikulo ket para kadagiti kakaskasar, ilawlawagna dagiti pakarigatan a mabalin a mapasaran ti amin nga agassawa. Itampokna dagiti masursurotayo kadagiti inyulidan ti dadduma a matalek a lallaki ken babbai iti Biblia. Adda dagiti masursurotayo kadagita a mabalintayo nga iyaplikar iti biagtayo ken iti panagasawa. Ammuentayo met dagiti masursurotayo kadagiti kapadasan ti dadduma nga agassawa iti kaaldawantayo.

3-4. Ania dagiti pakarigatan a mabalin a maipasango kadagiti kakaskasar?

³ Mabalin nga iparegta ti dadduma a tattao kadagiti kakaskasar a surotenda ti makunkuna a normal a panagbiag. Kas pagarigan, ti agassawa ket mabalin a piliten dagiti nagannak  ken dadduma pay a kakabagian a maaddaanen iti annak. Wenno baka kombinsiren ida ti dadduma a gagayyem ken kapamiliada a gumatangda iti balay ken punnuenda dayta kadagiti agkakapintas a gamit.

⁴ No saan nga agannad ti agassawa, mabalin a mailumlomda iti utang. No kasta ti mapasamak, posible a kasapulan nga agtrabahoda a dua iti adu nga oras tapno makabayadda. Gapu iti trabahoda, mabalin a maksayan ti orasda nga usarenda koma iti personal a panagadal iti Biblia, panagdaydayaw ti pamilia, ken ministerio. Baka malangananda payen dagiti gimong ta ag-overtime-da tapno dakdakkel ti sueldoda wenno tapno saanda a maikkat iti trabahoda. Kas resultana, maikapisda kadagiti makaparagsak nga oportunidad a mangpalawa iti panagserbida ken Jehova.

5. Ania ti masursurotayo iti kapadasan da Klaus ken Marisa?

⁵ Ipakita dagiti kapadasan a no isentrotayo ti biagtayo kadagiti material a bambanag, saantayo a naragsak. Usigentayo ti nasursuro ti agassawa a da Klaus ken Marisa iti daytoy a banag. * Idi kakaskasarda, agpadada a nagtrabaho iti full-time tapno nanam-ay ti panagbiagda. Ngem ti kinaagpaysuanna, nariknada nga adda kurang iti biagda. Inamin ni Klaus: “Adu nga agpayso ti kuartami, ngem awan ti naespirituan a kalatmi. Komplikado ken makapa-stress ketdi ti biagmi.” Nalabit nakitayo met a saan a nangyeg kadakayo iti pannakapnek ti panangisentroyo iti biagyo kadagiti material a bambanag. No kasta, saankayo a maupay. Makatulong kadakayo dagiti nasayaat nga ulidan ti dadduma. Umuna, usigentayo ti masursuro dagiti assawa a lallaki iti inyulidan ni Ari Jehosafat.

6. Maitunos iti balakad ti Proverbio 3:5, 6, kasano a sinango ni Ari Jehosafat ti maysa a nakaro a pakarigatan?

⁶ Assawa a lallaki, mariknayo kadi no dadduma a nakaad-adu ti responsabilidadyo? No wen, makatulong kadakayo ti ulidan ni Ari Jehosafat. Kas ari, responsabilidad ni Jehosafat ti seguridad ti intero a nasion! Kasanona nga intungpal dayta a nagdagsen a responsabilidadna? Inaramid ni Jehosafat ti amin a kabaelanna tapno maprotektaranna ti amin nga umili. Pinaderanna dagiti siudad ti Juda ken nangummong iti nabileg nga armada a buklen ti nasurok a 1,160,000 a soldado. (2 Cron. 17:12-19) Idi agangay, adda nakaro a pakarigatan a naipasango ken Jehosafat. Ni Jehosafat, ti pamiliana, ken dagiti umilina ket pinangtaan ti dakkel nga armada a buklen dagiti Ammonita, Moabita, ken lallaki iti kabambantayan ti Seir. (2 Cron. 20:1, 2) Ania ti inaramid ni Jehosafat? Nagkiddaw ken Jehova iti tulong ken bileg. Maitunos dayta iti nainsiriban a balakad ti Proverbio 3:5, 6. (Basaen.) Ipakita ti napakumbaba a kararag ni Jehosafat iti 2 Cronicas 20:5-12 nga agtaltalek unay iti nadungngo a  nailangitan nga Amana. Kasano a sinungbatan ni Jehova ti kararag ni Jehosafat?

7. Kasano a sinungbatan ni Jehova ti kararag ni Jehosafat?

⁷ Nakisarita ni Jehova ken Jehosafat babaen ti Levita a ni Jahaziel. Imbaga ni Jehova: “Agpuestokayo, agtakderkayo, ket kitaenyo ti panangisalakan ni Jehova kadakayo.” (2 Cron. 20:13-17) Talaga a karkarna nga estratehia dayta iti pannakigubat! Ngem saan a tao ti nangibilin iti dayta no di ket ni Jehova. Siento porsiento a nagtalek ni Jehosafat iti Diosna, ket nagtulnog. Idi sumangon ni Jehosafat ken dagiti tattaona kadagiti kalabanda, saan a dagiti kalaingan a soldado ti pinagpuestona iti sanguanan ti armadana, no di ket dagiti awanan armas a lallaki, a mangidaydayaw ken Jehova babaen ti panagkanta. Saan a pulos a pinaay ni Jehova ni Jehosafat; inabak ti Dios ti armada dagiti kalaban.​—2 Cron. 20:18-23.

8. Ania ti masursuro ti asawa a lalaki iti ulidan ni Jehosafat?

⁸ Asawa a lalaki, adda dagiti masursurom iti ulidan ni Jehosafat. Responsabilidadmo nga aywanan ti pamiliam, isu nga ikagumaam a protektaran ken suportaran ti pamiliam. No maipasangoka kadagiti pakarigatan, baka mariknam a kabaelam a solbaren dagita a siksika. Ngem labanam ti tendensiam nga agpannuray iti bukodmo a pigsa. Personal ketdi nga ikararagmo a tulongannaka ni Jehova. Sipapasnek met nga agkararagkayo a dua ken baketmo. Agpaidalankayo ken Jehova babaen ti panagadalyo iti Biblia ken kadagiti publikasion nga impaay ti organisasion ti Dios, ket iyaplikaryo dagiti makitayo a balakad. Mabalin a kontraen ti dadduma dagiti desisionyo a naibatay iti Biblia, ken mabalin pay ketdi nga ibagada a saan a limpio ti panagpampanunotyo. Baka ibagada a ti kuarta ken dagiti material a bambanag ti mangipaay iti kasayaatan a proteksionyo a sangapamiliaan. Ngem laglagipenyo ti ulidan ni Jehosafat. Nagtalek ken Jehova ken pinaneknekanna dayta babaen kadagiti aramidna. Saan a binaybay-an ni Jehova dayta a napudno a lalaki, ket saannakayto met a baybay-an. (Sal. 37:28; Heb. 13:5) Ania ti mabalin nga aramiden dagiti agassawa tapno masiguradoda a naragsak ti biagda?

9. Ania ti maikunatayo maipapan ken ni propeta Isaias ken ni baketna?

⁹ Insentro ni propeta Isaias ken ni baketna ti biagda iti panagserbi ken Jehova. Maysa a propeta ni Isaias ket mabalin a nagipadto met ni baketna, ta naawagan iti “propeta a babai.” (Isa. 8:1-4) Kas agassawa, nalawag a nagpokus da Isaias ken ni baketna iti panagdaydayawda ken Jehova. Talaga a nagsayaat ti inyulidanda para kadagiti agassawa ita!

10. Kasano a ti panangadal kadagiti padto ti Biblia ti makatulong kadagiti agassawa tapno agbalinda a determinado a mangaramid iti ad-adu para ken Jehova?

¹⁰ Maisentro dagiti agassawa ita ti biagda iti panagserbi ken Jehova no aramidenda ti amin a kabaelanda para kenkuana. Ad-adda nga agtalekda ken Jehova no agkaduada a mangadal kadagiti padto ti Biblia ken makitada a kanayon a pumayso dagita. * (Tito 1:2) Mabalin a panunotenda no ania ti maitulongda iti pannakatungpal ti dadduma a padto ti Biblia. Kas pagarigan, makatulongda iti pannakatungpal ti impadto ni Jesus a maikasaba ti naimbag a damag iti intero a daga sakbay a  dumteng ti panungpalan. (Mat. 24:14) No nabilbileg ti panamati ti agassawa a pumayso dagiti padto ti Biblia, nabilbileg met ti determinasionda a mangaramid iti ad-adu para ken Jehova.

11. Ania dagiti naaramidan da Priscila ken Aquila, ken apay?

¹¹ Adda masursuro dagiti agkabannuag nga agassawa iti Judio nga agassawa a da Priscila ken Aquila, nga agnanaed idi ti siudad ti Roma. Naammuanda ti naimbag a damag maipapan ken Jesus ket nagbalinda a Kristiano. Sigurado a kontentoda idin. Ngem bigla a nagbalbaliw ti situasionda idi imbilin ni Emperador Claudio a pumanaw idiay Roma ti amin a Judio. Panunotenyo ti epekto dayta kada Aquila ken Priscila. Masapul a panawanda ti lugar a nakairuamanda, agbirokda iti baro a pagyananda, ken mangrugida manen iti negosioda a panagaramid iti tolda iti sabali a lugar. Ngem dagita kadi a narigat a situasion ti rason tapno saandan nga iyun-una dagiti interes ti Pagarian? Ammoyo la ketdin ti sungbat. Idiay Corinto nga immakaran da Aquila ken Priscila, timmulongda iti kongregasion ken nakipagtrabahoda ken apostol Pablo a mangpabileg kadagiti kakabsat. Kalpasanna, immakarda iti dadduma nga ili nga agkasapulan iti ad-adu a manangaskasaba. (Ara. 18:18-21; Roma 16:3-5) Talaga a naragsak ken okupado ti biagda a dua!

12. Apay a masapul nga adda dagiti naespirituan a kalat ti maysa nga agassawa?

¹² Matulad dagiti agassawa ita da Priscila ken Aquila no iyun-unada dagiti interes ti Pagarian. Ti kasayaatan a tiempo a pagsaritaan ti agin-innayat dagiti kalatda iti biag ket bayat nga agnobioda. No agkaduada nga agdesision ken ragpatenda dagiti agpada a naespirituan a kalatda, ad-adu ti oportunidadda a makakita nga agtigtignay ti espiritu ni Jehova iti biagda. (Ecl. 4:9, 12) Alaentay a pagarigan da Russell ken Elizabeth. Imbaga ni Russell, “Idi agnobiokami pay laeng, espesipiko a nagsaritaanmin dagiti naespirituan a kalatmi.” Kinuna ni Elizabeth, “Nagsaritaanmi dagita tapno inton maipasangokami iti nadumaduma a panagdesision, masiguradomi a dagiti  pilienmi ket saan a makalapped iti panangragpatmi kadagita a kalat.” Impalubos ti situasion da Russell ken Elizabeth nga umakarda idiay Micronesia tapno agserbida iti lugar nga agkasapulan iti ad-adu nga agibumbunannag.

13. Sigun iti Salmo 28:7, ania ti resultana no agtalektayo ken Jehova?

¹³ Kas kada Russell ken Elizabeth, pinasimple ti adu nga agassawa ti biagda tapno ad-adu ti tiempoda iti trabaho a panangasaba ken panangisuro. No pagbalinen a kalat ti agassawa nga ad-adu ti maaramidanda iti panagserbi ken Jehova ken ikagumaanda a ragpaten dayta, adu ti nasayaat a resultana. Makitadanto no kasano ti panangaywan ni Jehova kadakuada, dumakkelto ti panagtalekda kenkuana, ken agbalindanto a pudpudno a naragsak.​—Basaen ti Salmo 28:7.

14. Kasano nga impakita da apostol Pedro ken baketna a nagtalekda iti kari a mabasa iti Mateo 6:25, 31-34?

¹⁴ Adda met masursuro dagiti agassawa iti inyulidan da apostol Pedro ken ni baketna. Masapul a mangaramid ni apostol Pedro iti napateg a desision agarup innem a bulan agingga iti makatawen kalpasan ti damo a panagam-ammoda ken Jesus. Panagkalap ti negosio idi ni Pedro. Idi ngarud inawis ni Jesus ni Pedro a sumurot kenkuana iti amin a tiempo, masapul nga ikabilangan ni Pedro ti situasion ti pamiliana. (Luc. 5:1-11) Inkeddeng ni Pedro ti sumurot ken Jesus iti trabaho a panangasaba. Nainsiriban ti desisionna! Ket masiguradotayo la ketdi a sinuportaran ti asawa ni Pedro ti desisionna. Ngamin, ipakita ti Biblia a kalpasan ti panagungar ni Jesus, adda dagiti tiempo a nagdaliasat isuna a kadua ni Pedro. (1 Cor. 9:5) Talaga a ti ulidanna kas maysa a Kristiano nga asawa a babai ti nangted ken Pedro iti wayawaya a mangbalakad kadagiti Kristiano nga assawa a lallaki ken babbai. (1 Ped. 3:1-7) Nalawag a nagtalek da Pedro ken ni baketna iti kari ni Jehova nga ipaayna dagiti kasapulanda no iyun-unada ti Pagarian iti biagda.​—Basaen ti Mateo 6:25, 31-34.

15. Ania ti masursuroyo iti kapadasan da Tiago ken Esther?

¹⁵ No sumagmamano metten a tawen nga agassawakayo, kasanoyo a maitultuloy a parayrayen ti tarigagayyo a mangpalawa iti ministerioyo? Ti maysa ket agsursurokayo kadagiti kapadasan ti dadduma nga agassawa. Kas pagarigan, basaenyo ti serye a “Situtulok nga Agsaksakripisioda.” Dagita nga artikulo ti nakatulong kada Tiago ken Esther, nga agassawa idiay Brazil, a mangparayray iti tarigagayda nga agserbi iti lugar a dakdakkel ti panagkasapulanna. Inlawlawag ni Tiago: “Idi basbasaenmi dagiti kapadasan no kasano a tinulongan ni Jehova dagiti adipenna iti panawentayo, kayatmi met a marikna nga idalan ken aywanannakami ti ima ni Jehova.” Di nagbayag, immakarda idiay Paraguay ket sipud idi 2014, agserserbidan iti kongregasion a mangaskasaba kadagiti Portuguese ti lengguaheda. Kinuna ni Esther: “Ti maysa a teksto a paboritomi a dua ket ti Efeso 3:20. Namin-adun a pimmayso dayta iti panagserbimi ken Jehova.” Iti dayta a surat ni Pablo kadagiti taga-Efeso, inkarina nga ipaay ni Jehova ti ad-adu nga amang ngem iti kidkiddawentayo. Talaga nga agpayso dayta a kari!

16. Pagpabalakadan dagiti agkabannuag nga agassawa no pampanunotenda dagiti kalatda iti biag?

¹⁶ Makatulong kadagiti agkabannuag nga agassawa ita ti kapadasan dagidiay nakasursuro nga agpannuray ken Jehova. Adda dagiti agassawa a mabalin nga adun a dekada  nga agserserbi iti amin-tiempo a ministerio. Nasayaat no agpabalakadkayo kadakuada no pampanunotenyo dagiti kalatyo. Maysa pay dayta a pamay-an nga ipakpakitayo nga agtaltalekkayo ken Jehova. (Prov. 22:17, 19) Makatulong met dagiti panglakayen kadagiti agkabannuag nga agassawa a mangpili ken mangragpat kadagiti naespirituan a kalat.

17. Ania ti napasamak kada Klaus ken Marisa, ken ania ti masursurotayo iti kapadasanda?

¹⁷ Ngem no dadduma, mabalin a saan a kas iti ninamnamatayo ti pagbanagan ti desisiontayo a mangpalawa iti serbisiotayo. Alaentayo a pagarigan da Klaus ken Marisa a nadakamaten. Idi tallo a tawendan nga agassawa, immakarda iti pagnaedan tapno agboluntarioda iti konstruksion ti sangay iti Finland. Nupay kasta, naammuanda nga innem a bulan laeng ti maipalubos a panagyanda sadiay. Idi damo, nadismayada. Ngem idi kuan, naawisda nga agadal iti lengguahe nga Arabic. Maragragsakanda itan nga agserserbi iti kongregasion a mangaskasaba kadagiti Arabic ti lengguaheda iti sabali a pagilian. Malagip ni Marisa: “Mabutengak idi a mangaramid iti diak pay pulos napadpadasan isu a masapul nga agtalekak ken Jehova iti amin a pusok. Ngem nakitak a kanayon a tultulongannakami ni Jehova kadagiti pamay-an a dimi ekspektaren, isu nga ad-addan nga agtalekak ken Jehova.” Kas ipakita dayta a pagarigan, masiguradoyo a kanayon a gunggonaannakayo ni Jehova no siento porsiento nga agtalekkayo kenkuana.

18. Ania ti aramiden dagiti agassawa tapno kanayon nga agtalekda ken Jehova?

¹⁸ Ti panagasawa ket sagut ni Jehova. (Mat. 19:5, 6) Kayatna a tagiragsaken dagiti agassawa dayta a sagutna. (Prov. 5:18) Dakayo nga agkabannuag nga agassawa, panunotenyo no kasanoyo nga us-usaren ti biagyo. Ar-aramidenyo kadi ti amin a kabaelanyo tapno ipakitayo ken Jehova nga ap-apresiarenyo unay dagiti insagutna kadakayo? Makisaritakayo ken Jehova babaen ti kararag. Birokenyo iti Saona dagiti prinsipio nga agaplikar iti situasionyo. Kalpasanna, surotenyo ti balakad ni Jehova kadakayo. Masiguradoyo a naragsak ken makapnekto ti biagyo no isentroyo ti panagasawayo iti panagserbi ken Jehova!