1. Kasanotayo nga ammo a kayat ni Jehova nga umasidegtayo kenkuana?

 AW-AWISENNATAYO ni Jehova nga umasideg kenkuana. (Sant. 4:8) Kayatna nga isu ti agbalin a Diostayo, Amatayo, ken Gayyemtayo. Sungsungbatanna dagiti kararagtayo ken tultulongannatayo kadagiti narigat a tiempo. Us-usarenna met ti organisasionna a mangisuro ken mangprotektar kadatayo. Ngem ania dagiti masapul nga aramidentayo tapno sumingedtayo ken Jehova?

2. Kasanotayo a suminged ken Jehova?

² Sumingedtayo ken Jehova no agkararagtayo kenkuana ken no basaen ken utobentayo ti Saona. Bayat nga ar-aramidentayo dagita, mapno ti pusotayo iti ayat ken apresasion kenkuana. Matignaytayo nga agtulnog ken mangidaydayaw kenkuana ta maikari unay isuna iti dayta. (Apoc. 4:11) No ad-adda nga am-ammotayo ni Jehova, lallalo nga agtalektayo kenkuana ken iti organisasion nga impaayna a tumulong kadatayo.

3. Kasano nga ikagkagumaan ti Diablo nga isinanatayo ken Jehova, ngem ania ti makatulong tapno ditay pulos sumina iti Diostayo ken iti organisasionna? (Salmo 31:13, 14)

³ Nupay kasta, ikagkagumaan ti Diablo nga isinanatayo ken Jehova, nangruna no problemadotayo. Ania ti estratehiana? In-inut a dadaelenna ti panagtalektayo ken Jehova ken iti organisasion. Ngem malabanantayo dagiti taktikana. No nabileg ti pammati ken panagtalektayo ken Jehova, ditayto pulos sumina iti Diostayo ken iti organisasionna.​—Basaen ti Salmo 31:13, 14.

4. Ania ti usigentayo iti daytoy nga artikulo?

 ⁴ Iti daytoy nga artikulo, usigentayo ti tallo a taktika ti Diablo a mabalin nga aggapu iti ruar ti kongregasion. Tunggal maysa kadagita ti mabalin a mangdadael iti panagtalektayo ken Jehova ken iti organisasionna. Kasano a dagita a taktika ti mangisina kadatayo ken Jehova? Ken ania dagiti mabalintayo nga aramiden a panglaban kadagita a taktika ni Satanas?

5. Kasano a dagiti problema ti mabalin a mangdadael iti panagtalektayo ken Jehova ken iti organisasionna?

⁵ No dadduma, adda dagiti problema​—kas iti ibubusor ti pamilia wenno no maawanantayo iti trabaho. Kasano a dagita ti mabalin a mangdadael iti panagtalektayo iti organisasion ni Jehova ken mangisina kadatayo kenkuana? No nabayagen nga agib-ibturtayo, mabalin a maawanantayo iti namnama ken madeprestayo. Gundawayan ni Satanas dagita a situasion tapno imulana ti panagduadua a dinatayo ay-ayaten ni Jehova. Kayat ti Diablo a panunotentayo a ni Jehova wenno ti organisasion ti makagapu iti panagsagabatayo. Kasta ti umasping a napasamak iti dadduma nga Israelita idiay Egipto. Idi damo, patienda nga inapointaran ni Jehova da Moises ken Aaron a mangwayawaya kadakuada iti pannakaadipenda. (Ex. 4:29-31) Ngem idi lalo a pinarigat ni Faraon ti biagda, pinabasolda da Moises ken Aaron gapu kadagiti problemada, ket imbagada kadakuada: “Gapu kadakayo, kagurguranakamin ni Faraon ken dagiti adipenna ket kayatdakami payen a patayen.” (Ex. 5:19-21) Pinabasolda dagiti matalek nga adipen ti Dios. Makapaladingit! No nabayagen nga ib-ibturam dagiti problema, kasano a mapagtalinaedmo ti nabileg a panagtalekmo ken Jehova ken iti organisasionna?

6. Ania dagiti masursurotayo ken propeta Habakuk no kasano nga ibturan dagiti problema? (Habakuk 3:17-19)

⁶ Ikararagmo ken Jehova ti amin a linaon ti pusom, ken agpatulongka kenkuana. Adu idi ti problema ni propeta Habakuk. Naminsan, kasla nagduadua no ay-ayaten met la isuna ni Jehova, isu nga inkararagna ken Jehova ti amin a marikriknana. Imbagana: “Kasano kabayag nga agpatulongak, O Jehova, ngem saanka a dumngeg? . . . Apay nga ipalpalubosmo ti panangidadanes?” (Hab. 1:2, 3) Sinungbatan ni Jehova ti naimpusuan a kararag ti matalek nga adipenna. (Hab. 2:2, 3) Rimmagsak manen ni Habakuk kalpasan a linagipna dagiti panangisalakan ni Jehova kadagiti adipenna. Kombinsidon nga ay-ayaten isuna ni Jehova ken tulonganna a mangibtur iti aniaman a suot. (Basaen ti Habakuk 3:17-19.) Ania dagiti masursurotayo? No adda dagiti problemam, ikararagmo ken Jehova ti marikriknam. Agpatulongka kenkuana. No aramidem dagita, makapagtalekka a pabilgennaka ni Jehova nga agibtur. Ken no makitam a tultulongannaka, lallalo a bumileg ti pammatim kenkuana.

7. Ania ti imbaga ti kabagian ni Shirley, ken ania ti nakatulong kenkuana tapno saan a mapukaw ti pammatina ken Jehova?

⁷ Itultuloymo ti naespirituan a rutinam. Kitaentayo no kasano a nakatulong dayta iti sister a taga-Papua New Guinea a ni Shirley idi naaddaan kadagiti problema. b Pobre ti pamilia ni Shirley, ken no dadduma, agkurang ti kanenda. Pinadas ti maysa a kabagianna a dadaelen ti panagtalekna ken Jehova. Kinunana: “Kunak man no tultulongannakayo ti nasantuan nga espiritu ti Dios, ngem ayanna ngay ti tulongna? Marigrigatkayo met latta. Saysayangenyo laeng ti orasyo ta  kasabakayo la a kasaba.” Inamin ni Shirley: “Nagay-ayam iti panunotko: ‘Talaga kadi nga ipatpategnakami ti Dios?’ Isu a nagkararagak a dagus ken Jehova ken imbagak ti amin a pampanunotek. Kanayon met a basaek ti Biblia ken dagiti publikasiontayo, ken kanayon a mangasaba ken makigimongak.” Idi agangay, naamirisna nga ay-aywanan ida ni Jehova a sangapamiliaan. Adda met latta ti kanenda ken naragsakda. Imbaga ni Shirley: “Nariknak a sungsungbatan ni Jehova dagiti kararagko.” (1 Tim. 6:6-8) No itultuloymo ti naespirituan a rutinam, dimonto ipalubos a dagiti problema wenno panagduadua ti mangisina kenka ken Jehova.

8. Ania ti posible a mapasamak kadagiti kakabsat a mangidadaulo iti organisasion ni Jehova?

⁸ Dagiti bumusbusor kadatayo us-usarenda ti media ken dagiti social network a mangiwaras iti kinaulbod wenno di umiso nga impormasion maipapan kadagiti kakabsat a mangidadaulo iti organisasion ni Jehova. (Sal. 31:13) Dadduma kadakuada ti naaresto ken naakusaran kas kriminal. Naipasango dagiti Kristiano idi umuna a siglo iti umasping a situasion idi naidarum ni apostol Pablo iti di umiso nga akusasion isu a naaresto. Ania ti reaksionda?

9. Ania ti reaksion ti dadduma a Kristiano idi naibalud ni apostol Pablo?

⁹ Idi naibalud ni apostol Pablo idiay Roma, insardeng a tulongan ti dadduma a Kristiano idi umuna a siglo. (2 Tim. 1:8, 15) Apay? Imbainda ngata ni Pablo ta imbilang isuna dagiti tattao kas kriminal? (2 Tim. 2:8, 9) Wenno mabutengda ta baka isuda met ti sumaruno a maidadanes? Aniaman ti rasonda, panunotem ti narikna la ketdi idi ni Pablo. Adu a rigat ti sinagabana ken inrisgona pay ketdi ti biagna para kadakuada. (Ara. 20:18-21; 2 Cor. 1:8) Ditay koma pulos tultuladen dagidiay binaybay-anda ni Pablo iti tiempo a kasapulanna unay ida! Ania ti laglagipentayo no maidadanes dagiti kakabsat a mangidadaulo iti organisasion?

10. Ania ti laglagipentayo no maidadanes dagiti kakabsat a mangidadaulo, ken apay?

 ¹⁰ Laglagipentayo no apay a maidaddadanestayo ken no asino ti adda iti likudan dayta. Kuna ti 2 Timoteo 3:12: “Maidadanesto met ti amin nga agtarigagay nga agbiag maitunos iti debosionda iti Dios kas adalan ni Kristo Jesus.” Ditay ngarud masdaaw no apay a dagiti kakabsat a mangidadaulo ti pumpuntiriaen ni Satanas. Kayatna ngamin a dadaelen ti integridadda ken butbutngennatayo.​—1 Ped. 5:8.

11. Ania dagiti masursurotayo iti ulidan ni Onesiforo? (2 Timoteo 1:16-18)

¹¹ Itultuloymo a suportaran dagiti kakabsat ken dimo pulos baybay-an ida. (Basaen ti 2 Timoteo 1:16-18.) Idi naibalud ni Pablo, sabali ti reaksion ni Onesiforo a maysa a Kristiano idi umuna a siglo. “Saanna nga imbain ti pannakaikawar [ni Pablo].” Sinapsapulna ketdi ni Pablo, ket idi nasarakanna, tinulonganna kadagiti praktikal a pamay-an. Idi inaramid dayta ni Onesiforo, inrisgona ti mismo a biagna. Ania dagiti masursurotayo? Masapul a ditay agbuteng iti tao wenno ditay ipalubos a dayta a panagbuteng ti manglapped kadatayo a mangsuporta kadagiti kakabsat a maidaddadanes. Idepensa ken tulongantayo ketdi ida. (Prov. 17:17) Kasapulanda ti ayat ken suportatayo.

12. Ania dagiti masursurotayo kadagiti kakabsat a lallaki ken babbai idiay Russia?

¹² Kitaentayo no kasano a tultulongan dagiti kakabsat idiay Russia dagiti ipatpategda a kapammatian a nakabalud. No mabisbista ti kaso ti dadduma, adu a kakabsat ti mapan iti korte tapno suportaranda ida. Ania dagiti masursurotayo? No mapadpadakes, maaresto, wenno maidadanes dagiti kakabsat a mangidadaulo, dika agbuteng. Ikararagam ida, tulongam dagiti kapamiliada, ken mangpanunotka iti dadduma a pamay-an a maipakitam ti suportam kadakuada.​—Ara. 12:5; 2 Cor. 1:10, 11.

13. Kasano a ti pannakauyaw ti mabalin a mangdadael iti panagtalektayo ken Jehova ken iti organisasionna?

¹³ Baka uyawendatayo dagiti saan a Saksi a kakabagian, katrabahuan, wenno kaeskuelaan gapu iti trabahotayo a panangasaba wenno panangsurottayo kadagiti nangato a pagalagadan ni Jehova iti moral. (1 Ped. 4:4) Mabalin nga ibagada: “Ap-apresiarenka, ngem karkarna ken istrikto unay ti relihionmo.” Baka adda dagiti mangkritikar iti panangtratotayo kadagiti nailaksid, nga ibagada: “Kasano a maibagam a nadungngoka no kasta ti panangtratom?” Dagita a komento ti mabalin a mangimula iti panagduadua iti isiptayo. Baka mapanunottayo: ‘Sobra kadi unay ti ekspektaren ni Jehova kaniak? Istrikto kadi unay ti organisasionna?’ No maipasangoka iti kasta a situasion, kasanoka a makapagtalinaed a nasinged ken Jehova ken iti organisasionna?

14. Ania ti masapul a reaksiontayo no uyawendatayo gapu ta sursurotentayo dagiti pagalagadan ni Jehova? (Salmo 119:50-52)

¹⁴ Itultuloymo a suroten dagiti pagalagadan ni Jehova. Ni Job ket maysa kadagiti nangsurot kadagiti pagalagadan ni Jehova uray no nauy-uyaw iti panangaramidna iti dayta. Maysa kadagiti peke a gagayyem ni Job ti nangpadas pay ketdi a mangkombinsir kenkuana nga uray no umiso wenno saan dagiti ar-aramidenna, awan serserbi dagita iti Dios. (Job 4:17, 18; 22:3) Ngem saan a pulos a namati ni Job kadagita a kinaulbod. Ammona nga umiso dagiti moral a pagalagadan ni Jehova, ken determinado a mangsurot kadagita. Dina impalubos a mapukaw ti integridadna gapu iti ibagbaga ti dadduma. (Job 27:5, 6) Ania dagiti masursurotayo? Uray no  adda manguyaw, dimo pulos kuestionaran dagiti pagalagadan ni Jehova. Panunotem ti mismo a kapadasam. Namin-adun a nakitam a gapu ta sursurotem dagiti pagalagadan ni Jehova, simmayaat ti biagmo. Determinadoka koma a kanayon a mangsuporta iti organisasion a mangsursurot kadagita a pagalagadan. Kasanoman kakaro ti pannakauyawmo, dimonto pulos ipalubos a dayta ti mangisina kenka ken Jehova.​—Basaen ti Salmo 119:50-52.

15. Apay a nauy-uyaw ni Brizit?

¹⁵ Kitaentayo ti kapadasan ti sister a taga-India a ni Brizit. Inuy-uyaw dagiti kapamiliana gapu iti relihionna. Di nagbayag kalpasan ti bautismona idi 1997, naawanan iti trabaho ti saan a Saksi a lakayna. Isu a nagdesision ni lakayna a makikabbalayda pay laeng a sangapamiliaan kadagiti katugangan ni Brizit, nga aggigian iti sabali a siudad. Ngem immadu dagiti problema ni Brizit. Awan trabaho ni lakayna isu a masapul nga agtrabaho iti full-time tapno masuportaranna ti pamiliada. Maysa pay, ti kaasitgan a kongregasion ket agarup 350 a kilometro (220 mi) ti kaadayona. Makapaliday ta binusor ti pamilia ni lakayna gapu iti relihionna. Kimmaro ti ibubusor isu a kapilitan nga immakar manen ti pamilia ni Brizit. Kalpasanna, bigla a natay ni lakayna. Idi agangay, maysa kadagiti annakna ti natay iti kanser idi 12 ti tawenna. Lallalo pay a kimmaro ti kasasaad ta ni Brizit ti pinabasol dagiti kakabagianna kadagita a napasamak. Imbagada a no saan koma a nagbalin a Saksi ni Jehova, saan a napasamak dagidiay a trahedia. Ngem nagtultuloy a nagtalek ken Jehova ken nagtalinaed iti organisasion.

16. Kasano a nabendisionan ni Brizit gapu ta nagtalinaed a nasinged ken Jehova ken iti organisasion?

¹⁶ Nagadayo ti balay ni Brizit iti kongregasion, isu nga imparegta ti manangaywan iti sirkito a kasabaanna dagiti kalugaranna ken angayenna dagiti gimong iti balayna. Idi damo, nariknana a kasla narigat. Ngem sinurotna dayta a pammaregta. Inkasabana ti naimbag a damag, inangayna dagiti gimong iti balayna, ken kanayon nga indauluanna ti panagdaydayaw  ti pamilia a kadua dagiti annakna. Ania dagiti resultana? Naaddaan ni Brizit iti adu nga iyad-adalan iti Biblia, ken adu kadakuada ti nabautisaran. Idi 2005, rinugianna ti nag-regular pioneer. Nagunggonaan ti panagtalekna ken Jehova ken ti kinamatalekna iti organisasion. Simamatalek nga agserserbi ken Jehova dagiti annakna, ken dua itan ti kongregasion iti dayta a lugar! Kombinsido ni Brizit a pinabileg ni Jehova tapno maibturanna dagiti rigat ken pananguyaw ti pamiliana.

17. Ania ti determinasiontayo?

¹⁷ Kayat ni Satanas a patientayo a baybay-annatayo ni Jehova no agproblematayo ken rumigat ti biagtayo no suportarantayo ti organisasion ni Jehova. Kayat ni Satanas a mabutengtayo no mapadpadakes, maidadanes, wenno maibalud dagiti mangidadaulo a kakabsat. Us-usarenna met ti pananguyaw tapno madadael ti panagtalektayo kadagiti pagalagadan ni Jehova ken iti organisasion. Ngem pagaammotayo dagiti dakes a taktikana isu a dinatayon maallilaw. (2 Cor. 2:11) Ania ngarud ti determinasiontayo? Ditay pulos patien dagiti kinaulbod ni Satanas ken agtalinaedtayo a matalek ken Jehova ken iti organisasion. Laglagipem, dinaka pulos baybay-an ni Jehova. (Sal. 28:7) Dimo ngarud koma ipalubos nga adda mangisina kenka ken Jehova!​—Roma 8:35-39.

18. Ania ti adalentayo iti sumaruno nga artikulo?

¹⁸ Iti daytoy nga artikulo, naadaltayo dagiti taktika a mabalin nga aggapu iti ruar ti kongregasion. Ngem mabalin met a masubok ti panagtalektayo ken Jehova ken iti organisasionna gapu kadagiti problema iti uneg ti kongregasion. Kasanotayo a mapagballigian dagita? Pagsasaritaantayo dagita iti sumaruno nga artikulo.