Sakbay nga ituloyko ti simmaruno a napasamak, iyestoriak pay nga umuna no kasano a nangrugiak iti amin-tiempo a panagserbi.

Nayanakak idi 1942 iti napintas nga isla ti Curaçao iti Caribbean. Taga-Suriname ni tatangko, ngem immakar iti isla tapno agtrabaho. Sumagmamano a tawen sakbay a nayanakak, maysa isuna kadagiti immuna a nagbalin a Saksi ni Jehova a nabautisaran iti Curaçao. a Linawas nga inyadalna ti Biblia kadakami nga agkakabsat, uray no kanayon a dimi kayat. Idi agtawenakon iti 14, immakarkami a sangapamiliaan iti Suriname tapno maaywanan ni Tatang ti bumakbaketen a nanangna.

Iti Suriname, nakigayyemak kadagiti kakongregasionmi nga agtutubo a naregta nga agserbi ken Jehova. In-inaunada kaniak iti sumagmamano a tawen ken regular pioneer-da. Nakaragragsakda no iyes-estoriada dagiti kapadasanda iti ministerio. Kalpasan dagiti gimongmi, agiinnestoriakami met maipapan iti Biblia​—no dadduma, bayat a nakatugawkami iti ruar a mangtangtangad iti namituen a rabii. Nakatulong dagita a gagayyemko tapno maammuak ti kayatko iti biag​—kayatko ti agserbi ken Jehova. Isu a nagpabautisarak idi 16 ti tawenko. Idi 18 ti tawenkon, nangrugiakon nga agserbi kas regular pioneer.

Adu ti nasursurok kas payunir, ken dagita ti nakatulong kaniak bayat ti panagserbik iti amin a tiempo. Kas pagarigan, ti maysa kadagiti umuna a leksion a nasursurok ket ti kinapateg ti panangsanay iti dadduma. Idi nangrugiak nga agpayunir, sinanaynak ti misionero a ni Willem van Seijl. b Adu ti insurona kaniak maipapan iti panangasikaso kadagiti responsabilidad iti kongregasion. Kadagidi a tiempo, diak man la impagarup a kasapulak  unay dagita a panangsanay. Iti simmaruno a tawen, naapointaranak kas special pioneer. Idi agangay, timmulongak kadagiti naiputputong a grupo dagiti kakabsat nga agnanaed iti nasulinek a paset ti kabakiran ti Suriname. Apresiarek unay ti naintiempuan a panangsanay idi kaniak dagiti kakabsat! Sipud idin, inkagumaakon a suroten ti ulidanda a mangiwaya iti tiempo a mangsanay iti dadduma.

Ti maikadua a nasursurok ket ti pagsayaatan ti simple ngem organisado unay a biag. Iti umuna nga aldaw ti kada bulan, pagsaritaanmin iti partnerko nga special pioneer dagiti kasapulanmi kadagiti sumaruno a lawas. Kalpasanna, maysa kadakami ti agbiahe iti adayo a mapan iti kabesera tapno gumatang kadagiti masapsapulmi. Nasken nga ibadyetmi a naimbag ti allowance-mi kada bulan ken iyan-anaymi dagiti suplaymi iti intero a makabulan. Ngamin, no maibusankami iti dadduma a suplay, manmano dagiti mabalin a tumulong kadakami, no adda man. Napaneknekak a gapu ta nairuamak iti simple ken organisado unay a biag idi ubingak, nakapagpokusak iti panagserbik ken Jehova iti intero a panagbiagko.

Ti maikatlo a nasursurok ket ti pagsayaatan ti panangisuro kadagiti tattao iti bukodda a lengguahe. Ammok ti agsao iti Dutch, English, Papiamento, ken Sranantongo (maawagan met iti Sranan), ti gagangay a lengguahe iti Suriname. Ngem iti kabakiran, nakitak a lallalo nga aginteres dagiti tattao iti naimbag a damag no usarenmi ti bukodda a lengguahe. Marigatanak iti dadduma kadagita a lengguahe, kas iti Saramaccan, gapu iti nasinggit ken nabangag a tonona. Ngem saan a sayang ti panagreggetko. Iti adu a tawen, adu ti naisurok iti kinapudno gapu ta makasaritak ida iti bukodda a lengguahe.

Siempre, adda dagiti nakababain a kapadasak. Kas pagarigan, naminsan, kinomustak ti maysa a babai a mayad-adalan iti Biblia a Saramaccan ti lengguahena. Agsaksakit ngamin ti tianna. Ngem ti gayam naisaludsodko ket no masikog isuna! Siempre, saanna a nagustuan dayta nga imbagak. Ngem uray no adda dagiti kasta a kamalik, kanayon nga inkagumaak ti agsao latta iti lengguahe dagiti tattao iti teritoriak.

Idi 1970, naapointaranak kas manangaywan iti sirkito. Iti dayta a tawen, impabuyak iti adu a naiputputong a grupo iti kabakiran ti slide program a “Panagpasiar iti Sangalubongan a Hedkuarter Dagiti Saksi ni Jehova.” Tapno makapanak kadagita a lugar dagiti kakabsat, adda kakabsat a kaduak nga aglugan iti atiddog ken akikid a bangka a lumasat kadagiti karayan iti kabakiran. Nagawitkami iti generator, gasolina, lampara, ken slide projector. Apagdanonmi iti destinasionmi, bagkatenmi amin dagita agingga iti lugar a pagipabuyaanmi iti slide program. Talaga a nagustuan dayta dagiti tattao kadagita a nasulinek a lugar, isu a diak pulos malipatan dagita a biahe. Nakaragragsakak a timmulong kadagiti tattao a makasursuro maipapan ken Jehova ken iti naindagaan a paset ti organisasionna. Awan kaimudingan dagiti sakripisiok no ikompara kadagiti naawatko a naespirituan a bendision bayat nga agserserbiak ken Jehova.

Ammok nga iti panagserbik, adda pagsayaatan ti kinaawan asawa. Ngem nariknak latta a kasapulak ti inggat’ tungpal biag a kapareha. Isu nga espesipiko nga inkararagko a makabirokak koma iti asawa a maragsakan a makikadua kaniak nga agserbi iti amin-tiempo kadagiti narigat a teritoria iti kabakiran. Kalpasan ti agarup makatawen, inaremko ti managsakripisio nga special pioneer a ni Ethel. Sipud pay idi ubing ni Ethel, bilib unayen ken apostol Pablo ken kayatna a tuladen isuna iti ministeriona. Nagkallaysakami idi Septiembre 1971 ket nagkaduakamin nga agserbi iti sirkito.

Dimmakkel ni Ethel iti simple a biag, isu a nalaka a nakibagay iti trabaho iti sirkito iti kabakiran. Kas pagarigan, no agsagsaganakami a bumisita kadagiti kongregasion iti nasulinek a paset ti kabakiran, bassit laeng ti itugotmi. Aglaba ken agdiguskami kadagiti karayan. Nairuamkami met a mangan iti aniaman nga idasar dagiti mangsangaili kadakami​—kas iti iguana, piranha, wenno aniaman pay a naalada iti kabakiran wenno karayan. No awan ti plato, agusarkami iti bulong ti saba. No awan ti kutsara, agkammetkami. Nariknami ken Ethel a dagiti sakripisio nga ar-aramidenmi iti panagserbimi ken Jehova ti nangpatibker iti relasionmi a kas iti tali a tallo ti lubidna. (Ecl. 4:12) Saanmi nga isukat dagita a kapadasanmi iti aniaman!

Maysa nga aldaw, idi agawidkamin manipud iti panagbisitami kadagiti kakabsat iti kabakiran, napasamak ti inyestoriak itay. Idi addakamin iti napegges a paset ti karayan, kellaat a limned ti makinsango a paset ti bangka, ngem timpaw met la a dagus. Imbag laengen ta naka-life jacket-kami ken addakami latta iti bangka. Ngem napno iti danum ti bangkami. Isu nga imbellengmi iti karayan dagiti balonmi a makan ket inusarmi dagiti pagbalonan a pagkaras iti danum ti bangka.

Awanen ti kanenmi isu a nagbanniitkami bayat nga agdaldaliasatkami iti karayan. Ngem  awan a pulos ti nabanniitanmi. Isu a nagkararagkami ken Jehova nga ikkannakami iti makan iti dayta nga aldaw. Kalpasan ti kararag, nagbanniit ti maysa a brother ket nakaala iti dakkel a lames nga immanay a pangrabiimi a lima ket nabsogkami.

Kalpasan ti lima a tawen a panagserbimi iti sirkito, nakaawatkami ken Ethel iti di ninamnama a bendision​—maaddaankami iti anak. Nakaragragsakak idi naammuak dayta, uray no saanak a sigurado iti mapasamak kadakami. Kayatmi la unay ken Ethel ti agtalinaed iti amin-tiempo a panagserbi agingga a posible. Idi 1976, nayanak ni Ethniël. Kalpasan ti dua ket kagudua a tawen, nayanak ti buridekmi a ni Giovanni.

Gapu kadagiti panagkasapulan idiay Suriname iti dayta a tiempo, inyurnos ti sanga nga opisina nga agtultuloyak nga agserbi kas manangaywan iti sirkito bayat a padpadakkelenmi dagiti annakmi. Idi ubbing pay dagiti annakmi, naapointaranak nga agbisita kadagiti sirkito a sumagmamano ti kongregasionna. Kaaduanna nga agbisitaak iti dua a lawas kada bulan. Iti dadduma pay nga aldaw ti bulan, agpayunirak iti kongregasion a nakaitimpuyoganmi. No asideg iti balaymi ti kongregasion a bisitaek, itugotko ti agiinak. Ngem maymaysak a mangbisita kadagiti kongregasion iti kabakiran ken mangasamblea sadiay.

Iplamplanok a naimbag dagiti bambanag tapno maaramidko ti amin a responsabilidadko. Sigsiguraduek a makapag-family study-kami kada lawas. No bisitaek dagiti kongregasion iti kabakiran, ni Ethel ti mangidaulo iti family study a kadua dagiti annakmi idiay balay. Ngem agingga a posible, ikagkagumaanmi ti makapagkakadua. Regular met nga aglinglingaykami a sangapamiliaan​—agay-ayam wenno agpasiarkami kadagiti lugar nga asideg iti balaymi. Masansan a rabii unayen no malpasko nga asikasuen dagiti nateokratikuan nga asaynmentko. Nagsayaat nga asawa ni Ethel, kas dineskribir ti Proverbio 31:15. Nasapa nga agriing tapno sigurado a makapagteksto ken makapamigatkami a sangapamiliaan sakbay a mapan ageskuela dagiti annakmi. Anian a yamanko ta addaanak iti managsakripisio nga asawa a kanayon a tumultulong kaniak tapno maaramidko dagiti responsabilidad nga inted kaniak ni Jehova!

Kas nagannak, inkagumaanmi a tulongan dagiti annakmi nga ayatenda ni Jehova ken ti Nakristianuan a ministerio. Kayatmi nga agserbi  dagiti annakmi iti amin a tiempo, saan a gapu ta dayta ti kayatmi, no di ket gapu ta dayta ti kayatda. Sangkaibagami a nakaragragsak ti agserbi iti amin a tiempo. Imbagami met a nupay adda dagiti rigat, kanayon a tultulongan ken bembendisionannakami ni Jehova a sangapamiliaan. Siniguradomi met a ti kanayon a kadua dagiti annakmi ket dagiti kakabsat a ni Jehova ti iyun-unada iti biagda.

Impaay ni Jehova ti amin a kasapulanmi a sangapamiliaan. Siempre, kanayon nga ikagkagumaak nga aramiden dagiti responsabilidadko. Gapu kadagiti kapadasak iti kabakiran kas special pioneer idi baroak pay, nasursurok ti agbadyet tapno magatangmi dagiti kasapulanmi. Ngem no dadduma, uray no kasano ti panangikagumaan, adda latta ti kurang. Ngem kadagita a gundaway a nakitami ti “ima” ni Jehova. Kas pagarigan, kadagiti maudi a paset ti 1980’s ken kadagiti umuna a paset ti 1990’s, adda gerra sibil iti Suriname. Kadagidi a tawen, nagrigat no dadduma a magun-odan uray dagiti kangrunaan a kasapulan. Ngem impaay dagita ni Jehova kadakami.​—Mat. 6:32.

Iti intero a panagbiagmi, kanayon nga inaywanannakami ni Jehova isu a nakaragragsak ken kontentokami. Bendision kadakami dagiti annakmi, ken agyamankami ta napadakkelmi ida nga agserbi ken Jehova. Naragsakankami ta pinilida met ti amin-tiempo a panagserbi. Nageskuela da Ethniël ken Giovanni kadagiti eskuelaan ti organisasion ken agserserbida ita iti sanga nga opisina iti Suriname a kadua ti asawada.

Lakay ken baketkamin ken ni Ethel, ngem busy-kami latta iti panagserbi ken Jehova kas special pioneer. Kinapudnona, busy-kami unay isu nga awan ti tiempok nga agsursuro nga aglangoy! Ngem awan ti pagbabbabawyak. No lagipek ti napalabas, kombinsidoak a ti desisionko idi agtutuboak nga agserbi iti amin a tiempo ti maysa pay laeng kadagiti kasayaatan a desision nga inaramidko.