1. Ania ti ekspektarentayo, ngem ania ti masiguradotayo?

 EKSPEKTARENTAYO a mapasarantayo ti ibubusor iti trabahotayo a panangasaba. Mabalin a kumaronto pay dayta. (Dan. 11:44; 2 Tim. 3:12; Apoc. 16:21) Ngem masiguradotayo nga ipaay ni Jehova ti tulong a kasapulantayo. Apay? Kanayon ngamin a tultulongan ni Jehova dagiti agserserbi kenkuana tapno maaramidda dagiti trabahoda​—kasanoman karigat dagita. Kas pagarigan, kitaentayo ti dadduma a napasamak iti biag ni propeta Ezekiel, a nangasaba kadagiti Judio a naipan idiay Babilonia.

2. Ania ti imbaga ni Jehova maipapan kadagiti kasabaan ni Ezekiel, ken ania ti usigentayo iti daytoy nga artikulo? (Ezekiel 2:3-6)

² Ania a klase a tattao ti kasabaan ni Ezekiel? Imbaga ni Jehova a “nasukir,” “natangken ti pusoda,” ken “rebelioso.” Makadangranda kas kadagiti siit ken napeggadda a kas kadagiti manggagama. Isu met la gayam a namin-adu nga imbaga ni Jehova ken Ezekiel: “Dika agbuteng”! (Basaen ti Ezekiel 2:3-6.) Naitungpal ni Ezekiel ti trabahona a panangasaba ta isu ket (1) imbaon ni Jehova, (2) pinabileg ti espiritu ti Dios, ken (3) pinapigsa ti sasao ti Dios. Kasano a nakatulong dagita ken Ezekiel? Ken kasano a dagita ti tumultulong kadatayo ita?

3. Ania a sao ti nangpabileg la ketdi ken Ezekiel, ken kasano nga impasigurado ni Jehova a tulonganna?

³ Imbaga ni Jehova ken Ezekiel: “Ibaonka.” (Ezek. 2:3, 4) Dayta la ketdi ti nangpabileg ken Ezekiel. Apay? Sigurado a nalagipna a kasta met laeng ti imbaga ni Jehova idi pinilina da Moises ken Isaias kas propetana. (Ex. 3:10; Isa. 6:8) Ammo met ni Ezekiel no kasano a tinulongan ni Jehova dagita a dua a propetana tapno maitungpalda ti narigat nga asaynmentda. Isu nga idi namindua nga imbaga ni Jehova ken Ezekiel: “Ibaonka,” adda nasayaat a pangibatayanna nga isu ket tulongan ni Jehova. Iti libro met nga Ezekiel, namin-adu nga insuratna: “Kinuna kaniak ni Jehova.” (Ezek. 3:16) Maulit-ulit met a mabasatayo ti sasao a, “Kinuna manen kaniak ni Jehova.” (Ezek. 6:1) Sigurado a kombinsido ni Ezekiel nga isu ket imbaon ni Jehova. Kanayonanna, gapu ta isu ket anak ti maysa a padi, insuro la ketdi ni tatangna a kanayon a tultulongan ni Jehova dagiti propetana. Kas pagarigan, imbaga ni Jehova kada Isaac, Jacob, ken Jeremias: “Addaak kenka.”​—Gen. 26:24; 28:15; Jer. 1:8.

4. Ania ti makaliwliwa nga imbaga ni Jehova a nangpabileg ken Ezekiel?

⁴ Ania ti reaksion ti kaaduan nga Israelita iti panangasaba ni Ezekiel? Imbaga ni Jehova: “Saanto a dumngeg kenka ti sangakabbalayan ti Israel, ta dida kayat ti dumngeg kaniak.” (Ezek. 3:7) Idi linaksidda ni Ezekiel, linaksidda met ni Jehova. Impasigurado dagita a sasao ken Ezekiel a nupay linaksid dagiti tattao, dina kaipapanan a napaay iti trabahona kas propeta. Impanamnama met ni Jehova ken Ezekiel a no matungpalen dagiti panangukom nga impakaammona kadagiti tattao, “maammuandanto nga adda propeta  iti tengngada.” (Ezek. 2:5; 33:33) Napabileg la ketdi ni Ezekiel kadagita a makaliwliwa a sasao tapno maitungpalna ti ministeriona.

5. Ania ti ibaga ti Isaias 44:8 a mangpabileg kadatayo?

⁵ Mapabilegtayo met ta ammotayo nga imbaonnatayo ni Jehova. Padpadayawannatayo ta inawagannatayo kas ‘dagiti saksina.’ (Isa. 43:10) Nagsayaat la ketdi dayta a pribilehio! Kas iti imparegta ni Jehova ken Ezekiel: “Dika agbuteng,” iparparegta met ni Jehova kadatayo: “Dikay agamak.” Apay a masapul a ditay kabuteng dagiti bumusbusor? Kas ken Ezekiel, imbaonnatayo ni Jehova ken tultulongannatayo.​—Basaen ti Isaias 44:8.

6. (a) Ania ti imbaga ni Jehova a mangipasigurado a tulongannatayo? (b) Ania ti mangliwliwa ken mangpabileg kadatayo?

⁶ Ipaspasigurado ni Jehova a tulongannatayo. Kas pagarigan, sakbay nga imbaga ni Jehova: “Dakayo dagiti saksik,” imbagana: “Inton lumasatka kadagiti danum, addaakto kenka, ken kadagiti karayan, saankanto a malmes. Inton magnaka iti apuy, saankanto a masinit, ken saankanto a masiraman.” (Isa. 43:2) Bayat nga itungtungpaltayo ti ministeriotayo, maipasangotayo no dadduma kadagiti arig layus ken apuy a suot. Ngem maitultuloytay latta ti mangasaba iti tulong ni Jehova. (Isa. 41:13) Kas idi kaaldawan ni Ezekiel, saan a kayat ti kaaduan a tattao ita ti mensahetayo. Laglagipentayo a saan a gapu ta saanda a kayat ti mensahetayo, napaaytayon kas dagiti Saksi ti Dios. Maliwliwa ken mapabilegtayo ta ammotayo a maragragsakan ni Jehova no simamatalek nga itultuloytayo nga ipakaammo ti mensahena. Imbaga ni apostol Pablo: “Umawatto iti gunggona ti tunggal maysa sigun iti panagtrabahona.” (1 Cor. 3:8; 4:1, 2) Imbaga ti maysa a sister a nabayagen a payunir: “Maragsakanak a makaammo a gunggonaan ni Jehova dagiti panagreggettayo.”

7. Kada malagip ni Ezekiel ti nakitana a sirmata, ania ti epekto dayta kenkuana? (Kitaen ti ladawan iti akkub.)

⁷ Nakita ni Ezekiel no kasano kabileg ti espiritu ti Dios. Iti sirmata, nakitana no kasano a ti nasantuan nga espiritu ti tumultulong kadagiti mannakabalin nga anghel ken dayta ti mangtigtignay kadagiti nagdadakkel a pilid ti nailangitan a karuahe. (Ezek. 1:20, 21) Ania ti reaksion ni Ezekiel? Insuratna ti napasamak. “Idi nakitak dayta, nagrukobak.” Uray la nagrukob ni Ezekiel gapu iti napalalo a panagamangana. (Ezek. 1:28) Idi agangay, kada malagip ni Ezekiel dayta a nakaskasdaaw a sirmata, napabileg ti panagtalekna nga iti tulong ti espiritu ti Dios, maitungpalna ti ministeriona.

8-9. (a) Ania ti epekto ken Ezekiel ti bilin ni Jehova a “tumakderka”? (b) Kasano pay a pinabileg ni Jehova ni Ezekiel iti narigat nga asaynmentna?

⁸ Imbilin ni Jehova ken Ezekiel: “Anak ti tao, tumakderka ta adda ibagak.” Dayta a bilin ken ti tulong ti espiritu ti Dios ti nangted iti bileg a kasapulan ni Ezekiel tapno makapagtakder. Insurat ni Ezekiel: “Simrek kaniak ti espiritu ket pinagtakdernak.” (Ezek. 2:1, 2) Iti intero a ministerio ni Ezekiel, tinulongan ti “ima” ti Dios​—kayatna a sawen, ti nasantuan nga espiritu ti Dios. (Ezek. 3:22; 8:1; 33:22; 37:1; 40:1, ftn.) Ti espiritu ti Dios ti nangpabileg ken Ezekiel iti asaynmentna​—ti panangasabana kadagiti tattao a “natangken ti ulo ken puso[da].” (Ezek. 3:7) Imbaga ni Jehova ken Ezekiel: “Pinagbalinko ta rupam a kas katangken ti rupada ken ta mugingmo a kas katangken ti mugingda. Pinagbalinko ti mugingmo a kas iti diamante, a  natangtangken ngem iti bato. Dimo kabuteng ida wenno kaamak ti rupada.” (Ezek. 3:8, 9) Kas man la imbaga ni Jehova ken Ezekiel: ‘Dika maupay iti kinasukir dagiti tattao. Patibkerenkanto.’

⁹ Kalpasanna, ni Ezekiel ket impan ti espiritu ti Dios kadagiti kasabaanna. “Sibibileg a nagtignay kaniak ti pannakabalin ni Jehova,” insurat ni Ezekiel. Makalawas a pinampanunot a naimbag ti propeta ti mensahe nga ipakaammona tapno situtured a maikasabana dayta. (Ezek. 3:14, 15) Idi agangay, imbaon ni Jehova a mapan iti tanap ket sadiay a “simrek [kenkuana] ti espiritu.” (Ezek. 3:23, 24) Nakasaganan ni Ezekiel iti ministeriona.

10. Ania a tulong ti kasapulantayo tapno makapangasabatayo, ken apay?

¹⁰ Ania a tulong ti kasapulantayo tapno makapangasabatayo? Tapno masungbatan dayta, subliantayo ti napasamak ken Ezekiel. Sakbay a rinugianna ti aktual a panangasabana, impaay kenkuana ti espiritu ti Dios ti bileg a kasapulanna. Ita, kas ken Ezekiel, maitungpaltayo laeng ti trabahotayo a panangasaba iti tulong ti espiritu ti Dios. Apay? Gubgubatennatayo ngamin ni Satanas tapno mapasardeng ti panangasabatayo. (Apoc. 12:17) Para kadagiti tattao, kasla awan ti kaimudingantayo no ikompara ken Satanas. Ngem no mangasabatayo, maab-abaktayo ni Satanas! (Apoc. 12:9-11) Kasano? No mangasabatayo, ipakpakitatayo a saantayo a mabuteng kadagiti pangta ni Satanas. Kada mangasabatayo, maabak ni Satanas. Gapu ta maitungtungpaltayo ti trabaho a panangasaba iti laksid ti ibubusor, ania ngarud ti konklusiontayo? Pabpabilgennatayo ti nasantuan nga espiritu ken adda kadatayo ti pabor ni Jehova.​—Mat. 5:10-12; 1 Ped. 4:14.

11. Ania ti aramiden ti espiritu ti Dios kadatayo, ken kasano nga agtultuloy a maawattayo dayta?

¹¹ Ania pay a pammaregta ti magun-odantayo iti simboliko a panangpatangken ni Jehova  iti rupa ken muging ni Ezekiel? Mapabilegnatayo ti espiritu ti Dios tapno mapagballigiantayo ti aniaman a karit iti ministeriotayo. (2 Cor. 4:7-9) Ania ngarud ti aramidentayo tapno sigurado nga agtultuloy a maawattayo ti espiritu ti Dios? Masapul a kanayon a kiddawentayo dayta ken Jehova ken agtalektayo a denggenna dagiti kararagtayo. Insuro ni Jesus kadagiti adalanna: “Itultuloyyo ti agdawat, . . . itultuloyyo ti agsapul, . . . itultuloyyo ti agtuktok.” Ania ti aramiden ni Jehova? “Mangted iti nasantuan nga espiritu kadagidiay agdawdawat kenkuana.”​—Luc. 11:9, 13; Ara. 1:14; 2:4.

12. Sigun iti Ezekiel 2:9–3:3, naggapuan ti lukot ken ania ti linaonna?

¹² Ni Ezekiel ket saan laeng a pinabileg ti espiritu ti Dios no di ket pinapigsa pay ti sasao ti Dios. Iti sirmata, nakita ni Ezekiel ti maysa nga ima a nakaiggem iti lukot. (Basaen ti Ezekiel 2:9–3:3.) Naggapuan ti lukot? Ania ti linaonna? Kasano a dayta ti nangpapigsa ken Ezekiel? Kitaentayo. Ti lukot ket naggapu iti trono ti Dios. Mabalin nga inusar ni Jehova ti maysa kadagiti uppat nga anghel a nasaksakbay a nakita ni Ezekiel a nangyawat iti lukot. (Ezek. 1:8; 10:7, 20) Naglaon ti lukot kadagiti sasao ti Dios​—atiddog a mensahe ti panangukom a masapul nga ipakaammo ni Ezekiel kadagiti rebelde nga Israelita a naipan iti Babilonia. (Ezek. 2:7) Dayta a mensahe ket naisurat iti sango ken likud ti lukot.

13. Ania ti imbaga ni Jehova nga aramiden ni Ezekiel iti lukot, ken apay a nasam-it dayta?

¹³ Imbaga ni Jehova iti propetana a kanenna ti lukot ‘tapno mabsog.’ Nagtulnog ni Ezekiel ket kinnanna ti intero a lukot. Ania ti kaipapanan daytoy a paset ti sirmata? Masapul a maawatan a naimbag ni Ezekiel ti mensahe nga ipakaammona. Masapul a kombinsido iti dayta a mensahe tapno matignay a mangasaba. Pagammuan ta adda nakaskasdaaw a napasamak. Imbaga ni Ezekiel a ti lukot ket “kas kasam-it ti diro.” (Ezek. 3:3) Apay? Para ken Ezekiel, maysa a pakaidayawan ti agbalin a representante ni Jehova. Kas man la nasam-it, wenno makaparagsak, a kapadasan dayta. (Sal. 19:8-11) Agyaman unay ta inikkan ni Jehova iti pribilehio nga agserbi kas propetana.

14. Ania ti nakatulong ken Ezekiel tapno nakasagana a mangitungpal iti asaynmentna?

¹⁴ Idi agangay, imbaga ni Jehova ken Ezekiel: “Ipapusom ken denggem ti amin a sasao nga ibagak kenka.” (Ezek. 3:10) Ti kaipapanan dayta nga instruksion ni Jehova ken Ezekiel ket tandaananna dagiti sasao iti lukot ken panunotenna a naimbag dagita. Pimmigsa ni Ezekiel idi inaramidna dayta. Naammuanna met a nadagsen a mensahe ti ipakaammona. (Ezek. 3:11) Idi naawatan ni Ezekiel ti mensahe ti Dios, nakasaganan a mangasaba ken mangitungpal iti asaynmentna.​—Idilig ti Salmo 19:14.

15. Tapno makapagibturtayo, ania ti masapul nga “ipapuso[tayo]”?

¹⁵ Tapno makapagibturtayo iti ministerio, kasapulantay met ti pigsa nga ipaay ti Sao ti Dios. Masapul nga “ipapuso[tayo]” ti amin nga ibagbaga ni Jehova kadatayo. Makisarsarita ita kadatayo ni Jehova babaen ti naisurat a Saona, ti Biblia. Kasanotayo a masigurado a kanayon a ti Sao ti Dios ti mangimpluensia iti isip, rikna, ken motibotayo?

16. Ania ti masapul nga aramidentayo iti Sao ti Dios, ken kasano a maipapusotayo dayta?

¹⁶ No mangantayo ken marunaw ti kinnantayo, pumigsa ti bagitayo. Kasta met laeng no adalentayo ti Sao ti Dios ken utobentayo  dayta. Pumigsa ti pammatitayo. Tantandaanantayo dagiti masursurotayo maipapan iti lukot. Kayat ni Jehova a ‘mabsogtayo’ iti Saona, wenno maawatantayo a naimbag dayta. Maaramidtay dayta no agkararag, agbasa, ken agutobtayo. Umuna, agkararagtayo tapno maisagana ti pusotayo a mangawat iti pampanunot ti Dios. Sumaruno, basaentayo ti maysa a paset ti Biblia. Kalpasanna, sumardengtayo biit tapno agutob, kayatna a sawen, panunotentayo a naimbag dagiti nabasatayo. Ania no kua ti resultana? No ad-adu ti maawatantayo iti Sao ti Dios, napigpigsa ti pammatitayo.

17. Apay a napateg nga utobentayo dagiti nabasatayo iti Biblia?

¹⁷ Apay a napateg a basaen ken utobentayo ti Biblia? Tapno napigsatayo a mangikasaba iti mensahe ti Pagarian ita ken mangipakaammo iti nadagsen a mensahe ti panangukom iti asidegen a masanguanan. No met pampanunotentayo dagiti makaay-ayo a kualidad ni Jehova, lallalo a suminged ti relasiontayo kenkuana. Kas resultana, natalna ti isiptayo ken kontentotayo​—a kas man la iti makaparagsak a nasam-it a makan.​—Sal. 119:103.

18. Anianto ti kapilitan a mabigbig dagiti kaskasabaantayo, ken apay?

¹⁸ Saantayo a propeta a kas ken Ezekiel. Ngem determinadotayo a mangitultuloy a mangipakaammo iti mensahe nga impaisurat ni Jehova iti Saona agingga nga ibagana a nalpasen ti trabaho a panangasaba. No dumtengen ti aldaw ti panangukomna, awanto ti pagpambar dagiti tattao a saanda a napakdaaran wenno saan ida nga inikkan ti Dios iti gundaway. (Ezek. 3:19; 18:23) Imbes ketdi, kapilitan a mabigbigdanto a ti mensahe nga inkasabatayo ket naggapu iti Dios.

19. Ania ti makatulong kadatayo tapno maitungpaltayo ti ministeriotayo?

¹⁹ Ania ti makatulong kadatayo tapno maitungpaltayo ti ministeriotayo? Ti met laeng tallo a banag a nakatulong ken Ezekiel. Agtultuloytayo a mangasaba ta ammotayo nga imbaonnatayo ni Jehova, pabpabilgennatayo ti nasantuan nga espiritu ti Dios, ken pappapigsaennatayo ti Sao ti Dios. Iti tulong ni Jehova, kayattayo nga itungpal ti ministeriotayo ken agibtur “agingga iti panungpalan.”​—Mat. 24:13.