1-2. (a) Ania dagiti saludsod nga usigentayo? (b) Ania ti mangipakita a magagaran ni Jehova a tumulong kadatayo?

 MATULONGANNATAYO ni Jehova a mangibtur kadagiti problema iti biag ken agbalin a naragsak iti panagserbitayo kenkuana. Kasanonatayo a tultulongan? Ken kasanotayo a naan-anay a magunggonaan kadagiti tulong nga ipapaay ni Jehova? Masungbatan dagita a saludsod iti daytoy nga artikulo. Ngem usigentayo nga umuna daytoy a saludsod: Talaga kadi a nakasagana ni Jehova a tumulong kadatayo?

² Iti surat ni apostol Pablo kadagiti Hebreo, nangusar iti sao a makatulong tapno masungbatantayo dayta a saludsod. Insuratna: “Ni Jehova ti tumultulong kaniak; saanakto nga agbuteng. Ania ti maaramidan kaniak ti tao?” (Heb. 13:6) Sigun kadagiti reperensia ti Biblia, ti sao a “tumultulong” a nausar iti daytoy a bersikulo ket tumukoy iti maysa nga agdardaras a tumulong iti maysa a tao nga agpegpeggad ti biagna. Imadyinem ni Jehova nga agdardaras a mapan mangalaw iti maysa nga agpapaarayat. Sigurado nga umanamongka nga itampok dayta nga ilustrasion a nakasagana ni Jehova​—wen, magagaran​—a tumulong kadatayo. Gapu ta tultulongannatayo ni Jehova, siraragsak a maibturantayo dagiti suot.

3. Ania ti tallo a pamay-an a tultulongannatayo ni Jehova tapno siraragsak a maibturantayo dagiti suot?

³ Ania ti dadduma a pamay-an a tultulongannatayo ni Jehova tapno siraragsak a maibturantayo dagiti suot? Kitaentayo ti sungbat iti libro nga Isaias. Apay? Adu kadagiti impadto  ni Isaias nga impaisurat ti Dios ti agaplikar kadagiti adipen ti Dios ita. Kasta met, masansan a deskribiren ni Isaias ni Jehova kadagiti termino a nalakatayo a maawatan. Alaentayo a pagarigan ti Isaias kapitulo 30. Nagusar sadiay ni Isaias iti nagpipintas nga ilustrasion a mangdeskribir kadagiti pamay-an a tultulongannatayo ni Jehova kas ad-adipenna: (1) dengdenggenna a naimbag ken sungsungbatanna dagiti kararagtayo, (2) iwanwanwannatayo, ken (3) bembendisionannatayo ita ken bendisionannatayo iti masanguanan. Usigentayo a naimbag ti tallo a pamay-an no kasano a tultulongannatayo ni Jehova.

4. (a) Kasano a dineskribir ni Jehova dagiti Judio idi panawen ni Isaias, ngem ania ti impalubosna a mapasamak kadakuada? (b) Ania ti impanamnama ni Jehova kadagiti matalek? (Isaias 30:18, 19)

⁴ Iti damo a paset ti Isaias kapitulo 30, dineskribir ni Jehova dagiti Judio kas “dagiti nasukir nga annak” a ‘papaaduenda ti basol.’ Intuloyna: “Rebeliosoda a tattao, . . . a saan a dumdumngeg iti linteg ni Jehova.” (Isa. 30:1, 9) Gapu ta saan a dimngeg dagiti tattao, impadto ni Isaias nga ipalubos ni Jehova a madidigrada. (Isa. 30:5, 17; Jer. 25:8-11) Kasta ti napasamak idi naipanda kas balud idiay Babilonia. Ngem nagtalinaed a matalek ti dadduma a Judio. Impanamnama kadakuada ni Isaias nga addanto aldaw nga ipakitaan ida ni Jehova iti pabor. (Basaen ti Isaias 30:18, 19.) Ket kasta ti eksakto a napasamak. Winayawayaan ida ni Jehova. Ngem saan nga insigida ti pannakawayawayada. Ipakita ti sasao a “siaanus nga agur-uray ni Jehova tapno ipakitaannakayo iti pabor” a lumabas pay ti tiempo sakbay a mawayawayaan dagiti matalek. Kinapudnona, 70 a tawen a nagtalinaed dagiti Israelita idiay Babilonia sakbay a napagsubli idiay Jerusalem ti dadduma kadakuada. (Isa. 10:21; Jer. 29:10) Apaman a nakasublidan iti dagada, dagiti luada iti liday idi naipanda idiay Babilonia ket nagbalinen a lulua ti ragsak.

5. Ania ti ipasigurado kadatayo ti Isaias 30:19?

⁵ Makaliwliwa kadatayo ita dagitoy a sasao: “Sigurado a kaasiannakayto no mangngegna ti panagpatulongyo.” (Isa. 30:19) Ipasigurado kadatayo ni Isaias a dumngeg a naimbag ni Jehova kadagiti ararawtayo ken insigida a sungbatanna dagiti pakaasitayo. Innayon ni Isaias: “Sumungbatto a dagus.” Ipasigurado dagita a sasao a ti Amatayo ket nakasagana​—wen, magagaran​—a mangsaranay kadagidiay agpakpakaasi kenkuana. Dayta ti makatulong kadatayo nga agibtur a siraragsak.

6. Kasano nga ipakita dagiti imbaga ni Isaias a dengdenggen ni Jehova ti kararag ti tunggal adipenna?

⁶ Ania pay ti isursuro dayta a bersikulo maipapan kadagiti kararagtayo? Dengdenggen a naimbag ni Jehova ti kararag ti tunggal maysa kadatayo. Apay a maibagatay dayta? Iti umuna a paset ti Isaias kapitulo 30, kasarsarita ni Jehova ti ilina kas maysa a grupo. Ngem iti bersikulo 19, ti mensahe ket para iti tunggal indibidual. Kas nadungngo nga Ama, saan nga ibagbaga ni Jehova iti maup-upay nga anakna a lalaki wenno babai, “Masapul a napigsa ti pakinakemmo a kas iti kabsatmo.” Imbes ketdi, maseknan kadatayo ken talaga a dengdenggenna dagiti kararag ti tunggal maysa kadatayo.​—Sal. 116:1; Isa. 57:15.

7. Kasano nga impakita da Isaias ken Jesus a napateg ti napinget a panagkararag?

⁷ No ibagatayo ken Jehova a Dios ti pakadanagantayo, mabalin a dagus a pabilgennatayo tapno makapagibturtayo. No ti suot ket saan nga agpatingga a dagus kas iti ninamnamatayo, baka masapul a maulit-ulit a kiddawentayo ken Jehova a pabilgennatayo  tapno maibturantayo dayta. Kasta ti kayat ni Jehova nga aramidentayo. Dayta ti ipaawat dagitoy a sasao ni Isaias: “Diyo paginanaen [ni Jehova].” (Isa. 62:7) Ania ti kayat a sawen dayta? Nakapingpingettayo koma nga agkararag a kas man la ditay ipalubos nga aginana ni Jehova. Ipalagip kadatayo dagita a sasao ni Isaias dagiti ilustrasion ni Jesus maipapan iti kararag a mabasa iti Lucas 11:8-10, 13. Imparegta ni Jesus nga agkararagtayo a napakuyogan iti “natured a panangipilit” ken ‘itultuloytayo ti agdawat’ iti nasantuan nga espiritu. Ipakaasitayo met ken Jehova nga iwanwannatayo tapno makaaramidtayo kadagiti umiso a desision.

8. Idi un-unana, kasano a natungpal ti Isaias 30:20, 21?

⁸ Basaen ti Isaias 30:20, 21. Ti Jerusalem ket pinalikmutan ti armada ti Babilonia iti makatawen ket kagudua. Nakaro a rigat ti sinagaba dagiti tattao a kas man la nagbalinen dayta a gagangay kadakuada a kas iti tinapay ken danum. Ngem sigun iti bersikulo 20 ken 21, inkari ni Jehova kadagiti Judio a no agbabawi ken agbalbaliwda, isalakanna ida. Tinukoy ni Isaias ni Jehova kas ti ‘Naindaklan nga Instruktorda.’ Inkari ni Isaias kadagiti tattao nga isuro ida ni Jehova no kasanoda a dayawen iti akseptarenna a pamay-an. Natungpal dagita a sasao idi nawayawayaan dagiti Judio. Pinaneknekan ni Jehova nga isu ti Naindaklan nga Instruktorda. Iti panangiwanwanna, nagballigi dagiti adipenna a mangisubli iti nadalus a panagdaydayaw. Maragsakantayo unay ta ni Jehova ti Naindaklan nga Instruktortayo ita.

9. Kasanonatayo nga iwanwanwan ita ni Jehova?

⁹ Imbaga ni Isaias iti ilustrasionna a kaslatayo kadagiti estudiante nga isursuro ni Jehova iti dua a pamay-an. Umuna, imbaga ni Isaias: “Makitayonto a mismo ti Naindaklan nga Instruktoryo.” Iti daytoy nga ilustrasion, nakatakder ti Instruktor iti sango dagiti estudiantena. Maysa a pribilehio ti agbalin nga estudiante ti Dios ita. Kasanonatayo nga isursuro ni Jehova? Us-usarenna ti organisasionna. Agyamantayo unay kadagiti nalawag a panangiwanwan dayta a gubuayan! Dagiti instruksion a maaw-awattayo kadagiti gimong, asamblea, kombension, publikasion, broadcasting, ken dadduma pay ti tumultulong kadatayo a siraragsak nga agibtur bayat dagitoy narigat a tiempo.

10. Kasanotayo a mangmangngeg ti “sao iti likudan[tayo]”?

¹⁰ Daytoy ti imbaga ni Isaias a maikadua a pamay-an nga isursuronatayo ni Jehova:  “Makangngegkayto a mismo iti sao iti likudan.” Ti propeta dineskribirna ni Jehova kas atentibo wenno alerto nga instruktor a magmagna iti likudan dagiti estudiantena. Itudtudona ti papananda ken iwanwanwanna ida. Mangmangngegtayo ita ti timek ti Dios iti likudantayo. Kasano? Dagiti sasao ti Dios iti Biblia ket naisurat adun a tawen ti napalabas. Nabayagen dayta. Arigna nalikudantayon dayta a tiempo, isu a no basbasaentayo ti Biblia, kas man la mangmangngegtayo ti timek ti Dios iti likudantayo.​—Isa. 51:4.

11. Tapno siraragsak a makapagibturtayo, ania dagiti masapul nga aramidentayo, ken apay?

¹¹ Kasanotayo a naan-anay a magunggonaan iti panangiwanwan ni Jehova babaen ti organisasion ken ti Saona? Kitaentayo ti dua nga imbaga ni Isaias. Umuna, “daytoy ti dalan.” Maikadua, “magnakayo iti dayta.” (Isa. 30:21) Saan nga umdas nga ammotayo “ti dalan.” Masapul met a ‘magnatayo iti dayta.’ Babaen ti Sao ni Jehova, kas ilawlawag ti organisasionna, maammuantayo dagiti kayat ni Jehova nga aramidentayo. Maammuantayo met no kasanotayo nga iyaplikar dagiti masursurotayo. Masapul nga aramidentayo dagita tapno siraragsak a makapagibturtayo iti panagserbitayo ken Jehova. Iti kasta, sigurado a bendisionannatayo ni Jehova.

12. Sigun iti Isaias 30:23-26, kasano a binendisionan ni Jehova ti ilina?

¹² Basaen ti Isaias 30:23-26. Kasano a natungpal dayta a padto kadagiti Judio a naggapu idiay Babilonia a nagsubli idiay Israel? Aglaplapusanan a bendision ti naawatda​—iti pisikal ken naespirituan. Binendisionan ni Jehova ti ilina iti naruay a suplay ti pisikal a taraon. Ngem napatpateg pay iti dayta, binendisionanna ida iti aglaplapusanan a naespirituan a taraon bayat nga in-inut a naisubli ti nadalus a panagdaydayaw. Adayo nga ad-adu ti naespirituan a bendision a naawatda iti dayta a tiempo ngem iti inawatda sakbay dayta. Kas ipakita ti bersikulo 26, lallalo a pinagsilnag ni Jehova ti naespirituan a lawag. (Isa. 60:2) Gapu kadagita a bendision ni Jehova kadagiti adipenna, nakapagtultuloyda a naragsak ken napigsa nga agserbi kenkuana “ta nasayaat ti pusoda.”​—Isa. 65:14.

13. Kasano a natungpal iti kaaldawantayo ti padto maipapan iti pannakaisubli ti nadalus a panagdaydayaw?

¹³ Agaplikar kadi ita kadatayo ti padto maipapan iti pannakaisubli ti nadalus a panagdaydayaw? Wen! Iti ania a pamay-an? Sipud 1919 C.E., minilion a tattao ti nawayawayaanen iti pannakaadipenda iti Babilonia a Dakkel, ti sangalubongan nga imperio ti ulbod a  relihion. Naipanda iti napimpintas nga amang a lugar ngem iti Naikari a Daga iti Israel. Addadan iti naespirituan a paraiso. (Isa. 51:3; 66:8) Ania dayta a naespirituan a paraiso?

14. Ania ti naespirituan a paraiso, ken siasino dagiti agnanaeden sadiay? (Kitaen ti Kaipapanan ti Termino.)

¹⁴ Manipud idi 1919 C.E., dagiti dinutokan ti espiritu ket agnanaeden iti naespirituan a paraiso. b Iti panaglabas ti tiempo, dagidiay addaan iti naindagaan a namnama, ti ‘sabsabali a karnero,’ ket simrek metten iti daytoy a naespirituan a daga ken umaw-awatda iti naruay a bendision ni Jehova.​—Juan 10:16; Isa. 25:6; 65:13.

15. Sadino ti naespirituan a paraiso?

¹⁵ Sadino ita ti naespirituan a daga, wenno paraiso? Agnanaed dagiti agdaydayaw ken Jehova iti intero a daga. Isu a ti naespirituan a paraiso nga ayanda ket adda met iti intero a lubong. Sadinoman ngarud ti pagnanaedantayo ditoy daga, agbalintayo a paset ti naespirituan a paraiso no la ket ta aktibotayo a mangsupsuporta iti pudno a panagdaydayaw.

16. Kasanotayo a maitultuloy a makita ti kinapintas ti naespirituan a paraiso?

¹⁶ Tapno agtalinaedtayo iti naespirituan a paraiso, masapul a kanayon a nauneg ti apresasiontayo iti sangalubongan a kongregasion Kristiano. Kasano? Agpokustayo iti kinapintas dagiti adda iti dayta, saan nga iti kinaimperpektoda. (Juan 17:20, 21) Apay a nagpateg dayta? Panunotentayo daytoy a panangikompara. Ekspektarentayo a makakitatayo iti nadumaduma a kayo iti nagpintas a parke, wenno hardin. Kasta met laeng iti naespirituan a paraiso. Kadagiti kongregasion ita, ti nadumaduma a kakabsat ket kas kadagiti kayo. (Isa. 44:4; 61:3) Masapul a siguraduentayo nga itultuloytayo ti agpokus iti kinapintas ti “kabakiran,” saan a kadagiti pakapilawan ti tunggal “kayo” nga adda iti asidegtayo. Ditay ipalubos a ti kinaimperpektotayo wenno ti dadduma a kakabsat iti kongregasion ti mangsinga iti panagpokustayo iti intero a kinapintas  ti agkaykaysa a sangalubongan a kongregasion Kristiano.

17. Ania ti aramiden ti tunggal maysa kadatayo tapno agtalinaed ti panagkaykaysa iti kongregasion?

¹⁷ Ania ti aramiden ti tunggal maysa kadatayo tapno agtalinaed ti panagkaykaysa iti kongregasion? Agbalintayo a mannakikappia. (Mat. 5:9; Roma 12:18) Kada datayo ti umuna a mangikagumaan a pagtalinaeden ti natalna a relasiontayo kadagiti kakongregasiontayo, lallalo a mapapintastayo ti naespirituan a paraiso. Laglagipentayo a ti tunggal maysa nga agnanaed iti naespirituan a paraiso ket inyasideg ni Jehova iti nadalus a panagdaydayaw. (Juan 6:44) Nakaragragsak la ketdi ni Jehova no makitkitana nga ikagkagumaantayo a pagtalinaeden ti talna ken patibkeren ti panagkaykaysa dagiti napateg kenkuana​—dagiti adipenna!​—Isa. 26:3; Hag. 2:7.

18. Ania koma ti masansan nga utobentayo, ken apay?

¹⁸ Nakaad-adu ti bendision ni Jehova kadagiti adipenna. Kasanotayo a naan-anay a magunggonaan kadagita? Utobentayo dagiti maad-adaltayo iti Sao ti Dios ken kadagiti publikasiontayo a naibatay iti Biblia. Ti panagadal ken panagutob ket makatulong tapno lallalo a mapasayaattayo dagiti Nakristianuan a kualidad. Iti kasta, maipakitatayo ti “nainkabsatan nga ayat” ken “nadungngo a panagayat iti maysa ken maysa” iti kongregasion. (Roma 12:10) Bayat nga ut-utobentayo dagiti agdama a bendisiontayo, tumibtibker met ti relasiontayo ken Jehova. Ken no utobentayo dagiti bendisionna iti masanguanan, agbalin nga agpaypayso kadatayo ti namnama nga agserbi kenkuana iti agnanayon. Makatulong amin dagita tapno naragsaktayo nga agserbi ken Jehova ita.

19. (a) Sigun iti Isaias 30:18, ania ti masiguradotayo? (b) Ania ti makatulong kadatayo a siraragsak nga agibtur?

¹⁹ “Agtignayto” ni Jehova para kadatayo inton pagpatinggaenna daytoy dakes a lubong. (Isa. 30:18) Kombinsidotayo a ni Jehova​—a “Dios ti hustisia”​—dina ipalubos nga agtalinaed ti lubong ni Satanas iti maysa nga aldaw a napapaut ngem iti ikeddeng ti hustisia. (Isa. 25:9) Siaanus nga urayentayo ti aldaw inton isalakannatayo ni Jehova. Kabayatanna, determinadotayo koma nga agtultuloy a mangipateg iti pribilehiotayo nga agkararag iti Dios, agadal ken mangyaplikar iti Saona, ken mangutob kadagiti bendisionna. No ar-aramidentayo dagita, tulongannatayo ni Jehova a siraragsak nga agibtur bayat nga agdaydayawtayo kenkuana.