MARIGATANKA kadi no dadduma a pagbalinen a regular ken makaparagsak ti personal a panagadalmo iti Biblia? Posible a kastatayo amin no dadduma. Ngem panunotem ti dadduma a regular nga ar-aramidentayo kas iti panagbuggo wenno panagdigus. Tiempo ken panagregget ti kasapulan kadagita. Ngem saan kadi a mabang-arantayo kalpasanna? Ti panagadal iti Biblia ket nayarig iti makapabang-ar ‘a panagbuggo iti danum.’ (Efe. 5:26) Kitaem ti sumagmamano a suhestion a makatulong kenka:

• Mangaramidka iti eskediul. Karaman ti personal a panagadal iti Biblia kadagiti “napatpateg a bambanag” a masapul nga aramiden ti maysa a Kristiano. (Fil. 1:10) Tapno saanmo a malipatan, isuratmo dayta iti papel ken ikabilmo iti lugar a kanayon a makitam, kas iti noticeboard wenno iti ridaw ti refrigerator-mo. Wenno baka makatulong no i-set-mo ti alarm ti gadyetmo sakbay unay ti oras ti panagadalmo.

• Piliem ti oras ken pamay-an ti panagadal a maibagay kenka. Kasano ti kayatmo a panagadal? Kas pagarigan, mas makapagpokuska kadi no agadalka iti maysa nga oras? Wenno kaykayatmo ti agadal iti ab-ababa a tiempo ngem masansan? Ammom ti kasayaatan para kenka. Isu nga ikabilangam dayta no iplanom ti oras ti panagadalmo. No aglaladutka iti oras nga agadalka koman, padasem ti agadal uray iti 10 laeng a minuto. Nasaysayaat laengen ti 10 a minuto a panagadal ngem iti saanka a pulos nagadal. Ket apaman a rinugiamon, baka ma-enjoy-monton ken ilaylayonmonto payen ti agadal.—Fil. 2:13.

• Nasaksakbay a piliem ti adalem. No agpanunotka pay laeng iti adalem iti oras nga agadalka koman, mabalin a saanmo a ‘mausar ti tiempom iti kasayaatan a pamay-an.’ (Efe. 5:16) Ilistam ngarud dagiti artikulo wenno topiko a kayatmo nga adalen. No adda napanunotmo a saludsod, isuratmo dayta. Ket kada malpas ti panagadalmo, mabalinmo nga inayon iti listaam dagiti kayatmonto pay nga adalen.

• Baliwam no kasapulan. Mangaramidka iti panagbalbaliw iti eskediulmo, kas iti kaadu ti oras ti panagadalmo wenno no ania dagiti topiko nga adalem. Ti napateg ket saan a no kaano, kasano kapaut, wenno no ania ti adalem—no di ket no regular wenno linawas met laeng nga agad-adalka.

No linawas wenno regular nga agadaltayo, adu ti magunggonatayo. Sumingedtayo ken Jehova, masursurotayo ti mangaramid kadagiti nasayaat a desision, ken mabang-arantayo.—Jos. 1:8.