1. Ania ti panangmatmat ni apostol Pablo kadagiti ministerial nga adipen?

 NAGPATEG ti trabaho dagiti ministerial nga adipen iti kongregasion. Nalawag nga inapresiar ni apostol Pablo dagitoy a matalek a lallaki. Kas pagarigan, idi nagsurat kadagiti Kristiano idiay Filipos, espesipiko a kinablaawanna dagiti ministerial nga adipen idi kinablaawanna dagiti panglakayen.—Fil. 1:1.

2. Ania ti panagrikna ti brother a ni Luis iti annongenna kas ministerial nga adipen?

² Agtutubo man wenno nataengan, adu a bautisado a brother ti maragragsakan nga agserserbi kas ministerial nga adipen. Kas pagarigan, naapointaran ni Devan idi 18 ti tawenna. Ti met brother a ni Luis ket naapointaran idi nasurok a 50 ti tawennan. Nariknana ti marikrikna ti adu a ministerial nga adipen. Kinunana: “Para kaniak, maysa a pribilehio nga aramiden ti trabaho ti ministerial nga adipen, nangruna no panunotek ti amin nga ayat nga ipakpakita kaniak ti kongregasion!”

3. Ania dagiti saludsod nga usigentayo?

³ No maysaka a bautisado a brother ket saanka pay a ministerial nga adipen, mabalin kadi pagbalinem dayta a kalat? Ania ti mabalin a mangtignay kenka a mangaramid iti dayta? Ken ania dagiti Nainkasuratan a kualipikasion a masapul a ragpatem? Iti daytoy nga artikulo, usigentayo ti sungbat dagitoy a saludsod. Ngem umuna, pagsasaritaantayo ti trabaho ti ministerial nga adipen.

ANIA TI TRABAHO TI MINISTERIAL NGA ADIPEN?

4. Ania ti trabaho ti ministerial nga adipen? (Kitaen met ti ladawan.)

⁴ Ti ministerial nga adipen ket maysa a bautisado a brother nga inapointaran ti nasantuan nga espiritu tapno tumulong kadagiti  panglakayen a mangaramid kadagiti napapateg a banag iti kongregasion. Dadduma a ministerial nga adipen ti mangsigurado nga adda dagiti maasak a teritoria ken adda umdas a literatura nga usaren dagiti agibumbunannag iti ministerioda. Tumulong ti dadduma iti panangdalus ken panangmantener iti Kingdom Hall. Agserserbi met dagiti ministerial nga adipen kas attendant ken operator ti audio ken video equipment bayat dagiti gimong. Talaga a dakkel ti maitultulong dagiti ministerial nga adipen. Ngem kangrunaanna, dagiti ministerial nga adipen ket naespirituan a lallaki; ay-ayatenda ni Jehova ken agbibiagda maitunos kadagiti nalinteg nga estandartena. Ay-ayatenda met unay dagiti kapammatianda. (Mat. 22:​37-39) Ania ti aramiden ti maysa a bautisado a brother tapno maragpatna ti kalat nga agbalin a ministerial nga adipen?

5. Kasano a maragpat ti maysa a brother ti kalat nga agbalin a ministerial nga adipen?

⁵ Ibaga ti Biblia dagiti kualipikasion para kadagidiay maapointaran kas ministerial nga adipen. (1 Tim. 3:​8-10, 12, 13) Maragpatmo daytoy a pribilehio no adalem dagiti Nainkasuratan a kualipikasion ken ikagumaam nga aramiden dagita. Ngem umuna, masapul a panunotem no ania ti motibom a mangragpat iti daytoy a pribilehio.

APAY A KAYATMO TI AGBALIN A MINISTERIAL NGA ADIPEN?

6. Ania koma ti mangtignay kenka nga agserbi kadagiti kapammatiam? (Mateo 20:28; kitaen met ti ladawan.)

⁶ Panunotenyo ti kasayaatan nga ulidantayo a ni Jesu-Kristo. Amin nga inaramidna ket gapu iti ayat—ayatna ken Amana ken iti tattao. Dayta nga ayat ti nangtignay kenkuana nga agtrabaho a sigagaget ken mangaramid uray kadagiti kasla nababa a trabaho a pagimbagan ti sabsabali. (Basaen ti Mateo 20:28; Juan 13:​5, 14, 15) No ayat ti mangtignay kenka, bendisionannaka ni Jehova ken tulongannaka a mangragpat iti kalatmo a makualipikar kas ministerial nga adipen.—1 Cor. 16:14; 1 Ped. 5:5.

7. Apay a saan a nasayaat no ti motibom a rumagpat kas ministerial nga adipen ket tapno laeng idaydayawdaka ti dadduma?

⁷ Iti lubong, masansan a magustuan dagiti tattao dagidiay mangipampannakkel iti bagida. Saan a kasta iti organisasion ni Jehova.  No ayat ti mangtignay iti maysa a brother, kas impakita ni Jesus, saanna a tarigagayan ti pannakabalin, saanna nga iturayan ti dadduma, wenno ibilang ti bagina a nangatngato. No maapointaran iti kongregasion ti kasta nga ambisioso a tao, posible a saannanto a kayat nga aramiden ti dadduma a kasla nababa a trabaho a kasapulan tapno maaywanan dagiti napateg a karnero ni Jehova. Baka panunotenna a mangipababa iti kinataona dagiti kasta a trabaho. (Juan 10:12) Saan a bendisionan ni Jehova ti asinoman a rumagragpat laeng ta kayatna ti mapadayawan wenno gapu ta nangato ti panangmatmatna iti bagina.—1 Cor. 10:​24, 33; 13:​4, 5.

8. Ania ti imbalakad ni Jesus kadagiti apostolna?

⁸ Adda met idi dagiti nasinged a kakadua ni Jesus a kayatda ti maaddaan iti pribilehio ngem di umiso ti motiboda. Panunotenyo ti inaramid ti dua nga apostol ni Jesus a da Santiago ken Juan. Kiniddawda ken Jesus nga ikkanna ida iti espesial a posision iti Pagarianna. Saan nga imbaga ni Jesus a nasayaat ti ambisionda. Imbes ketdi, inlawlawagna iti 12 nga apostol: “Asinoman a mayat nga agbalin a natan-ok, isu ti agserbi kadakayo, ken asinoman a mayat nga agbalin a kangrunaan kadakayo, isu ti agbalin nga adipen ti amin.” (Mar. 10:​35-37, 43, 44) No ti motibo dagiti brother a rumagpat iti pribilehio ket tapno agserbi iti sabsabali, agbalinda a bendision iti kongregasion.—1 Tes. 2:8.

ANIA TI MANGPABILEG ITI TARIGAGAYMO A RUMAGPAT?

9. Kasano a mapabilegmo ti tarigagaymo a rumagpat?

⁹ Sigurado nga ay-ayatem ni Jehova ken kayatmo a pagserbian ti dadduma. Ngem uray no kasta, mabalin nga awan ti tarigagaymo a mangaramid kadagiti trabaho dagiti ministerial nga adipen. Kasano a mapabilegmo ti tarigagaymo nga agserbi? Panunotem ti ragsak a resulta ti panagserbim kadagiti kakabsat. Imbaga ni Jesus: “Naragragsak ti mangted ngem ti umawat.” (Ara. 20:35) Nagbiag ni Jesus maitunos iti dayta a prinsipio. Nakaragragsak a nagserbi iti dadduma, ket kasta met ti mariknam no aramidem dayta.

10. Kasano nga impakita ni Jesus a naragsak isuna nga agserbi iti dadduma? (Marcos 6:​31-34)

¹⁰ Usigentayo ti maysa a pagarigan no kasano nga impakita ni Jesus a naragsak isuna nga agserbi iti dadduma. (Basaen ti Marcos 6:​31-34.) Naminsan, nabambannog ni Jesus ken dagiti apostolna. Idi mapmapandan iti awan matataona a lugar tapno aginana, immun-unan a nakadanon dagiti tattao sadiay ta kayatda a suruan ida ni Jesus. Mabalinna koma ti agsaan. Ngamin, ‘di payen masango’ ni Jesus ken dagiti kakaduana ti mangan. Wenno mabalin koma a sinuruan ida ni Jesus iti sumagmamano la a banag sa pinaawidna idan. Ngem gapu iti ayatna kadakuada, “insurona ida iti adu a banag.” Ken nagtultuloy a sinuruanna ida agingga a ‘nakamalmalemen.’ (Mar. 6:35) Inaramidna dayta, saan a gapu ta obligado, no di ket gapu ta “naasian kadakuada.” Kayatna a suruan ida gapu ta ay-ayatenna ida. Nakaragragsak ni Jesus gapu ta nagserbi iti dadduma.

11. Kasano a nagserbi ni Jesus kadagiti dumdumngeg kenkuana iti praktikal a pamay-an? (Kitaen met ti ladawan.)

¹¹ Saan la a sinuruan ni Jesus dagiti tattao. Impaayna met ti pisikal a kasapulanda. Babaen ti milagro, nangipaay ni Jesus iti makan sa impaiwarasna dayta kadagiti adalanna. (Mar. 6:41) Inaramidna dayta tapno suruanna dagiti adalanna nga agserbi iti dadduma. Impakitana met kadakuada a napateg dagiti praktikal a panagserbi kas iti ar-aramiden dagiti ministerial nga adipen. Nakaragragsak la ketdi dagiti  apostol a nakiraman ken Jesus iti panagiwaras iti makan agingga a ‘nakapanganda amin ket nabsogda’! (Mar. 6:42) Ngem saan la a daytoy ti gundaway nga inyun-una ni Jesus ti pagsayaatan ti dadduma. Iti intero a panagbiagna ditoy daga, nagserbi kadagiti tattao. (Mat. 4:23; 8:16) Naragsakan ken napnek ni Jesus idi sinuruanna ti dadduma ken impaayna dagiti kasapulanda. Sigurado a mariknam met ti kasta unay a kinaragsak no naimpusuan nga agserbika kas ministerial nga adipen.

12. Apay a saantayo koma a panunoten a bassit laeng ti maitulongtayo iti kongregasion?

¹² No panagriknam ket awan ti naisangsangayan nga abilidadmo, dika koma maup-upay. Sigurado nga adda dagiti kualidadmo a makatulong iti kongregasion. Mabalin a makatulong no basaem ti imbaga ni Pablo iti 1 Corinto 12:​12-30 sa ikararagmo ken Jehova a tulongannaka a mangkita no kasano nga agaplikar dayta kenka. Nalawag nga ipakita dagiti sasao ni Pablo nga adda napateg a pasetmo iti kongregasion kas iti tunggal adipen ni Jehova. No saanmo pay la a maragpat dagiti kualipikasion nga agserbi kas ministerial nga adipen, saanka koma a sumuksuko. Imbes ketdi, aramidem ti amin a kabaelam nga agserbi ken Jehova ken kadagiti kakabsat. Manamnamam nga ikabkabilangan dagiti panglakayen dagiti abilidadmo ket mabalin nga ikkandaka iti aniaman nga asaynment a kayam nga aramiden.—Roma 12:​4-8.

13. Ania ti maikunatayo iti kaaduan a kualipikasion para kadagiti naapointaran a lallaki?

¹³ Usigentayo ti maysa pay a rason no apay a ragpatem dagiti kualipikasion para iti ministerial nga adipen: Kaaduan kadagiti kualipikasion ket agaplikar iti amin a Kristiano. Kinapudnona, amin a Kristiano ket masapul a suminged ken Jehova, maragsakan a mangted, ken agbiag iti pamay-an a mangparagsak iti Dios. Ngem ania ti espesipiko nga aramiden ti maysa a brother tapno makaragpat?

NO KASANO TI RUMAGPAT

14. Ania ti kaipapanan ti panagbalin a ‘serioso’? (1 Timoteo 3:​8-10, 12)

¹⁴ Pagsasaritaanyo itan ti dadduma a kualipikasion a naisurat iti 1 Timoteo 3:​8-10, 12. (Basaen.) Ti maysa a ministerial nga adipen ket masapul a ‘serioso.’ Dayta a sao ket mabalin met a maipatarus kas “mararaem,” wenno “adda dignidadna.” Saan a kayat a sawen dayta a saankan a mabalin nga agkatawa wenno ag-enjoy. (Ecl. 3:​1, 4) Ngem masapul  a serioso ti panangitungpalmo iti amin a responsabilidadmo. No pagaammodaka kas mapagtalkan ken mapangnamnamaan, respetuendaka iti kongregasion.

15. Ania ti kaipapanan ti ‘saan a manangallilaw’ ken ‘saan a naagum iti material a gunggona’?

¹⁵ Ti ‘saan a manangallilaw’ kaipapananna a napudno, mapagtalkan, ken saanka nga agpampammarang. Tungpalem ti imbagam ken saanmo a sikapan ti dadduma. (Prov. 3:32) Ti ‘saan a naagum iti material a gunggona’ kaipapananna a napudnoka iti amin a transaksionmo mainaig iti kuarta ken mapagpiaranka iti naitalek kenka a donasion dagiti kakabsat. Saanmo nga usaren ti nasayaat a relasionmo kadagiti kapammatiam tapno makakuartaka.

16. (a) Ania ti kaipapanan ti ‘saan a nalaing nga uminum iti arak’? (b) Ania ti kaipapanan ti addaan iti “nadalus a konsiensia”?

¹⁶ Ti ‘saan a nalaing nga uminum iti arak’ kaipapananna a saanmo a sobraan ti panaginum iti arak wenno saandaka a pagaammo kas mangnginum. Ti addaan iti “nadalus a konsiensia” kaipapananna nga agbibiagka maitunos kadagiti estandarte ni Jehova. Uray no imperpektoka, mariknam ti talna gapu ta nasayaat ti relasionmo iti Dios.

17. Ania ti kaipapanan ti ‘masubok no maikari’? (1 Timoteo 3:10; kitaen met ti ladawan.)

¹⁷ Ti ‘masubok no maikari’ kaipapananna a mapagtalkanka kadagiti responsabilidad. Isu a no ikkandaka dagiti panglakayen iti asaynment, surotem a naimbag dagiti instruksionda ken ti direksion ti organisasion. Masapul a maawatam no kasano nga aramiden dayta ken no kaano a masapul a malpas. No napasnekka a mangaramid iti tunggal asaynmentmo, makita dayta dagiti kakabsat ket apresiarenda la ketdi ti panagrang-aymo. Dakayo a panglakayen, alertokayo koma a mangsanay kadagiti bautisado a brother. (Basaen ti 1 Timoteo 3:10.) Adda kadi dagiti bautisado a brother iti kongregasionyo nga agtawen iti 10 agingga iti 14 wenno ub-ubing pay? Regular kadi ti personal a panagadalda? Regular kadi nga agkomkomentoda kadagiti gimong ken regular kadi a mangaskasabada? No wen, ikkanyo ida kadagiti asaynment a maibagay iti edad ken kasasaadda. Iti kastoy a pamay-an, ‘masubok no maikari’ dagitoy nga agtutubo a brother. Ket inton agtawendan iti 17 agingga iti 19, baka mabalindan ti makualipikar kas ministerial nga adipen.

18. Ania ti kaipapanan ti ‘awan ti pakaakusaranna’?

¹⁸ Ti ‘awan ti pakaakusaranna’ kaipapananna  nga awan ti nainkalintegan nga akusasion a maibusor kenka. Siempre, posible nga adda dagiti ibagbaga ti dadduma nga ulbod nga akusasion kadagiti Kristiano. Impakpakauna ni Jesus a mapadasan dayta dagiti pasurotna ta uray isuna ket biktima met idi iti ulbod nga akusasion. (Juan 15:20) Ngem no pagtalinaedem a nasayaat ti konduktam kas iti inaramid ni Jesus, napintasto ti reputasionmo iti kongregasion.—Mat. 11:19.

19. Ania ti kaipapanan ti “asawa koma ti maymaysa a babai”?

¹⁹ “Asawa koma ti maymaysa a babai.” No adda asawam, masapul a surotem ti orihinal a paglintegan ni Jehova iti panagasawa—maysa a lalaki ken maysa a babai. (Mat. 19:​3-9) Saan koma a pulos nga agaramid iti seksual nga immoralidad ti maysa a Kristiano a lalaki. (Heb. 13:4) Ngem saan la a dayta. Masapul a napudnoka ken baketmo ken saanka a pulos a mangted iti di maitutop nga atension iti sabali a babai.—Job 31:1.

20. Kasano ti ‘nasayaat a panangidaulo’ ti maysa a brother iti sangakabbalayanna?

²⁰ “Nasayaat ti panangidauloda kadagiti annakda ken iti sangakabbalayanda.” No maysaka nga ulo ti pamilia, masapul a seriosoka iti responsabilidadmo. Idauluam ti regular a panagdaydayaw ti pamiliayo. Masansan koma a kaduam ni baketmo ken dagiti annakyo iti ministerio. Tulongam dagiti annakmo a maaddaan iti personal a relasion ken Jehova. (Efe. 6:4) No ay-aywanan ti maysa a brother ti pamiliana, ipakpakitana a kayana nga aywanan ti kongregasion.—Idilig ti 1 Timoteo 3:5.

21. No saanka pay a ministerial nga adipen, ania ti mabalinmo nga aramiden?

²¹ No saanka pay a ministerial nga adipen, pangngaasim ta basaem a naimbag daytoy nga artikulo. Sipapasnek met nga ikararagmo ken Jehova daytoy a banag. Adalem dagiti kualipikasion para iti ministerial nga adipen ken aramidem ti amin a kabaelam a mangragpat kadagita. Panunotem no kasano kauneg ti ayatmo ken Jehova ken kadagiti kakabsat. Pabilgem ti tarigagaymo nga agserbi kadakuada. (1 Ped. 4:​8, 10) Ikagumaam ti agbalin a ministerial nga adipen ket mariknamto a nakaragragsak ti panagserbi kadagiti kakabsat iti kongregasion. Bendisionan koma ni Jehova dagiti panagreggetmo a makualipikar nga agbalin a ministerial nga adipen!—Fil. 2:13.