1-2. Ania ti karaman kadagiti “nasayaat nga aramid” ti maysa a panglakayen?

 NO AGSERSERBIKA kas ministerial nga adipen iti sumagmamanon a tiempo, mabalin nga adun ti napatanormo a kualidad a kasapulan tapno makualipikarka nga agserbi kas panglakayen. Kayatmo kadi ti makiraman kadagiti “nasayaat nga aramid” dagiti panglakayen?—1 Tim. 3:1.

² Ania ti karaman kadagiti nasayaat nga aramid ti maysa a panglakayen? Idadauluanna ti panangasaba, ikagkagumaanna ti mangipastor wenno ag-shepherding ken mangisuro, ken parparegtaenna ti kongregasion babaen ti sao ken ulidanna. Dayta ti rason a dagiti nagaget a panglakayen ket inawagan ti Biblia a “lallaki a kas sagut.”—Efe. 4:8.

3. Kasano a makualipikar ti maysa a brother nga agserbi kas panglakayen? (1 Timoteo 3:​1-7; Tito 1:​5-9)

³ Kasanoka a makualipikar nga agserbi kas panglakayen? Ti kualipikasion ti maysa a panglakayen ket saan a kapada ti kualipikasion para iti sekular a trabaho. Masansan a tapno makastrekka iti sekular a trabaho, umdasen nga adda dagiti paglaingam a birbiroken ti kompania. Ngem saan a kasta ti panagbalin a panglakayen. No kayatmo ti maapointaran kas panglakayen, saan laeng nga umdas a nalaingka a mangasaba ken mangisuro. Masapul a maragpatmo dagiti Nainkasuratan a kualipikasion para kadagiti panglakayen a naisurat iti 1 Timoteo 3:​1-7 ken Tito 1:​5-9. (Basaen.) Pagsasaritaantayo iti daytoy nga artikulo dagiti makalikaguman kadagiti agbalin a panglakayen iti tallo a napateg nga aspeto: addaan iti nasayaat a reputasion iti uneg ken ruar ti kongregasion, nasayaat nga ulidan kas ulo ti pamilia, ken situtulok a panagserbi iti kongregasion.

 ADDAAN ITI NASAYAAT A REPUTASION

4. Ania ti kaipapanan ti ‘awan pakababalawanna’?

⁴ Tapno makualipikarka kas panglakayen, masapul nga ‘awan pakababalawam,’ kayatna a sawen, nasayaat ti reputasionmo iti kongregasion gapu iti nasayaat a kababalinmo. Kasta met, masapul a ‘nasayaat ti reputasionmo kadagiti tattao iti ruar ti kongregasion.’ Mabalin a kontraen dagiti di manamati dagiti patpatiem. Ngem awan koma ti negatibo a maibagada maipapan iti panagbalinmo a napudno wenno iti nasayaat a kababalinmo. (Dan. 6:​4, 5) Isaludsodmo iti bagim, ‘Nasayaat kadi ti reputasionko iti uneg ken ruar ti kongregasion?’

5. Kasano a maipakitam a ‘managayatka iti kinaimbag’?

⁵ No ‘managayatka iti kinaimbag,’ dagiti nasayaat a kualidad ti sabsabali ti kitaem ket komendaram ida gapu kadagita. Naragsakka met nga agaramid iti naimbag iti dadduma uray no saanda a kidkiddawen dayta. (1 Tes. 2:8; kitaen ti “lover of goodness” iti study note ti Titus 1:8.) Apay a nakapatpateg nga adda kadagiti panglakayen daytoy a kualidad? Us-usarenda ngamin ti adu a tiempoda a mangipastor iti kongregasion ken mangaramid kadagiti annongenda. (1 Ped. 5:​1-3) Nupay kasta, dakdakkel ti rag-o a mariknada nga agserbi iti sabsabali ngem iti aniaman nga isaksakripisioda.—Ara. 20:35.

6. Kasano a maipakitam a ‘managpadaguska’? (Hebreo 13:​2, 16; kitaen met ti ladawan.)

⁶ Ipakpakitam a ‘managpadaguska’ no agaramidka iti naimbag iti dadduma, a pakairamanan dagidiay saan a nasinged kenka. (1 Ped. 4:9) Kastoy ti panangdeskribir ti maysa a reperensia iti tao a managpadagus: “Ti ridaw ti balayna ken ti pusona ket masapul a nakalukat kadagiti estranghero.” Isaludsodmo iti bagim, ‘Ania ti reputasionko no maipapan iti kinamanagpadagus?’ (Basaen ti Hebreo 13:​2, 16.) Ti managpadagus ket naimbag iti amin, a pakairamanan dagiti nanumo ken dagiti nagaget a kakabsat, a kas kadagiti manangaywan iti sirkito ken bumisbisita nga ispiker.—Gen. 18:​2-8; Prov. 3:27; Luc. 14:​13, 14; Ara. 16:15; Roma 12:13.

7. Kasano a maipakita ti maysa a panglakayen a “saan a managayat iti kuarta”?

⁷ “Saan a managayat iti kuarta.” Kaipapanan daytoy a saanka nga agpokus kadagiti material a bambanag. Nabaknangka man wenno saan, ti koma panagserbi ken Jehova ti kapatgan iti biagmo. (Mat. 6:33) Usarem ti tiempom, pigsam, ken sanikuam a mangidaydayaw ken Jehova, mangaywan iti pamiliam, ken  agserbi iti kongregasion. (Mat. 6:24; 1 Juan 2:​15-17) Isaludsodmo iti bagim: ‘Ania ti panangmatmatko iti kuarta? Kontentoak kadin kadagiti banag a kasapulak laeng? Wenno kanayon a kayatko nga ad-adu koma pay ti kuartak ken material a sanikuak?’—1 Tim. 6:​6, 17-19.

8. Ania ti kaipapanan ti ‘natimbeng ti ugalina’ ken “managteppel”?

⁸ No ‘natimbeng ti ugalim’ ken ‘managteppelka,’ balanseka iti amin nga aspeto ti biagmo. Kas pagarigan, saan a sobra ti pannangan wenno panaginummo, nanakman ti panaglanglangam ken panagbadbadom, ken nasayaat dagiti pilpiliem a paglinglingayan. Saanmo a basta suroten ti uso iti lubong. (Luc. 21:34; Sant. 4:4) Kalmadoka latta uray adda dagiti mamagpungtot kenka. ‘Saanka a mammartek’; wenno saandaka koma a pagaammo dagiti tattao kas mangnginum. Isaludsodmo iti bagim, ‘Ipakpakitak kadi a natimbeng ti ugalik ken managteppelak?’

9. Ania ti kaipapanan ti “nasimbeng ti panunotna” ken “naurnos”?

⁹ No ‘nasimbeng ti panunotmo,’ tingtingitingem dagiti bambanag maibatay kadagiti prinsipio ti Biblia. Pampanunotem a naimbag dagita a prinsipio isu nga ad-adda nga umuneg ti pannakatarus ken pannakaawatmo. Saanka a dagus nga agkonklusion, no di ket sigsiguraduem nga adda kenka ti amin a kasapulan nga impormasion. (Prov. 18:13) Kas resultana, makaaramidka kadagiti nainsiriban a desision a maitunos iti pampanunot ni Jehova. No ‘naurnoska,’ organisado ken managsapsapaka. Pagaammodaka a mapangnamnamaan ken sursurotem dagiti instruksion. Sumayaat ti reputasionmo no adda kenka dagitoy a kualidad. Pagsasaritaantayo itan no kasanom a maragpat dagiti Nainkasuratan a kualipikasion iti panagbalin a nasayaat nga ulidan kas ulo ti pamilia.

NASAYAAT NGA ULIDAN KAS ULO TI PAMILIA

10. Kasano a ti maysa a lalaki “nasayaat ti panangidaulona iti sangakabbalayanna”?

¹⁰ No maysaka nga asawa a lalaki ket kayatmo ti makualipikar kas panglakayen, ti reputasion ti pamiliam apektaranna ti kualipikasionmo. Isu a masapul a ‘nasayaat ti panangidaulom iti sangakabbalayam.’ Masapul a pagaammodaka a naayat ken responsable nga ulo ti pamilia. Karaman iti dayta ti panangidaulom iti amin nga aspeto ti panagdaydayawtayo. Apay a nakapatpateg daytoy? Imbaga ni apostol Pablo: “No saan nga ammo ti maysa a lalaki nga idauluan ti sangakabbalayanna, kasanonto a maaywananna ti kongregasion ti Dios?”—1 Tim. 3:5.

11-12. Kasano a maapektaran ti kualipikasion ti maysa a lalaki gapu iti kondukta dagiti miembro ti pamiliana? (Kitaen met ti ladawan.)

¹¹ No maysaka nga ama, dagiti menor de edad nga annakmo ket masapul nga “agpaspasakup ken nasingpet.” Masapul a siaayat a suruam ken sanayem ida. Siempre, kayatmo a naragsakda ken agay-ayamda met a kas iti gagangay nga ar-aramiden ti amin nga ubbing. Ngem masapul met a suruam ida nga agbalin a natulnog, nadayaw, ken nanakem. Kasta met, masapul nga ikagumaam a tulongan dagiti annakmo a maaddaan iti nasayaat a relasion ken Jehova, mangsurot kadagiti prinsipio ti Biblia, ken rumang-ay agingga a mabautisaranda.

¹² “Addaan iti manamati nga annak a saan a naakusaran iti naalas a panagbiag wenno kinarebelioso.” Kasano a maapektaran ti ama no makaaramid iti nadagsen a basol ti manamati nga anakna nga adda iti poderna? No saan a mangipapaay ti ama iti panangsanay ken disiplina, posible a saan a makualipikar kas panglakayen.—Kitaen ti Oktubre 15, 1996 a ruar Ti Pagwanawanan, p. 21, par. 6-7.

 PANAGSERBI ITI KONGREGASION

13. Kasanom a maipakita a ‘nainkalinteganka’ ken ‘saanmo nga ipilit ti kaykayatmo’?

¹³ Dagiti brother nga addaan iti nagsasayaat a Nakristianuan a kualidad ket nagdakkel a tulong iti kongregasion. Ti “nainkalintegan” a tao kanayon a kayatna nga adda kappia. Maysa pay, denggenna ti sabsabali ken ikagumaanna a tarusan ti panangmatmatda. Kas pagarigan, bayat ti maysa a miting, situtulok kadi a suportaram ti desision ti kaaduan no la ket ta awan ti makontra a linteg wenno prinsipio ti Biblia? Ti “saanna nga ipilit ti kaykayatna” kaipapananna a saanmo a piliten ti dadduma a mangaramid kadagiti bambanag iti pamay-an a kayatmo. Ammom a napateg ti panangdengngeg iti opinion ti dadduma. (Gen. 13:​8, 9; Prov. 15:22) ‘Saanka a mannakiriri’ wenno saanka a “nalaka nga agpungtot.” Kayat a sawen dayta a respetuem ti dadduma wenno saanka a makiapa kadakuada. Imbes ketdi, naalumamay ken nataktikaka. Kas mannakikappia, ikagumaam a maadda ti talna uray iti nabara a situasion. (Sant. 3:​17, 18) No nasingpet ti pannakisaritam, agbalin a kalmado ti dadduma, uray dagiti bumusbusor iti patpatientayo.—Uk. 8:​1-3; Prov. 20:3; 25:15; Mat. 5:​23, 24.

14. Ania ti kaipapanan ti “saan a baro a manamati” ken “napudno”?

¹⁴ Ti brother a makualipikar kas panglakayen ket “saan a baro a manamati.” Nupay saan a kasapulan nga adu a tawenen a bautisadoka, masapul nga aglabas pay ti tiempo tapno agbalinka a nataengan iti naespirituan. Sakbay a maapointaranka kas panglakayen, masapul a kas ken Jesus, ipakpakitam a napakumbabaka ken kontentoka nga agur-uray iti aniaman nga asaynment nga ited kenka ni Jehova. (Mat. 20:23; Fil. 2:​5-8) Pampaneknekam a ‘napudnoka’ no agmatalekka ken Jehova, agbiagka a maitunos kadagiti nalinteg a pagalagadanna, ken no surotem dagiti instruksion ti organisasionna.—1 Tim. 4:15.

15. Masapul kadi a nakalalaing nga agpalawag ti maysa a panglakayen? Ilawlawag.

 ¹⁵ Nalawag nga ibaga ti Kasuratan a dagiti manangaywan ket masapul a “kualipikado a mangisuro.” Kayat kadi a sawen dayta a masapul a nakalalaingka nga agpalawag? Saan. Saan nga amin a panglakayen ket nakalalaing nga agpalawag. Ngem mabalin nga epektiboda iti ministerio ken iti panag-shepherding. (Kitaen ti “qualified to teach” iti study note ti 1 Timothy 3:2; idilig ti 1 Corinto 12:​28, 29 ken Efeso 4:11.) Nupay kasta, masapul nga itultuloymo a parang-ayen ti abilidadmo a mangisuro tapno agbalinka a mas epektibo. Kasano?

16. Kasanoka nga agbalin a mas epektibo a mannursuro? (Kitaen met ti ladawan.)

¹⁶ “Sursurotenna a naimbag ti mapagtalkan a sao.” Tapno agbalinka a mas epektibo a mannursuro, masapul nga ibataymo iti Sao ti Dios dagiti palawag ken balakadmo. Tapno maaramidmo dayta, masapul a gagetam nga adalen ti Biblia ken dagiti publikasiontayo. (Prov. 15:28; 16:23; kitaen ti “holding firmly to the faithful word” iti study note ti Titus 1:9.) Bayat nga agad-adalka, siputam ti panangilawlawag dagiti publikasiontayo kadagiti teksto tapno siuumiso a mailawlawagmo met dagita. Ken no mangisursuroka, ikagumaam a danonen ti puso dagiti dumdumngeg kenka. Rumang-ayka kas mannursuro no agpatulongka kadagiti eksperiensiado a panglakayen ken no iyaplikarmo dagiti suhestionda. (1 Tim. 5:17) Dagiti panglakayen ket masapul a ‘kabaelanda ti mangparegta’ kadagiti kakabsat. Ngem masapul met a mangbalakadda no dadduma wenno ‘mangtubngarda’ pay ketdi. Aniaman kadagita ti aramidenda, masapul a kanayon a nasingpet dagiti panglakayen. No naalumamay ken naayatka, ken naibatay iti Sao ti Dios dagiti isursurom, agbalinka nga epektibo ta tultuladem ti Naindaklan a Mannursuro a ni Jesus.—Mat. 11:​28-30; 2 Tim. 2:24.

ITULTULOYMO TI RUMAGPAT

17. (a) Ania ti makatulong kadagiti ministerial nga adipen nga agtultuloy a rumagpat? (b) Ania koma ti laglagipen dagiti panglakayen no mangirekomendada kadagiti brother nga agbalin a panglakayen? (Kitaen ti kahon nga “ Agbalin a Naemma no Repasuen ti Kualipikasion ti Dadduma.”)

¹⁷ Mabalin a marikna ti dadduma a ministerial  nga adipen a saanda a pulos a kualipikado kalpasan nga adalenda dagiti kualipikasion dagiti agserbi kas panglakayen. Ngem laglagipem a saan a namnamaen ni Jehova wenno ti organisasionna a naan-anay a maipakitam dagita a kualidad. (1 Ped. 2:21) Ken ti nabileg nga espiritu ni Jehova ti tumulong kenka tapno maragpatmo dagita a kualipikasion. (Fil. 2:13) Adda kadi espesipiko a kualidad a kayatmo a parang-ayen? Ikararagmo dayta ken Jehova. Ag-research-ka maipapan iti dayta a topiko, ken dumawatka kadagiti suhestion iti maysa a panglakayen no kasano ti rumang-ay.

18. Ania ti maiparegta nga aramiden ti amin a ministerial nga adipen?

¹⁸ Sapay koma ta itultuloytayo amin, agraman dagiti agserserbin kas panglakayen, a kultibaren dagiti kualidad a napagsasaritaantayo iti daytoy nga artikulo. (Fil. 3:16) Maysaka kadi a ministerial nga adipen? Itultuloymo ti rumang-ay! Kiddawem ken Jehova a sanayen ken sukogennaka tapno ad-adda a makapagserbika kenkuana ken iti kongregasion. (Isa. 64:8) Bendisionan koma ni Jehova ti panagreggetmo a makualipikar nga agserbi kas panglakayen.