1, 2. (a) Ania ti mabalin nga epektona iti maysa a Kristiano no adda di ninamnama a panagbalbaliw iti biagna? (Kitaen ti ladawan iti rugi ti artikulo.) (b) Sigun iti Salmo 131, ania a kababalin ti makatulong tapno agtalinaed a natalna ti panunottayo?

NASUROKEN a 25 a tawen nga agserserbi da Lloyd ken Alexandra iti Bethel. Idi naammuanda nga agserbidan iti ruar kas payunir, naladingitanda idi damo. Imbaga ni Lloyd: “Kasla biagkon ti Bethel ken ti trabahok. Maawatak dagiti rason ti panagbalbaliw, ngem iti simmaruno a lawlawas ken bulbulan, masansan a mariknak a kasla didak kasapulanen. Agbaliwbaliw ti emosionko. Positiboak ita ngem madamdama, maup-upayakon.”

² No adda di ninamnama a panagbalbaliw iti biagtayo, mabalin a madanagan ken ma-stress-tayo. (Prov. 12:25) Mabalin a marigatantayo pay ketdi a mangakseptar iti dayta. No kasta ti mapasamak, kasanotayo a ‘maep-ep ken mapagulimek’ ti kararuatayo? (Basaen ti Salmo 131:1-3.) Usigentayo no kasano a ti dadduma a karakter ti Biblia ken dadduma nga adipen ni Jehova ita ket napagtalinaedda a natalna ti panunotda uray nagbaliw ti kasasaadda.

3. Ania ti napasamak ken Jose?

³ Agarup 17 ti tawen ni Jose idi inlako dagiti kakabsatna kas adipen gapu iti imonda. Isu idi ti paborito ni amana. (Gen. 37:2-4, 23-28) Iti agarup 13 a tawen, inibturan ni Jose ti pannakaadipen ken pannakaibalud idiay Egipto, nga adayo iti sibay ti dungdungnguenna nga ama a ni Jacob. Ania ti nakatulong ken Jose a saan a maupay ken saan nga agsakit ti nakemna?

4. (a) Ania ti nagpokusan ni Jose bayat a nakabalud? (b) Ania ti sungbat ni Jehova kadagiti kararag ni Jose?

⁴ Bayat nga agrigrigat ni Jose iti pagbaludan, nagpokus la ketdi iti ebidensia a bembendisionan ni Jehova. (Gen. 39:21; Sal. 105:17-19) Nagtalek met nga an-anamongan ni Jehova gapu kadagiti naimpadtuan a tagtagainepna idi ub-ubing pay. (Gen. 37:5-11) Mabalin a saan la a namnaminsan nga inyebkasna ken Jehova ti panagtuokna. (Sal. 145:18) Kas sungbat iti naimpusuan a kararag ni Jose, imparikna ni Jehova nga ‘adda kenkuana’ iti amin a pakasuotanna.​—Ara. 7:9, 10. *

5. Kasano a makatulong ti “talna ti Dios” tapno makapagtultuloytayo nga agserbi?

⁵ Uray kasano karigat ti situasiontayo, mariknatayo ti mangpakalma nga epekto ti “talna ti Dios” a mangsaluad iti isiptayo. (Basaen ti Filipos 4:6, 7.) Isu a no agpatulongtayo ken Jehova no maburiborantayo, ti talna ti Dios ti mangpatibker iti determinasiontayo nga agtultuloy nga agserbi ken saluadanna ti panunottayo tapno ditay sumuko. Adalentayo ti ulidan ti dadduma a kakabsat a nakapadas iti kasta.

6, 7. Kasano a makatulong dagiti espesipiko a kararag tapno mapasubli ti talna ti panunot? Mangted iti pagarigan.

⁶ Idi naibaga kada Ryan ken Juliette a nagpatinggan ti panagserbida kas temporary special pioneer, medio naupayda. Imbaga ni Ryan: “Dagus nga inkararagmi dayta ken Jehova. Ammomi nga adda espesial a gundawaymi ditoy a mangipakita iti panagtalek kenkuana. Kabbaro iti kinapudno ti adu a kakongregasionmi, isu nga inkararagmi ken Jehova a tulongannakami nga agbalin a nasayaat nga ulidan iti pammati.”

⁷ Kasano a sinungbatan ni Jehova ti kararagda? Malagip ni Ryan: “Kalpasan la unay ti panagkararagmi, napukaw dagiti negatibo a rikrikna ken pakadanaganmi. Ti talna ti Dios ti nangsaluad iti puso ken isipmi. Nakitami nga usarennakami latta ni Jehova no agtalinaed a positibo ti panangmatmatmi.”

8-10. (a) Kasano a makatulong ti espiritu ti Dios tapno madaerantayo ti pakadanagantayo? (b) Kasano a tulongannatayo ni Jehova tapno maitultuloytayo nga iyun-una ti naespirituan a bambanag?

⁸ Saan laeng a mangpakalma iti rikna ti espiritu ti Dios, maiturongnatayo pay kadagiti teksto a tumulong iti panangyun-unatayo iti naespirituan a bambanag. (Basaen ti Juan 14:26, 27.) Alaentayo a pagarigan ti agassawa a da Philip ken Mary, a nagserbi iti Bethel iti dandani 25 a tawen. Iti uneg ti uppat a bulan, agpada a natay ti nanangda ken ti maysa a kabagian ni Philip. Kasapulan met nga aywananda ti tatang ni Mary a nakaron ti kabawna (dementia).

⁹ Malagip ni Philip: “Impagarupko a madadaerakon dagita, ngem adda pay gayam kurang. Nakitak ti Colosas 1:11 iti maysa a maadal nga artikulo ti Pagwanawanan. Agpayso nga agib-ibturak, ngem saan a naan-anay. Masapul nga ‘agibturak ken maaddaanak iti mabayag a panagitured buyogen ti rag-o.’ Impalagip  kaniak daytoy a bersikulo a saan koma a nakadepende ti kinaragsakko iti kasasaadko no di ket iti epekto kaniak ti espiritu ti Dios.”

¹⁰ Gapu ta intuloy da Philip ken Mary nga inyun-una ti naespirituan a bambanag, inikkan ida ni Jehova iti adu a bendision. Di nagbayag kalpasan a rimmuarda iti Bethel, agpada a naaddaanda kadagiti progresibo nga iyad-adalan iti Biblia a mayat a mayadalan iti nasursurok ngem maminsan iti makalawas. Imbaga ni Mary, “Isuda ti rag-omi ken pamay-an ni Jehova a mangibaga kadakami a sumayaatto ti bambanag.”

11, 12. (a) Kasano nga inikkan ni Jose ni Jehova iti banag a bendisionanna? (b) Kasano a nagunggonaan ni Jose iti panagibturna?

¹¹ No bigla nga agbaliw ti kasasaadtayo, mabalin a dagiti laengen pakadanagantayo ti pampanunotentayo. Mabalin a kasta koma ti napasamak ken Jose. Ngem inaramidna no ania ti kasayaatan a maaramidanna iti situasionna, isu nga inikkanna ni Jehova iti banag a bendisionanna. Uray nakabalud ni Jose, inkagumaanna nga aramiden ti responsabilidadna nga inted ti panguluen nga opisial iti pagbaludan, kas iti inaramidna idi agtrabtrabaho ken Potifar.​—Gen. 39:21-23.

¹² Iti maysa nga aldaw, naitalek ken Jose ti panangaywan iti dua a lallaki a dati a nangato ti posisionda iti palasio ni Faraon. Gapu ta nakitada a nasingpet ni Jose, imbagada ti pakariribukanda ken ti tagtagainepda iti napalabas a rabii a dida ammo ti kaipapananna. (Gen. 40:5-8) Saan idi nga ammo ni Jose a naragsakto ti resulta dayta a saritaan. Uray dua a tawen pay a nagibtur iti pagbaludan, dimteng met laeng ti aldaw a nawayawayaan, ket naapointaran iti dayta met la nga aldaw kas agturay a sumaruno ken Faraon.​—Gen. 41:1, 14-16, 39-41.

13. Kasanotayo a maikkan ni Jehova iti banag a bendisionanna aniaman ti situasiontayo?

¹³ Kas ken Jose, mabalin a bassit wenno awan ti maaramidantayo iti situasiontayo. Ngem no itultuloytayo ti aganus ken aramidentayo ti kasayaatan a maaramidantayo iti situasiontayo, ik-ikkantayo ni Jehova iti banag a bendisionanna. (Sal. 37:5) Agpayso a ‘mariribukantayo’ no dadduma, ngem kas iti imbaga ni apostol Pablo, ‘saantayo a naan-anay nga awanan ruaran.’ (2 Cor. 4:8) Mapadasantayto dayta nga imbaga ni Pablo, aglalo no agtalinaedtayo a nakapokus iti ministeriotayo.

14-16. Kasano a nakapagtalinaed ni Felipe a nakapokus iti ministeriona uray namin-adu a nagbaliw ti situasionna?

¹⁴ Nagsayaat ti ulidan ni Felipe nga ebanghelisador iti panagtalinaed a nakapokus iti  ministerio uray namin-adu a nagbaliw ti situasionna. Nakaro idi ti ibubusor idiay Jerusalem kalpasan ti pannakapapatay ni Esteban. * Iti dayta a tiempo, tagtagiragsaken ni Felipe ti baro a pribilehiona. (Ara. 6:1-6) Idi kuan, naiwarawara dagiti pasurot ni Kristo, ngem saan nga impalubos ni Felipe nga awan ti ar-aramidenna. Napan nangasaba idiay Samaria, maysa a siudad nga adu pay ti saan a nakangngeg iti naimbag a damag.​—Mat. 10:5; Ara. 8:1, 5.

¹⁵ Situtulok ni Felipe a mapan iti sadinoman a pangiturongan ti espiritu ti Dios, ket inusar ni Jehova a mapan kadagiti baro a teritoria. Gapu ta saan a mangidumduma ni Felipe, nagin-awaan kenkuana dagiti Samaritano, idinto ta di nasayaat ti panangtrato kadakuada dagiti Judio. Saan ngarud a pakasdaawan nga adu ti “nagkaykaysa” a dimngeg kenkuana!​—Ara. 8:6-8.

¹⁶ Ti simmaruno a nangiturongan ti espiritu ti Dios ken ni Felipe ket kadagiti siudad ti Asdod ken Cesarea, nga ayan ti adu a Gentil. (Ara. 8:39, 40) Agarup 20 a tawen kalpasan ti damo a panangasaba ni Felipe idiay Samaria, nagbaliw manen ti situasionna. Adda itan pamiliana iti dayta a teritoriana. Uray nagbaliw ti kasasaadna, nagtalinaed a nakapokus iti ministeriona. Kas resultana, sibabaknang a binendisionan ni Jehova agraman ti pamiliana.—Ara. 21:8, 9.

17, 18. Kasano a makatulong ti panagpokus iti ministerio tapno agtalinaedtayo a positibo no agbaliw ti kasasaad?

¹⁷ Paneknekan ti adu nga agserserbi iti amin-tiempo a makatulong ti panagpokus iti ministerio tapno agtalinaed a positibo uray agbaliw ti kasasaad. Idi pimmanaw iti Bethel ti agassawa a da Osborne ken Polite, a taga-South Africa, ninamnamada a makabirokda a dagus iti pagyananda ken part-time a trabahoda. Imbaga ni Osborne: “Makapaladingit ta dikam nakabirok a dagus iti trabaho a kas iti ninamnamami.” Malagip ni Polite a baketna: “Tallo a bulan nga awan trabahomi, ket awan ti urnongmi. Talaga a nakarigrigat dayta.”

¹⁸ Ania ti nakatulong kadakuada iti makapa-stress a kasasaadda? Kastoy ti kuna ni Osborne: “Dakkel ti naitulong ti panangasaba a kaduami ti kongregasion tapno agtalinaedkami a nakapokus ken positibo. Imbes nga agtugawkami lattan a madandanagan, kanayonkami iti ministerio, ket dayta ti mangparparagsak  kadakami. Inkagumaanmi ti agbirok iti trabaho, ket nakabirokkami met laeng idi agangay.”

19-21. (a) Ania ti makatulong kadatayo tapno agtalinaed a natalna ti panunottayo? (b) Ania ti pagsayaatanna no makibagaytayo iti baro a kasasaadtayo?

¹⁹ Kas ipakita dagitoy a pagarigan, no aramidentayo ti kasayaatan a maaramidantayo iti situasiontayo ken urayentayo ni Jehova buyogen ti panagtalek, agtalinaedto a natalna ti panunottayo. (Basaen ti Mikias 7:7.) Mabigbigtayto pay ketdi a ti pannakibagay iti baro a situasiontayo patibkerenna ti relasiontayo ken Jehova. Kas napadasanen ni Polite, a nadakamat itay, kunana: “Idi na-reassign-kami, nasursurok ti ad-adda nga agtalek ken Jehova uray nakarigrigat ti situasionko. Ad-adda pay a dimmekket ti relasionko kenkuana.”

²⁰ Ni Mary, a nadakamat itay, ket ay-aywananna latta ti lakayen a tatangna bayat nga agpaypayunir. Kinunana: “Nasursurok a no madandanaganak, masapul nga agsardengak, agkararagak, ken agkalmaak. Ti panangipabiang ken Jehova iti bambanag ti kasayaatan a nasursurok ket ad-addanto pay a kasapulak dayta iti masanguanan.”

²¹ Imbaga da Lloyd ken Alexandra, a nadakamat iti rugi, a ti nagbaliw a kasasaadda ti nangsubok iti pammatida iti pamay-an a dida ninamnama. Ngem imbagada: “Satayo la maibaga a pudpudno ti pammatitayo no masubok dayta ken no matulongan ken maliwliwanatayo kadagiti narigat a kasasaad. Nagbalinkami a mas nasaysayaat nga indibidual.”

22. No ikagumaantayo nga aramiden ti kasayaatan iti agdama a situasiontayo, ania ti masiguradotayo?

²² No bigla nga agbaliw ti kasasaadmo​—gapu man dayta iti nagbaliw nga annongem iti organisasion, kimmapuy a salun-at, wenno baro a responsabilidad iti pamilia​—masiguradom nga ipatpategnaka ni Jehova ken tulongannaka iti umiso a tiempo. (Heb. 4:16; 1 Ped. 5:6, 7) Ngem ita, ikagumaam nga aramiden ti kasayaatan a maaramidam iti situasionmo. Umasidegka iti nailangitan nga Amatayo iti kararag, ken sursuruem nga italek ti bagim iti panangaywanna. Iti kastoy a pamay-an, mapagtalinaedmo met a natalna ti panunotmo uray agbaliw ti kasasaadmo.