Dayta a tulag ti nangbukel ti baro nga organisasion a naawagan League of Nations. Panggepna a “maisaknap ti panagkaykaysa iti amin a nasion ken magun-od ti sangalubongan a talna ken talged.” Adu a relihion iti Kakristianuan ti nangsuporta iti dayta nga organisasion. Pinadayawan ti Federal Council of the Churches of Christ in America dayta nga organisasion kas “ti napolitikaan nga ebkas ti Pagarian ti Dios ditoy daga.” Sinuportaranna dayta babaen ti panangibaonna kadagiti delegado para iti Paris Peace Conference. Maysa kadagiti delegado ti nangibaga a dayta a komperensia ti “pangrugian ti baro a panawen iti pakasaritaan ti lubong.”

Mangrugrugi idin ti baro a panawen, ngem saan a gapu kadagiti tattao a nakipaset iti dayta a komperensia. Idi 1919, nangrugi ti baro a panawen iti trabaho a panangasaba idi pinabileg ni Jehova ti ilina para iti naregregta a panangasabada. Ngem sakbay dayta, masapul nga adda napateg a panagbalbaliw iti situasion dagiti Estudiante ti Biblia.

Nayeskediul ti tinawen a pannakapili dagiti agbalin a direktor ti Watch Tower Bible and Tract Society idi Sabado, Enero 4, 1919. Iti dayta a tiempo, ni Joseph F. Rutherford, a mangidadaulo idi iti ili ni Jehova ket di nainkalintegan a nakabalud idiay Atlanta, Georgia, U.S.A., agraman ti pito a dadduma pay. Ti saludsod ket, Masapul kadi a mabutosan manen dagiti nakabalud nga opisial? Wenno masapul a masuktanda?

Bayat ti kaadda ni Brother Rutherford iti seldana, maburburiboran iti masakbayan ti organisasion. Ammona a pampanunoten ti dadduma a kakabsat a nasaysayaat no adda sabali nga agbalin a presidente. Gapuna, nagsurat para kadagiti umatender iti dayta nga eleksion ket inrekomendana ni Evander J. Coward nga agbalin a presidente. Dineskribirna ni Coward kas “kalmado,” “masirib,” ken “matalek iti Apo.” Ngem sabali ti kayat a solusion ti adu a kakabsat ​—maitantan ti eleksion iti innem a bulan. Immanamong dagiti abogado a mangidepdepensa kadagiti naibalud a kakabsat. Ngem nagbalin a nabara ti diskusion.

Kalpasanna, adda maysa a kabsat a nangikagumaan a mangsolbar iti narigat a situasion kas imbaga ni Richard H. Barber idi agangay. Kuna dayta a kabsat: “Saanak nga abogado, ngem no maipapan iti kinalegal ti kasasaad, adda ammok maipapan iti linteg dagiti matalek. Kinamatalek ti kidkiddawen ti Dios. Ti kasayaatan a pamay-an a maipakitatayo ti kinamatalektayo iti Dios ket ituloytayo ti eleksion ken ibutostayo manen ni Brother Rutherford kas presidente.”​—Sal. 18:25.

Malagip idi agangay ti maysa kadagiti naibalud a ni A. H. Macmillan nga iti simmaruno nga aldaw, nagtuktok iti diding ti seldana ni Brother Rutherford sa imbagana, “Iruarmo ta imam.” Adda telegrama nga inyawat ni Brother Rutherford. Idi nabasa ni Macmillan ti ababa a mensahe, dagus a naawatanna ti kaipapanan dayta. Kuna ti mensahe: “RUTHERFORD WISE VAN BARBER ANDERSON BULLY KEN SPILL DIREKTOR UMUNA TALLO OPISIAL AYAT ITI AMIN.” Kayat a sawen daytoy a nabutosan nga agtalinaed ti amin a direktor kasta met da Joseph Rutherford ken William Van Amburgh. Isu nga agtultuloy kas presidente ni Brother Rutherford.

Bayat a nakabalud ti walo a kakabsat, nagpapirma kadagiti tattao dagiti matalek nga Estudiante ti Biblia para iti maysa a petision iti gobierno tapno mawayawayaan dagiti kakabsat. Nakaurnong dagitoy a natutured a kakabsat iti nasurok a 700,000 a pirma. Idi Mierkoles, Marso 26, 1919, sakbay a maipasa ti petision, nawayawayaan ni Brother Rutherford ken ti dadduma pay a responsable a kakabsat.

Imbaga ni Brother Rutherford iti palawagna kadagiti nangsabat kenkuana: “Kombinsidoak a napasarantayo amin dagitoy tapno maisaganatayo iti narigrigat a tiempo. . . . Ti pannakilabanyo ket saan a tapno mawayawayaan dagiti kakabsatyo. Saan a dayta ti kangrunaan nga isyu. . . . Makilablabankayo tapno maipakaammo ti Kinapudno, ket immawaten iti nagsayaat a bendision dagidiay nangaramid iti dayta.”

Ipakita dagiti pasamak bayat ti pannakabista dagiti kakabsat nga iwanwanwan ti Dios ti bambanag. Idi Mayo 14, 1919, daytoy ti desision ti korte a pagapelaran: “Dagiti akusado iti daytoy a kaso . . . ket saan a naipaayan iti kalinteganda a patas a pannakabista, gapu iti dayta, mabaliktad ti desision.” Nasentensiaan dagiti kakabsat iti nadagsen a krimen, ket posible nga agtalinaed dayta iti rekordda no naabsuelto wenno napaababa laeng ti sentensiada. Awanen ti sabali pay a kaso a nayuli kontra kadakuada. Kas resultana, saan a napukaw ti legal a kualipikasion ni Judge Rutherford a mangidepensa iti ili ni Jehova iti Supreme Court ti United States, a  namin-adu nga inaramidna kalpasan a nawayawayaan.

“Saantayo laeng nga agtugaw ken agkuyakoy a mangur-uray iti Apo a mangala kadatayo idiay langit,” malagip ni Brother Macmillan. “Naawatanmi a masapul nga adda aramidenmi tapno maammuanmi no ania a talaga ti pagayatan ti Apo.”

Ngem saan a basta maituloy dagiti kakabsat iti hedkuarter ti trabahoda iti adun a tawen. Apay? Gapu ta bayat ti pannakaibaludda, nadadael amin a material para iti panagimprenta iti literatura. Makapaupay dayta, ket pinanunot ti dadduma a kakabsat a baka nalpasen ti trabaho a panangasaba.

Adda pay ngata interesado iti mensahe ti Pagarian nga ikaskasaba dagiti Estudiante ti Biblia? Tapno masungbatan dayta, nagdesision ni Brother Rutherford a mangipaay iti palawag a mayawis iti amin. “No awan ti immay,” kuna ni Brother Macmillan, “ammomin a nalpasen ti panangasaba.”

Napasamak dayta idi Domingo, Mayo 4, 1919. Uray nakaro ti sakit ni Brother Rutherford, imparangna ti palawag a “Namnama Para iti Masmasnaayan a Sangatauan” idiay Los Angeles, California. Agarup 3,500 ti immatender, ken ginasut ti napaawid ta awanen ti pagyananda. Iti sumaruno nga aldaw, adda pay 1,500 nga immatender. Ammon dagiti kakabsat ti sungbat​—interesado pay laeng dagiti tattao!

Ti simmaruno nga inaramid dagiti kakabsat ti nangisagana iti trabaho a panangasaba dagiti Saksi ni Jehova agingga iti panawentayo.

Inyanunsio ti Agosto 1, 1919 a ruar ti The Watch Tower nga iti nasapa a paset ti Septiembre, adda maangay a kombension iti Cedar Point, Ohio. “Kayat ti amin ti umatender,” malagip  ni Clarence B. Beaty, maysa idi nga agtutubo nga Estudiante ti Biblia a taga-Missouri. Nasurok nga 6,000 a kakabsat ti immatender, ad-adu ngem iti ninamnamada. Ad-adda pay a rimmagsak ti okasion ta adda nasurok a 200 a nabautisaran iti asideg a Lake Erie.

Idi Septiembre 5, 1919, iti maikalima nga aldaw ti kombension, iti “Palawag Kadagiti Kadua a Trabahador” nga imparang ni Brother Rutherford, inyanunsiona ti pannakaipablaak ti baro a magasin a napauluan iti The Golden Age. * Mabasa iti dayta dagiti “kabaruan a napateg a damag, ken ilawlawagna dagiti Nainkasuratan a rason no apay a mapaspasamak dagita.”

Naparegta ti amin nga Estudiante ti Biblia a situtured a mangasaba babaen dayta a baro a publikasion. Kuna ti surat a mangdesdeskribir no kasano a maorganisar ti trabaho: “Laglagipen koma ti amin a bautisado a nagdakkel a pribilehio ti agserbi, ken gundawayanda koma dayta itan ken makipasetda iti nasaknap a panangsaksi iti intero a lubong.” Adu a tattao ti immawat iti imbitasion a mangasaba! Idi nadanon ti Disiembre, nasurok a 50,000 a suskripsion iti baro a magasin ti naala dagiti naregta a manangiwaragawag iti Pagarian.

Iti maudi a paset ti 1919, naorganisar ken napabileg manen ti ili ni Jehova. Kanayonanna, natungpal ti dadduma kadagiti napateg a padto iti maudi nga al-aldaw. Nalpasen ti pannakasubok ken pannakagugor ti ili ti Dios kas naipadto iti Malakias 3:1-4. Nawayawayaanen ti ili ni Jehova iti simboliko a pannakaadipenda iti “Babilonia a Dakkel,” ket dinutokanen ni Jesus ti “matalek ken masirib nga adipen.” * (Apoc. 18:2, 4; Mat. 24:45) Nakasagana itan dagiti Estudiante ti Biblia iti trabaho a kayat ni Jehova nga aramidenda.