1. Apay a maikari ni Jehova iti naipamaysa a debosiontayo?

MAIKARI ni Jehova iti naipamaysa a debosiontayo gapu ta isu ti Namarsua ken pagtataudan ti biag. (Apoc. 4:11) Ngem adda peggad. Uray no ay-ayaten ken raraementayo ni Jehova, mabalin nga adda bambanag a mangagaw iti naipamaysa a debosiontayo a maikari kenkuana. Masapul a maawatantayo no kasano a mapasamak dayta. Ngem pagsasaritaantayo nga umuna ti kaipapanan ti panangipaay iti naipamaysa a debosion.

2. Sigun iti Exodo 34:14, ania ti aramidentayo no naipamaysa ti debosiontayo ken Jehova?

² Iti Biblia, ti debosion iti Dios kaipapananna ti nauneg a panagayat kenkuana. No naipamaysa ti debosiontayo ken Jehova, isu laeng ti pagdaydayawantayo. Ditay ipalubos nga adda asinoman wenno aniaman a banag a mangagaw iti lugarna iti pusotayo.​—Basaen ti Exodo 34:14.

3. Apay a saan a bulsek ti debosiontayo ken Jehova?

³ Saan a bulsek ti debosiontayo ken Jehova. Apay a saan? Gapu ta naibatay dayta iti bambanag a nasursurotayo maipapan kenkuana. Ap-apresiarentayo dagiti nagsasayaat a kualidadna. Ammotayo dagiti kayat ken saanna a kayat, ket anamongantayo dagita. Matarusantayo ti panggepna para kadatayo ken supsuportarantayo dayta. Mariknatayo a dakkel a pribilehio ti panangipalubosna nga agbalintayo a gayyemna. (Sal. 25:14) Amin a banag a masursurotayo maipapan iti Namarsua ti mangpasinged kadatayo kenkuana.​—Sant. 4:8.

4. (a) Ania ti us-usaren ti Diablo a mangpakapuy iti debosiontayo ken Jehova? (b) Ania ti pagsasaritaantayo iti daytoy nga artikulo?

 ⁴ Konkontrolen ti Diablo daytoy a sistema ti bambanag, ket us-usarenna dayta a manggundaway kadagiti natural a tarigagay ken pagkapuyan ti tao. (Efe. 2:1-3; 1 Juan 5:19) Panggepna a bingayen ti panagayattayo tapno saan a naipamaysa ti debosiontayo ken Jehova. Pagsasaritaantayo ti dua a pamay-anna. Umuna, sulsulisogennatayo nga agpabaknang, ken maikadua, im-impluensiaannatayo a mangpili iti saan a nasayaat a paglinglingayan.

5. Apay a masapul nga agannadtayo tapno ditay ayaten ti kuarta?

⁵ Natural laeng a kayattayo ti maaddaan iti umdas a makan, nasayaat a bado, ken desente a pagtaengan. Ngem masapul nga agannadtayo tapno ditay ayaten ti kuarta. Iti lubong ni Satanas, adu ti “managayat iti kuarta” ken iti bambanag a magatang dayta. (2 Tim. 3:2) Ammo ni Jesus a mabalin a masulisog dagiti pasurotna a mangayat iti kuarta. Kuna ni Jesus: “Awan ti adipen a makapagserbi iti dua nga amo; ta mabalin a guraenna ti maysa ket ayatenna ti sabali, wenno matalek iti maysa ket tallikudanna ti sabali. Diyo mapaggiddan a pagserbian ti Dios ken ti Kinabaknang.” (Mat. 6:24) Arigna agserserbi iti dua nga amo ti tao nga agdaydayaw ken Jehova ngem sobra met ti tiempo ken panagreggetna nga agpabaknang. Saanna nga ipapaay ken Jehova ti naipamaysa a debosion.

6. Ania ti masursurotayo iti imbaga ni Jesus iti kongregasion idiay Laodicea?

⁶ Iti panagpatingga ti umuna a siglo C.E., impannakkel dagiti miembro ti kongregasion iti siudad ti Laodicea: “Nabaknangak ken nakaurnongak iti kinabaknang ken awanen  ti banag a kasapulak pay.” Ngem iti imatang ni Jehova ken ni Jesus, “nakapimpiman, nakakaasi, napanglaw, bulsek, ken lamolamo[da].” Binalakadan ida ni Jesus, saan a gapu ta nabaknangda, no di ket gapu ta daddadaelen ti panagayatda iti kinabaknang ti relasionda ken Jehova. (Apoc. 3:14-17) No madlawtayo a tumubtubo iti pusotayo ti tarigagay nga agpabaknang, masapul nga agtignaytayo a dagus a mangilinteg iti panagpampanunottayo. (1 Tim. 6:7, 8) Ta no saan, mabingay ti pusotayo ket saan nga awaten ni Jehova ti panagdayawtayo. ‘Kidkiddawenna ti naipamaysa a debosion.’ (Deut. 4:24) Kasano a mabalin a mapukaw ti balanse a panangmatmattayo iti kuarta?

7-9. Ania ti masursurom iti kapadasan ti panglakayen nga agnagan David?

⁷ Alaentayo a pagarigan ni David, maysa a nagaget a panglakayen a taga-United States. Imbagana a dedikado isuna nga empleado iti kompania a pagtrabtrabahuanna. Nai-promote ken napadayawan pay ketdi iti intero a pagilian gapu iti laingna iti trabahona. Imbaga ni David: “Impagarupko idi a dagitoy a gunggona ket ebidensia ti pamendision ni Jehova.” Ngem talaga kadi a kasta?

⁸ Nangrugi a makita ni David dagiti negatibo nga epekto ti trabahona iti relasionna ken Jehova. “No addaak iti gimong ken uray iti ministerio, dagiti problema iti trabaho ti mapampanunotko,” kunana. “Dakkel ti sueldok, ngem permi ti stress-ko, ket maap-apektaranen ti relasionmi ken baketko.”

⁹ Nabigbig ni David a masapul nga agpili no ania ti kapatgan kenkuana. “Desididoak a mangilinteg iti situasionko,” kunana. Kayatna a baliwan ti eskediul ti trabahona, ket imbagana ti planona iti amona. Ania ti resultana? Naikkat ni David iti trabahona! Ania  ti inaramidna? “Kabigatanna, nagaplayak kas continuous auxiliary pioneer,” kunana. Tapno masuportaranda ti bagida, nagtrabahoda ken baketna kas paradalus. Di nagbayag, nag-regular pioneer ni David, sa simmaruno met ni baketna idi agangay. Ibilbilang ti adu a nababa ti trabaho a pinili dagitoy nga agassawa, ngem saan a ti klase ti trabaho ti kapatgan kadakuada. Uray no ti sueldoda ket 10 a porsiento laengen ti dati a sueldoda, umanay dayta para iti binulan a paggastuanda. Kayatda nga iyun-una ni Jehova, ket napaneknekanda nga ay-aywananna dagidiay mangyun-una iti Pagarian.​—Mat. 6:31-33.

10. Kasano a masaluadantayo ti pusotayo?

¹⁰ Bassit man wenno adu ti kuartatayo, masapul a saluadantayo ti pusotayo. Kasano? Saanmo nga ayaten ti kinabaknang. Ken dimo ipalubos nga agbalin a napatpateg ti trabahom ngem iti panagserbim ken Jehova. Kasano a maammuam no mapaspasamak dayta kenka? Mabalin nga isaludsodmo iti bagim: ‘Masansan kadi a mapampanunotko ti trabahok no addaak iti gimong wenno iti ministerio? Kanayon kadi a pagdandanagak no addanto met laeng umdas a kuartak iti masanguanan? Ti kadi kuarta ken sanikua ti makagapu nga agprobproblemakami nga agassawa? Nakasaganaak kadi a mangaramid iti trabaho nga ibilbilang ti dadduma a nababa tapno ad-adu ti tiempok nga agserbi ken Jehova?’ (1 Tim. 6:9-12) Bayat a pampanunotentayo dagitoy a saludsod, laglagipentayo nga ay-ayatennatayo ni Jehova ken kastoy ti ikarkarina kadagidiay naipamaysa ti debosionda kenkuana: “Saankanto a pulos panawan ken saankanto a pulos baybay-an.” Dayta ti rason nga insurat ni apostol Pablo: “Iti panagbiagyo, saanyo nga ayaten ti kuarta.”​—Heb. 13:5, 6.

11. Ania ti mabalin nga epekto ti paglinglingayan iti maysa a tao?

¹¹ Kayat ni Jehova a naragsaktayo, ket makatulong kadatayo ti paglinglingayan. Kinapudnona, kuna ti Sao ti Dios nga “awanen ti nasaysayaat iti maysa a tao no di ti mangan, uminum, ken mangtagiragsak iti bunga ti napasnek a panagtrabahona.” (Ecl. 2:24) Ngem mabalin a dakes ti epekto kadatayo ti kaaduan a paglinglingayan ditoy lubong. Dagita ti mangipababa iti moral a pagalagadan dagiti tattao, isu a konkonsintiren wenno pagaayatda pay ketdin ti bambanag a kondenaren ti Sao ti Dios.

12. Sigun iti 1 Corinto 10:21, 22, apay a masapul a pilientayo a naimbag ti paglinglingayantayo?

 ¹² Kayattayo nga ipaay ken Jehova ti naipamaysa a debosiontayo, isu a saantayo a mabalin ti mangan iti “lamisaan ni Jehova” ken iti “lamisaan dagiti demonio.” (Basaen ti 1 Corinto 10:21, 22.) Makuna nga aggayyem ti dua a tao no agkadkaduada a mangan. No pilientayo ti paglinglingayan a mangitamtampok iti kinaranggas, espiritismo, immoralidad, wenno dadduma pay a nainlasagan a tarigagay ken kababalin, arigna makipangpangantayo kadagiti kabusor ti Dios iti taraon nga insaganada. Kas resultana, saantay laeng a dangdangran ti bagitayo no di ket daddadaelentayo pay ti relasiontayo ken Jehova.

13-14. Maibatay iti Santiago 1:14, 15, apay a masapul nga agannadtayo iti pilpilientayo a paglinglingayan? Mangted iti ilustrasion.

¹³ Usigentayo ti dadduma a pamay-an a mayarig ti paglinglingayan iti literal a taraon. No mangantayo, mapilitayo no ania ti isubotayo. Ngem no natilmontayon ti makan, saantayon a mapili ti agbalin nga epektona iti bagitayo. Makapasalun-at ti nasustansia a taraon, ngem makaperdi iti salun-at ti di nasustansia a taraon. Mabalin a saan a dagus a madlaw dagiti epektona, ngem makitanto met laeng dagita inton agangay.

¹⁴ Umasping iti dayta, no pilpilientayo ti paglinglingayantayo, makontroltayo ti iserserrektayo iti panunottayo. Ngem kalpasan dayta, apektaran ti paglinglingayan a pinilitayo ti panunot ken pusotayo. Pagimbagantayo ti nasayaat a paglinglingayan, ngem pagdaksantayo ti dakes a paglinglingayan. (Basaen ti Santiago 1:14, 15.) Mabalin a saan a dagus a madlaw dagiti epekto ti di nasayaat a paglinglingayan, ngem makitanto met laeng dagita inton agangay. Dayta ti makagapu nga impakdaar ti Biblia: “Dikay agpaallilaw: Saanyo a mabalin a lokuen ti Dios. Ta aniaman nga imulmula ti maysa a tao, daytanto met ti apitenna; ta ti agimulmula para iti lasagna ket agapitto iti pannakadadael manipud iti lasagna.” (Gal. 6:7, 8) Nakapatpateg ngarud a liklikantayo ti amin a paglinglingayan a mangitamtampok iti bambanag a kagura ni Jehova!​—Sal. 97:10.

15. Ania a makaparagsak a regalo ti ipapaay ni Jehova kadatayo?

¹⁵ Adu nga adipen ni Jehova ti maragragsakan nga agbuya iti JW Broadcasting^®, ti estasiontayo iti TV iti Internet. Imbaga ti sister nga agnagan Marilyn: “Tinulongannak ti JW Broadcasting nga agbalin a mas positibo, ket saankon a kasapulan a pilien ti buyaek iti dayta. No malidliday wenno maup-upayak, adda makaparegta a palawag wenno programa ti Morning Worship a mabuyak. Gapu iti dayta, nasingsinged ti riknak ken Jehova ken iti organisasionna. Naan-anay a binalbaliwan ti JW Broadcasting ti biagko.” Matultulongannaka kadi daytoy a regalo ni Jehova? Malaksid iti binulan a baro a programa, makita pay iti JW Broadcasting ti adu nga audio ken video a programa kasta met dagiti makaparegta a kanta a mabalinmo a buyaen ken denggen iti aniaman nga oras.

16-17. Apay a masapul a kontrolentayo ti kaadu ti oras nga us-usarentayo nga aglinglingay, ken kasano a maaramidantayo dayta?

¹⁶ Saan laeng a ti klase ti paglinglingayantayo ti masapul a kontrolentayo no di pay ket ti kaadu ti oras nga us-usarentayo iti dayta. Ta no saan, baka ad-adun ti orastayo iti panaglinglingay ngem iti panagserbitayo ken Jehova. Adu ti marigatan a mangkontrol iti kaadu ti oras nga us-usarenda nga aglinglingay. Kuna ti sister nga agnagan Abigail nga agtawen iti 18: “Makaparelaks ti panagbuyak iti  TV kalpasan ti makabannog nga agmalem. Ngem no diak agannad, adu nga oras ti mausarko nga agbuya.” Kuna ti agtutubo a brother nga agnagan Samuel: “Madlawko no dadduma nga agbuybuyaak iti nakaad-adu nga ababa a video iti Internet. Maysa laeng koma a video ti buyaek, ngem diak mapupuotan a tallo wenno uppat nga oras gayamen nga agbuybuyaak.”

¹⁷ Kasanom a makontrol ti kaadu ti orasmo nga aglinglingay? Ammuem nga umuna no kasano kaadu ti oras nga us-usarem iti dayta. Apay a dimo padasen nga irekord ti makalawas a panaglinglingaymo? Isuratmo iti kalendario no mano nga oras ti panagbuyam iti TV, panag-Internet, ken panagay-ayammo iti gadyetmo. No makitam nga adu unay nga oras ti us-usarem, padasem ti agaramid iti eskediul. Iplanom nga aramiden nga umuna ti napatpateg a bambanag, sa iplanom ti oras nga aglinglingay. Kalpasanna, ikararagmo ken Jehova a masurotmo ti eskediulmo. No kasta ti aramidem, adda oras ken pigsam para iti personal a panagadal iti Biblia, panagdaydayaw ti pamilia, pannakigimong, ken panagserbi ken Jehova babaen ti trabaho a panangasaba ken panangisuro. Mabalin a saankanto met a makonsiensia iti oras nga inusarmo nga aglinglingay ta inyun-unam ni Jehova.

18-19. Kasanotayo a mapaneknekan a naipamaysa ti debosiontayo ken Jehova?

¹⁸ Kalpasan nga insurat ni apostol Pedro ti maipapan iti panagpatingga ti lubong ni Satanas ken iti um-umay a baro a lubong, kinunana: “Patpatgek a kakabsat, gapu ta ur-urayenyo dagitoy a banag, aramidenyo ti amin a kabaelanyo tapno iti kamaudiananna, masarakannakayo nga awanan iti rugit ken mansa ken addaan iti talna.” (2 Ped. 3:14) No tungpalentayo dayta a balakad ken ikagumaantayo ti agtalinaed a nadalus iti moral ken naespirituan, pampaneknekantayo a naipamaysa ti debosiontayo ken Jehova.

¹⁹ Itultuloy ni Satanas ken ti lubongna ti mangsulisog kadatayo tapno baliwantayo dagiti prioridadtayo. (Luc. 4:13) Nupay kasta, saantayo nga ipalubos nga adda asinoman wenno aniaman a banag a mangagaw iti lugar ni Jehova iti pusotayo. Determinadotayo a mangipaay ken Jehova iti maikari kenkuana​—ti naipamaysa a debosiontayo!