1. Ania ti mabalin nga aramiden ni Jehova tapno matungpal ti panggepna?

MAKAPAGBALIN ni Jehova iti aniaman a kasapulan tapno matungpal ti panggepna. Kas pagarigan, nagbalin ni Jehova a Mannursuro, Manangliwliwa, ken Ebanghelisador. Sumagmamano laeng dagitoy iti adu a banag a mabalinna nga aramiden. (Isa. 48:17; 2 Cor. 7:6; Gal. 3:8) Nupay kasta, masansan nga usarenna dagiti tattao a mangitungpal kadagiti panggepna. (Mat. 24:14; 28:19, 20; 2 Cor. 1:3, 4) Maipaay met ni Jehova iti asinoman kadatayo ti sirib ken bileg a kasapulan tapno makapagbalintayo iti aniaman a kasapulan tapno matungpal ti pagayatanna. Amin dagitoy ket paset ti kaipapanan ti nagan ni Jehova, kas insingasing ti sumagmamano nga eskolar.

2. (a) Apay nga agduaduatayo no dadduma no us-usarennatayo met laeng ni Jehova? (b) Ania ti pagsasaritaantayo iti daytoy nga artikulo?

² Kayattayo amin a mausarnatayo ni Jehova, ngem baka agduadua ti dadduma no us-usaren met laeng ida ni Jehova. Apay? Mariknada ngamin a limitado ti maaramidanda gapu iti edad, kasasaad, wenno abilidadda. Iti sabali a bangir, baka kontenton ti dadduma iti maar-aramidanda ket mariknada a saandan a kasapulan ti mangaramid iti ad-adu pay. Iti daytoy nga artikulo, pagsasaritaantayo no kasano a pagbalinen ni Jehova a kualipikado ti asinoman tapno matungpal ti panggepna. Kalpasanna, usigentayo dagiti salaysay iti Biblia no kasano nga impaay ni Jehova kadagiti adipenna​—lallaki ken babbai—​ti tarigagay ken ti pannakabalin nga agtignay. Kasta met, pagsasaritaantayo no ania ti aramidentayo tapno mausarnatayo ni Jehova.

3. Kas nadakamat iti Filipos 2:13, kasano a maipaay kadatayo ni Jehova ti tarigagay nga agtignay?

³ Basaen ti Filipos 2:13. * Maipaay kadatayo ni Jehova ti panagtarigagay nga agtignay. Kasano nga aramidenna dayta? Nalabit naammuantayo nga adda panagkasapulan iti kongregasiontayo. Wenno imbasa dagiti panglakayen ti surat ti sanga nga opisina a mangibagbaga nga adda panagkasapulan iti sabali a lugar. Gapu iti dayta, baka maisaludsodtayo iti bagitayo, ‘Kasano a makatulongak?’ Wenno mabalin a naikkantayo iti narigat nga annongen, ngem pampanunotentayo no kabaelantayo met laeng ngata dayta. Wenno kalpasan a nabasatayo ti sumagmamano a bersikulo ti Sao ti Dios, mabalin a maisaludsodtayo, ‘Kasanok a mayaplikar daytoy a teksto tapno matulongak ti dadduma?’ Dinatay pilpiliten ni Jehova a mangaramid iti aniaman. Ngem no makitana a pampanunotentayo no ania ti mabalintayo nga aramiden, ipaayna kadatayo ti panagtarigagay a mangaramid iti pampanunotentayo.

4. Kasano nga ipaay kadatayo ni Jehova ti pannakabalin nga agtignay?

⁴ Maipaay met kadatayo ni Jehova ti pannakabalin nga agtignay. (Isa. 40:29) Mapasayaatna dagiti abilidadtayo babaen ti nasantuan nga espirituna. (Ex. 35:30-35) Mabalin nga usarenna ti organisasionna a mangisuro kadatayo a mangaramid iti dadduma a trabaho. No saanka a sigurado no kasano nga aramiden ti maysa a trabaho, agpatulongka. Kasta met, agkiddawka iti naparabur nga Amatayo idiay langit iti “bileg a nalablabes ngem iti gagangay.” (2 Cor. 4:7; Luc. 11:13) Naglaon ti Biblia iti adu a pagarigan no kasano a pinagbalin ni Jehova a kualipikado dagiti lallaki ken babbai babaen ti panangipaayna kadakuada iti tarigagay ken pannakabalin nga agtignay. Bayat nga us-usigentayo ti dadduma kadagitoy a salaysay, panunotem no kasano a mausarnaka met ni Jehova iti kasta a pamay-an.

5. Ania ti masursurotayo iti no kasano ken kaano nga inusar ni Jehova ni Moises a mangisalakan iti ilina?

⁵ Tinulongan ni Jehova ni Moises nga agbalin a manangisalakan kadagiti Israelita. Ngem kaano nga inusar ni Jehova? Idi kadi narikna ni Moises a kualipikadon kalpasan a ‘naisuro kenkuana ti amin a sirib dagiti Egipcio’? (Ara. 7:22-25) Saan. Inusar ni Jehova ni Moises idi natulongannan nga agbalin a napakumbaba ken naalumamay. (Ara. 7:30, 34-36) Inikkanna ni Moises iti tured a sumango iti kangatuan nga agturay iti Egipto. (Ex. 9:13-19) Ania ti masursurotayo iti no kasano ken kaano nga inusar ni Jehova ni Moises? Us-usaren ni Jehova dagidiay mangtultulad kadagiti kualidadna ken mangnamnama iti bileg nga ipaayna.​—Fil. 4:13.

6. Ania ti masursurotayo iti pamay-an ni Jehova a nangusar ken Barzillai a tumulong ken Ari David?

⁶ Ginasut a tawen kalpasanna, inusar ni Jehova ni Barzillai a mangipaay kadagiti kasapulan ni Ari David. ‘Mabisin ken nabannog ken mawaw’ idin ni David ken dagiti tattaona ta itartarayanda ti anakna a ni Absalom. Nupay lakay idin ni Barzillai, inrisgona ti biagna agraman ti dadduma pay tapno maipaay dagiti kasapulan ni David ken dagiti kakaduana. Saan nga impapan ni Barzillai a saanen nga usaren ni Jehova gapu ta lakayen. Imbes ketdi, sipaparabur nga inusarna ti adda kenkuana tapno matulonganna dagiti agkasapulan nga adipen ti Dios. (2 Sam. 17:27-29) Ania ti masursurotayo? Aniaman ti edadtayo, mausarnatayo ni  Jehova a tumulong kadagiti agkasapulan a kapammatiantayo, iti man lugartayo wenno iti sabali a pagilian. (Prov. 3:27, 28; 19:17) Uray no saantayo a direkta a maipaay ti kasapulanda, mabalintayo ti agdonar iti sangalubongan a trabaho tapno adda mausar kaanoman wenno sadinoman a kasapulan dayta.​—2 Cor. 8:14, 15; 9:11.

7. Kasano nga inusar ni Jehova ni Simeon, ken apay a makaparegta ti pannakaammotayo iti dayta?

⁷ Inkari ni Jehova ken Simeon, maysa a matalek a lakay idiay Jerusalem, a saanto a matay agingga a makitana ti Mesias. Sigurado a naparegta unay ni Simeon iti dayta, ta adun a tawen nga ur-urayenna ti Mesias. Nagunggonaan ti pammati ken panagibturna. Maysa nga aldaw, “iti panangidalan ti nasantuan nga espiritu,” napan idiay templo. Nakitana sadiay ti maladaga a ni Jesus, ket inusar ni Jehova ni Simeon nga agipadto maipapan iti daytoy nga ubing nga agbalinto a Kristo. (Luc. 2:25-35) Nupay posible nga awanen ni Simeon sakbay nga inrugi ni Jesus ti ministeriona ditoy daga, agyamyaman iti pribilehiona, ket adunto pay nga agkakaimbag a banag ti agur-uray kenkuana! Inton baro a lubong, makitanto dayta a matalek a lalaki no kasano a mabendisionan ti amin a pamilia ditoy daga babaen ti panangituray ni Jesus. (Gen. 22:18) Agyamyamantayo met iti aniaman a pribilehio ti panagserbi nga ipaay kadatayo ni Jehova.

8. Kasano a mausarnatayo ni Jehova kas iti panangusarna ken Bernabe?

⁸ Idi umuna a siglo C.E., nakasagana nga agpausar ken Jehova ti naparabur a lalaki nga agnagan Jose. (Ara. 4:36, 37) Mabalin a gapu ta nalaing a manangliwliwa ni Jose, inawagan isuna dagiti apostol iti Bernabe, a kaipapananna “Anak ti Liwliwa.” Kas pagarigan, idi nagbalin a manamati ni Saul, adu a kakabsat ti mabuteng nga umasideg kenkuana ta indadanesna idi dagiti kongregasion. Ngem timmulong ken Saul ti naasi a ni Bernabe, ket sigurado a nagyamyaman ni Saul iti kinaimbagna. (Ara. 9:21, 26-28) Idi agangay, nakita dagiti panglakayen nga agkasapulan iti pammaregta dagiti kakabsat idiay Antioquia iti Siria. Sino ti imbaonda? Ni Bernabe! Umiso ti pinilida. Mabasatayo a “pinaregtana amin ida a naimpusuan nga agtalinaedda a matalek iti Apo.” (Ara. 11:22-24) Kasta met ita, matulongannatayo ni Jehova nga agbalin nga “anak ti liwliwa” kadagiti padatayo a Kristiano. Kas pagarigan, mabalin nga usarennatayo a mangliwliwa kadagidiay natayan iti ipatpateg. Wenno baka tignayennatayo a bumisita wenno tumawag iti maysa a masakit wenno malidliday tapno mangibagatayo iti makapabileg a sasao. Ipalubosmo kadi nga usarennaka ni Jehova kas iti panangusarna ken Bernabe?​—1 Tes. 5:14.

9. Ania ti masursurotayo iti pamay-an a panangtulong ni Jehova iti kabsat nga agnagan Vasily tapno agbalin a kualipikado a naespirituan a pastor?

⁹ Tinulongan ni Jehova ti kabsat nga agnagan Vasily nga agbalin a kualipikado a naespirituan a pastor. Idi nadutokan ni Vasily kas panglakayen idi 26 ti tawenna, madanagan amangan no saan a kualipikado a tumulong iti kongregasion, nangnangruna kadagidiay agprobproblema. Nupay kasta, sinanay dagiti panglakayen ken nageskuela iti Kingdom Ministry School. Inkagumaan ni Vasily ti rumang-ay. Kas pagarigan, nangilista iti babassit a banag a mabalinna nga aramiden. Kada maaramidanna ti maysa kadagita, manayonan met ti kompiansana. Kunana itan: “Ti pagdandanagak idi ket pagragragsakak itan. No tulongannak ni Jehova a mangbirok iti umiso a teksto tapno maliwliwak ti maysa a kabsat iti kongregasion, dayta ti mangyeg kaniak iti dakkel a ragsak.” Kakabsat a lallaki, no ipalubosyo nga usarennakayo ni Jehova kas ken Vasily,  maitedna kadakayo ti abilidad a mangaramid iti dakdakkel pay a responsabilidad iti kongregasion.

10. Ania ti inaramid ni Abigail, ken ania ti masursurotayo kenkuana?

¹⁰ Agkasapulan iti tulong ni David ken dagiti tattaona idi kamkamaten ida ni Ari Saul. Nagkiddaw dagiti tattao ni David iti bassit a taraon iti nabaknang nga Israelita nga agnagan Nabal, uray ania ti maitedna. Napanunotda nga umiso laeng nga agkiddawda ta protprotektaranda dagiti taraken ni Nabal iti let-ang. Ngem nagkedked a mangted iti aniaman ti managimbubukodan a ni Nabal. Nakapungtot ni David ket implanona a papatayen ni Nabal ken ti amin a lallaki iti sangakabbalayanna. (1 Sam. 25:3-13, 22) Ngem masirib ti napintas nga asawa ni Nabal a ni Abigail. Inturturedna ti nagruknoy kadagiti saka ni David ket impakaasina a saan koma nga agibukbok iti dara babaen ti panagibalesna. Sitataktika nga imbalakadna ken David nga ipabiangna laengen ken Jehova ti bambanag. Natignay ti puso ni David iti napakumbaba a sasao ken nainsiriban nga inaramid ni Abigail. Nabigbigna a ni Jehova ti nangibaon ken Abigail. (1 Sam. 25:23-28, 32-34) Naipakita ni Abigail dagiti kualidad a kasapulan tapno usaren ni Jehova. Kasta met, dagiti Kristiano a babbai a nataktika ken masirib ket mabalin nga usaren ni Jehova a mangpabileg iti pamiliada ken iti kongregasion.​—Prov. 24:3; Tito 2:3-5.

11. Ania ti inaramid dagiti annak a babbai ni Salum, ken siasino ita ti mangtultulad kadakuada?

¹¹ Ginasgasut a tawen kalpasanna, karaman dagiti annak a babbai ni Salum kadagiti inusar ni Jehova a mangtarimaan kadagiti pader ti Jerusalem. (Neh. 2:20; 3:12) Nupay prinsipe ti amada a ni Salum, situtulokda a nangaramid iti dayta a narigat ken napeggad a trabaho. (Neh. 4:15-18) Naidumada kadagiti natan-ok a lallaki a Tekoita, a ‘saan a timmulong’ iti trabaho! (Neh. 3:5) Nakaragragsak la ketdi dagita nga annak ni Salum idi naileppas ti proyekto iti 52 laeng nga aldaw! (Neh. 6:15) Iti kaaldawantayo, naragsak a tumultulong dagiti natulok a kakabsat a babbai iti maysa nga espesial a kita ti sagrado a panagserbi​—ti panagibangon ken panagmantener kadagiti patakder a naidedikar ken Jehova. Nakapatpateg dagiti paglaingan, panagregget, ken kinamatalekda tapno agballigi daytoy a trabaho.

12. Kasano a mausarnatayo ni Jehova kas iti panangusarna ken Tabita?

¹² Gapu ta tinignay ni Jehova ni Tabita, “adu ti naimbag nga inaramidna ken tumultulong kadagiti napanglaw,” nangnangruna kadagiti balo a babbai. (Ara. 9:36) Adu ti nagladingit idi natay ni Tabita ta nagpaiduma ti kinaparabur ken kinaimbagna. Ngem kasta unay ti ragsakda idi pinagungar isuna ni apostol Pedro. (Ara. 9:39-41) Ania ti masursurotayo ken Tabita? Ubingtayo man wenno nataengan, lalaki wenno babai, adda praktikal a bambanag a maitulongtayo kadagiti kakabsattayo.​—Heb. 13:16.

13. Kasano nga inusar ni Jehova ti maysa a managbabain a kabsat nga agnagan Ruth, ken ania ti konklusionna?

¹³ Kayat ti managbabain a kabsat nga agnagan Ruth ti agbalin a misionero. Idi ubing pay, alisto nga agiwaras kadagiti tract iti binalaybalay. “Talaga a magusgustuak daytoy a trabaho,” kunana. Ngem marigatan a makisarita ken mangibaga kadagiti bumalay maipapan iti Pagarian ti Dios. Uray no managbabain ni Ruth, nagbalin a regular pioneer idi agtawen iti 18. Idi 1946, nageskuela iti Watchtower Bible School of Gilead ken nagserbi idi agangay idiay Hawaii ken Japan. Inusar ni Jehova a mangaramid iti ad-adu pay tapno  maisaknap ti naimbag a damag kadagidiay a pagilian. Kalpasan ti dandani 80 a tawen a pannakiraman ni Ruth iti ministerio, kastoy ti konklusionna: “Ni Jehova ti mangpabpabileg kaniak. Tinulongannak a manglaban iti kinamanagbabainko. Talaga a patiek a mabalin nga usaren ni Jehova ti asinoman nga agtalek kenkuana.”

14. Sigun iti Colosas 1:29, ania ti masapul nga aramidentayo tapno usarennatayo ni Jehova?

¹⁴ Iti intero a pakasaritaan, inusar ni Jehova dagiti adipenna iti adu a nadumaduma a pamay-an. Anianto ngata ti pangusaranna kenka? Nakadepende dayta iti kinatulokmo nga agpausar. (Basaen ti Colosas 1:29.) No nakasaganaka nga agpausar, mapagbalinnaka ni Jehova a naregta nga ebanghelisador, nasayaat a mannursuro, epektibo a manangliwliwa, eksperto a trabahador, manangsuporta a gayyem, wenno aniaman a kasapulan tapno maitungpal ti pagayatanna.

15. Sigun iti 1 Timoteo 4:12, 15, ania koma ti ipakaasi dagiti kakabsat nga agtutubo a lallaki ken Jehova?

¹⁵ Dakayo ngay nga agtutubo a kakabsat a lallaki a dandanin agbalin nga adulto? Adda dakkel a panagkasapulan iti napipigsa a lallaki a mangibaklay iti kanayonan a responsabilidad kas ministerial nga adipen. Iti adu a kongregasion, ad-adu ti panglakayen ngem iti ministerial nga adipen. Dakayo nga agtutubo a lallaki, mabalin kadi a tarigagayanyo nga ibaklay dagiti kanayonan a responsabilidad iti kongregasion? No dadduma, adda dagiti kakabsat a lallaki a mangibagbaga, “Kontentoakon kas regular nga agibumbunannag.” No kasta ti marikriknam, ipakaasim ken Jehova nga ipaayna kenka ti tarigagay nga agbalin a ministerial nga adipen ken ti pannakabalin a mangaramid iti amin a kabaelam nga agserbi kenkuana. (Ecl. 12:1) Kasapulanmi ti tulongmo!​—Basaen ti 1 Timoteo 4:12, 15.

16. Ania ti masapul a kiddawentayo ken Jehova, ken apay?

¹⁶ Mapagbalinnaka ni Jehova iti aniaman a kasapulanna tapno matungpal ti pagayatanna. Isu a kiddawem kenkuana ti tarigagay a mangaramid iti trabahona, sa kiddawem nga ikkannaka iti pannakabalin a kasapulam. Ubingka man wenno nataengan, usarem ti tiempom, pigsam, paglaingam, ken ti aniaman nga adda kenka tapno maidaydayawmo itan ni Jehova. (Ecl. 9:10) Dimo koma ipalubos a ti panagdanag wenno ti riknam a saanka a kualipikado ti rason a palabsem dagiti nagsayaat nga oportunidad a mangaramid iti amin a kabaelam nga agserbi ken Jehova. Talaga a pribilehiotayo nga aramiden ti aniaman a kabaelantayo a mangipaay iti panangidaydayaw a maikari iti naayat nga Amatayo!