Talaga a pinabileg ni Jehova dagitoy a magaggagaran a manangaskasaba. Iti dayta a tawen, nagbalin a 350 ti 225 a bilang dagiti colporteur, wenno payunir. Ket iti kaunaan a gundaway, nasurok a 8,000 a class worker, wenno agibumbunannag, ti nangireport iti hedkuarter iti naaramidanda iti ministerio. Aglaplapusanan ti panangbendision kadakuada ni Jehova.

Idi Marso 21, 1920, ni Joseph F. Rutherford, a mangidadaulo kadagiti Estudiante ti Biblia, impalawagna ti tema a “Minilion a Sibibiag Ita ti Saanton a Pulos a Matay.” Inaramid dagiti Estudiante ti Biblia ti amin a kabaelanda a mangawis kadagiti interesado iti daytoy a palawag. Inabanganda ti maysa kadagiti kadakkelan a teatro iti New York City ken nagiwarasda iti agarup 320,000 nga imbitasion.

Ad-adu ti immay ngem iti ninamnama dagiti Estudiante ti Biblia. Gapu ta nasurok a 5,000 laeng ti malaon ti teatro, agarup 7,000 a tattao ti saan a nakastrek. Inawagan dayta ti The Watch Tower kas “maysa kadagiti kadakkelan ken makaliwliwa unay a taripnong nga inangay dagiti International Bible Students.”

Limmatak dagiti Estudiante ti Biblia gapu iti panangipakaammoda a “minilion a sibibiag ita ti saanton a pulos a matay.” Saanda pay idi a maawatan a masapul a maipakaammo ti mensahe ti Pagarian iti ad-adu pay a lugar ken iti napapaut a tiempo. Ngem naisangsangayan latta ti regtada. Nalagip ni Ida Olmstead, a nangrugi a nakigimong idi 1902: “Ammomi a nagadu a bendision ti agur-uray iti intero a sangatauan, isu a kanayon nga impakaammomi daytoy a naimbag a damag kadagiti tattao.”

Tapno masigurado nga adda suplay ti naespirituan a taraon, nangrugi nga iyimprenta dagiti kakabsat iti Bethel ti dadduma a publikasion. Gimmatangda iti makina a pagimprentaan ket inkabilda dayta iti maysa a maab-abangan a pasdek iti 35 Myrtle Avenue, Brooklyn, New York, sumagmamano laeng a bloke manipud iti pagtaengan ti Bethel.

Nangrugi nga agserbi iti Bethel da Leo Pelle ken Walter Kessler idi Enero 1920. “Idi nakasangpetkami,” malagip ni Walter, “kinitanakami ti manangaywan iti pagimprentaan sa imbagana, ‘Maysa ket kagudua nga oras nga agtrabahokayo sakbay ti pangngaldaw.’ Imbaonnakami nga iyulimi manipud iti basement dagiti kinarton a libro.”

Malagip ni Leo ti napasamak kabigatanna: “Naibaonkami a mangdalus kadagiti diding ti  umuna a kadsaaran ti pasdek. Daydi pay laeng ti karurugitan a trabaho a napadasak. Ngem trabaho dayta ti Apo isu a makaparagsak.”

Iti sumagmamano la a lawas, ti The Watch Tower ket iyim-imprentan dagiti nareregta a boluntario a kakabsat. Inyimprenta ti flatbed press iti maikadua a kadsaaran ti 60,000 a kopia ti Pebrero 1, 1920, a ruar ti The Watch Tower. Iti met basement, nangikabil dagiti kakabsat iti pagimprentaan a naawagan iti Battleship. Nangrugi metten a mayimprenta sadiay ti The Golden Age idi Abril 14, 1920. Nalawag a binendisionan ni Jehova ti panagregget dagitoy a boluntario a trabahador.

Nagkaykaysa manen dagiti matalek nga adipen ni Jehova ket sireregta nga intultuloyda ti aktibidadda. Ngem pinanawan ti dadduma nga Estudiante ti Biblia ti organisasion bayat dagiti nariribuk a tiempo manipud 1917 agingga iti 1919. Kasanoda a matulongan?

Adda artikulo ti The Watch Tower nga Abril 1, 1920, a napauluan, “Agbiagtayo Koma a Natalna.” Sidudungngo nga imparegtana: “Masiguradotayo . . . a ti tunggal maysa nga addaan iti espiritu ti Apo . . . lipatennan dagiti naaramidanna a kamali, . . . ken makikaykaysan iti ili ti Dios a mangaramid iti pagayatanna.”

Adu ti nangipangag kadagita a nagsayaat a sasao. Insurat ti maysa a pagassawaan: “Nabigbigmi a nagkamalikami iti napalabas a tawtawen ta saankami a nangaskasaba idinto ta nangasaba a sireregta ti dadduma. . . . Determinadokami a saanen a maulit dayta.” Adu a trabaho ti agur-uray kadagitoy nga aktibo manen a trabahador.

Idi Hunio 21, 1920, inrugi dagiti Estudiante ti Biblia ti naregta a kampania a panangiwaras iti “ZG,” a nalukneng ti akkubna nga edision ti The Finished Mystery. * Adu kadagitoy a libro ti naidulin idi naiparit dayta idi 1918.

Amin a class worker, saan laeng a dagiti colporteur, ket naawis a makiraman iti panagiwaras.  “Situtulok koma a makipaset ti tunggal nakonsagrar [nabautisaran] iti tunggal kongregasion. Daytoy koma ti motto itan ti tunggal maysa: ‘Daytoy ti aramidek’—agipaima iti ZG.” Malagip ni Edmund Hooper a daytoy a kampania ti damo a pannakiraman ti adu a kakabsat iti trabaho a panagbalaybalay. Innayonna: “Naawatanmi met laengen no ania ti karaman iti trabaho a maisaknap iti ad-adu a lugar ngem iti impagarupmi.”

Narigat ti pannakikomunikar kadagiti Estudiante ti Biblia iti dadduma a pagilian bayat ti Gubat Sangalubongan I. Gapu iti dayta, kayat a paregtaen ni Brother Rutherford dagita a kakabsat ken organisaren manen ti trabaho a panangasaba. Isu nga idi Agosto 12, 1920, kaduana ti uppat a kakabsat a lallaki a napan idiay Britain, Continental Europe, ken Middle East.

Idi bimmisita ni Rutherford iti Britain, nangangay dagiti Estudiante ti Biblia iti tallo a kombension ken 12 a miting publiko. Napattapatta a 50,000 ti immatender. Kastoy ti panangsumario ti The Watch Tower iti dayta nga ibibisita: “Nabang-aran ken naparegta dagiti kakabsat. Lallalo a nagkaykaysada iti ayat ken panagserbi ket rimmagsak ti adu a naladingit a puso.” Idiay Paris, impalawag manen ni Brother Rutherford ti tema a “Minilion a Sibibiag Ita ti Saanton a Pulos a Matay.” Idi nangrugi ti palawag, napumpunno ti teatro. Tallo gasut a tattao ti nagkiddaw iti kanayonan nga impormasion.

Iti simmaruno a lawlawas, bimmisita ti dadduma a kakabsat idiay Athens, Cairo, ken Jerusalem. Tapno masurnadan ti interes dagiti nakasabaan kadagita a lugar, nangipasdek ni Brother Rutherford iti maysa a bodega ti literatura iti ili ti Ramallah, nga asideg iti Jerusalem. Kalpasanna, nagsubli idiay Europe ken impasdekna ti Central European Office sana inyurnos a mayimprenta sadiay dagiti publikasion.

Idi Septiembre 1920, inruar dagiti Estudiante ti Biblia ti No. 27 a The Golden Age, maysa nga espesial a ruar a nangibutaktak iti pannakaidadanes dagiti Estudiante ti Biblia bayat ti 1918. Ti Battleship, a nadakamat itay, ket aldaw ken rabii a nangyimprenta iti nasurok nga uppat a milion a kopia daytoy a magasin.

Naammuan dagiti nagbasa iti dayta a magasin ti nagpaiduma a kaso ni Emma Martin. Maysa a colporteur ni Sister Martin iti San Bernardino, California. Idi Marso 17, 1918, kaduana ti tallo a kakabsat  a lallaki a da E. Hamm, E. J. Sonnenburg, ken E. A. Stevens nga immatender iti bassit a gimong dagiti Estudiante ti Biblia.

Immatender ti maysa a lalaki ngem saan a tapno agsursuro maipapan iti Biblia. “Napanak iti dayta a gimong . . . gapu iti bilin ti opisina ti Prosecutor,” imbagana idi agangay. “Napanak sadiay tapno makaalaak iti ebidensia.” Naalana ti “ebidensia” a birbirokenna, ti kopia ti The Finished Mystery. Sumagmamano nga aldaw kalpasanna, naaresto da Sister Martin ken ti tallo a kakabsat a lallaki. Naakusaranda a sinalungasingda ti Espionage Act babaen ti panangiwarasda kadagiti kopia ti maiparit a libro.

Naduktalan a nakabasol ni Emma ken dagiti gagayyemna isu a nasentensiaanda iti tallo a tawen a pannakaibalud. Idi Mayo 17, 1920, naabak dagiti panagapelarda isu a naibaludda. Ngem dandani idin sumayaat ti kasasaad.

Ti kapadasanda ket inyestoria ni Brother Rutherford idi Hunio 20, 1920 iti maysa a kombension idiay San Francisco. Nakasuron dagiti agdengdengngeg iti pannakamaltrato dagitoy a Kristiano isu a nagtelegramada iti presidente ti United States. Insuratda: “Ibilangmi a saan a kinahustisia ti desision . . . para ken Mrs. Martin . . . maibatay iti Espionage law . . . Ti panangusar dagiti Federal officer iti autoridadda tapno . . . allilawenda . . . ni Mrs. Martin . . . sada nangparbo iti kaso kontra kenkuana tapno maibalud ket ibilangmi a . . . nakadakdakes.”

Iti simmaruno nga aldaw, dagus nga inabsuelto ni President Woodrow Wilson dagiti sentensia ni Sister Martin ken da Brother Hamm, Sonnenburg, ken Stevens. Nagpatinggan ti di nainkalintegan a pannakaibaludda.

Idi agpatinggan ti 1920, naamiris dagiti Estudiante ti Biblia a pagragsakanda ti adu a napasamak. Nagtultuloy a rimmang-ay ti trabaho iti hedkuarter, ken lallalo a nagbalin nga aktibo dagiti pudno a Kristiano a mangipakaammo iti Pagarian ti Dios kas solusion dagiti problema ti sangatauan. (Mat. 24:14) Iti simmaruno a tawen, 1921, lallalo a rimmang-ay ti pannakaipakaammo ti kinapudno maipapan iti Pagarian.