1. Sigun iti 2 Corinto 3:1-3, ania ti pangibilangantayo kadagiti nagpabautisar? (Kitaen ti ladawan iti akkub.)

ANIA ti mariknam no makitam a mabautisaran ti maysa a mayad-adalan iti Biblia iti kongregasionyo? Sigurado a nakaragragsakka. (Mat. 28:19) Ket no sika ti nangyadal kenkuana, sigurado a magagaran ken maragsakanka unay a makakita iti panagbautisarna! (1 Tes. 2:19, 20) Dagiti kababautisar nga adalan ket nagsayaat a “surat ti rekomendasion” para kadagidiay nangyadal kadakuada ken uray iti intero a kongregasion.—Basaen ti 2 Corinto 3:1-3.

2. (a) Ania a napateg a saludsod ti masapul nga usigentayo, ken apay? (b) Ania ti panagadal iti Biblia? (Kitaen ti footnote.)

² Nagsayaat a makita nga iti napalabas nga uppat a tawen, agarup 10,000,000 a panagadal iti Biblia * ti mairepreport iti kada bulan iti intero a lubong. Kadagita met la a tawen, nasurok a 280,000 ti tinawen a mababautisaran kas Saksi ni Jehova ken baro nga adalan ni Jesu-Kristo. Kasano a matulongantayo nga agpabautisar ti adu kadagiti minilion a mayad-adalan iti Biblia? Siaanus nga ik-ikkan ni Jehova dagiti tattao iti tiempo ken gundaway nga agbalin nga adalan ni Kristo. Isu a kayattayo nga aramiden ti amin a kabaelantayo a tumulong kadakuada  a rumang-ay agingga nga agpabautisarda iti kabiitan a tiempo. Bassiten ti nabati a tiempo!—1 Cor. 7:29a; 1 Ped. 4:7.

3. Ania ti usigentayo iti daytoy nga artikulo maipapan iti panangikondukta iti panangyadal iti Biblia?

³ Gapu ta nakapatpateg ita ti panagaramid iti adalan, nasurbey dagiti sanga nga opisina tapno maammuan no kasanotayo a matulongan ti adu nga iyad-adalantayo iti Biblia a rumang-ay agingga nga agpabautisarda. Iti daytoy nga artikulo ken iti sumaruno, makitatayo no ania ti masursurotayo kadagiti eksperiensiado a payunir, misionero, ken manangaywan iti sirkito. * (Prov. 11:14; 15:22) Ilawlawagda no ania ti mabalin nga aramiden dagiti mangyad-adal ken dagiti iyad-adalanda tapno nabalballigi ti panagadalda. Iti daytoy nga artikulo, usigentayo ti lima a masapul nga aramiden ti tunggal mayad-adalan tapno agtultuloy a rumang-ay agingga nga agpabautisar.

4. Ania ti masapul a bigbigentayo maipapan iti panangyadal iti Biblia iti ruangan?

⁴ Adu a kakabsat ti mangyad-adal iti Biblia iti mismo a ruangan ti bumalay. Nupay nasayaat daytoy a pangrugian tapno mapatanor ti interesna iti Biblia, masansan nga ababa laeng dagitoy a saritaan ken mabalin a saan a linawas. Tapno rumayray ti interesna, kiddawen ti dadduma a kakabsat ti contact number-na sa tawagan wenno teksanda tapno mangiranudda iti impormasion maipapan iti Biblia. Mabalin nga agtultuloy iti adu a bulan dagita a sagpaminsan a saritaan a saan nga agresulta iti nabunga a panagadal iti Biblia. Matignayto ngata nga agdedikar ken agpabautisar no kasta la ti panawen ken panagreggetna nga agadal iti Sao ti Dios? Posible a saan.

5. Ania ti impaganetget ni Jesus iti Lucas 14:27-33 a mausartayo a pangtulong kadagiti iyad-adalantayo?

⁵ Naminsan, inyilustrar ni Jesus no ania ti aramiden ti maysa tapno agbalin nga adalanna. Dinakamatna ti maysa a tao a kayatna ti agbangon iti torre ken ti maysa nga ari a kayatna ti mapan makigubat. Imbaga ni Jesus a daydiay kayatna ti agbangon masapul nga “agtugaw nga umuna ket kuentaenna ti magastos” tapno makitana no maileppasna ti torre. Masapul met nga “agtugaw nga umuna ken agpabalakad” ti ari tapno makitana no kabaelan ti armadana nga ibanag ti panggepna. (Basaen ti Lucas 14:27-33.) Kasta met, ammo ni Jesus a dagidiay mayat nga agbalin nga adalanna masapul nga ammuenda a naimbag dagiti rumbeng nga aramidenda tapno  agbalinda a pasurotna. Gapu iti dayta, masapul a paregtaentayo dagiti mayad-adalan a linawas nga agpayadalda iti Biblia kadatayo. Kasanotayo a maaramidan dayta?

6. Ania ti mabalin nga aramidentayo tapno rumang-ay dagiti iyad-adalantayo?

⁶ Umuna, iyat-atiddogmo ti panangyadal iti Biblia iti ruangan. Nalabit nayonam ti ilawlawagmo a teksto ti Biblia kada sarungkaram ti bumalay. No kayatna ti at-atiddog a panagsarita, damagem no adda mabalinyo a pagtugawan tapno itultuloyyo ti agsarita. Ipakita ti sungbatna no kasano kapateg kenkuana ti panagadal iti Biblia. Inton agangay, tapno napartak ti panagrang-ayna, mabalin a damagem no kayatna a mamindua iti kada lawas nga agadalkayo. Ngem saan la a ti maminsan wenno mamindua a panagadal iti kada lawas ti kasapulan.

7. Kasano a makapagsagana a naimbag ti mangyad-adal para iti tunggal panangyadalna?

⁷ Kas mangyad-adal, masapul nga agsaganaka a naimbag para iti tunggal panangyadalmo iti Biblia. Mabalin a rugiam dayta babaen ti panangbasam iti adalenyo ken kadagiti teksto. Tarusam dagiti kangrunaan a punto. Panunotem ti paulo ti leksion, dagiti subtitulo, dagiti saludsod para iti parapo, dagiti teksto a “basaen,” dagiti ladawan, ken aniaman a video a makatulong iti panangilawlawagmo iti adalenyo. Kalpasanna, bayat a pampanunotem ti iyad-adalam, panunotem a naimbag no kasanom nga ilawlawag ti impormasion iti simple ken nalawag a pamay-an tapno nalakana a maawatan ken mayaplikar dayta.—Neh. 8:8; Prov. 15:28a.

8. Ania ti masursurotayo iti imbaga ni apostol Pablo iti Colosas 1:9, 10 maipapan iti panangikararagtayo kadagiti iyad-adalantayo?

⁸ Kas paset ti panagsaganam, ikararagmo ken Jehova ti iyad-adalam ken dagiti kasapulanna. Agpatulongka ken Jehova tapno madanonmo ti pusona bayat nga iyad-adalmo ti Biblia. (Basaen ti Colosas 1:9, 10.) Panunotem dagiti posible a dina unay maawatan wenno maakseptar. Laglagipem a ti kalatmo ket tulongam a rumang-ay agingga nga agpabautisar.

9. Kasanom a matulongan ti iyad-adalam nga agsagana para iti panagadal? Ilawlawag.

⁹ Namnamaentayo a babaen ti regular a panangyadal iti Biblia, maapresiarto ti mayad-adalan dagiti inaramid ni Jehova ken ni Jesus  ken kayatna nga ammuen ti ad-adu pay. (Mat. 5:3, 6) Tapno naan-anay a magunggonaan ti mayad-adalan, masapul a panunotenna a naimbag ti ad-adalenna. Ilawlawagmo ngarud a nakapatpateg nga agsagana para iti tunggal panagadal babaen ti nasapsapa a panangbasana iti leksion ken panangpanunotna no kasano a mayaplikarna ti maad-adalna. Kasano a matulongam? Kaduaem a mangisagana iti maysa a leksion tapno maisurom no kasano ti agsagana. * Ilawlawagmo no kasanona a mabirokan ti direkta a sungbat ti saludsod para iti parapo, ken isurom a ti pananguged wenno panangkolor iti kangrunaan laeng a sasao ket makatulong kenkuana a manglagip iti sungbat. Kalpasanna, ibagam a sumungbat iti bukodna a sasao. No kasta ti aramidenna, makitam no naawatanna a naimbag ti ad-adalenna. Ngem adda pay mabalinmo nga iparegta nga aramidenna.

10. Apay a napateg a ti mayad-adalan ket inaldaw nga agbasa iti Biblia, ken ania ti kasapulan tapno naan-anay a magunggonaan iti dayta?

¹⁰ Malaksid iti linawas a pannakipagadal ti mayad-adalan, adda dagiti mabalin nga inaldaw nga aramidenna a makatulong kenkuana. Masapul a makikomunikar ken Jehova. Kasano? No dumngeg ken makisarita ken Jehova. Dumngeg iti Dios no inaldaw a basaenna ti Biblia. (Jos. 1:8; Sal. 1:1-3) Ipakitam no kasano nga usaren ti mai-print nga “Eskediul iti Panagbasa iti Biblia” a nai-post iti jw.org. * Siempre, tapno naan-anay a magunggonaan iti panagbasana iti Biblia, paregtaem a panunotenna a naimbag ti isursuro kenkuana ti Biblia maipapan ken Jehova ken no kasanona nga iyaplikar iti biagna ti maad-adalna.—Ara. 17:11; Sant. 1:25.

11. Kasano a masursuro ti mayad-adalan ti umiso a panagkararag, ken apay a napateg a masansan nga agkararag ken Jehova?

¹¹ Paregtaem ti iyad-adalam a makisarita ken Jehova babaen ti inaldaw a panagkararag. Naimpusuan nga agkararagka iti rugi ken ngudo ti tunggal panagadalyo, a dakamatem ti nagan ti iyad-adalam. Bayat a dengdenggenna dagiti kararagmo, masursurona no kasano ti agkararag a naimpusuan ken masapul a ni Jehova a Dios ti pagkararaganna iti nagan ni Jesu-Kristo. (Mat. 6:9; Juan 15:16) Panunotem no kasano a ti inaldaw a panagbasa iti Biblia (panagdengngeg ken Jehova) ken panagkararag (pannakisarita ken Jehova) ket  makatulong iti iyad-adalam a suminged iti Dios! (Sant. 4:8) No inaldaw nga aramidenna dagita, matulongan a rumang-ay agingga nga agdedikar ken agpabautisar.

12. Kasano a matulongam ti iyad-adalam a maaddaan iti personal a relasion ken Jehova?

¹² Saan la koma a maawatan ti iyad-adalam dagiti masursurona iti panagadalyo no di ket maipapusona met koma dagita. Apay? Ti pusotayo—a ramanenna dagiti tarigagay, emosion, ken rikriknatayo—ti manggutugot kadatayo nga agtignay. Nagusar ni Jesus iti lohikal a panagrason a nagustuan dagiti tattao. Ngem nagbalinda met a pasurotna ta nadanonna ti pusoda. (Luc. 24:15, 27, 32) Masapul a bigbigen ti iyad-adalam a pudpudno a Persona ni Jehova, a mabalinna a pakigayyeman ken ibilang kas Amana, Diosna, ken Gayyemna. (Sal. 25:4, 5) Bayat ti panagadalyo iti Biblia, ipaganetgetmo ti personalidad ti Diostayo. (Ex. 34:5, 6; 1 Ped. 5:6, 7) Aramidem dayta aniaman ti topiko nga ad-adalenyo. Tulongam a mangapresiar kadagiti nagsayaat a kualidad ni Jehova—ti ayat, kinaimbag, ken asina. Imbaga ni Jesus a “ti kangrunaan ken umuna a bilin” ket “ayatem ni Jehova a Diosmo.” (Mat. 22:37, 38) Ikagumaam nga iyukuok iti pusona ti nauneg a panagayat iti Dios.

13. Mangted iti pagarigan no kasanom a matulongan ti iyad-adalam a mangammo iti personalidad ni Jehova.

¹³ No kasarsaritam ti iyad-adalam, mariknana koma a nauneg ti panagayatmo ken Jehova. Makatulong dayta tapno mabigbigna a masapul met a maaddaan iti nasinged a personal a relasion iti Dios. (Sal. 73:28) Kas pagarigan, adda kadi sasao iti publikasion a pagad-adalanyo wenno maysa a teksto a mangisuro iti ayat, sirib, kinahustisia, wenno pannakabalin ni Jehova a nangtukay iti pusom? Dakamatem dayta ken ibagam a maysa dayta iti adu a rason nga ay-ayatem ti nailangitan nga Amatayo. Adda pay masapul nga aramiden ti tunggal mayad-adalan iti Biblia tapno rumang-ay agingga nga agpabautisar.

14. Ania ti ibaga ti Hebreo 10:24, 25 maipapan iti pannakigimong a makatulong iti irarang-ay ti mayad-adalan?

¹⁴ Kayattayo amin nga agpabautisar dagiti iyad-adalantayo. Ti maysa a napateg a pamay-an a matulongantayo ida ket paregtaentayo ida a makigimong. Sigun kadagiti eksperiensiado a mangyad-adal, dagiti mayad-adalan a dagus a makigimong ti kaalistuan a rumang-ay. (Sal. 111:1) Ibaga met ti dadduma a mangyad-adal  kadagiti iyad-adalanda nga adu ti masursuroda iti gimong a saanda a masursuro iti pannakipagadalda. Ibasam ti Hebreo 10:24, 25 iti iyad-adalam ken ilawlawagmo dagiti pagsayaatanna no makigimong. Ipabuyam ti video nga Ania ti Maar-aramid iti Kingdom Hall? * Tulongam ti iyad-adalam a pagbalinenna a napateg a paset ti biagna ti linawas a pannakigimong.

15. Kasanom a maparegta ti iyad-adalam tapno regular a makigimong?

¹⁵ Ania ti mabalinmo nga aramiden no saan pay a nakigimong ti iyad-adalam wenno saan a regular a makigimgimong? Sigaganaygay nga ibagam ti maysa a nasursurom iti nabiit pay a gimong. Ad-adda a matignay iti dayta ngem iti basta panangawismo kenkuana. Ikkam iti Pagwanawanan wenno iti Workbook iti Gimong a Panagbiag ken Ministerio a madama a pagad-adalan iti gimong. Ipakitam no ania ti maadal iti sumaruno a gimong, ken damagem no ania a paset ti paginteresanna unay. Ti mapadasan ti iyad-adalam iti damo a pannakigimongna ket adayo a nasaysayaat ngem iti napadasanna iti aniaman a taripnong ti sabali a relihion. (1 Cor. 14:24, 25) Maam-ammona ti dadduma nga addaan iti nasayaat nga ulidan a mabalinna a tuladen ken makatulong kenkuana a rumang-ay agingga a mabautisaran.

16. Kasanotayo a matulongan ti mayad-adalan tapno agpabautisar, ken ania ti masursurotayo iti sumaruno nga artikulo?

¹⁶ Kasanotayo a matulongan dagiti mayad-adalan iti Biblia tapno agpabautisarda? Matulongantayo ti iyad-adalantayo a mangipateg iti panagadalna no paregtaentayo a linawas a makipagadal ken agsagana para iti tunggal panagadal. Kayattayo met a paregtaen nga inaldaw a makikomunikar ken Jehova ken maaddaan iti personal a relasion Kenkuana. Kayattayo a tignayen nga umatender kadagiti gimong. (Kitaen ti kahon, “ Dagiti Aramiden ti Mayad-adalan Agingga nga Agpabautisar.”) Ngem kas ilawlawag ti sumaruno nga artikulo, adda pay lima a mabalin nga aramiden dagiti mangyad-adal tapno matulonganda dagiti iyad-adalanda nga agpabautisar.