1. Kasanotayo nga ammo a mangisalakan iti biag ti trabaho a panagaramid iti adalan?

TI TRABAHO a panagaramid iti adalan ket mangisalakan iti biag! Kasano? Idi inted ni Jesus ti bilin a naisurat iti Mateo 28:19, 20, imbagana: “Inkayo . . . kadagiti tattao . . . ket pagbalinenyo ida nga adalak, ken bautisaranyo ida.” Kasano kapateg ti panagbautisar? Masapul nga agpabautisar dagidiay kayatda ti maisalakan. Masapul a mamati ti agpabautisar a ti pannakaisalakan ket posible laeng gapu iti ipapatay ken panagungar ni Jesus. Dayta ti makagapu nga imbaga ni apostol Pedro kadagiti padana a Kristiano: “Ti bautismo . . . ti mangisalakan . . . kadakayo ita . . . babaen ti panagungar ni Jesu-Kristo.” (1 Ped. 3:21) Isu a no agpabautisar ti baro nga adalan, manamnamana a maisalakan.

2. Ania ti ibagbaga ti 2 Timoteo 4:1, 2 a pagbalinantayo kas mannursuro?

² Tapno makaaramidtayo iti adalan, masapul nga agbalintayo a ‘nalaing a mangisuro.’ (Basaen ti 2 Timoteo 4:1, 2.) Apay? Gapu ta imbilin ni Jesus: “Inkayo . . . kadagiti tattao . . . ket pagbalinenyo ida nga adalak . . . , ken isuroyo” ida. Imbaga ni apostol Pablo nga ‘ikagumaantayo’ nga itungpal dayta a trabaho, ‘ta no kasta ti aramidentayo, maisalakantayonto ti bagitayo ken dagiti dumngeg kadatayo.’ Gapuna, imbaga ni Pablo: “Kanayon nga asikasuem . . . ti isursurom.” (1 Tim. 4:16) Ti panangisuro ket konektado iti panagaramid iti adalan, isu a kayattayo a ti panangisurotayo ket ti kasayaatan.

3. Iti daytoy nga artikulo, ania ti usigentayo maipapan iti panangyadal iti Biblia?

³ Regular nga isursurotayo dagiti kinapudno iti Biblia iti minilion a tattao. Ngem kas nadakamat iti napalabas nga artikulo, kayattayo a maammuan no kasanotayo a matulongan ti ad-adu  nga agbalin a bautisado nga adalan ni Jesu-Kristo. Iti daytoy nga artikulo, usigentayo ti lima pay a masapul nga aramiden ti tunggal mangyad-adal tapno matulonganna ti iyad-adalanna nga agpabautisar.

4. Apay a masapul nga agteppel ti maysa no mangyad-adal iti Biblia? (Kitaen met ti footnote.)

⁴ Magusgustuantayo dagiti isursurotayo manipud iti Sao ti Dios. Isu a mabalin nga adda tendensiatayo a makaadu nga agsao maipapan kadagita. Ngem mangikonkonduktatayo man iti Panagadal iti Pagwanawanan, Panagadal ti Kongregasion iti Biblia, wenno panangyadal iti Biblia, saan koma a datayo ti makaadu nga agsao. Bay-antayo a ti Biblia ti mangisuro isu nga agteppel koma ti mangyad-adal ken saanna nga ilawlawag ti amin nga ammona maipapan iti maysa a topiko wenno teksto ti Biblia. * (Juan 16:12) Ikomparam ti kaadu ti pannakaammom iti Biblia idi mabautisaranka ken ti kaadun ti pannakaammom ita. Mabalin a dagiti laeng kangrunaan a doktrina ti Biblia ti naawatam idi. (Heb. 6:1) Adu a tawen a nasursurom dagiti ammom ita, isu a dimo koma mammaminsan nga isuro dagita iti baro nga iyad-adalam.

5. (a) Maitunos iti 1 Tesalonica 2:13, ania ti kayattayo a maawatan ti iyad-adalantayo maipapan kadagiti maad-adalna? (b) Kasanotayo a maparegta ti iyad-adalantayo a mangibaga kadagiti maad-adalna?

⁵ Kayattayo a maawatan ti iyad-adalantayo a naggapu iti Sao ti Dios dagiti maad-adalna. (Basaen ti 1 Tesalonica 2:13.) Kasano? Paregtaem nga ibagana ti maipapan kadagiti maad-adalna. Imbes a kanayon nga ilawlawagmo dagiti teksto ti Biblia, ipailawlawagmo kenkuana ti dadduma kadagita. Ipaawatmo no kasano nga agaplikar kenkuana ti Sao ti Dios. Mangusarka kadagiti makaiwanwan ken mangadaw iti kapanunotan a saludsod tapno maammuam ti pampanunoten ken marikriknana maipapan kadagiti teksto a binasana. (Luc. 10:25-28) Kas pagarigan, isaludsodmo: “Iti daytoy a teksto, ania ti naawatam a kualidad ni Jehova?” “Ania ti maitulong kenka daytoy a nasursurom iti Biblia?” “Ania ti makunam iti nasursurom?” (Prov. 20:5) Saan a ti kaadu ti ammo ti mayad-adalan ti importante no di ket ti panangipateg ken panangyaplikarna kadagita.

6. No mapantay mangyadal, apay a nasayaat a mangikuyogtayo iti eksperiensiado a mangyad-adal?

⁶ Iti panangyadalmo iti Biblia, napadasam kadin ti nangikuyog kadagiti agibumbunannag nga eksperiensiado a mangyadal? No wen, damagem no ania ti makunada iti panangyadalmo ken no baybay-am met laeng a ti  Biblia ti mangisuro. Masapul a napakumbabaka no kayatmo a lumaingka a mangisuro. (Idilig ti Aramid 18:24-26.) Kalpasanna, damagem iti eksperiensiado nga agibumbunannag no maaw-awatan met laeng ti iyad-adalam ti maad-adalna a kinapudno. Mabalinmo met a kiddawen iti isu met laeng a kabsat nga isu pay la ti mangyadal no awanka iti maysa wenno ad-adu pay a lawas. Iti kasta, regular latta ti panagadal ken marikna ti iyad-adalam a nakapatpateg ti panagadalna. Dimo koma pulos panunoten a “sika” laeng ti masapul a mangyadal kenkuana ken awan ti sabali a mabalin a mangikondukta iti dayta. Kayatmo ngamin ti kasayaatan para kenkuana tapno agtultuloy ti naespirituan nga irarang-ayna.

7. Ania ti makatulong iti mayad-adalan tapno ipategna dagiti masursurona?

⁷ Masapul a makita ti mayad-adalan iti Biblia nga ipatpategmo ken patiem dagiti kinapudno iti Biblia. (1 Tes. 1:5) Iti kasta, kastanto met ti mariknana maipapan kadagiti masursurona. Mabalinmo nga ibaga no kasano a nakatulong iti mismo a biagmo dagiti prinsipio ti Biblia. Iti kasta, mabigbigna a ti Biblia ket naglaon kadagiti praktikal a balakad a makatulong met kenkuana.

8. Ania pay ti mabalinmo nga aramiden tapno matulongam ti iyad-adalam, ken apay?

⁸ Bayat ti panagadalyo, iyestoriam iti iyad-adalam dagiti agpayso a kapadasan dagidiay naipasango kadagiti pakarigatan a kas iti mapaspasaranna ken no kasano a napagballigianda dagita. Iti panagadalyo, mabalin a mangikuyogka iti maysa a kabsat a ti ulidanna ket makatulong iti iyad-adalam. Wenno mangbirokka kadagiti makaparegta a kapadasan iti jw.org iti serye a “Ti Biblia Balbaliwanna ti Biag.” * Dagiti kasta nga artikulo ken video matulonganda ti iyad-adalam tapno maawatanna a sumayaat ti biagna no iyaplikarna dagiti prinsipio ti Biblia.

9. Kasanom a maparegta ti iyad-adalam nga ibagana kadagiti kapamilia ken gagayyemna dagiti masursurona?

⁹ No adda asawa ti iyad-adalam, makipagad-adal met kadi ti asawana? No saan, awisem ti asawana a makiraman met iti panagadal. Iparegtam iti iyad-adalam nga ibagana kadagiti kapamilia ken gagayyemna dagiti masursurona. (Juan 1:40-45) Kasano? Mabalin nga isaludsodmo: “Kasanom nga ilawlawag daytoy a  kinapudno iti pamiliam?” wenno “Ania a teksto ti usarem tapno paneknekam daytoy iti gayyemmo?” Iti kasta, masanaymo isuna nga agbalin met a mannursuro. Ket inton kualipikadon, mabalinnan ti makiraman iti ministerio kas di bautisado nga agibumbunannag. Damagem no adda am-ammona a mayat met nga agpayadal iti Biblia. No adda, kontakenyo a dagus, awisem a makipagadal kenkuana, ken ipabuyayo ti video a Kasano ti Panagadal iti Biblia? *

10. Kas nailadawan iti 1 Tesalonica 2:7, 8, kasano a matulad ti mangyad-adal ti ulidan ni Pablo?

¹⁰ Masapul nga ipakita dagiti mangyad-adal ti naimpusuan a personal nga interes kadagiti iyad-adalanda. Ibilangmo ida kas naespirituan a kakabsatmo iti masanguanan. (Basaen ti 1 Tesalonica 2:7, 8.) Saan a nalaka para kadakuada a tallikudan dagiti gagayyemda iti lubong ken mangaramid iti amin a napateg a panagbalbaliw tapno makapagserbida ken Jehova. Masapul a tulongantayo ida a makabirok kadagiti pudno a gagayyem iti kongregasion. Gayyemem ti iyad-adalam babaen ti pannakilangenmo kenkuana saan laeng nga iti panagadalyo no di ket iti dadduma pay a gundaway. Maipakitam a talaga a maseknanka kenkuana no tawagam, teksam, wenno pasiarem uray no saanyo nga eskediul ti agadal.

11. Ania ti kayattayo a mabirokan dagiti iyad-adalantayo iti kongregasion, ken apay?

¹¹ Kuna ti maysa a proverbio idiay Africa: “Agtitinnulong ti maysa a barrio a mangpadakkel iti maysa nga ubing.” Maibagatayo met: “Agtitinnulong ti maysa a kongregasion a mangaramid iti maysa nga adalan.” Isu a ti nalaing a mangyad-adal iti Biblia iyam-ammona ti iyad-adalanna kadagiti kakabsat iti kongregasion nga agbalin a nasayaat nga impluensia kenkuana. Iti kasta, matagiragsak ti mayad-adalan ti makilangen kadagiti adipen ti Dios a makaipaay kenkuana iti naespirituan ken emosional a suporta. Kayattayo a marikna ti tunggal mayad-adalan a paset isuna ti kongregasion ken naespirituan a pamiliatayo. Kayattayo a maallukoy iti naragsak ken naayat a Nakristianuan a panagkakabsattayo. Iti kasta, saanto unayen a marigatan a mangtallikud kadagiti tattao a saan a makatulong kenkuana a mangayat ken Jehova. (Prov. 13:20) No panawan dagiti dati a gagayyemna, ammona a makabirok iti pudno a gagayyem iti organisasion ni Jehova.—Mar. 10:29, 30; 1 Ped. 4:4.

12. Apay a masapul nga ibagatayo iti iyad-adalantayo a napateg ti dedikasion ken bautismo?

¹² Masapul nga ibagatayo iti iyad-adalantayo a napateg ti dedikasion ken bautismo. Ngamin, ti panggeptayo a mangyadal iti Biblia ket tulongan ti maysa a tao nga agbalin a bautisado nga adalan. No regularen a mayad-adalan iti sumagmamano a bulan ken nangnangruna no rinugiannan ti makigimong, masapul a maawatanna a ti panggep ti panagadal iti Biblia ket tapno matulongan a mangirugi nga agserbi ken Jehova kas maysa kadagiti Saksina.

13. Ania dagiti masapul nga aramiden ti mayad-adalan tapno makualipikar nga agpabautisar?

¹³ Ti napasnek a mayad-adalan kabaelanna nga in-inut a ragpaten ti kalat a panagpabautisar! Umuna, masapul nga am-ammuen ken ayatenna ni Jehova ken mamati Kenkuana. (Juan 3:16; 17:3) Kalpasanna, makigayyem ken Jehova ken kadagiti kakabsat iti kongregasion. (Heb. 10:24, 25; Sant. 4:8) Inton agangay, isardengnan ti dakes nga ar-aramidna ken pagbabawyanna dagiti basolna. (Ara. 3:19) Kabayatanna, ti pammatina ti mangtignay kenkuana a mangibaga iti kinapudno iti sabsabali. (2 Cor. 4:13) Kalpasanna, idedikarna ti bagina ken Jehova ken ipakitana a nagdedikaren babaen ti panagpabautisarna. (1 Ped. 3:21; 4:2) Nakaragragsakto la ketdi dayta nga aldaw! Bayat a ragragpatenna ti kalatna, kanayon koma a sipapasnek a komendaram ken paregtaem nga itultuloyna ti nasayaat nga ar-aramidenna.

14. Kasano a mausig ti mangyad-adal ti panagrang-ay ti iyad-adalanna?

¹⁴ Masapul a naanustayo bayat a tultulongantayo ti mayad-adalan a makualipikar nga agdedikar ken agpabautisar. Ngem masapul met nga ammuentayo no adda tarigagayna nga agserbi ken Jehova a Dios. Adda kadi dagiti makitam a pagilasinan nga ikagkagumaanna ti agtulnog kadagiti bilin ni Jesus? Wenno kayatna laeng a manayonan ti pannakaammona iti Biblia?

15. Ania dagiti pagilasinan ti panagrang-ay a masapul a paliiwem iti iyad-adalam?

¹⁵ Regular nga usigem ti panagrang-ay ti iyad-adalam. Kas pagarigan, iyeb-ebkasna kadi ti rikriknana ken Jehova? Agkarkararag kadi ken Jehova? (Sal. 116:1, 2) Magusgustuanna kadi ti agbasa iti Biblia? (Sal. 119:97) Regular kadin a makigimgimong? (Sal. 22:22) Adda kadin binalbaliwanna iti biagna? (Sal. 119:112)  Ibagbagana kadin kadagiti kapamilia ken gagayyemna dagiti maad-adalna? (Sal. 9:1) Kangrunaanna, kayatna kadi ti agbalin a Saksi ni Jehova? (Sal. 40:8) No dina man la ar-aramiden ti aniaman kadagita, sitataktika nga ammuem no apay ken siaasi ken prangka a kasaritam maipapan iti dayta. *

16. Kaano a masapul nga isardengmo ti maysa a panagadal iti Biblia?

¹⁶ Pasaray usigem no masapul nga itultuloymo nga iyadalan ti maysa. Isaludsodmo iti bagim: ‘Saan kadi nga agsagsagana sakbay ti panagadalmi? Saan kadi nga interesado a makigimong? Adda pay kadi dagiti bisiona? Miembro pay laeng kadi ti ulbod a relihion?’ No wen, ti agtultuloy a panangyadal kenkuana ket kas iti panangisuro iti maysa a tao nga aglangoy ngem dina met kayat ti mabasa! No talaga a dina ap-apresiaren ti maad-adalna ken dina kayat ti agbalbaliw, apay koma nga itultuloymo pay laeng nga iyadalan?

17. Sigun iti 1 Timoteo 4:16, ania ti masapul nga aramiden ti amin a mangyad-adal iti Biblia?

¹⁷ Nakapatpateg kadatayo ti responsabilidadtayo nga agaramid iti adalan. Kayattayo a tulongan dagiti iyad-adalantayo a rumang-ay ken agpabautisar. Bay-antayo ngarud a ti Biblia ti mangisuro ken ipakitatayo nga ipatpategtayo ken patientayo ti isursurotayo. Paregtaentayo ti iyad-adalantayo a makigayyem kadagiti kakabsat iti kongregasion ken ipaganetgettayo ti kalat a panagdedikar ken panagpabautisar, a pasaray usigentayo ti panagrang-ayna. (Kitaen ti kahon, “ Dagiti Aramiden ti Mangyad-adal Tapno Agpabautisar ti Iyad-adalanna.”) Naragsaktayo ta adda pasettayo iti daytoy a trabaho a makaisalakan iti biag! Determinadotayo koma a mangaramid iti amin a kabaelantayo a mangikondukta kadagiti progresibo a panagadal iti Biblia nga agresulta iti panagpabautisar.