1. Apay a magulguluan ti panunot ti adu a tattao?

MABALIN a pinullo a ribu a relihion ita ti mangibagbaga a Kristianoda ken agdaydayawda kano iti Dios iti pamay-an a makaay-ayo kenkuana. Isu met la gayam a magulguluan ti panunot ti adu a tattao! Isalsaludsodda, “Maymaysa la kadi ti pudno a relihion, wenno akseptaren kadi ti Dios ti amin a relihion?” Talaga kadi a kombinsidotayo a ti isursurotayo ket ti kinapudno? Ken kombinsidotayo met kadi a ti pagtuladan iti panagdaydayaw a sursuroten ita dagiti Saksi ni Jehova ti kakaisuna a pamay-an nga akseptaren ni Jehova? Talaga kadi a posible ti maaddaan iti kasta a nabileg a panamati? Usigentayo dagiti ebidensia.

2. Sigun iti 1 Tesalonica 1:5, apay a nabileg ti panamati ni apostol Pablo iti kinapudno?

² Talaga a kombinsido ni apostol Pablo iti kinapudno. (Basaen ti 1 Tesalonica 1:5.) Dayta a nabileg a panamati ket saan a naibatay iti emosion. Siaanep nga inadal ni Pablo ti Sao ti Dios. Patienna nga “inwanwan ti Dios ti pannakaisurat ti intero a Kasuratan.” (2 Tim. 3:16) Ania dagiti nasursurona? Iti Kasuratan, nakabirok ni Pablo iti di mabalusingsing a prueba a ni Jesus ti naikari a Mesias​—ebidensia a saan nga inkankano dagiti lider ti relihion dagiti Judio. Imbaga dagidi a managinsisingpet nga isursuroda ti kinapudno maipapan iti Dios ngem ar-aramidenda met dagiti kagurana. (Tito 1:16) Ngem saan a kas kadakuada ni Pablo. Saanna a pinili no ania a paset ti Sao ti Dios ti patienna. Sisasagana a nangisuro ken nangyaplikar iti “amin a pagayatan ti Dios.”​—Ara. 20:27.

3. Tapno talaga a kombinsidotayo, masapul kadi nga ammotayo ti sungbat ti amin a saludsodtayo? (Kitaen met ti kahon nga “ Ar-aramid ken Pampanunot ni Jehova​—‘Di Masaggaysa iti Kinaaduda.’”)

 ³ Para iti dadduma, masapul a kabaelan a sungbatan ti pudno a relihion ti amin a saludsod, uray dagiti saludsod a saan nga espesipiko a sungbatan ti Biblia. Realistiko kadi dayta? Kitaentayo ti ulidan ni Pablo. Pinaregtana dagiti kapammatianna a “siguraduen[da] ti amin a banag,” ngem inaminna met nga adu a banag ti dina pay maawatan. (1 Tes. 5:21) “Saan a kompleto ti pannakaammotayo,” insuratna, sana innayon, “nalidem a ladawan ti makitkitatayo iti metal a sarming.” (1 Cor. 13:9, 12) Saan a naawatan ni Pablo ti amin; ket kastatayo met. Ngem naawatan ni Pablo ti intero a ladawan wenno pakabuklan dagiti panggep ni Jehova. Ammona nga umdas daytan tapno agbalin a kombinsido a nasarakannan ti kinapudno!

4. Kasanotayo a mapabileg ti panamatitayo a nabirokantayon ti kinapudno, ken ania dagiti usigentayo maipapan kadagiti pudno a Kristiano?

⁴ Ti maysa a pamay-an tapno mapabilegtayo ti panamatitayo a nabirokantayon ti kinapudno ket no ikomparatayo ti pagtuladan iti panagdaydayaw nga insuro ni Jesus iti ar-aramiden ita dagiti Saksi ni Jehova. Iti daytoy nga artikulo, makitatayo a dagiti pudno a Kristiano (1) laksidenda ti idolatria, (2) raraemenda ti nagan ni Jehova, (3) ipatpategda ti kinapudno, ken (4) nauneg ti panagayatda iti maysa ken maysa.

5. Ania ti masursurotayo ken Jesus maipapan iti umiso a pamay-an ti panagdaydayaw iti Dios, ken kasanotayo a mayaplikar ti insurona?

⁵ Gapu iti nauneg a panagayat ni Jesus iti Dios, ni laeng Jehova ti nagdaydayawanna, idi man adda idiay langit ken idi adda ditoy daga. (Luc. 4:8) Insurona kadagiti adalanna a kasta met ti aramidenda. Nikaanoman, saan a  nagusar ni Jesus wenno dagiti matalek nga adalanna kadagiti imahen iti panagdaydayawda. Ti Dios ket Espiritu, isu a saan a pulos a makaaramid dagiti tattao iti aniaman a banag nga umarngi iti langa ken kinadayag ni Jehova! (Isa. 46:5) Ngem ti ngay met panangaramid iti imahen dagiti maaw-awagan iti santo ken panagkararag kadakuada? Iti maikadua iti Sangapulo a Bilin, imbaga ni Jehova: “Dika mangaramid iti kinitikitan nga imahen wenno iti kapada ti aniaman nga adda iti langit, [wenno iti] daga . . . Dika agruknoy . . . kadagita.” (Ex. 20:4, 5) Nalawag dagita a sasao kadagidiay mayat a mangparagsak iti Dios.

6. Ania a pagtuladan iti panagdaydayaw ti sursuroten ita dagiti Saksi ni Jehova?

⁶ Sigun kadagiti historiador, ti laeng Dios ti nagdaydayawan dagiti nagkauna a Kristiano. Kas pagarigan, kuna ti libro a History of the Christian Church a dagiti nagkauna a Kristiano “kagurada unay” ti kapanunotan a panangikabil kadagiti imahen kadagiti lugar a pagdaydayawanda. Ita, sursuroten dagiti Saksi ni Jehova ti pagtuladan nga inannurot dagiti Kristiano idi umuna a siglo. Saantayo nga agkararag kadagiti imahen dagiti “sasanto” wenno anghel; ditay pay ketdi agkararag ken Jesus. Saantayo met nga agdaydayaw kadagiti simbolo ti nasion a pagnanaedantayo. Aniaman ti mapasamak, determinadotayo nga agtulnog iti imbaga ni Jesus: “Ni laeng Jehova a Diosmo ti masapul a pagdayawam.”​—Mat. 4:10.

7. Ania dagiti nalawag a nakaidumaan dagiti Saksi ni Jehova iti dadduma a relihion?

⁷ Ita, adu ti pasurot dagiti nalatak a lider ti relihion. Bilibda unay kadagita a tattao nga uray la dayawenda idan. Araken dagiti tattao dagiti simbaanda, gatangenda dagiti libroda, ken nagadu ti idonarda kadagiti organisasion a supsuportaran dagita a lider ti relihion. Adda pay ketdi dagiti tattao a mamati iti amin nga ibagbaga dagita a lider. Permi ti ragsak dagita a pasurotda a kasla kettay ni Jesus a mismo ti makitkitada! Ngem naiduma dagiti pudno nga agdaydayaw ken Jehova ta awan ti tao a liderda. Nupay raraementayo dagiti mangidadaulo kadatayo, iyap-aplikartayo ti nalawag nga insuro ni Jesus: “Agkakabsatkayo amin.” (Mat. 23:8-10) Awan ti id-idoluentayo a tattao, liderda man iti relihion wenno iti politika. Saantayo met a supsuportaran dagiti kalatda. Imbes ketdi, kanayontayo a neutral ken naisina iti daytoy a lubong. Kadagitoy nga aspeto, naidumatayo unay iti adu a grupo nga agkunkuna a Kristianoda.​—Juan 18:36.

8. Kasanotayo nga ammo a kayat ni Jehova a maipadayag ken maipakaammo ti naganna?

⁸ Naminsan, inkararag ni Jesus: “Ama, padayagem ti naganmo.” Sinungbatan a mismo ni Jehova dayta a kararag babaen ti gumgumluong a timek manipud langit. Inkarina a padayagenna ti naganna. (Juan 12:28) Iti intero a ministerio ni Jesus, pinadayagna ti nagan ni Amana. (Juan 17:26) Rasonable ngarud nga ekspektarentayo nga ibilang dagiti pudno a Kristiano a maysa a pribilehio nga usaren ken ipakaammo ti nagan ti Dios.

9. Kasano a pinaneknekan dagiti Kristiano idi umuna a siglo a raraemenda ti nagan ti Dios?

⁹ Idi umuna a siglo C.E., kalpasan a naipasdek ti kongregasion Kristiano, ‘inawat ni Jehova dagiti tattao kadagiti nasion tapno mangpili iti ili a maipaay iti naganna.’ (Ara. 15:14) Para kadagiti Kristiano idi umuna a siglo, maysa a pribilehio nga usaren ken ipakaammo ti nagan ti Dios. Masansan nga inusarda ti nagan ti Dios iti ministerioda ken iti sursuratda. * Pinaneknekanda nga isuda ti ili a maipaay iti nagan ti Dios.​—Ara. 2:14, 21.

10. Ania ti ebidensia a dagiti Saksi ni Jehova ti ili a maipaay iti nagan ni Jehova?

 ¹⁰ Dagiti kadi Saksi ni Jehova ti ili a maipaay iti nagan ni Jehova? Usigentayo ti ebidensia. Ar-aramiden ti adu a lider ti relihion ita ti amin a kabaelanda tapno ilemmengda ti kinapudno nga adda personal a nagan ti Dios. Inikkatda dayta kadagiti Biblia nga impatarusda ken iti dadduma a kaso, imparitda a mausar dayta a nagan kadagiti simbaanda. * Dagiti ngay Saksi ni Jehova? Saan kadi a nalawag nga isuda laeng ti mangraraem iti nagan ni Jehova ken mangipapaay iti dayaw a pakaikarianna? Nasaksaknap ti panangipakaammotayo iti personal a nagan ti Dios ngem iti dadduma pay a relihion! Ar-aramidentayo ti amin a kabaelantayo nga agbiag maitunos iti nagantayo, dagiti Saksi ni Jehova. (Isa. 43:10-12) Nakayimprentatayon iti nasurok a 240 a milion a kopia ti Baro a Lubong a Patarus ti Nasantuan a Kasuratan. Iti dayta a patarus, naisubli ti nagan ni Jehova kadagiti teksto a nangikkatan ti dadduma a nangipatarus iti Biblia. Mangipabpablaaktayo met kadagiti naibatay-Biblia a publikasion a mangus-usar iti nagan ni Jehova iti nasurok a 1,000 a lengguahe!

11. Kasano nga impakita dagiti nagkauna a Kristiano nga ipatpategda ti kinapudno?

¹¹ Impateg ni Jesus ti kinapudno​—ti kinapudno maipapan iti Dios ken kadagiti panggepna. Nagbiag ni Jesus maitunos iti dayta a  kinapudno ken impakaammona dayta. (Juan 18:37) Kasta unay met ti panangipateg dagiti pudno a pasurot ni Jesus iti kinapudno. (Juan 4:23, 24) Kinapudnona, tinukoy ni apostol Pedro ti Kristianidad kas “ti pudno a sursuro.” (2 Ped. 2:2) Gapu ta ipatpateg unay dagiti nagkauna a Kristiano ti kinapudno, inwaksida dagiti narelihiosuan nga ideya, tradision ti kulturada, ken personal nga opinion a maikontra iti kinapudno. (Col. 2:8) Kasta met, ikagkagumaan dagiti pudno a Kristiano ita ti “agtultuloy . . . a magna iti dalan ti kinapudno.” Talaga nga ibatbatayda iti Sao ni Jehova ti amin a patpatienda ken ti pamay-an ti panagbiagda.​—3 Juan 3, 4.

12. Ania ti aramiden dagiti mangidadaulo no makitada a masapul a malawlawagan ti pannakaawattayo, ken apay?

¹² Saan nga ibagbaga ti ili ti Dios ita a perpekto wenno kompleto ti pannakaammoda iti kinapudno. No dadduma, agkamalida iti panangilawlawagda iti pannursuro ti Biblia ken iti panangiturongda iti organisasion. Ditay koma pakasdaawan dayta. Nalawag nga ibagbaga ti Kasuratan nga umad-adu ti umiso a pannakaammo bayat ti panaglabas ti tiempo. (Col. 1:9, 10) In-inut nga ibukbuksilan ni Jehova ti kinapudno, isu a masapul a situtulok nga urayentayo a siaanus a lumawag a lumawag ti kinapudno. (Prov. 4:18) No makita dagiti mangidadaulo a masapul a malawlawagan ti pannakaawattayo iti maysa a kinapudno, dagus a mangaramidda kadagiti kasapulan a panagbalbaliw. Adu a relihion iti Kakristianuan ita ti mangar-aramid kadagiti panagbalbaliw tapno maay-ayoda dagiti miembroda wenno tapno agbalinda a sikat iti lubong. Ngem dagiti panagbalbaliw nga ar-aramiden ti organisasion ni Jehova ket nadisenio tapno ad-adda a sumingedtayo iti Dios ken ad-adda a masurottayo ti pagtuladan iti panagdaydayaw nga insuro ni Jesus. (Sant. 4:4) Ar-aramidentayo dagita a panagbalbaliw, saan a gapu ta dayta ti uso wenno tapno pagustuan ti kayat ti kaaduan, no di ket gapu ta nalawlawag ti pannakaawattayo iti Biblia. Ipatpategtayo ti kinapudno!​—1 Tes. 2:3, 4.

13. Ania ti kapatgan a kualidad nga ipakpakita dagiti pudno a Kristiano, ken kasano nga iparparangarang dayta dagiti Saksi ni Jehova ita?

¹³ Pagaammo dagiti nagkauna a Kristiano gapu iti adu a nasayaat a kualidadda. Ngem ti kapatgan ket ti ayat. Imbaga ni Jesus: “Maammuanto ti amin a dakayo dagiti adalak​—no agiinnayatkayo.” (Juan 13:34, 35) Iti intero a lubong, tagtagiragsaken dagiti Saksi ni Jehova ti ayat ken panagkaykaysa. Naidumatayo iti amin a dadduma pay a relihion gapu ta kaslatay maymaysa a pamilia uray no nagduduma ti pagilian, kultura, ken kasasaad ti panagbiagtayo. Kadagiti gimong, asamblea, ken kombensiontayo, makitkitatayo ti ebidensia ti napudno a panagiinnayattayo. Dayta nga ebidensia ti mangpabileg iti panamatitayo a ti pamay-an ti panagdaydayawtayo ti kakaisuna nga an-anamongan ni Jehova.

14. Sigun iti Colosas 3:12-14, ania ti maysa a napateg a pamay-an a maipakitatayo ti nauneg a panagayat iti maysa ken maysa?

¹⁴ Iparegta kadatayo ti Kasuratan a “nauneg koma ti ayat[tayo] iti maysa ken maysa.” (1 Ped. 4:8) Ti maysa a pamay-an a maipakitatayo ti kasta nga ayat ket ti panagpipinnakawan ken panagiinnanus kadagiti kinaimperpekto ti maysa ken maysa. Mangpanunottayo met kadagiti gundaway a maipakitatayo ti kinaparabur ken kinamanagpadagus iti amin a kapammatiantayo, uray kadagidiay mabalin a nangpasakit kadatayo. (Basaen ti Colosas 3:12-14.) Ti kasta a panagiinnayat ti talaga a kangrunaan a pakabigbigan dagiti pudno a Kristiano.

15. Ania pay dagiti pamay-an a sursurotentayo ti pagtuladan iti panagdaydayaw nga impasdek dagiti Kristiano idi umuna a siglo?

¹⁵ Adda pay dadduma a pamay-an a sursurotentayo ti pagtuladan iti panagdaydayaw nga impasdek ti kongregasion Kristiano idi umuna a siglo. Kas pagarigan, ti urnos nga impasdek dagiti apostol idi umuna a siglo ti sursuroten ti organisasiontayo. Addaantayo met kadagiti agdaldaliasat a manangaywan, panglakayen, ken ministerial nga adipen. (Fil. 1:1; Tito 1:5) Kas kadagiti nagkauna a Kristiano, raraementayo dagiti linteg ni Jehova maipapan iti seks, panagasawa, ken kinasagrado ti dara, ken determinadotayo a mangprotektar iti kongregasion kadagiti di agbabbabawi a nakabasol.​—Ara. 15:28, 29; 1 Cor. 5:11-13; 6:9, 10; Heb. 13:4.

16. Ania ti masursurotayo iti Efeso 4:4-6?

¹⁶ Imbaga ni Jesus nga adunto ti agkuna nga isuda dagiti adalanna, ngem saan nga amin ket pudno. (Mat. 7:21-23) Impakdaar met ti Biblia nga iti maudi nga al-aldaw, adunto ti ‘kasla relihioso.’ (2 Tim. 3:1, 5) Kaskasdi a nalawag nga ibaga ti Biblia nga adda laeng “maysa a pammati” nga aprobaran ti Dios.​—Basaen ti Efeso 4:4-6.

17. Siasino ita dagiti mangsursurot ken Jesus ken mangan-annurot iti maymaysa a pudno a pammati?

¹⁷ Siasino ita ti mangan-annurot iti maymaysa a pudno a pammati? Nasukimattayon dagiti ebidensia. Nakitatayon ti pagtuladan iti panagdaydayaw nga insuro ni Jesus ken inannurot dagiti Kristiano idi umuna a siglo. Maysa laeng ti sungbat​—dagiti Saksi ni Jehova. Nagsayaat a pribilehio ti agbalin a paset ti ili ni Jehova ken maammuan ti kinapudno maipapan ken Jehova ken kadagiti panggepna! Sapay koma ta itultuloytayo ti kumpet a siiirut iti kinapudno nga addaan nabileg a panamati.