1. Ania ti ‘naespirituan a kasapulantayo,’ ken kasano nga agdepende iti dayta ti kinaragsaktayo?

 TI PUDNO a kinaragsak ket saan la a nasayaat nga emosion a mariknam ita, ngem inton bigat ket saanen. Imbes ketdi, agpaut dayta iti intero a panagbiag ti maysa a tao. Kasano? Inlawlawag ni Jesus iti Sermonna iti Bantay: “Naragsak dagiti sipapanunot iti naespirituan a kasapulanda.” (Mat. 5:3) Ammo ni Jesus a naparsua dagiti tattao a kayatda la unay nga am-ammuen ti Namarsua kadakuada a ni Jehova a Dios ken agdaydayaw kenkuana. Dayta ti ‘naespirituan a kasapulantayo.’ Ket gapu ta ni Jehova “ti naragsak a Dios,” naragsak met dagiti agdaydayaw kenkuana.​—1 Tim. 1:11.

2-3. (a) Sigun ken Jesus, siasino pay dagiti naragsak? (b) Ania ti ammuentayo iti daytoy nga artikulo, ken apay?

² Masapul kadi a nasayaat ti situasion ti biagtayo tapno agbalintayo a naragsak? Saan. Iti sermon ni Jesus, adda nakaskasdaaw nga imbagana. “Dagiti agladladingit”​—gapu man ta makonkonsiensiada kadagiti basolda wenno adda nadagsen a problemada​—ket naragsak. Kasta met la ti imbaga ni Jesus maipapan kadagiti “maidaddadanes gapu iti kinalinteg” wenno kadagiti ‘mauy-uyaw’ gapu ta pasurotna ida. (Mat. 5:4, 10, 11) Ngem kasano a posible ti agbalin a pudpudno a naragsak kadagita a situasion?

³ Isursuro kadatayo ni Jesus nga agbalintayo a naragsak, saan a gapu ta nasayaat ti situasion ti biagtayo, no di ket gapu ta pempennekentayo dagiti naespirituan a kasapulantayo ken ikagkagumaantayo ti umasideg iti Dios. (Sant. 4:8) Kasanotayo a maaramid dayta? Iti daytoy nga artikulo, ammuentayo ti tallo a kangrunaan a pamay-an tapno agbalintayo a pudpudno a naragsak.

4. Ania ti umuna a pamay-an tapno agbalintayo a pudpudno a naragsak? (Salmo 1:1-3)

⁴ UMUNA: Tapno agbalintayo a pudpudno a naragsak, masapul a mangantayo iti naespirituan a taraon. Masapul a mangan agpadpada dagiti tattao ken animal iti pisikal a taraon tapno agtultuloyda nga agbiag. Ngem dagiti laeng tattao ti mabalin a mangan iti naespirituan a taraon. Ken kasapulantayo dayta, isu nga imbaga ni Jesus: “Saan laeng a tinapay ti pagbiag ti tao, no di ket ti tunggal sao nga aggapu ken Jehova.” (Mat. 4:4) Masapul ngarud a ditay palabsen ti maysa nga aldaw a ditay nangan iti naespirituan a taraon manipud iti nagpateg a Sao ti Dios, ti Biblia. Imbaga ti salmista: ‘Naragsak ti tao a pagragsakanna ti linteg ni Jehova, ken basbasaenna dayta iti nakapsut a timek iti aldaw ken rabii.’​—Basaen ti Salmo 1:1-3.

5-6. (a) Ania dagiti maammuantayo iti Biblia? (b) Kasano a makatulong kadatayo ti panagbasa iti Biblia?

⁵ Ay-ayatennatayo ni Jehova isu nga impaisuratna iti Biblia dagiti napateg nga impormasion tapno agbiagtayo a naragsak. Maammuantayo no apay a pinarsuanatayo. Maammuantayo no kasanotayo nga umasideg kenkuana ken no ania dagiti aramidentayo tapno pakawanenna dagiti basoltayo. Maammuantayo met ti nagsayaat a namnama nga inkarina para iti masakbayantayo. (Jer. 29:11) Gapu kadagita a kinapudno a maammuantayo iti panagadaltayo iti Biblia, mapno ti pusotayo iti ragsak!

⁶ Ammotayo a napno met ti Biblia kadagiti makatulong a pammagbaga para iti inaldaw a biag. Naragsaktayo no surotentayo dagita. No maupayka gapu kadagiti problema iti biag, kakaaduem ti orasmo nga agbasa iti Sao ni  Jehova ken mangutob iti dayta. Imbaga ni Jesus: “Naragragsak . . . dagidiay dumdumngeg iti sao ti Dios ken mangtungtungpal iti dayta!”​—Luc. 11:28.

7. Ania dagiti aramidem tapno naan-anay a magunggonaanka iti panagbasam iti Sao ti Dios?

⁷ Bayat a basbasaem ti Sao ti Dios, nanamem ti basbasaem. Kas pagarigan, napadasam kadin daytoy? Adda nagluto iti paboritom a makan. Ngem gapu ta agap-apuraka wenno adda nauneg a pampanunotem, tilmonka lattan a tilmon a dimo man la nannanamen ti tunggal isakmolmo. Idi naibusmon, nasdaawka ta nagbiitmo a kinnan ket agbabbabawikan ta dimo man la na-enjoy ti nangan. Adda met kadin ti tiempo a nagap-apuraka a nangbasa iti Biblia isu a dimo man la nananam ti mensahena? Dika agap-apura nga agbasa iti Sao ti Dios tapno ma-enjoy-mo dayta; iladawam iti panunotmo dagiti eksena, imadyinem ti boses dagiti karakter, ken panunotem dagiti nabasam. No aramidem dagita, naragragsakka.

8. Kasano nga itungtungpal “ti matalek ken masirib nga adipen” ti trabahona? (Kitaen met ti footnote.)

⁸ Dinutokan ni Jesus “ti matalek ken masirib nga adipen” a mangipaay iti naespirituan a taraon iti umiso a tiempo, isu a mabmabsogtayo iti naespirituan. * (Mat. 24:45) Ti Biblia nga impaisurat ti Dios ti kangrunaan a ramen wenno ingrediente ti amin nga idasdasar ti matalek nga adipen. (1 Tes. 2:13) Dayta a naespirituan a taraon ti tumultulong kadatayo a mangammo iti panagpampanunot ni Jehova kas impakaammona iti Biblia. Dayta ti rason a basaentayo dagiti magasin a Ti Pagwanawanan ken Agriingkayo! ken dagiti artikulo iti jw.org. Agsaganatayo met para kadagiti gimong ti kongregasion iti tengnga ti lawas ken ngudo ti lawas, ken buyaentayo ti binulan a programa iti JW Broadcasting^® no available iti lengguahetayo. No umdas ti kanentayo a naespirituan a taraon, maaramidtayo ti maikadua a pamay-an tapno agbalintayo a pudpudno a naragsak.

9. Ania ti maikadua a pamay-an tapno agbalintayo a pudpudno a naragsak?

⁹ MAIKADUA: Tapno agbalintayo a pudpudno a naragsak, masapul nga agtulnogtayo kadagiti pagalagadan ni Jehova. Insurat ti salmista: “Naragsak ti amin nga agbuteng ken Jehova, a magmagna kadagiti dalan ti Dios.” (Sal. 128:1) Ti panagbuteng ken Jehova kaipapananna a raraementayo unay isuna isu a saantayo a mangaramid iti aniaman a kagurana. (Prov. 16:6) Gapu iti dayta, itultuloytayo ti agregget a mangsurot kadagiti pagalagadan ti Dios maipapan iti umiso ken di umiso a nailawlawag iti Biblia. (2 Cor. 7:1) Naragsaktayo no ayatentayo dagiti ay-ayaten ni Jehova ken guraentayo dagiti kagurana.​—Sal. 37:27; 97:10; Roma 12:9.

10. Sigun iti Roma 12:2, ania ti responsabilidadtayo?

¹⁰ Basaen ti Roma 12:2. Mabalin nga ammo ti maysa a tao nga adda autoridad ni Jehova a mangikeddeng iti umiso ken di umiso, ngem masapul met nga agtulnog a mismo kadagiti pagalagadan ti Dios. Kas pagarigan, mabalin nga ammo ti maysa a tao nga adda kalintegan ti gobierno a mangikeddeng iti maipalubos a kapartak dagiti lugan (speed limit) iti haywey. Ngem baka dina kayat ti agtulnog kadagita a paglintegan, isu a naparpartak ti panagpatarayna. Ti kababalintayo ti pakakitaan no talaga a mamatitayo a ti panangsurot kadagiti pagalagadan ni Jehova ti kasayaatan a mangidalan iti biagtayo. (Prov. 12:28) Kasta ti narikna ni David isu nga imbagana maipapan  ken Jehova: “Impakaammom kaniak ti dalan ti biag. Adda naruay a rag-o iti sanguanam; adda agnanayon a kinaragsak iti kannawan nga imam.”​—Sal. 16:11.

11-12. (a) No problemado wenno maup-upaytayo, ania ti masapul a pagannadantayo? (b) Kasano a makatulong ti Filipos 4:8 no agpilpilitayo iti paglinglingayan?

¹¹ No problemado wenno maup-upaytayo, baka mariknatayo a masapul nga agpalpaliwatayo tapno malipatantayo pay laeng dagiti problematayo. Mayat met ketdi dayta ngem masapul nga agannadtayo a ditay agaramid iti kagura ni Jehova.​—Efe. 5:10-12, 15-17.

¹² Iti surat ni apostol Pablo kadagiti Kristiano idiay Filipos, imparegtana nga itultuloyda nga utoben dagiti bambanag a “nalinteg, . . . nadalus, . . . maay-ayat, [ken] naimbag.” (Basaen ti Filipos 4:8.) Uray no saan a maipapan iti paglinglingayan ti espesipiko nga insurat ni Pablo, dagiti insuratna ti mangigiya koma iti panagpilitayo kadagiti pagpalpaliwaan. Padasem daytoy: Kada mabasam ti sao a “bambanag” iti bersikulo, sukatam dayta iti sao a “kanta,” “pelikula,” “nobela,” “telenobela,” “video,” wenno “video game.” No aramidem dayta, mailasinmo no ania dagiti mabalin a nasayaat ken saan a nasayaat iti imatang ti Dios. Kayattayo a suroten dagiti nangato a pagalagadan ni Jehova. (Sal. 119:1-3) Iti kasta, nadalus ti konsiensiatayo ket maaramidtayo ti maikatlo a pamay-an tapno agbalintayo a pudpudno a naragsak.​—Ara. 23:1.

13. Ania ti maikatlo a pamay-an tapno agbalintayo a pudpudno a naragsak? (Juan 4:23, 24)

¹³ MAIKATLO: Siguraduem a numero uno iti biagmo ti panagdaydayaw ken Jehova. Gapu ta ni Jehova ti Namarsua kadatayo, maikari unay a pagdaydayawantayo. (Apoc. 4:11; 14:6, 7) Masapul ngarud nga ipangpangrunatayo ti panagdaydayaw kenkuana iti pamay-an a kayatna, “maitunos iti espiritu ken kinapudno.” (Basaen ti Juan 4:23, 24.) Kayattayo ti agpaidalan iti nasantuan nga espiritu ti Dios iti panagdaydayawtayo tapno maitunos dayta kadagiti kinapudno iti Saona. Rumbeng nga iyun-unatayo ti panagdaydayawtayo uray no malimlimitaran wenno maiparit ti trabahotayo iti lugar a pagnanaedantayo. Nasurok a 100 a kakabsat a lallaki ken babbai ti nakabalud ita gapu laeng ta isuda ket Saksi ni Jehova. * Ngem siraragsak nga ipampamuspusanda latta ti agkararag, agadal, ken mangipakaammo iti maipapan iti Dios ken iti Pagarianna. No malalais wenno maidaddadanestayo, naragsaktayo ta ammotayo a kaduatayo ni Jehova ken gunggonaannatayto.​—Sant. 1:12; 1 Ped. 4:14.

14. Ania ti napasamak iti maysa nga agtutubo a brother idiay Tajikistan, ken apay?

¹⁴ Paneknekan dagiti kapadasan a talaga a makatulong ti tallo a pamay-an a napagsasaritaantayo tapno agbalintayo a pudpudno a naragsak, aniaman ti kasasaadtayo. Kitaentayo ti napasamak iti 19 ti tawenna a ni Jovidon Bobojonov a taga-Tajikistan ta dina kayat ti agsoldado. Idi Oktubre 4, 2019, puersado a naipanaw idiay balayda, naibalud iti adu a bulan, ken natrato a kas iti kriminal. Dayta a kinaawan hustisia ket impadamag ti media iti adu a pagilian. Nakabkabil tapno mapilit nga agsapata nga agserbi iti militar ken agisuot iti uniporme dagiti soldado. Kalpasanna, nasentensiaan ken naibalud agingga nga inikkan ti presidente ti pagilian iti pardon sa imbilinna a mawayawayaan. Iti intero a nasaem a kapadasanna, nagtalinaed a matalek ken naragsak ni  Jovidon. Kasano? Kanayon a sipapanunot kadagiti naespirituan a kasapulanna.

15. Kasano a nangan ni Jovidon iti naespirituan a taraon bayat a nakabalud?

¹⁵ Bayat a nakabalud ni Jovidon, nangan iti naespirituan a taraon, uray no awan Bibliana wenno aniaman a publikasiontayo. Kasano? Nagideliber dagiti kalugaranna a kakabsat iti makan a naikabil kadagiti grocery bag ket insuratda kadagita ti inaldaw a teksto. Gapu iti dayta, nabasana ti Biblia ken nautobna dayta kada aldaw. Idi naparuaren iti pagbaludan, kastoy ti imbalakadna kadagiti saan pay a nakapasar iti nakaro a suot: “Nakapatpateg nga usarenyo ita ti wayawayayo a mangpauneg iti pannakaammoyo maipapan ken Jehova babaen ti panagbasa iti Saona ken kadagiti publikasiontayo.”

16. Ania ti kanayon a pinampanunot ni Jovidon?

¹⁶ Ti kabsattayo a ni Jovidon ket nagtulnog kadagiti pagalagadan ni Jehova. Dina pinampanunot dagiti dakes a tarigagay ken saan a nagaramid iti dakes. Kanayon ketdi a pinampanunotna ni Jehova ken dagiti napateg Kenkuana. Inapresiar ni Jovidon dagiti nakaskasdaaw ken nakapimpintas a parsua ti Dios. Kada agsapa, mariing iti makaay-ayo a kanta ken uni dagiti billit. Kada rabii, tangtangadenna  ti bulan ken dagiti bituen. Imbagana: “Gapu kadagita a regalo ni Jehova, napabilegak ken rimmagsakak.” No yamanentayo dagiti naespirituan ken pisikal a probision ni Jehova, naragsak ti pusotayo, ken dayta ti makatulong tapno makapagibturtayo.

17. Kasano a pumudno ti 1 Pedro 1:6, 7 iti maysa a tao a mabalin a makapadas iti napasaran ni Jovidon?

¹⁷ Inyun-una met ni Jovidon ti panagdaydayaw ken Jehova. Ammona ti kinapateg ti panagtalinaed a matalek iti pudno a Dios. Imbaga ni Jesus: “Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.” (Luc. 4:8) Kayat dagiti komander ti militar ken dagiti soldado a tallikudan ni Jovidon ti relihionna. Ngem sipapasnek a nagkarkararag iti aldaw ken rabii. Impakaasina ken Jehova a tulonganna isuna tapno saan a sumuko ken dina maikompromiso ti pammatina. Nupay nakaro ti pannakamaltrato ni Jovidon, nagtalinaed a matalek. Gapu iti dayta, nakaragragsak isuna ta addaanen iti nasubok a pammati​—banag nga awan pay idi kenkuana sakbay a puersado nga innalada, nakabkabil, ken naibalud.​—Basaen ti 1 Pedro 1:6, 7.

18. Kasanotayo nga agtalinaed a naragsak?

¹⁸ Ammo ni Jehova dagiti kasapulan tapno agbalintayo a pudpudno a naragsak. No aramidem ti tallo a pamay-an tapno agbalinka a pudpudno a naragsak, agtalinaedka a naragsak iti laksid dagiti nakaro a problema. Iti kasta, maibagamto met: “Naragsak ti ili a ni Jehova ti Diosna!”​—Sal. 144:15.