1. Ania a namnama ti impaay ni Jehova kadatayo?

 INIKKANNATAYO ni Jehova iti nagsayaat a namnama a biag nga agnanayon. Namnamaen ti dadduma nga agbiagdanto nga agnanayon idiay langit kas immortal nga espiritu a parsua. (1 Cor. 15:50, 53) Ngem namnamaen ti kaaduan nga agbiagdanto nga agnanayon ditoy daga a naragsak ken addaan iti perpekto a salun-at. (Apoc. 21:3, 4) Ti man panagbiag nga agnanayon idiay langit wenno ditoy daga ti segseggaantayo, napateg kadatayo ti namnamatayo.

2. Ania ti nakaibatayan ti namnamatayo, ken apay a kasta ti maibagatayo?

² Ti sao a “namnama,” a nausar iti Biblia, kaipapananna ti “panangsegga a mapasamak ti nasayaat a bambanag.” Garantisado ti namnamatayo iti masanguanan ta ni Jehova ti nangted iti dayta. (Roma 15:13) Ammotayo dagiti inkarina, ken ammotayo a kanayon a tungpalenna dagiti imbagana. (Num. 23:19) Kombinsidotayo a kayat ni Jehova ken adda pannakabalinna a mangaramid iti amin nga inkarina. No kasta, ti namnamatayo ket saan a naibatay iti pantasia wenno arapaap; naibatay dayta iti ebidensia ken realidad.

3. Ania ti pagsasaritaantayo iti daytoy nga artikulo? (Salmo 27:14)

³ Ay-ayatennatayo ti nailangitan nga Amatayo, ken kayatna nga agtalektayo kenkuana. (Basaen ti Salmo 27:14.) No natibker ti namnamatayo ken Jehova, maibturantayo dagiti suot. Natured ken naragsaktayo met a mangsango iti masanguanan. Usigentayo no kasano a protektarannatayo ti namnamatayo. Ammuentayo nga umuna no kasano a ti namnamatayo ket kas iti angkla ken helmet. Kalpasanna, pagsasaritaantayo no kasanotayo a pabilgen ti namnamatayo.

4. Kasano a ti namnama ket kas iti angkla? (Hebreo 6:19)

⁴ Iti surat ni apostol Pablo kadagiti Hebreo, impadana ti namnamatayo iti maysa nga angkla. (Basaen ti Hebreo 6:19.) Masansan idi nga agbiahe ni Pablo iti baybay, isu nga ammona a maus-usar dagiti angkla tapno saan a mayanud ti barko. Naminsan, nakalugan iti barko idi bigla a nagbagyo iti napigsa. Bayat dayta a bagyo, nakitana a nangitinnag dagiti marino kadagiti angkla tapno saan a maidungpar ti barko iti kabatuan. (Ara. 27:29, 39-41) No kasano a makatulong ti angkla tapno agtalinaed ti barko iti ayanna, makatulong ti namnamatayo tapno ditay mayadayo ken Jehova no maipasangotayo kadagiti nakaro a suot. Tulongannatayo ti natibker a namnamatayo nga agtalinaed a kalmado ta kombinsidotayo a kalpasan dagiti arig bagyo a problema, sumayaatto met laeng dagiti kasasaad. Laglagipentayo nga impakdaar ni Jesus a maidadanestayo. (Juan 15:20) Isu a no kanayon a panunotentayo ti naikari a namnamatayo iti masanguanan, makapagtultuloytayo nga agserbi ken Jehova.

5. Kasano a nakatulong ken Jesus ti namnama idi dandanin matay?

⁵ Kitaentayo no kasano a ti namnama ket nakatulong ken Jesus nga agtalinaed a matalek uray no ammona a mapasaranna ti naulpit nga ipapatay. Idi aldaw ti Pentecostes 33 C.E., kinotar ni apostol Pedro ti padto iti libro a Salmo. Kastoy ti nagpintas a panangdeskribirna iti kinakalmado ken panagtalek ni Jesus: “Agbiagakto nga addaan namnama; ta dinakto baybay-an iti Tanem, ken dimonto ipalubos nga agrupsa daydiay napudno kenka. . . . Punnuennakto iti dakkel a rag-o iti sanguanam.” (Ara. 2:25-28; Sal. 16:8-11) Nupay ammo ni Jesus nga isu ket matay, natibker ti namnamana a pagungaren ti Dios ken siraragsak a makaduana manen ni Amana idiay langit.​—Heb. 12:2, 3.

6. Ania ti imbaga ti maysa a brother maipapan iti namnama?

⁶ Ti namnamatayo kas Kristiano ket nakatulongen iti adu a kakabsat nga agibtur. Kitaentayo ti kapadasan ni Leonard Chinn, a matalek a brother a taga-England. Bayat ti Gubat Sangalubongan I, naibalud ta dina kayat ti agsoldado. Dua a bulan a naibartolina. Kalpasanna, pinagtrabahoda iti nadagsen. “Gapu kadagiti kapadasak,” insuratna idi agangay, “naamirisko a nagpateg ti namnamatayo tapno makapagibturtayo. Adda dita ti ulidan ni Jesus, dagiti apostol, ken dagiti propeta, agraman dagiti nagsayaat a kari iti Biblia. Amin dagita ti mangpabileg iti namnamatayo para iti masanguanan ken makatulong kadatayo nga agibtur.” Para ken Leonard, ti namnama ket maysa nga angkla, ken mabalin a kasta met para kadatayo.

7. Kasano a dagiti suot pabilgenda ti namnamatayo? (Roma 5:3-5; Santiago 1:12)

⁷ Rumaniag a rumaniag ti namnamatayo kada maibturantayo dagiti suot ken makitatayo a tultulongan ken pabpaborannatayo ni Jehova. (Basaen ti Roma 5:3-5; Santiago 1:12.) Gapu iti dayta, nabilbilegen ti namnamatayo ngem idi damo nga inawattayo ti naimbag a damag. Kayat ni Satanas a sumukotayo no maipasangotayo kadagiti suot. Ngem iti tulong ni Jehova, mapagballigiantayo amin dagita.

8. Kasano a ti namnama ket kas iti helmet? (1 Tesalonica 5:8)

⁸ Ti namnamatayo ket impada met ti Biblia iti helmet. (Basaen ti 1 Tesalonica 5:8.) Aghelmet ti maysa a soldado tapno maprotektaran ti ulona bayat a makilablaban. Iti naespirituan a pannakigubattayo, masapul a  protektarantayo ti isiptayo kadagiti panangatake ni Satanas. Adu ti us-usarenna a mangsulisog ken mangdadael iti panagpampanunottayo. No kasano a ti helmet protektaranna ti ulo ti maysa a soldado, ti namnamatayo protektaranna ti panagpampanunottayo tapno makapagmatalektayo ken Jehova.

9. Ania ti mapasamak kadagiti tattao no awan ti namnama?

⁹ Ti namnamatayo nga agbiag nga agnanayon ti tumulong tapno makaaramidtayo kadagiti nainsiriban a desision. Ngem no maaw-awanantayo iti namnama ken dagiti laeng tarigagaytayo ti sangkapanunottayo, malipatantayo ti namnamatayo nga agbiag nga agnanayon. Kitaentayo ti napasamak iti dadduma a Kristiano iti nagkauna a Corinto. Insardengdan ti mamati iti maysa a napateg a kari ti Dios​—ti namnama a panagungar. (1 Cor. 15:12) Insurat ni Pablo a dagiti saan a mamati iti panagungar ket agbibiag para laeng iti agdama. (1 Cor. 15:32) Adu ita ti saan a mamati kadagiti kari ti Dios, isu nga agbibiagda para laeng iti agdama. Ar-aramidenda ti amin tapno ag-enjoy-da iti biagda. Ngem agtalektayo iti kari ti Dios. Ti namnamatayo ket kas iti simboliko a helmet a mangprotektar iti panagpampanunottayo. Iti kasta, saan laeng a ti bagitayo ti pampanunotentayo a mabalin a mangdadael iti relasiontayo ken Jehova.​—1 Cor. 15:33, 34.

10. Kasano a maprotektarannatayo ti namnama kontra iti ulbod a panagrasrason?

¹⁰ Kas iti helmet, maprotektarannatayo met ti namnamatayo tapno ditay panunoten nga awan serserbi ti panangikagumaantayo a mangparagsak ken Jehova. Kas pagarigan, baka irason ti dadduma: ‘Saanakto a pulos nga agbiag nga agnanayon. Saanak a maikari sadiay. Diak kaya nga aramiden dagiti ipapaaramid ti Dios.’ Laglagipentayo a kasta ti panagrasrason ni Elifaz a peke a manangliwliwa ni Job. Imbaga ni Elifaz: “Adda aya tao a nadalus?” Imbagana pay maipapan iti Dios: “Kitaem! Awan panagtalekna kadagiti anghelna, ken uray ti langit ket saan a nadalus iti panagkitana.” (Job 15:14, 15) Ulbod dagita nga imbagana! Laglagipem a kasta ti kayat ni Satanas a panunotem. Ammona a no sangkapanunotmo dagita, mapukawmo ti namnamam. Masapul ngarud a dimo patien dagita a kinaulbod ken kanayon a panunotem dagiti kari ni Jehova. Dimo pulos pagduaduaan a kayat ni Jehova nga agbiagka nga agnanayon ket tulongannaka a manggun-od iti dayta.​—1 Tim. 2:3, 4.

11. Apay a masapul nga agan-anustayo bayat nga ur-urayentayo a matungpal ti namnamatayo?

¹¹ Saan a kaskarina a pagtalinaeden a naraniag ti namnamatayo. Baka ditay makaan-anus bayat nga agur-uraytayo iti Dios. Ngem agnanayon ni Jehova. Naiduma ti orasna iti orastayo. (2 Ped. 3:8, 9) Tungpalenna dagiti karina iti kasayaatan a pamay-an, ngem baka dina aramiden dayta iti tiempo nga ekspektarentayo. Ania ti makatulong tapno agtalinaed a naraniag ti namnamatayo bayat a siaanus nga urayentayo a tungpalen ti Dios dagiti karina?​—Sant. 5:7, 8.

12. Sigun iti Hebreo 11:1, 6, ania ti koneksion ti namnama iti pammati?

¹² Agtalinaed a naraniag ti namnamatayo no kanayon a nasingedtayo ken Jehova, ta isu ti mangipaspasigurado a matungpal ti namnamatayo. Kinapudnona, sigun iti Biblia, tapno maaddaantayo iti namnama, masapul a mamatitayo nga adda ni Jehova ken isu “ti manggunggona kadagidiay napasnek a mangsapsapul kenkuana.” (Basaen ti Hebreo 11:1, 6.) No agpaypayso ni Jehova kadatayo, dakdakkel ti panagtalektayo nga aramidenna ti amin nga inkarina. Kitaentayo dagiti makatulong a  pamay-an tapno suminged ti relasiontayo ken Jehova ken agtalinaed a naraniag ti namnamatayo.

13. Kasanotayo a suminged iti Dios?

¹³ Agkararagka ken Jehova, ken basaem ti Saona. Nupay saantayo a makita ni Jehova, mabalintayo ti suminged kenkuana. Mabalintayo ti makisarita kenkuana babaen ti kararag, ket makapagtalektayo a denggennatayo. (Jer. 29:11, 12) Dumdumngegtayo iti Dios no basbasaentayo ti Saona ken ut-utobentayo dayta. Bayat a basbasaentayo no kasano nga inaywanan ni Jehova dagiti napudno kenkuana idi un-unana, rumaniag a rumaniag ti namnamatayo. Amin a naisurat iti Sao ti Dios ket “naisurat a pakasursuruantayo, tapno maaddaantayo koma iti namnama babaen ti panagibturtayo ken babaen ti liwliwa manipud iti Kasuratan.”​—Roma 15:4.

14. Apay nga utobentayo dagiti inaramiden ni Jehova para iti dadduma a tattao?

¹⁴ Utobem no kasano a tungtungpalen ni Jehova dagiti karina. Kitaentayo ti inaramid ti Dios kada Abraham ken Sara. Lakay ken baketda idin isu a saandan a maaddaan iti annak. Ngem inkari ti Dios kadakuada a maaddaanda iti anak. (Gen. 18:10) Ania ti reaksion ni Abraham? Kuna ti Biblia: “Adda pammatina nga isu ket agbalin nga ama ti adu a nasion.” (Roma 4:18) Iti panangmatmat ti tao, kasla awanen ti namnama ti situasionda, ngem nagtalek ni Abraham a tungpalen ni Jehova ti karina. Saan a napaay dayta a matalek a tao. (Roma 4:19-21) Isuro dagita a salaysay a kanayon a makapagtalektayo a tungpalen ni Jehova dagiti karina uray no kasla imposible dagita para kadatayo.

15. Apay a masapul a panunotentayo dagiti ar-aramiden ti Dios para kadatayo?

¹⁵ Panunotem dagiti ar-aramiden ni Jehova para kenka. Lagipem dagiti kari ti Dios iti Saona a nakitamon a pimmayso iti biagmo.  Kas pagarigan, inkari ni Jesus nga ipaay ni Amana dagiti kasapulam iti biag. (Mat. 6:32, 33) Impasigurado met ni Jesus nga ikkannaka ni Jehova iti nasantuan nga espiritu kada dawatem dayta. (Luc. 11:13) Tungtungpalen ni Jehova dagita a karina. Baka adda pay dagiti malagipmo a karina a tinungpalna para kenka. Kas pagarigan, inkarina a pakawanennaka, liwliwaennaka, ken taraonannaka iti naespirituan. (Mat. 6:14; 24:45; 2 Cor. 1:3) No panunotem dagiti ar-aramiden ti Dios para kenka, tumibker ti namnamam kadagiti aramidennanto pay para kenka iti masanguanan.

16. Apay a ti namnama ket nakapatpateg a sagut?

¹⁶ Ti namnamatayo a biag nga agnanayon ket nakapatpateg a sagut ti Dios. Segseggaantayo ti nagsayaat a masanguanantayo a sigurado a matungpal. Kasla angkla dayta a pagtalinaedennatayo a kalmado tapno maibturantayo dagiti suot, madaerantayo ti pannakaidadanes, ken kayatayo a sanguen uray ti ipapatay. Kasla met helmet dayta a mangprotektar iti panagpampanunottayo tapno dagiti laeng nasayaat ti maaramidtayo imbes a dagiti dakes. Gapu iti namnamatayo a naibatay iti Biblia, sumingedtayo iti Dios ken maammuantayo a kasta la unay ti panagayatna kadatayo. Talaga a pagsayaatantayo no pagtalinaedentayo a naraniag ken nabileg ti namnamatayo.

17. Apay nga agrag-otayo iti namnamatayo?

¹⁷ Imparegta ni apostol Pablo iti suratna kadagiti taga-Roma: “Agrag-okayo iti namnama.” (Roma 12:12) Makapagrag-o ni Pablo ta masiguradona a no agtalinaed a matalek, agbiag nga agnanayon idiay langit. Makapagrag-otayo met iti namnamatayo ta masiguradotayo a tungpalen ni Jehova dagiti karina. Kas iti insurat ti salmista: “Naragsak ti tao a . . . mangnamnama ken Jehova a Diosna, . . . Daydiay agnanayon a matalek.”​—Sal. 146:5, 6.