Kabayatan dayta a tawen, nagaramid ti organisasion iti sumagmamano a panagbalbaliw tapno ad-adda nga agkaykaysa dagiti Estudiante ti Biblia iti panagdaydayawda. Inrugi nga ipablaak ti The Watch Tower dagiti komento a mangilawlawag iti teksto nga inusigda iti linawas a Gimong ti Kararag, Panagdayaw, ken Testimonia. Nagimprenta met dagiti Estudiante ti Biblia iti kalendario a pakakitaan iti teksto para iti kada lawas agraman ti himno a mabalin a kantaen bayat ti personal a panagadal ken panagdaydayaw ti pamilia.

Kadagiti gimong dagiti Estudiante ti Biblia, mangtedda “kadagiti testimonia” maipapan iti kapadasanda iti panangasaba, no apay nga agyamyamanda ken Jehova, ken mabalinda pay ketdi ti agkanta, wenno agkararag. Malagip ni Sister Eva Barney, a nabautisaran idi 1923 iti edad a 15: “No kayatmo idi ti mangted iti testimonia, tumakderka laeng ken ibagam ti kas iti, ‘Kayatko ti agyaman iti Apo gapu iti amin a kinaimbagna kaniak.’” Magusgustuan ti dadduma a kakabsat ti mangted iti testimonia. Intuloy nga inyestoria ni Sister Barney: “Ni Brother Godwin ket maysa a lakay a kabsat. Nagadu ti kayatna nga estoriaen kas panagyamanna iti Apo. Ngem no madlaw ni baketna nga alusiisenen ti kabsat a mangidadaulo iti gimong, guyodenna ti likud ti amerikana ni lakayna tapno agtugawen.”

Maminsan iti kada bulan, mangangay ti tunggal klase iti espesial a Gimong ti Kararag, Panagdayaw, ken Testimonia. Kastoy ti panangilawlawag ti Abril 1, 1923 a The Watch Tower maipapan iti dayta a gimong: “Kagudua ti gimong ket para iti testimonia maipapan iti panangasaba ken panangparegta kadagiti trabahador. . . . Mamatikami a daytoy a gimong ti mangpasinged kadagiti kakabsat iti maysa ken maysa.”

Ni Charles Martin ket 19 ti tawenna a trabahador ti klase (agibumbunannag ti kongregasion) iti Vancouver, Canada. Dakkel ti naitulong kenkuana dagitoy a gimong. Malagipna: “Ditoy nga immuna a naadalko no ania ti ibagak iti panangasaba iti binalaybalay. Kaaduanna nga adda maysa a mangyestoria iti kapadasanna iti panangasaba. Dayta ti mangted kaniak iti ideya no ania ti ibagak ken no kasanok a sungbatan dagiti kumontra iti mensahe.”

Nakatulong met iti panagkaykaysa ti organisasion “dagiti aldaw ti panagserbi.” Kastoy ti naipakaammo  iti Abril 1, 1923, a ruar ti The Watch Tower: “Tapno adda panagkaykaysa . . . , ti Martes, Mayo 1, 1923, ti aldaw a napili a panagserbi ti amin. Kasta met laeng ti aramidentayo iti kada umuna a Martes iti kada bulan . . . Masapul a makipaset iti dayta a trabaho ti tunggal miembro ti tunggal klase.”

Nakipaset met iti daytoy a trabaho uray dagiti agtutubo nga Estudiante ti Biblia. Malagip ni Hazel Burford nga agtawen laeng idi iti 16: “Naikabil iti Bulletin dagiti canvass (a kapada dagiti pagtuladan iti pannakisarita) tapno ikabesami. a Nakaregregtakami ken lolok a makipaset iti amin nga aktibidad.” Ngem adda dagiti saan nga umanamong iti panangasaba ni Sister Burford. Insuratna: “Adda lakay a brother a talaga a saanna a kayat a makisaritaak kadagiti tattao. Iti daydi a tiempo, adda dagiti saan a makaawat no apay nga amin nga Estudiante ti Biblia a pakairamanan dagiti ‘agtutubo a lallaki ken babbai’ ket masapul a makiraman iti panangidaydayaw iti Naindaklan a Namarsua kadatayo.” (Sal. 148:12, 13) Ngem intultuloy ni Sister Burford ti panangasabana. Idi agangay, maysa isuna kadagiti nagadal iti maikadua a klase ti Gilead ken nagserbi a misionero idiay Panama. Dimteng ti tiempo a binalbaliwan dagidi a kakabsat ti panangmatmatda maipapan iti panangasaba dagiti agtutubo.

Dagiti kombension pinagkaykaysana met dagiti kakabsat. Paset ti adu kadagitoy a kombension dagiti aldaw ti panagserbi, kas iti napasamak iti Winnipeg, Canada. Idi Marso 31, naitampok iti kombension ti “Espesial a Panagbomba iti Winnipeg.” Amin a nakikombension ket naawis a makipaset iti dayta. Gapu kadagitoy nga espesial a panagserbi, adu ti nakasabaan ken naginteres. Isu nga idi Agosto 5, agarup 7,000 a tattao ti immatender iti sabali pay a kombension iti Winnipeg. Dayta pay laeng a kombension iti Canada ti kangatuan ti bilang ti immatender.

Ti saan a malipatan a kombension ti ili ni Jehova idi 1923 ket naangay idi Agosto 18-26, idiay Los Angeles, California. Lawlawas sakbay ti kombension, daytoy ket nai-advertise kadagiti diario.  Nagiwaras met dagiti Estudiante ti Biblia iti nasurok a 500,000 nga imbitasion. Adda pay ketdi dagiti banner a nangyawis iti kombension a naipaskil kadagiti pangpubliko ken pribado a lugan.

Idi Sabado, Agosto 25, indiskurso ni Brother Rutherford ti palawag a napauluan iti “Dagiti Karnero ken Kalding.” Nalawag nga impakaammona ti kinasiasino dagiti “karnero” kas nalinteg ti panagpuspusona a tattao nga agbiagto iti paraiso a daga. Imbasana met ti resolusion a napauluan iti “Pakdaar.” Daytoy a resolusion kinondenarna ti Kakristianuan ken pinaregtana dagiti nasingpet a tattao a rummuarda iti “Babilonia a Dakkel.” (Apoc. 18:2, 4) Idi agangay, nagkaykaysa dagiti naregta nga Estudiante ti Biblia a nagiwaras iti minilion a kopia daytoy a resolusion.

Iti maudi nga aldaw ti kombension, nasurok a 30,000 ti nakangngeg iti diskurso publiko ni Brother Rutherford a napauluan iti “Amin a Nasion ket Agmarmartsa nga Agturong iti Armagedon, Ngem Minilion a Sibibiag Ita ti Saanton a Pulos a Matay.” Inekspektar idi dagiti Estudiante ti Biblia nga adu ti umatender isu nga inabanganda ti kaar-aramid a Los Angeles Coliseum. Sinigurado dagiti kakabsat a mangngeg ti amin ti palawag isu nga inusarda ti loudspeaker system ti istadium a baro a teknolohia iti dayta a tiempo. Adu pay ti nakangngeg iti programa babaen ti radio.

Idi 1923, adda nalawag a makita a panagrang-ay iti trabaho a panangasaba iti Africa, Europe, India, ken South America. Iti India, adu a publikasion ti naaramid iti Hindi, Tamil, Telugu, ken Urdu iti tulong ni A. J. Joseph bayat nga ipapaayna dagiti kasapulan ni baketna ken ti innem nga annakda.

Iti Sierra Leone, nagsurat dagiti Estudiante ti Biblia a da Alfred Joseph ken Leonard Blackman iti sangalubongan a hedkuarter iti Brooklyn, New York, tapno agpatulongda. Idi Abril 14, 1923, nasungbatan ti kiddawda. Inyestoria ni Alfred: “Nakarabrabiin iti Sabado idi adda timmawag iti telepono.” Nagpigsa ti boses ti timmawag sa insaludsodna, “Sika kadi ti nagsurat iti Watch Tower Society tapno agibaonda kadagiti mangasaba?” “Wen,” kinuna ni Alfred. “Siak ti imbaonda.” Boses dayta ni William R. Brown. Kasangsangpetna idi manipud Caribbean a kaduana ti baketna a ni Antonia ken ti ubbing nga annakda a da Louise ken Lucy. Saanen nga aguray dagiti kakabsat iti mabayag sakbay a maam-ammoda ti kasangsangpet a pamilia.

 Inyestoria pay ni Alfred: “Kabigatanna, bayat a pagsarsaritaanmi ken Leonard ti Biblia, kas iti linawas nga ar-aramidenmi, adda nakitami a nagtayag a lalaki iti ridaw—ni Brother Brown. Nakaregregta nga uray la kayatnan ti agpalawag iti publiko kabigatanna.” Awan pay makabulan, naipaiman ni Brother Brown ti amin a publikasion nga awitna. Di nagbayag, nakaawat iti 5,000 pay a libro. Ngem kurang latta. Nupay kasta, saan a nagdinamag ni Brother Brown kas aglaklako iti libro. Iti nabayag a panagserbina ken Jehova a sireregta, kanayon a nagkotar iti Kasuratan iti panagpalawagna, isu a napanaganan iti Bible Brown.

Kabayatanna, naileten ti dati a sanga nga opisina iti Barmen, Germany. Dayta a siudad ket dandani metten sakupen ti kabangibangna a France. Nakabirok dagiti Estudiante ti Biblia iti pasilidad idiay Magdeburg a maibagay unay iti panagimprenta kadagiti publikasion. Idi Hunio 19, dagiti alikamen a pagimprenta ken dadduma pay a gamit ket inyakar dagiti kakabsat iti baro a Bethel iti Magdeburg. Maysa nga aldaw kalpasan unay a naabisuan ti sangalubongan a hedkuarter a nalpasen ti panagakar, impadamag dagiti diario a nasakupen ti France ti siudad ti Barmen. Narikna dagiti kakabsat a ti panagakar ket ebidensia ti pamendision ken proteksion ni Jehova.

Iti Brazil, ni George Young ket napan iti adu a lugar tapno ipakaammona ti naimbag a damag. Nangipasdek met iti baro a sangay ken rinugianna nga ipablaak ti The Watch Tower iti Portugues. Iti sumagmamano la a bulan, nakaipaima iti nasurok a 7,000 a publikasion. Ti pannakaibaonna iti Brazil ket nakatulong met ken Sarah Ferguson. Manipud pay idi 1899 nga agbasbasa iti The Watch Tower ngem saan pay a nabautisaran. Sumagmamano a bulan kalpasanna, nabautisaran met laengen ni Sister Ferguson ken ti uppat nga annakna.

Idi malmalpasen ti tawen, dinakamat ti The Watch Tower a Disiembre 15, 1923 ti epekto ti panagkaykaysa ti panagdaydayaw dagiti Estudiante ti Biblia: ‘Nalawag a nagsayaat ti espiritualidad dagiti klase (dagiti kongregasion). Agsaganatayo para iti adu a trabaho ken itultuloytayo ti agserbi iti Dios a sireregta ken siraragsak para iti sumaruno a tawen.’

Makaparagsak met unay kadagiti Estudiante ti Biblia ti sumaruno a tawen. Sumagmamano a bulan nga insagana dagiti kakabsat iti Bethel ti maysa a lote idiay Staten Island nga asideg iti hedkuarter iti Brooklyn. Dagiti pasilidad iti dayta a baro a lugar ket naileppas a naibangon idi rugrugi ti 1924. Nakatulong dagita tapno agkaykaysa dagiti kakabsat ken maisaknap ti naimbag a damag kadagiti pamay-an a kasla imposible pay laeng idi.