1-2. Ania ti kasayaatan a pamay-an ti panagbasa ken panagadal iti Biblia? Iyilustrar.

 IMADYINEM nga agplamplanoka a gumatang iti balay. Ania ti kayatmo a makita sakbay a gatangem? Umanay kadin ti piktiur ti sango ti balay? Sigurado a kayatmo a personal a makita ti balay tapno malikmutmo, mastrekmo ti amin a kuartona tapno mainspeksionmo, ken tapno makitam ti amin a sulina. Baka kayatmo pay a makita ti plano ti balay tapno maammuam no kasano a naipatakder dayta. Sigurado a kayatmo a makita ti amin a detalye ti balay sakbay a gatangem.

² Kasta met laeng ti kayattayo no agbasa ken agadaltayo iti Biblia. Imbaga ti maysa nga eskolar ti Biblia a ti mensahe ti Biblia ket kas iti “nakadakdakkel a pasdek a nakangatngato ken nauneg dagiti pundasionna.” Kasano ngarud nga agbalintayo a pamiliar iti amin a linaon ti Biblia? No paspasam a basaen, baka dagiti laeng kangrunaan a kinapudno ti maammuam—dagiti “pagdamdamuan a bambanag manipud kadagiti sagrado a mensahe ti Dios.” (Heb. 5:12) Imbes ketdi, kas iti balay, “umunegka” tapno masukimatmo a naimbag ti amin a detalye. Ti maysa a nagsayaat a pamay-an a maadalmo ti Biblia ket ti panangkitam no kasano nga agkokonektar ti mensahena iti nagduduma a pasetna. Ikagumaam a tarusan saan laeng a no ania dagiti kinapudno a patpatiem no di ket no apay a patpatiem dagita.

3. Ania ti imparegta ni apostol Pablo kadagiti padana a Kristiano, ken apay? (Efeso 3:14-19)

³ Tapno maawatantayo a naan-anay ti amin nga anggulo ti  Sao ti Dios, masapul nga ammuentayo dagiti nauuneg a kinapudno iti Biblia. Imparegta ni apostol Pablo kadagiti padana a Kristiano a siaanep nga adalenda ti Sao ti Dios tapno “maawatan[da] a naimbag ti kaakaba ken kaatiddog ken kangato ken kauneg” ti kinapudno. Iti kasta, ‘mairamut ken maipasdekda’ iti pammatida. (Basaen ti Efeso 3:14-19.) Masapul a kasta met ti aramidentayo. Kitaentayo no kasanotayo a maadal a naimbag ti Sao ti Dios tapno lalo a maawatantayo ti kababagasna.

4. Ania ti aramidentayo tapno agbalintayo a nadekdekket ken Jehova? Mangted kadagiti pagarigan.

⁴ Kas Kristiano, saantayo koma a kontento laeng kadagiti narabaw wenno pagdamdamuan a kinapudno iti Biblia. Iti tulong ti nasantuan nga espiritu ti Dios, magagarantayo a mangadal ‘uray iti nauneg a bambanag ti Dios.’ (1 Cor. 2:9, 10) Baka kayatmo ti mangaramid iti proyekto iti personal a panagadalmo tapno agbalinka a nadekdekket ken Jehova? Kas pagarigan, mabalinmo nga adalen no kasano nga impakitana ti ayatna kadagiti nagkauna nga adipenna ken no kasano a paneknekan dayta nga ay-ayatennaka met. Baka kayatmo nga adalen ti inyurnos ni Jehova a panagdaydayaw dagiti Israelita ken ikomparam dayta iti urnosna para kadagiti Kristiano ita. Wenno baka kayatmo nga adalen iti detalyado dagiti padto a tinungpal ni Jesus bayat ti panagbiag ken panagministeriona ditoy daga.

5. Adda kadi topiko a kayatmo nga i-research kas proyektom iti personal a panagadalmo?

⁵ Napagsaludsodan ti dadduma a nagaget nga agad-adal iti Biblia no ania a nauneg a bambanag ti kayatda a personal nga adalen iti Sao ti Dios. Dadduma kadagiti sungbatda ti nailista iti kahon a “ Dagiti Topiko Para iti Proyektom iti Personal a Panagadalmo.” Ma-enjoy-monto met nga adalen dagita a topiko iti tulong ti Watch Tower Publications Index wenno ti Giya iti Panagsukimat Para Kadagiti Saksi ni Jehova. Ti nauneg a panagadalmo iti Biblia ti mangpatibker iti pammatim ken mangtulong kenka tapno “masarakamto ti pannakaammo maipapan iti Dios.” (Prov. 2:4, 5) Pagsasaritaantayo ita ti dadduma a nauuneg a kinapudno iti Biblia a mabalintayo nga adalen a naimbag.

6. (a) Ania ti nagdumaan ti plano ken panggep? (b) Apay a maibagatayo a ti panggep ni Jehova para iti tao ken iti daga ket “agnanayon”? (Efeso 3:11)

⁶ Kitaentayo ti ibaga ti Biblia maipapan iti panggep ti Dios. Adda ti nalawag a nagdumaan ti plano ken panggep. Ti plano ket kas iti espesipiko a ruta a pinilim a pagnaan tapno makadanonka iti destinasionmo. Ngem ti plano ket mabalin a saan nga agballigi no adda bangen wenno lapped iti dalan. Iti sabali a bangir, ti panggep ket nakapokus iti mismo a destinasion. Ammotayo ti eksakto a papanantayo, ngem awan ti espesipiko a rutatayo. Mabalin a mabalbaliwan no kasapulan. Imbag laengen ta in-inut nga impalgak ni Jehova iti Biblia ti “agnanayon a panggepna.” (Kitaen ti study note ti Efeso 3:11.) “Iturturong ni Jehova ti amin a banag para iti panggepna” isu a kanayon nga agballigi. (Prov. 16:4) Ket agtalinaed iti agnanayon dagiti resulta ti ar-aramiden ni Jehova. Ania ti panggep ni Jehova, ken ania dagiti panagbalbaliw nga inaramidna tapno maitungpalna dayta?

7. Idi nagrebelde dagiti immuna a tattao, kasano a binaliwan ni Jehova ti pamay-an ti panangtungpalna iti panggepna? (Mateo 25:34)

⁷ Impakaammo ti Dios kadagiti immuna a tattao ti panggepna para kadakuada. Imbagana: “Agpaadukayo ken punnuenyo ti daga ken kultibarenyo, ket iturayanyo [ti] . . . tunggal sibibiag nga animal” ditoy daga. (Gen. 1:28) Idi nagrebelde da Adan ken Eva, simrek ti basol iti pamilia ti tao. Ngem awan ti makalapped iti pannakatungpal ti panggep ni Jehova. Binaliwanna ti pamay-anna a mangtungpal iti dayta. Dagus nga inkeddengna ti pannakaipasdek ti Pagarian idiay langit a mangtungpal iti orihinal a panggepna para kadagiti tattao ken iti daga. (Basaen ti Mateo 25:34.) Idi dimteng ti tiempo nga inkeddeng ni Jehova, imbaonna ditoy daga ti inauna nga Anakna gapu iti ayatna. Insuro ni Jesus kadagiti tattao maipapan iti Pagarian ken intedna ti biagna tapno masubbotnatayo iti basol ken ipapatay. Kalpasan a napagungar, nagsubli idiay langit tapno agturay kas Ari ti Pagarian ti Dios. Ngem adda pay ti masapul a maammuantayo maipapan iti panggep ti Dios.

8. (a) Ania ti tema ti Biblia? (b) Kas nailawlawag iti Efeso 1:8-11, ania ti kangrunaan a panggep ni Jehova? (Kitaen ti ladawan iti akkub.)

⁸ Ti kangrunaan a tema ti Biblia ket ti pannakaalangon ti nagan ni Jehova bayat a tungtungpalenna ti panggepna para iti daga babaen ti Pagarianna nga iturayan ti Kristo. Saan a mabalbaliwan ti panggep ni Jehova. Impasiguradona a matungpal dayta. (Isa. 46:10, 11, ftn.; Heb. 6:17, 18) Agbalinto a paraiso ti daga, ket dita nga ‘agbiagto iti agnanayon’ dagiti perpekto ken nalinteg a kaputotan da Adan ken Eva. (Sal. 22:26) Ngem adda pay aramiden ni Jehova a mangtungpal iti panggepna. Ti kangrunaan a panggepna ket pagkaykaysaenna ti amin a masirib a parsuana idiay langit ken ditoy daga. Iti kasta, amin a sibibiag ket simamatalekto nga agpasakup kenkuana kas Kangatuan nga Agturay. (Basaen ti Efeso 1:8-11.) Talaga a nakaskasdaaw ti nagpintas a pamay-an ni Jehova a mangtungpal iti panggepna!

9. No basaentayo ti Biblia, kasano kaadayo iti masanguanan ti makitatayo?

⁹ Usigentayo ita ti padto nga imbaga ni Jehova iti hardin ti Eden a mabasa iti Genesis 3:15. b Maipapan dayta kadagiti pasamak a mangtungpal iti panggepna ngem mapasamakto pay laeng kalpasan ti rinibu a tawen.  Kas pagarigan, imbaga ti Dios ken Abraham a kalpasan ti adu a henerasion, maysa kadagiti kaputotanna ti agbalin a Kristo. (Gen. 22:15-18) Kalpasanna, idi 33 C.E., nasugat ti mukod ni Jesus kas naipadto. (Ara. 3:13-15) Ti maudi a paset dayta a padto—ti pannakarumek ti ulo ni Satanas—ket nasurok a 1,000 pay a tawen sakbay a mapasamak. (Apoc. 20:7-10) Adu pay ti ipakaammo ti Biblia a mapasamak bayat a malmalpas ti panagginnura ti sistema ni Satanas ken ti organisasion ni Jehova.

10. (a) Ania dagiti dandanin mapasamak? (b) Kasano a maisaganatayo ti isip ken pusotayo? (Kitaen ti footnote.)

¹⁰ Panunotem dagitoy a nakaskasdaaw a pasamak nga impadto ti Biblia. Umuna, iproklama dagiti nasion ti “talna ken talged!” (1 Tes. 5:2, 3) ‘Dumtengto a kellaat’ ti dakkel a rigat inton rauten dagiti nasion ti amin nga ulbod a relihion. (Apoc. 17:16) Kalpasan dayta, addanto karkarna a pannakaiparangarang “ti Anak ti tao nga um-umay kadagiti ulep ti langit nga addaan pannakabalin ken dakkel a dayag.” (Mat. 24:30) Ukomento ni Jesus dagiti tattao, nga isinana dagiti karnero kadagiti kalding. (Mat. 25:31-33, 46) Ngem saan a sumardeng ni Satanas. Gapu iti gurana, sugsogannanto ti aliansa dagiti nasion nga aw-awagan ti Biblia a Gog iti daga ti Magog a mangraut iti ili ni Jehova. (Ezek. 38:2, 10, 11) Addanto tiempo bayat ti dakkel a rigat a maummong idiay langit ti natda kadagiti dinutokan ti espiritu tapno makikaduada ken Kristo ken iti nailangitan nga armadana a makilaban iti gubat ti Armagedon, ti maudi a paset ti dakkel a rigat. c (Mat. 24:31; Apoc. 16:14, 16) Kalpasanna, mangruginton ti Sangaribu a Tawen a Panagturay ni Kristo ditoy daga.—Apoc. 20:6.

11. Ania ti kaipapanan kenka ti namnama a biag nga agnanayon? (Kitaen met dagiti ladawan.)

¹¹ Ita, imadyinem ti biagmo kalpasan ti Sangaribu a Tawen. Ibaga ti Biblia a ti Namarsua kadatayo “inkabilna pay iti puso[tayo] ti kinaagnanayon.” (Ecl. 3:11) Panunotem ti kaipapanan dayta para kenka ken iti relasionmo ken Jehova. Makapainteres ti imbaga ti libro nga Umadanika ken Jehova, panid 319:  “Kalpasan ti ginasut, rinibu, minilion, binilion pay ketdi a tawen a panagbiagtayo, ad-adu nga amang ti ammotayton maipapan ken Jehova ngem iti ammotayo ita. Ngem di mabilang a nakaskasdaaw a banag ti maammuantayto pay. . . . Makapnek unay ken saan a makauma ti biag nga agnanayon—ket ti panagbalin nga ad-adda a nasinged ken Jehova ti kanayonto latta a kasayaatan a paset dayta.” Kabayatanna, no itultuloytayo nga adalen ti Sao ti Dios, ania pay dagiti maammuan ken masursurotayo?

12. Kasanotayo a makita dagiti mapaspasamak idiay langit? Mangted iti pagarigan.

¹² Mangted kadatayo ti Sao ti Dios iti ideya maipapan iti presensia ni Jehova “iti kangatuan.” (Isa. 33:5) Ipakaammo ti Biblia dagiti nakaskasdaaw a banag maipapan ken Jehova ken iti nailangitan a paset ti organisasionna. (Isa. 6:1-4; Dan. 7:9, 10; Apoc. 4:1-6) Kas pagarigan, mabasatayo maipapan kadagiti nakaskasdaaw a banag a nakita ni Ezekiel idi ‘naluktan ti langit ket nakakita kadagiti sirmata manipud iti Dios.’—Ezek. 1:1.

13. Ania ti ap-apresiarem maipapan iti akem ni Jesus idiay langit kas nailawlawag iti Hebreo 4:14-16?

¹³ Panunotem met ti akem ni Jesus idiay langit kas ti agturturayen nga Aritayo ken mannakipagrikna a Nangato a Padi. Babaen kenkuana, mabalintayo ti agkararag ken makaasideg iti “trono ti nagpaiduma a kinaimbag” ti Dios tapno agkiddaw iti asi ken tulong “iti umiso a tiempo.” (Basaen ti Hebreo 4:14-16.) Inaldaw koma a panunotentayo dagiti inaramid ken ar-aramiden da Jehova ken Jesus idiay langit para kadatayo. Gapu iti ayatda, matukay koma ti pusotayo ken matignaytayo nga agbalin a naregta iti panagserbi ken panagdaydayawtayo.—2 Cor. 5:14, 15.

14. Ania ti maysa kadagiti kasayaatan nga aramidentayo tapno maipakitatayo nga ap-apresiarentayo unay da Jehova ken Jesus? (Kitaen met dagiti ladawan.)

 ¹⁴ Ti maysa kadagiti kasayaatan nga aramidentayo tapno maipakitatayo nga ap-apresiarentayo ti Diostayo ken ti Anakna ket ti panagreggettayo a mangtulong iti dadduma nga agbalin a Saksi ni Jehova ken adalan ni Jesus. (Mat. 28:19, 20) Kasta ti inaramid ni apostol Pablo kas panagyamanna iti Dios ken ti Kristo. Ammona a pagayatan ni Jehova a “maisalakan koma ti amin a kita ti tattao ken maaddaanda iti umiso a pannakaammo iti kinapudno.” (1 Tim. 2:3, 4) Inkagumaanna a tulongan ti adu a tattao “tapno iti amin a pamay-an, adda dagiti maisalakan[na].”—1 Cor. 9:22, 23.

15. Sigun iti Salmo 1:2, ania ti aramidentayo tapno naragsaktayo?

¹⁵ Dineskribir ti nangisurat iti umuna a salmo a ti naragsak ken naballigi a tao ket daydiay “pagragsakanna ti linteg ni Jehova ken pampanunotenna a naimbag dayta a Linteg iti aldaw ken rabii.” (Sal. 1:1-3; ftn.) Maipapan iti dayta a teksto, imbaga ti managipatarus iti Biblia a ni Joseph Rotherham iti librona nga Studies in the Psalms a ti maysa a tao ket masapul a “naan-anay a maragsakan iti panangiwanwan ti Dios nga uray la birokenna, adalen, ken utobenna dayta iti nabayag.” Imbaga pay ni Rotherham a “no aglabas ti maysa nga aldaw a saan nga agbasa iti Biblia ti maysa a tao, nasayang laeng ti aldawna.” Matagiragsakmo ti agadal iti Biblia no agreggetka a mangammo kadagiti napateg a detalyena ken no kasano nga agkokonektar amin dagita. Talaga a makaparagsak nga adalen ti tunggal anggulo ti Sao ti Dios!

16. Ania ti pagsasaritaantayo iti sumaruno nga artikulo?

¹⁶ Saan a narigat a tarusan dagiti nagpipintas a kinapudno nga isursuro ni Jehova kadatayo iti Saona. Iti sumaruno nga artikulo, usigentayo ti maysa a nauneg a kinapudno—ti naindaklan a naespirituan a templo ni Jehova a dinakamat ni Pablo iti suratna kadagiti Hebreo a Kristiano. Sapay koma ta pagragsakam nga adalen dayta!