Nasurok a makatawen a nagtrabaho dagiti brother iti Bethel tapno maibangon ti estasion ti radio a WBBR idiay Staten Island, New York City. Umuna, pinukanda dagiti kayo, sada imbangon ti dakkel a balay para kadagiti trabahador ken sabali pay a pasilidad para kadagiti equipment. Idi nalpasdan ti nagibangon, in-assemble dagiti brother dagiti equipment tapno mairugidan ti “agibrodkas.” Ngem adda dagiti problema a masapul a solbarenda.

Nagrigat nga ikabit ti antena ti estasion. Ti 91 a metro (300 a pie) ti kaatiddogna nga antena ket masapul a maibitin iti nagbaetan ti dua a kayo a poste a sag-61 a metro (200 a pie) ti kangatona. Saan a nagballigi ti umuna a panangpadas. Ngem nagtalekda iti tulong ni Jehova isu a nagballigida met laeng idi agangay. Imbaga ni Calvin Prosser a nakipagtrabaho iti proyekto: “No koma nagballigikami iti umuna a panangpadasmi, baka inlastogmi a nakalalaingkami!” Ngem binigbig dagitoy a brother a naaramidanda laeng dayta iti tulong ni Jehova. Ngem adda pay dagiti problema a masapul a sanguenda.

Mangrugrugi pay laeng idi ti panagibrodkas iti radio, ken nagrigat ti gumatang kadagiti equipment a kasapulan. Ngem nakakita dagiti kakabsat iti segunda mano a 500-watt a transmitter a mabalinda nga usaren. Imbes a gumatangda iti mikropono, inusarda ti mikropono ti maysa nga ordinario a telepono. Maysa a rabii iti Pebrero, pinadas dagiti kakabsat a testingen ti simple nga  equipment. Kasapulanda ti programa nga ibrodkas, isu a nagkanta dagiti brother kadagiti kanta ti Pagarian. Maysa kadakuada ni Ernest Lowe ket inestoriana ti nakakatkatawa a pasamak iti dayta nga aldaw. Imbagana a bayat nga agkankantada, tinawagan ida ni Judge Rutherford b nga adda idiay Brooklyn nga agarup 25 a kilometro (15 a milia) ti kaadayona. Nangngegna iti radiona ti panagkantada.

“Isardengyo ti ar-aramidenyo,” kuna ni Brother Rutherford. “Kaslakay la agpipinnukkaw!” Medio nabainan dagiti kakabsat, isu a dagus nga iniddepda ti transmitter. Ngem ammoda nga agan-andaren ti radio ken mabalindan ti agibrodkas.

Idi Pebrero 24, 1924 ti umuna nga opisial a panagbrodkasda. Imbaga ni Brother Rutherford a mausar ti estasion ti radio “para iti interes ti pagarian ti Mesias.” Imbagana a ti panggep ti estasion ket “tapno matulongan ti amin a tattao, aniaman ti relihion wenno patpatienda, a mangtarus iti Biblia ken iti kinapateg ti tiempo a pagbibiagantayo.”

Nagballigi ti damo a panagbrodkasda. Nausar dayta nga estasion ti radio iti 33 a tawen a mangibrodkas kadagiti programa ti organisasiontayo.

Idi Hulio 1924, nagtataripnong dagiti Estudiante ti Biblia para iti maysa a kombension idiay Columbus, Ohio. Naggapu dagiti delegado iti intero a lubong. Nangngegda dagiti palawag iti Arabic, English, French, German, Greek, Hungarian, Italian, Lithuanian, Polish, Russian, kadagiti lengguahe ti Scandinavia, ken Ukrainian. Naibrodkas iti radio ti dadduma a paset ti programa. Impaipablaak met dagiti kakabsat iti Ohio State Journal ti inaldaw a mapaspasamak iti kombension.

Idi Huebes, Hulio 24, nasurok a 5,000 a nakikombension ti nangasaba. Nakaipaimada iti dandani 30,000 a libro ken nakairugida iti rinibu a panangyadal iti Biblia. Dineskribir ti The Watch Tower dayta nga aldaw kas “ti kararagsakan a paset ti kombension.”

Idi Biernes, Hulio 25, bayat ti maysa kadagiti palawag ni Brother Rutherford, situtured nga imbasana ti maysa a dokumento a mangibutaktak iti ar-aramiden dagiti lider ti relihion. Imbagana a dagiti lider ti relihion, dagiti politiko, ken negosiante  “laplapdanda dagiti tattao a mangammo iti kinapudno maipapan iti pagarian ti Dios nga usarennanto a mangbendision kadagiti tattao.” Imbagana pay a saan a husto ti ar-aramiden dagitoy a tattao ta “supsuportaranda ti League of Nations ken ibagbagada a ‘dayta ti us-usaren ti Dios a mangituray iti daga.’” Kasapulan dagiti Estudiante ti Biblia ti kinatured tapno ipakaammoda dayta a mensahe kadagiti tattao.

Idi agangay, imbaga ti maysa nga artikulo iti The Watch Tower a “ti kombension idiay Columbus pinabilegna ti pammati . . . daytoy a naregta a grupo dagiti kakabsat. Dayta ti mangpatured kadakuada a mangasaba uray no adda ibubusor.” Malagip ni Leo Claus, a maysa kadagiti immatender iti kombension: “Kalpasan ti kombension, magagarankamin a mangiranud iti dayta a mensahe iti teritoriami.”

Idi Oktubre, rinugian dagiti Estudiante ti Biblia ti agiwaras iti minilion a kopia ti tract nga Ecclesiastics Indicted, ti nayimprenta a bersion ti palawag ni Brother Rutherford a maikontra kadagiti lider ti relihion. Iti bassit nga ili ti Cleveland, Oklahoma, nagiwaras ni Frank Johnson kadagiti kasta a tract. Ngem nasapa a nalpas, isu a masapul nga aguray pay iti 20 a minuto sakbay a dagasen ti dadduma pay a kakabsat a kakaduana. Ngem saan a mabalin nga aguray lattan sadiay. Ngamin, birbiroken isuna dagiti makapungtot a tattao gapu iti panangasabana. Napan naglemmeng ni Brother Johnson iti asideg a simbaan. Awan ti tattao, isu a nangidisso iti kopia dayta a tract iti Biblia ti pastor ken iti tunggal tugaw sa pinaspasannan ti pimmanaw. Adda pay orasna, isu a napan iti dua pay a simbaan, ket kasta met laeng ti inaramidna.

Kalpasanna, nagdardaras a napan ni Frank iti pangdagasan kenkuana dagiti kakabsat. Naglemmeng iti likud ti gasolinaan, ken sinipsiputanna dagiti lallaki a mangbirbirok kenkuana. Limmabasda, ngem saanda a nakita isuna. Idi nakapanawdan, simmangpet met laengen dagiti mangdagas kenkuana a kakabsat a mangaskasaba laeng gayam iti asideg.

“Idi pumampanawkamin iti dayta nga ili,” inyestoria ti maysa a brother, “nalabsanmi ti tallo a simbaan. Iti sango dagita a simbaan, adda agarup 50 a tattao a nakatakder. Dadduma ti mangbasbasa iti tract, adda met dagiti mangingatngato iti dayta tapno makita ti pastorda. Imbag laengen ta nakapanawkami a dagus! Agyamyamankami ken Jehova a Dios ta prinotektarannakami ken insurona ti aramidenmi tapno maikasabami ti mensahena a saankami a matiliw.”

Dagiti Estudiante ti Biblia ket situtured met a nangasaba iti sabali a pagilian. Iti makin-amianan a France, kinasabaan ni Józef Krett dagiti minero a taga-Poland. Nakaeskediul nga agpalawag iti napauluan, “Asidegen ti Panagungar Dagiti Natay.” Idi inwarasda dagiti imbitasion kadagiti umili, pinakdaaran ti padi ti parokia a saanda nga umatender. Ngem sabali ti napasamak. Nasurok a 5,000 ti immatender iti palawagna, agraman ti padi! Inawis ni Brother Krett ti padi nga idepensana ti patpatienna, ngem nagkedked. Naipaima ni Brother Krett ti amin a publikasion a tugotna. Nadlawna a mawaw dagiti tattao iti Sao ti Dios.—Amos 8:11.

Idiay Africa, inkasaba ni Claude Brown ti naimbag a damag iti Gold Coast, a pagaammo itan kas Ghana. Adu ti nakangngeg iti kinapudno gapu kadagiti adu a palawag ken publikasion nga impaimana iti adu a tattao. Ni John Blankson  nga ages-eskuela idi tapno agbalin a pharmacist, ket nakaatender iti maysa kadagiti palawag ni Brother Brown. Dagus a naamirisna a nasarakannan ti kinapudno. “Permi ti ragsakko idi naammuak ti kinapudno,” nalagip ni John, “ket imbagak dayta iti adu a tattao idiay eskuelaanmi.”

Naammuan ni John a saan nga isursuro ti Biblia ti Trinidad, isu a maysa nga aldaw napan iti simbaan tapno damagenna iti padi maipapan iti dayta. Nakapungtot ti padi, sana imbugkaw: “Saanka a Kristiano; diabloka. Pumanawka ditoy!”

Idi nakaawiden ni John, sinuratanna ti padi ken inawisna nga agkitada iti publiko tapno pagsaritaanda ti maipapan iti Trinidad. Ngem imbaga ti padi ken John a mapan iti opisina ti principal lecturer ti eskuelaanda. Insaludsod dayta a lecturer ken John no talaga a sinuratanna ti padi.

“Wen, Sir,” kuna ni John.

Imbaga ti principal lecturer nga agsurat ni John iti padi tapno agpadispensar. Isu a nagsurat ni John:

“Sir, imbaga ti propesorko a suratankayo tapno agpadispensarak. Ngem aramidek la dayta no aminenyo a saan a husto dagiti isursuroyo.”

Nakigtot ti lecturer sana insaludsod, “Blankson, talaga kadi a dayta ti isuratmo?”

“Wen, Sir. Talaga a dayta ti kayatko nga isurat.”

“Ma-dismiss-ka no kasta ti isuratmo. Saanmo a mabalin ti ageskuela ditoy no kontrakontraem ti padi a supsuportaran ti gobierno!”

“Ngem, Sir, . . . saan kadi a no mangisursurokayo ket adda dimi naawatan, natural laeng nga agsaludsodkami kadakayo maipapan iti dayta?”

“Wen a, siempre.”

“Sir, kasla kasta laeng ti napasamak. Idi isursuronakami ti padi maipapan iti Biblia, nagsaludsodak. Ngem saanna a nasungbatan ti saludsodko. Isu nga apay koma nga agsuratak tapno agpadispensarak kenkuana?”

Saan a na-dismiss ni Blankson. Ket saan met a nagsurat tapno agpadispensar.

Maipapan kadagiti napasamak iti dayta a tawen, imbaga ti The Watch Tower: “Talaga a maibagami met ti imbaga ni David: ‘Papigsaennak a makigubat.’ (Sal. 18:39) Makapabileg unay dayta a tawen. Nakitami no kasano a tinulongannakami ni Jehova a mangaramid iti trabahona . . . Nakaragragsak dagiti matalek nga adipenna . . . a mangikaskasaba iti naimbag a damag.”

Iti maudi a paset dayta a tawen, implano dagiti kakabsat ti mangibangon iti maysa pay nga estasion ti radio. Naaramid dayta iti asideg ti Chicago. Naawagan dayta nga estasion iti WORD nga addaan iti 5,000-watt a transmitter. Napigpigsa ti transmitter ti WORD isu nga ad-adu a tattao ti nakangngeg iti mensahe ti Pagarian iti adayo a luglugar, a pakairamanan ti amianan ti Canada.

Idi 1925, tinulongan ni Jehova dagiti kakabsat a mangtarus iti makapagagar a baro nga impormasion maipapan iti Apocalipsis kapitulo 12. Gapu iti dayta a baro a lawag, nagsardeng ti dadduma nga agserbi ken Jehova. Ngem adu ti naragsak ta naawatanda no ania ti mapaspasamak idiay langit ken no kasano nga ap-apektaran dayta ti ili ti Dios ditoy daga.