1-2. Ania ti napasamak bayat a magmagna ti dua nga adalan ni Jesus nga agpa-Emmaus?

 IDI Nisan 16, 33 C.E., permi ti liday ken buteng dagiti adalan ni Jesus. Dua kadakuada ti pimmanaw iti Jerusalem sa napanda idiay Emmaus, maysa a purok nga agarup 11 a kilometro (7 a milia) manipud iti Jerusalem. Nakalidliday dagitoy nga adalan ta naammuanda a napapatay ni Jesus. Nangnamnamada nga adu ti nagsasayaat nga aramiden ti Mesias para kadagiti Judio. Ngem ita, natayen. Nupay kasta, adda nakaskasdaaw a napasamak.

² Adda lalaki a saanda nga am-ammo nga immasideg ken nakipagna kadakuada. Inyestoriada kenkuana a maup-upayda iti napasamak ken Jesus. Idi kuan, adda imbaga ti lalaki a didanto pulos malipatan. Inlawlawagna “manipud kadagiti insurat ni Moises ken ti amin a Propeta” no apay a masapul nga agsagaba ken matay ti Mesias. Idi agangay, nakadanon dagitoy a tallo a lalaki idiay Emmaus. Nailasinda a ti dida am-ammo a lalaki ket ti napagungaren a ni Jesus! Nakaragragsakda la ketdi a makaammo a sibibiagen ti Mesias!—Luc. 24:​13-35.

3-4. Ania ti napasamak kadagiti adalan ni Jesus, ken ania ti masursurotayo iti daytoy nga artikulo? (Aramid 1:3)

³ Iti maudi a 40 nga aldaw ni Jesus ditoy daga, namin-adu a nagparang kadagiti adalanna. (Basaen ti Aramid 1:3.) Pinaregta ni Jesus dagiti adalanna a maladladingitan ken mabutbuteng. Gapu iti dayta, nagbalinda a naragsak ken natured a  mangikasaba ken mangisuro iti naimbag a damag maipapan iti Pagarian. a

⁴ Adda masursurotayo iti panangadaltayo iti dayta a makapagagar a tiempo iti biag ni Jesus. Iti daytoy nga artikulo, kitaentayo no kasano nga inusar ni Jesus dayta a tiempo a (1) mangparegta kadagiti adalanna, (2) mangpauneg iti pannakaawatda iti Kasuratan, ken (3) mangsanay kadakuada para iti ad-adu pay a responsabilidad. Kitaentayo no kasanotayo a matulad ti ulidan ni Jesus iti tunggal maysa kadagita nga inaramidna.

MANGPAREGTA

5. Apay a kasapulan idi dagiti adalan ni Jesus ti pammaregta?

⁵ Kasapulan idi dagiti adalan ni Jesus ti pammaregta. Apay? Dadduma ngamin kadakuada ti nangpanaw kadagiti balbalay, pamilia, ken negosioda tapno kanayon a makaduada ni Jesus. (Mat. 19:27) Adda met dagiti saan a nasayaat ti pannakatratoda gapu ta nagbalinda nga adalanna. (Juan 9:22) Inaramidda dagitoy a sakripisio ta patienda a ni Jesus ti naikari a Mesias. (Mat. 16:16) Ngem idi napapatayen ni Jesus, permi ti lidayda ken kimmapuy ti pakinakemda. Ngamin, impagarupda a natungdayen ti namnamaenda.

6. Ania ti inaramid ni Jesus idi napagungaren?

⁶ Ammo ni Jesus a nagladingit dagiti adalanna, saan a gapu ta nakapuy ti pammatida, no di ket gapu ta ammona a gagangay laeng ti agladingit ta natayanda. Isu nga iti mismo nga aldaw a napagungar, rinugiannan a paregtaen dagiti gagayyemna. Kas pagarigan, nagparang ken Maria Magdalena bayat nga agsangsangit iti nakaitanemanna. (Juan 20:​11, 16) Nagparang met iti dua nga adalan a nadakamat iti rugrugi daytoy nga artikulo. Kalpasanna, nagparang ken apostol Pedro. (Luc. 24:34) Ania ti masursurotayo iti ulidan ni Jesus? Kitaentayo ti napasamak bayat ti umuna a panagparangna.

7. Sigun iti Juan 20:​11-16, ania ti nakita ni Jesus nga ar-aramiden ni Maria iti bigbigat ti Nisan 16, ken ania ti inaramid ni Jesus kenkuana? (Kitaen met ti ladawan.)

⁷ Basaen ti Juan 20:​11-16. Iti bigbigat ti Nisan 16, adda dagiti matalek a babbai a napan iti tanem ni Jesus. (Luc. 24:​1, 10) Kitaentayo  ti kapadasan ti maysa kadakuada, ni Maria Magdalena. Idi nakadanonen ni Maria iti tanem, nakitana nga awanen sadiay ti bangkay. Isu a nagtartaray a napan kada Pedro ken Juan tapno ipadamagna. Simmurot met la kadakuada a napan iti tanem. Idi napaneknekanen da Pedro ken Juan nga awanen sadiay ti bangkay, nagawiddan. Ngem nagbati ni Maria nga agsangsangit. Saanna nga ammo a kitkitaen isuna ni Jesus. Nakitana ti panagsangit daytoy a matalek a babai ket kayatna a liwliwaen. Isu a nagparang ken Maria, ket adda inaramidna a simple ngem makaparegta unay. Nakisarita kenkuana ken inikkanna iti nagpateg nga annongen—imbagana nga ipakaammona kadagiti kakabsatna ti maipapan iti panagungarna.—Juan 20:​17, 18.

8. Kasanotayo a matulad ni Jesus?

⁸ Kasanotayo a matulad ni Jesus? Matuladtayo ni Jesus no paregtaentayo dagiti kakabsat nga agtultuloyda nga agserbi ken Jehova. Kas ken Jesus, masapul a makipagriknatayo kadakuada, tarusantayo ti marikriknada, ken liwliwaentayo ida. Kitaentayo ti kapadasan ti sister a ni Jocelyn, a natay ti kabsatna a babai gapu iti nakaro nga aksidente. “Adu a bulan a kas man la malmalmesak iti liday,” imbagana. Ngem adda agassawa a kabsat a nangawis kenkuana iti balayda. Dimngegda a naimbag ken impasiguradoda kenkuana nga ay-ayaten isuna ni Jehova. Imbaga ni Jocelyn: “Desperadoak idin ken mariknak a kas man la malmalmesak iti maysa a nadawel a baybay. Ngem inusar ni Jehova dagitoy a kakabsat a mangalaw kaniak.” Maparegtatayo met ti dadduma no bay-antayo laeng ida a mangyebkas iti rikriknada ken dumngegtayo a naimbag iti ibagbagada. Iti kasta, maliwliwa ken matulongantayo ida nga agtultuloy nga agserbi ken Jehova.—Roma 12:15.

TULONGAN TI DADDUMA A MANGTARUS ITI SAO TI DIOS

9. Ania ti saan idi a naawatan dagiti adalan ni Jesus, ken ania ti inaramid ni Jesus tapno matulonganna ida?

⁹ Namati dagiti adalan ni Jesus iti Sao ti Dios ken inkagumaanda nga inyaplikar dayta iti biagda. (Juan 17:6) Ngem saanda a naawatan no apay a natay ni Jesus kas kriminal. Ammo ni Jesus a dagiti adalan ket mamati ken ay-ayatenda ni Jehova. Ngem nabigbigna nga agkurang pay ti pannakaawatda iti Kasuratan. (Luc. 9:​44, 45; Juan 20:9) Isu a sinuruanna ida a mangtarus iti Kasuratan. Kitaentayo ti inaramidna idi nagparang iti dua nga adalan iti dalan nga agpa-Emmaus.

10. Ania ti inaramid ni Jesus tapno makombinsirna dagiti adalanna nga isu a talaga ti Mesias? (Luc. 24:​18-27)

¹⁰ Basaen ti Lucas 24:​18-27. Kitaem ta saan a dagus nga inyam-ammo ni Jesus ti bagina iti dua nga adalan. Imbes ketdi, nagsaludsod kadakuada. Apay? Posible a kayatna nga iyebkasda ti pampanunoten ken marikriknada. Ket kasta ti inaramidda. Imbagada kenkuana nga ekspektarenda a ni Jesus ti agbalinto nga ari ti Israel ken mangituray kadakuada, imbes a dagiti Romano. Binay-an ni Jesus nga iyebkasda ti marikriknada. Kalpasanna, inusarna ti Kasuratan a tumulong kadakuada a mangtarus kadagiti napasamak. b Karabiyanna, nagparang manen iti dadduma pay nga adalan ken inlawlawagna kadakuada ti kaipapanan dagita a kinapudno. (Luc. 24:​33-48) Ania ti masursurotayo iti daytoy a salaysay?

11-12. (a) Ania ti masursurotayo iti pamay-an ni Jesus a mangisuro kadagiti kinapudno iti Biblia? (Kitaen met dagiti ladawan.) (b) Kasano a ni Nortey ket tinulongan ti mangyad-adal kenkuana iti Biblia?

¹¹ Kasanotayo a matulad ni Jesus? Umuna, no isursurotayo dagiti iyad-adalantayo iti  Biblia, agusartayo kadagiti nataktika a saludsod a mangaon iti adda iti isip ken pusoda. (Prov. 20:5) No naawatantayon ti marikriknada, isurotayo kadakuada no kasano ti agbirok kadagiti teksto a makatulong iti situasionda. Saantayo nga ibagbaga no ania ti aramidenda. Imbes ketdi, tulongantay la ida a mangtarus iti ibagbaga ti Biblia ken mangpanunot no kasanoda nga iyaplikar dagiti prinsipio ti Biblia iti biagda. Kitaentayo ti kapadasan ti brother a ni Nortey a taga-Ghana.

¹² Nangrugi a nakipagadal iti Biblia ni Nortey idi agtawen iti 16. Ngem di nagbayag, binusor ti pamiliana. Ania ti nakatulong kenkuana nga agtultuloy? Ti kabsat a mangyad-adal kenkuana iti Biblia inlawlawagna ti Mateo kapitulo 10 ken impakitana a maidadanes dagiti pudno a Kristiano. “Idi naidadanesakon,” kuna ni Nortey, “kombinsidoak a nabirokakon ti kinapudno.” Impakita met kenkuana ti kabsat ti ibagbaga ti Mateo 10:16 a masapul nga agannadtayo. Kalpasanna, nagsaritaanda no kasano a makatulong dayta a teksto ken Nortey a mangilawlawag iti patpatienna kadagiti kapamiliana iti nadayaw a pamay-an. Idi nabautisaranen ni Nortey, kayatnan ti agpayunir. Ngem ti kayat ni tatangna ket ageskuela isuna iti unibersidad. Saan nga imbaga ti mangyad-adal kenkuana ti masapul nga aramiden ni Nortey. Imbes ketdi, nagusar kadagiti saludsod a tumulong kenkuana a mangpanunot kadagiti prinsipio ti Biblia tapno makaaramid iti umiso a desision. Ti resultana? Nagdesision ni Nortey nga ag-regular pioneer. Gapu iti dayta, pinapanaw ni tatangna. Ania ti narikna ni Nortey kadagita a napasamak? Imbagana: “Kombinsidoak a husto ti desisionko.” No paregtaentayo met ti dadduma a mangutob iti Kasuratan, matulongantayo ida a mangpabileg iti pammatida tapno maitultuloyda ti agserbi ken Jehova.—Efe. 3:​16-19.

MANGSANAY KADAGITI BROTHER NGA AGBALIN A “LALLAKI A KAS SAGUT”

13. Ania ti inaramid ni Jesus tapno masiguradona nga agtultuloy ti ipatpatrabaho ti Amana? (Efeso 4:8)

¹³ Idi adda ni Jesus ditoy daga, perpekto nga inaramidna ti ipatpatrabaho kenkuana ti Amana. (Juan 17:4) Ngem saan a pulos a pinanunot ni Jesus, ‘Siak lattan ti mangaramid tapno mayat ti taray ti bambanag.’ Bayat ti tallo ket kagudua a tawen a panagministeriona, sinanayna ti dadduma iti dayta a trabaho. Nagtalek ni Jesus kadagiti adalanna.  Inikkanna ida iti responsabilidad a mangikasaba ken mangisuro iti naimbag a damag ken mangaywan kadagiti nagpapateg a karnero ni Jehova. Dadduma nga adalan a nangidaulo iti daytoy a trabaho ket posible nga awan pay 30 ti tawenda. (Basaen ti Efeso 4:8.) Sigagaget a nakipagtrabaho dagita a lallaki ken Jesus ken nagtalinaedda a matalek kenkuana. Ngem sakbay a mapan ni Jesus idiay langit, ad-adda pay a sinanayna ida tapno agbalin dagita a “lallaki a kas sagut.” Kasanona a sinanay ida?—Kitaen ti study note iti Ephesians 4:8.

14. Kasano a tinulongan ni Jesus dagiti adalanna a rumang-ay iti naespirituan bayat ti maudi a 40 nga aldawna ditoy daga? (Kitaen met ti ladawan.)

¹⁴ Binalakadan ni Jesus dagiti adalanna iti prangka ngem naayat a pamay-an. Kas pagarigan, nakitana nga adda tendensia ti dadduma kadakuada nga agduadua isu a binalakadanna ida. (Luc. 24:​25-27; Juan 20:27) Imbagana met kadakuada nga iyun-unada ti panangaywan kadagiti adipen ni Jehova imbes a kadagiti panggedanda. (Juan 21:15) Impalagipna kadakuada a saanda nga ikomkompara ti maar-aramidanda iti maar-aramidan ti dadduma iti panagserbi ken Jehova. (Juan 21:​20-22) Ken kinorehirna ti dadduma a kamali a kapanunotanda maipapan iti Pagarian ken tinulonganna ida nga agpokus iti pannakaikasaba ti naimbag a damag. (Ara. 1:​6-8) Ania ti masursuro dagiti panglakayen ken Jesus?

15-16. (a) Kasano a matulad dagiti panglakayen ni Jesus? Ilawlawag. (b) Kasano a nagunggonaan ni Patrick iti balakad?

¹⁵ Kasano a matulad dagiti panglakayen ni Jesus? Masapul a sanayenda dagiti brother, uray dagiti agtutubo pay, a mangibaklay iti ad-adu pay a responsabilidad. c Maawatan dagiti panglakayen nga adu pay ti masapul a sursuruen dagiti sansanayenda. Masapul nga ipaayanda ida iti naayat a balakad tapno makasursuroda ken makitada ti kinapateg ti panagbalin a napakumbaba, matalek, ken situtulok nga agserbi iti dadduma.—1 Tim. 3:1; 2 Tim. 2:2; 1 Ped. 5:5.

¹⁶ Kitaentayo no kasano a nagunggonaan iti balakad ti brother a ni Patrick. Idi agtutubo pay, nasakit ti panagsasaona ken awan konsiderasionna,  uray kadagiti sister. Nadlaw ti maysa a panglakayen a kasapulan ni Patrick ti agbalbaliw, isu a sipaprangka a binalakadanna ngem iti naayat a pamay-an. “Imbag laengen ta binalakadannak,” kuna ni Patrick. “Umapalak idi iti dadduma a brother no makaawatda kadagiti pribilehio a kayatko. Ngem gapu iti balakad ti panglakayen, nasursurok ti kinapateg ti kinapakumbaba ken panangipakita iti ayat kadagiti kakabsat, imbes nga agpokusak iti pananggaw-at kadagiti pribilehio.” Kas resultana, naapointaran ni Patrick kas panglakayen idi 23 ti tawenna.—Prov. 27:9.

17. Kasano nga impakita ni Jesus nga agtalek kadagiti adalanna?

¹⁷ Saan laeng a panangasaba no di ket panangisuro pay ti impabaklay ni Jesus a responsabilidad kadagiti adalanna. (Kitaen ti study note a “teaching them” iti Matthew 28:20.) Mabalin a narikna idi dagiti adalan a saanda a maikari iti dayta a responsabilidad. Ngem nagtalek ni Jesus a kabaelanda dayta. Sigurado isuna ta imbagana kadakuada: “No kasano nga imbaonnak ti Ama, ibaonkayo met.”—Juan 20:21.

18. Kasano a matulad dagiti panglakayen ni Jesus?

¹⁸ Kasano a matulad dagiti panglakayen ni Jesus? Dagiti eksperiensiado a panglakayen itedda ti dadduma a responsabilidadda kadagiti sansanayenda. (Fil. 2:​19-22) Kas pagarigan, mabalin nga iraman dagiti panglakayen dagiti agtutubo iti panagdalus ken panangmantener iti Kingdom Hall. Mabalin a mangted dagiti panglakayen iti trabaho iti maysa a brother. Isuroda no kasanona nga aramiden dayta ken agtalekda a maaramidna dayta. Agyamyaman ti kabbaro a panglakayen a ni Matthew gapu ta sinanay isuna dagiti eksperiensiado a panglakayen a mangaramid iti nagduduma a trabaho iti kongregasion, ken agtalekda a kayana dagita. Imbagana, “Impariknada kaniak a natural laeng nga agkamaliak ta agdadamoak pay laeng. Ngem tinulongandak met a makasursuro kadagita a kamalik tapno nasaysayaatton ti maaramidak inton sumaruno.” d

19. Ania ti masapul a determinasiontayo?

¹⁹ Inusar ni Jesus ti maudi a 40 nga aldawna ditoy daga a mangparegta, mangisuro, ken mangsanay iti dadduma. Determinadotayo koma a mangtulad a naimbag iti ulidanna. (1 Ped. 2:21) Sigurado a tulongannatayo ta inkarina: “Addaak kadakayo iti amin nga al-aldaw agingga iti panungpalan daytoy a sistema ti bambanag.”—Mat. 28:20.