1. Ania ti dadduma kadagiti sagut a naawattayo manipud ken Jesus?

 AWAN ti tao a naparparabur ngem ni Jesus. Idi adda ditoy daga, masansan nga inusarna ti pannakabalinna a tumulong iti dadduma. (Luc. 9:​12-17) Intedna ti biagna kas ti kapatgan a sagutna para kadatayo. (Juan 15:13) Manipud idi napagungar, intultuloyna ti kinaparaburna. Kas iti inkarina, kiniddawna ken Jehova nga ikkannatayo iti nasantuan nga espiritu a mangisuro ken mangliwliwa kadatayo. (Juan 14:​16, 17, ftn.; 16:13) Kadagiti gimong iti kongregasion, agtultuloy nga ipapaay ni Jesus dagiti kasapulantayo tapno makaaramidtayo kadagiti adalan iti intero a lubong.—Mat. 28:​18-20.

2. Siasino dagiti karaman kadagiti “lallaki a kas sagut” a nadakamat iti Efeso 4:​7, 8?

² Adda pay dagiti insagut ni Jesus kadatayo. Insurat ni apostol Pablo nga idi immulin ni Jesus idiay langit, “nangted kadagiti lallaki a kas sagut.” (Basaen ti Efeso 4:​7, 8.) Inlawlawag ni Pablo nga inted ni Jesus dagita a sagut tapno tulonganda ti kongregasion iti nadumaduma a pamay-an. (Efe. 1:​22, 23; 4:​11-13) Ita, karaman kadagita a “lallaki a kas sagut” dagiti ministerial nga adipen, panglakayen, ken manangaywan iti sirkito. a Siempre, imperpekto dagita a lallaki isu nga agkamalida. (Sant. 3:2) Ngem us-usaren ida ni Apo Jesu-Kristo a tumulong kadatayo. Sagutna ida para kadatayo.

3. Mangted iti pagarigan no kasanotayo amin a makatulong iti trabaho dagiti “lallaki a kas sagut.”

³ Inikkan ni Jesus dagita a “lallaki a kas sagut” iti annongen a mangpabileg iti kongregasion. (Efe. 4:12) Ngem adda  maaramidantayo amin tapno matulongantayo ida a mangibaklay iti dayta a napateg a responsabilidad. Mabalintayo nga iyarig dayta iti panagibangon iti Kingdom Hall. Adda dagiti aktual a makiramraman iti panagibangon. Adda met dagidiay tumultulong iti dayta a trabaho babaen ti panangipaayda iti makan, pagluganan, ken dadduma pay a kasapulan. Umasping iti dayta, makatulongtayo amin kadagiti ministerial nga adipen, panglakayen, ken manangaywan iti sirkito iti panangpabilegda iti kongregasion babaen kadagiti ibagbaga ken ar-aramidentayo. Kitaentayo no kasanotayo a magunggonaan iti panagbannogda. Ammuentayo met no kasanotayo a maipakita kadakuada nga ap-apresiarentayo ida ken ni Jesus, a nangipaay kadakuada “kas sagut” kadatayo.

DAGITI MINISTERIAL NGA ADIPEN A “TUMULTULONG ITI SABSABALI”

4. Idi umuna a siglo, ania ti dadduma nga inaramid dagiti ministerial nga adipen tapno ‘matulonganda ti sabsabali’?

⁴ Idi umuna a siglo, adda dagiti kakabsat a lallaki a nadutokan kas ministerial nga adipen. (1 Tim. 3:8) Agparang nga isuda ti tinukoy ni Pablo iti 1 Corinto 12:28 a “tumultulong iti sabsabali.” Posible ngarud nga isuda ti nangaramid iti dadduma a napateg a trabaho tapno makapagpokus dagiti panglakayen iti panangisuro ken panangipastor. Kas pagarigan, posible a timmulong dagiti ministerial nga adipen iti panagaramid kadagiti kopia ti Kasuratan wenno iti panaggatang kadagiti materiales a nausar iti panagkopia kadagita.

5. Ania ti dadduma nga ar-aramiden dagiti ministerial nga adipen ita tapno matulonganda ti sabsabali?

⁵ Kitaentayo ti dadduma a napateg nga ar-aramiden dagiti ministerial nga adipen a makatulong iti kongregasionyo. (1 Ped. 4:10) Mabalin a maikkan ti dadduma kadakuada iti annongen a mangasikaso iti accounts ti kongregasion, rekord dagiti teritoria, wenno iti panagorder kadagiti publikasion nga usaren dagiti kakabsat. Adda met dagiti ag-operate iti audio ken video, agserbi kas attendant, wenno tumulong iti panangmantener iti Kingdom Hall. Napateg amin dagita tapno agbalin nga organisado ti kongregasion. (1 Cor. 14:40) Malaksid kadagita, agpaspaset met ti dadduma kadakuada iti Gimong a Panagbiag ken Ministerio ken mangipaay iti palawag publiko. Mabalin a maapointaran met ti maysa a ministerial nga adipen kas assistant ti manangaywan iti grupo. No dadduma, adda dagiti kualipikado a ministerial nga adipen nga ikuyog dagiti panglakayen iti panag-shepherding-da.

6. Ania ti dadduma a rason nga ap-apresiarentayo dagiti nagaget a ministerial nga adipen?

⁶ Ania ti ibagbaga ti dadduma nga ar-aramiden dagiti ministerial nga adipen a pagsayaatan ti kongregasion? “Apresiarek dagiti ministerial nga adipen iti kongregasionmi ta maen-enjoy-ko dagiti gimong,” kuna ti taga-Bolivia a sister a ni Beberly. b “Gapu iti panangasikasoda iti annongenda, makakantaak, makakomentoak, makadengngegak kadagiti palawag, ken makasursuroak kadagiti video ken artwork. Sigsiguraduenda a protektado dagiti makigimong ken adda videoconference para kadagiti saan a makagimong iti in-person. Kalpasan ti gimong, tumulongda iti panagdalus, panangasikaso iti accounts, ken sigsiguraduenda nga adda dagiti mausarmi a publikasion. Agyamyamanak kadakuada!” Kastoy met ti imbaga ni Leslie nga asawa ti maysa a panglakayen a taga-Colombia: “Kasapulan unay ni lakayko ti tulong dagiti ministerial nga adipen. No awanda, lallalo manen a nabis-busy isuna, isu nga agyamyamanak iti kinaregta ken iti kinatulokda a tumulong.” Awan duadua a kasta met ti marikriknam.—1 Tim. 3:13.

7. Kasanotayo a maipakita nga ap-apresiarentayo dagiti ministerial nga adipen? (Kitaen met ti ladawan.)

 ⁷ Mabalin nga iti panagriknatayo ket ap-apresiarentayo dagiti ministerial nga adipen. Ngem iparparegta ti Biblia: “Ipakitayo a managyamankayo.” (Col. 3:15) Ni Krzysztof ket maysa a panglakayen a taga-Finland. Kastoy ti panangipakitana iti panagyamanna kadagiti ministerial nga adipen: “Mangipatulodak iti kard wenno teksak ida, mangdakamatak iti teksto, ken espesipiko nga isuratko ti imbaga wenno inaramidda a nakaparegtaak, wenno no apay nga ap-apresiarek dagiti ar-aramidenda.” Dagiti ministerial nga adipen ket masansan met nga ikararagan ti agassawa a da Pascal ken Jael a taga-New Caledonia. Imbaga ni Pascal, “Itay nabiit pay, dagiti ministerial nga adipen iti kongregasionmi ket iramramanmi kadagiti panagpakaasi, araraw, ken panagyamanmi.” Dengdenggen ni Jehova dagita a kararag, ket magunggonaan ti intero a kongregasion.—2 Cor. 1:11.

DAGITI PANGLAKAYEN NGA “AGBAMBANNOG PARA KADAKAYO”

8. Apay a naibaga ni Pablo nga “agbambannog” dagiti padana a panglakayen idi umuna a siglo? (1 Tesalonica 5:​12, 13)

⁸ “Agbambannog” dagiti panglakayen idi umuna a siglo para iti kongregasion. (Basaen ti 1 Tesalonica 5:​12, 13; 1 Tim. 5:17) Isuda ti “mangidadaulo” iti kongregasion—mangidadauloda kadagiti gimong ken mangar-aramidda kadagiti desision kas bagi dagiti panglakayen. Mangmangtedda iti espesipiko ngem naayat a ‘balakad’ kadagiti kakabsat tapno masalakniban ti kongregasion. (1 Tes. 2:​11, 12; 2 Tim. 4:2) Siempre, agbambannogda met tapno maipaayda dagiti kasapulan ti pamiliada ken tapno agtalinaed a nabileg ti espiritualidadda.—1 Tim. 3:​2, 4; Tito 1:​6-9.

9. Ania ti dadduma a responsabilidad dagiti panglakayen ita?

⁹ Nagadu ti responsabilidad dagiti panglakayen ita. Ebanghelisadorda. (2 Tim. 4:5) Naregtada a mangidaulo iti ministerio, mangyurnos iti panangasaba iti teritoria ti kongregasionda, ken sansanayendatayo tapno agbalintayo nga epektibo iti panangasaba ken panangisuro. Agserbida met kas naasi ken patas nga ukom. No adda kabsat a nakaaramid iti nadagsen a basol, ikagumaanda a tulongan a mangisubli iti relasionna ken Jehova. Ngem sigsiguraduenda nga agtalinaed a nadalus ti kongregasion. (1 Cor. 5:​12, 13; Gal. 6:1) Kangrunaanna, dagiti panglakayen ket papastor. (1 Ped. 5:​1-3) Ikagkagumaanda ti mangipaay kadagiti naibatay iti Biblia a palawag a naisagana a naimbag, am-ammuenda ti tunggal kakabsat iti kongregasion, ken ag-shepherding-da. Adda met dagiti panglakayen a tumultulong iti panangibangon ken panangmantener kadagiti Kingdom Hall, panangorganisar iti kombension, ken iti trabaho dagiti Hospital Liaison Committee ken Patient Visitation Group, malaksid iti dadduma pay a trabahoda. Talaga nga agbambannog dagiti panglakayen para kadatayo!

10. Ania ti dadduma a rason nga ap-apresiarentayo dagiti nagagaget a panglakayentayo?

¹⁰ Impakpakauna ni Jehova nga aywanandatayo a naimbag dagiti papastor ken ‘saantayton nga agbuteng wenno agamak.’ (Jer. 23:4) Napaneknekan dayta ti sister a taga-Finland a ni Johanna idi nagsakit iti nakaro ni nanangna. Imbagana: “Marigatanak idi a mangibaga iti problemak iti dadduma. Ngem adda panglakayen a diak unay am-ammo a nakaan-anus kaniak. Inkararagannak ken impasiguradona nga ay-ayatennak ni Jehova. Diak malagip ti eksakto nga imbagana ngem ti malagipko ket kimmalma ti riknak. Kombinsidoak nga imbaon isuna ni Jehova a tumulong kaniak iti oras a kasapulak unay dayta.” Sika ngay, kasanodaka metten a tinulongan dagiti panglakayen iti kongregasionyo?

11. Kasanotayo a maipakita nga ap-apresiarentayo dagiti panglakayen? (Kitaen met ti ladawan.)

 ¹¹ Kayat ni Jehova nga ipakitatayo ti naimpusuan nga apresasiontayo kadagiti panglakayen “gapu iti trabahoda.” (1 Tes. 5:​12, 13) Imbaga ni Henrietta a taga-Finland met laeng: “Situtulok dagiti panglakayen a tumulong iti dadduma. Ngem saan a kayat a sawen dayta nga ad-adu ti tiempo ken pigsada ngem iti dadduma wenno awan ti problemada. No dadduma, ibagbagak kadakuada, ‘Ammom? Nagsayaatka a panglakayen. Kayatko a maammuam dayta.’” Imbaga ti taga-Türkiye c a sister a ni Sera: “Kasapulan dagiti panglakayen ti pammaregta tapno maitultuloyda nga aramiden dagiti trabahoda. Mabalintayo nga ikkan ida iti card, awisen ida iti pannangan, wenno makikadua kadakuada iti ministerio.” Adda kadi am-ammom a panglakayen nga ap-apresiarem gapu kadagiti ar-aramidenna para iti kongregasion? Mangpanunotka kadagiti gundaway a mangyebkas iti apresasionmo.—1 Cor. 16:18.

DAGITI MANANGAYWAN ITI SIRKITO A MANGPABPABILEG ITI KONGREGASION

12. Siasino pay dagiti insagut ni Jesus kadagiti kongregasion idi umuna a siglo tapno mapabilegda? (1 Tesalonica 2:​7, 8)

¹² Adda pay inted ni Kristo Jesus a “lallaki a kas sagut” tapno matulongan idi ti kongregasion. Iti panangiwanwanna, dagiti panglakayen idiay Jerusalem imbaonda da Pablo, Bernabe, ken dadduma pay kas agdaldaliasat a manangaywan. (Ara. 11:22) Apay? Tapno paregtaenda dagiti kongregasion a kas met laeng iti ar-aramiden dagiti ministerial nga adipen ken panglakayen. (Ara. 15:​40, 41) Adu a sakripisio ti inaramid dagitoy a lallaki tapno maaramidda dayta a trabaho. Adda pay ketdi idi dagiti gundaway nga inrisgoda ti biagda tapno laeng maisuro ken maparegtada ti dadduma.—Basaen ti 1 Tesalonica 2:​7, 8.

13. Ania ti dadduma a responsabilidad dagiti manangaywan iti sirkito?

 ¹³ Kanayon nga agbibiahe dagiti manangaywan iti sirkito. Dadduma kadakuada ti agbiahe iti ginasut a kilometro tapno bisitaenda dagiti kongregasion. Kada lawas, adu a palawag ti iparang ti manangaywan iti sirkito, ag-shepherding, ikonduktana ti miting para kadagiti payunir, miting dagiti panglakayen, ken dagiti taripnong sakbay ti panangasaba. Agisagsagana kadagiti palawag ken or-organisarenna dagiti asamblea sirkito ken kombension. Agisursuro iti eskuelaan dagiti payunir, ken iyur-urnosna ti espesial a miting para kadagiti payunir iti sirkito. Malaksid kadagita, adda pay no dadduma dagiti kiddawen ti sanga nga opisina a masapul nga asikasuenna a dagus.

14. Ania ti dadduma a rason nga ap-apresiarentayo dagiti nagagaget a manangaywan iti sirkito?

¹⁴ Kasano a magunggonaan dagiti kongregasion kadagiti ar-aramiden dagiti manangaywan iti sirkito? Maipapan iti panagbisita dagiti agdaldaliasat a manangaywan, imbaga ti maysa a brother a taga-Türkiye: “Kada agbisitada, maparparegtaak nga ad-adda pay a tumulong kadagiti kakabsat. Nagadun ti naam-ammok a manangaywan iti sirkito. Ngem awan pay la a pulos ti nakariknaak a busy-da la unay wenno kasla narigatda a maas-asitgan.” Ni Johanna a nadakamat itay ket nakikadua iti maysa a manangaywan iti sirkito iti ministerio. Ngem awan ti nakasaritada. “Kaskasdi,” imbagana, “diakto pulos malipatan dayta nga aldaw. Kaak-akar idi dagiti kakabsatko iti sabali a lugar ket mail-iliwakon kadakuada. Naimpusuan a pinaregtanak ti manangaywan iti sirkito ken tinulongannak a mangkita a temporario laeng ti panagpipinnakada ita. Ngem inton baro a lubong, saantayto a maibusan iti gundaway nga agkakadua.” Adu kadatayo ti mangipatpateg kadagiti manangaywan iti sirkito gapu ta pinaregta ken tinulongandatayo.—Ara. 20:37–21:1.

15. (a) Sigun iti 3 Juan 5-8, kasanotayo a maipakita nga ap-apresiarentayo dagiti manangaywan iti sirkito? (Kitaen met ti ladawan.) (b) Apay a masapul a nakonsiderartayo iti assawa dagiti kakabsat nga agbambannog para iti kongregasion, ken kasanotayo nga ipakita dayta? (Kitaen ti kahon a “ Laglagipenyo Dagiti Assawada.”)

¹⁵ Pinaregta ni apostol Juan ni Gayo nga agbalin a managpadagus kadagiti kakabsat a  mangbisbisita idi kadagiti kongregasion. Kiniddawna pay a ‘parubbuatenna ida iti pamay-an a pakaragsakan ti Dios.’ (Basaen ti 3 Juan 5-8.) Ti maysa a pamay-an a maaramidtayo met dayta ket imbitarantayo ti manangaywan iti sirkito iti pannangan. Ti sabali pay a pamay-an ket suportarantayo dagiti urnos iti panagruar bayat ti panagbisitana. Ipakpakita ni Leslie, a nadakamat itay, ti panagyamanna iti dadduma pay a pamay-an. “Ikarkararagko ken Jehova nga itedna koma dagiti kasapulanda,” imbagana. “Namin-adu a sinuratanmi ida ken lakayko. Imbagami a nagdakkel ti naitulongda kadakami bayat ti panagbisitada.” Laglagipentayo a dagiti manangaywan iti sirkito ket tattao met laeng a kas kadatayo nga adda problemada ken mabambannogda. No dadduma, agsakit, madanagan, ken maupayda. Ngem ti makaparegta a sasaom wenno ti simple a regalom ti mabalin a sungbat iti kararag ti manangaywan iti sirkitoyo!—Prov. 12:25.

KASAPULANTAYO DAGITI “LALLAKI A KAS SAGUT”

16. Maitunos iti Proverbio 3:​27, ania dagiti mabalin nga isaludsod dagiti brother iti bagida?

¹⁶ Iti intero a lubong, kasapulantayo ti ad-adu pay a brother nga agserbi a “lallaki a kas sagut.” No maysaka a bautisado a brother, ‘kabaelam kadi ti tumulong’? (Basaen ti Proverbio 3:27.) Nakasaganaka kadi a mangragpat kadagiti kualipikasion tapno agbalinkanto a ministerial nga adipen? No maysakan a ministerial nga adipen, nakasaganaka kadin a mangragpat kadagiti kualipikasion tapno agbalinkanto a panglakayen? d Kabaelam kadi ti mangaramid kadagiti panagbalbaliw iti biagmo tapno makapagaplaykanto iti School for Kingdom Evangelizers? Matulongannaka dayta nga eskuelaan tapno ad-addanto pay a mausarnaka ni Jesus. No mariknam a saanka a kualipikado, ikararagmo dayta ken Jehova. Kiddawem nga ipaayna ti nasantuan nga espirituna tapno agballigika iti aniaman nga asaynment a maited kenka.—Luc. 11:13; Ara. 20:28.

17. Ania ti pampaneknekan dagiti “lallaki a kas sagut” maipapan iti Aritayo a ni Kristo Jesus?

¹⁷ Ti panagbannog dagiti inapointaran ni Jesus kas “lallaki a kas sagut” ket pammaneknek nga idadauluannatayo bayat iti daytoy maudi nga al-aldaw. (Mat. 28:20) Anian a yamantayo ta addaantayo iti naayat ken naparabur nga Ari a makaammo kadagiti kasapulantayo ken mangipapaay kadagiti kualipikado a brother a tumulong kadatayo! Mangpanunotka ngarud kadagiti gundaway a maipakitam ti apresasionmo kadagitoy a nagagaget a lallaki. Dimo met koma pulos liplipatan ti agyaman ken Jehova, ti Gubuayan ti “tunggal nasayaat ken perpekto a sagut.”—Sant. 1:17.